Aia Titiraki Taani Wareware . . .

E aera ngke e kamanena te naeta Tatan n taetae iai nakon Ewa?

▪ Ko bae ni boraoi n iango ma are e kabwarabwaraaki n iteraniba 8, bwa bon Tatan are e boutokaa te naeta bwa e na taetae nakon Ewa. Bon anne te reirei man te Baibara. Ma ko bae n titiraki ni kangai: ‘Bukin tera ngkai e taetae Tatan rinanon te naeta?’ E taekinaki n te Baibara bwa e kamanena te naeta te anera ae aki nonoraki aei bwa e na reitaki iai ma Ewa. E karaoa anne n te aro ae kaanga e bon taetae te naeta ai ngaia are e kairaki neiei bwa e na karitei nakon te Atua.

E kabwarabwaraaki n te Baibara ana bwai ni kamwane Tatan bwa ana “kunemwaan,” ao e ibuobuoki te bae riki aei ibukini kakoauaan anne. (I-Ebeto 6:11) E bon aki oteaki taekan te man are e taetae i Eten, ma bon te katoto ae kakamaaku teuana ibukin te bwai ni kamwane are e karaoaki ibukin atikan nanoia aomata mairoun te Atua. N te aro raa?

E rinerineia raoi konana Tatan. Bon te kabanea n ataei Ewa mai buakoni baike a karikaki ake a wanawana n te iuniweeti. N noran uarereken ana atatai Ewa, e a kamanena raoi te tai anne Tatan ni kamwanea ao ni burebureia. E nanowanawana ni karabaa buakakana ao kainikatongana Tatan ni kamanenaan te naeta ae te man are e taratara raoi ibukini kakororaoan nanona. (Karikani Bwaai 3:1) Iangoa naba te bwai are e kakororaoia ni kabonganaan te naeta bwa e na taetae.

Te moan, e rangi ni wanawana Tatan n atika ao n anaa nanon Ewa. E ataia neiei bwa a aki kona n taetae naeta ao e arani maan ni kabane buuna n ikotaki naba ma te naeta aei, tao imwini kamatebwaian aroia maan. (Karikani Bwaai 2:19) Akea te nanououa bwa e a tia Ewa ni matakuakina te man ae taratara raoi aei. Ngaia are e a kauekea kiriuriun nanon Ewa Tatan ao e a kairia bwa e na kaatuua iangoan te bwai ae tii teuana are katabuakaki iai mani bwaai nako n te onnaroka arei. Te kauoua, tera are e na reke n ana iango Ewa ngke e torokaran te naeta ni mwaangan te kai are e katabuaki? Tiaki bwa e na iangoia neiei bwa te man ae mangori ao n aki kona n taetae aei, e a tia ni kana uaan te kai anne ao ngaia are e a kona n taetae iai? Ngkana e rangi ni bati te bwai ae kona n riki mani kanakin te uaanikai anne iroun te naeta, tao tera ae na riki naba nakon neiei? Ti aki ataia raoi bwa tera ana iango Ewa ke tao e kana uaan te kai arei te naeta ke e aki, ma ti ataia are ngke e tuangaki iroun te naeta bwa te kai arei e na karikia bwa “kaanga te Atua,” ao e boni kakoauaa te kewe anne.

A bati baika kaotaraeaki n ana taeka Tatan ake e rinerinei. E karina te nanououa n ana iango Ewa ni bukina te Atua bwa e taua te bwai ae raoiroi ao akea riaina n tiatiana inaomatan Ewa. E boboto nakoraoin nanowanawanan Tatan i aon nanon Ewa n tangira riki karaoan oin nanona nakon tangiran te Atua, are e a tia n anganna bwaai ni kabane ake irouna. (Karikani Bwaai 3:4, 5) Te kananokawaki bwa e koro bukin ana iango, bwa a tuai ni karikirakea i nanoia te aeka n tangira anne ao te kakaitau are a riai n angan Iehova Ewa ao Atam. Tiaki bwa e karikirakea naba i nanora Tatan te aeka n iango are karaoan oin nanora ao iaiangoara i bon iroura ni boong aikai?

Ma tera are e kaira ana iango Tatan? Tera ae e uaiakinna? E kataia ni karabaa anuana ao ana iango i Eten. Ma imwin tabeua te tai, e a manga boni katerea i bon irouna. Ngke e kariria Iesu ao e kakoauaa raoi bwa e bon aki kona ni karabaa anuana. Ngaia are e a kaumaka Iesu ni kangai: “Katorobubua ni bobaraaki n taromauriai.” (Mataio 4:9) E teretere raoi bwa e a kamani kairaki Tatan ni bakantangina n taromaurian Iehova ae te Atua. E na karaoi bwaai ni kabane ibukin totokoan taromaurian te Atua. E tangirira bwa ti na katoka kakaonimakira ma te nano ae eti nakon te Atua.

E teretere raoi bwa e kaotaki n te Baibara bwa Tatan bon te tia kamwane ae tiritiri are e ukoukoriia te koraki ake e mamatania. E kakukurei bwa ti aki riai ni mwamwanaaki n aron Ewa “ngkai ti aki babanga n ana kunemwaan” Tatan.​—2 I-Korinto 2:11.