Riain Iehova N Tautaeka Ao Ana Tautaeka N Uea

“Iawe, am bai te kakanato, te korakora, te neboaki, te raneanea ma te mimitong . . . Iawe, bon am bai te tautaeka.”​—1 RONGORONGO 29:11, BK.

1. E aera ngkai e riai n riki Iehova bwa te tia Tautaeka ae Moan te Rietata i aon bwai ni kabane?

“E KATEIMATOA ana kaintokanuea Iehova i karawa; ao e uea i aoni bwaai ni kabane.” (Taian Areru 103:19) E kamanenai taeka aikai te tia areru ni kaota iai nibwan te tautaeka ni koaua. Ngkai bon te tia Karikiriki Iehova ae te Atua, boni ngaia ngkanne te tia Tautaeka ae Moan te Rietata i aon bwaai ni kabane.

2. E kanga Taniera ni kabwarabwaraa bannan ana tautaeka Iehova?

² Ngkana iai te tia tautaeka, e bae n iai aomata aika a na aantaeka irouna. N te moan tai, e tautaekania anera ni kabane Iehova ake e karikiia, ao e moanna ma Natina ae ana rikitemanna ao imwina anera aika rangi ni mwaiti. (I-Korote 1:15-17) Imwin te tai ae maan, e a nora bannan ana tautaeka Iehova i karawa te burabeti are Taniera. E taku: “I mataku ni karokoa kateani kaintokanuea, ao E tekateka temanna ae iai ma ngkoangkoa. . . . A bebeku tenga tenga i rouna, ao a tei i matana terebu terebu.” (Taniera 7:9, 10) E kairiri Iehova ae “temanna ae iai ma ngkoangkoa,” bwa te tia Tautaeka i nanon ririki aika rangi ni mwaiti, i aoia natina aika anera aika baireaki raoi n aia utu nako, ake “tabonibaina” aika kakaraoa nanona.​—Taian Areru 103:20, 21.

3. E kanga Iehova ni karakaanako ana tautaeka i aon te iuniweeti?

³ Imwina riki, e a manga karakaanako ana tautaeka Iehova ni karikan te iuniweeti ae rangi n totoakaei ae kangaanga karaoana, n ikotaki ma te aonnaba. (Iobi 38:4, 7) Ngkana e mataku temanna ni bwaini karawa aika baireaki raoi, e a taraa n aki kainnanoaki kairiraia ke tautaekanakiia. Ma e taku te tia areru: “E tua, [Iehova] ao a karaoaki. E kamatoai naba baikai n aki totoki: E karaoa te tua ae na aki mamauna.” (Taian Areru 148:5, 6) E waakina riaina n tautaeka Iehova n taai nako n arona ni kairiri, ni bairei tuua ao n tautaekana te mwakuri n te aba n taamnei i karawa ao te iuniweeti.​—Neemia 9:6.

4. E kanga Iehova ni waakina ana tautaeka i aoia aomata?

⁴ Ni karikaia te moan taanga, e waakina ana tautaeka te Atua n te aro riki teuana. Irarikin katauraoan bwaai ni kabane aika kainnanoaki irouia aomata bwa e na manena maiuia ma ni kakukurei, e kariaia Iehova bwa a na tau aroia maan aika mangori riki ni kabane i aon te aba. (Karikani Bwaai 1:26-28; 2:8, 9) Ngaia are e mataata bwa e aki tii tituaraoi ao n akoi ana tautaeka te Atua, ma e angania naba ana aomata te karineaki. Ngkana a teimatoa n aantaeka Atam ma Ewa nakon ana tautaeka Iehova, a na karekea te kaantaninga ibukin te maiu n aki toki n te aonnaba ae baretaiti.​—Karikani Bwaai 2:15-17.

5. Ti na kanga ni kabwarabwaraa aron Iehova ni waakina ana tautaeka?

⁵ Tera ae ti kona ni kakoauaa man baikai ni kabane? Te moan, e a tia Iehova ni waakina ana tautaeka i aoia ana karikibwai ni kabane. Te kauoua, e tituaraoi ana tautaeka te Atua ao e karineia ana aomata. N tokina, ti na kakabwaiaki n aki toki n ongeabara ni boutokaan ana tautaeka te Atua. Maroaka ae e a kairaki iai Uean Iteraera ngkoa are Tawita bwa e na kangai: “Iawe, am bai te kakanato, te korakora, te neboaki, te raneanea ma te mimitong. Bon am bai bai ni kabane akana i karawa ao i aon te aba. Iawe bon am bai te tautaeka: ko rietata i aoni bai ni kabane.”​—1 Rongorongo 29:11, BK.

E Aera Ngkai E Kainnanoaki Ana Tautaeka n Uea te Atua?

6. Tera irekereken riain Iehova n tautaeka i aon bwaai ni kabane ma ana Tautaeka n Uea?

⁶ Kioina ngkai e a tia ni waakina mwaakana ao korakorana Iehova ae te tia Tautaeka i Aon Bwaai ni Kabane, ma e aera ngkai e a manga kainnanoaki ana Tautaeka n Uea? E waakina mwaakana te tia tautaeka ae moan te rietata rinanon anganakin te botaki teuana tautaekanakiia ana aomata. Mangaia are ana Tautaeka n Uea te Atua bon ana aanga n tautaeka teuana i aoia ana karikibwai, are e kamanena bwa e na waakina iai ana tautaeka.

7. Bukin tera ngke e katea te tautaeka ae boou Iehova?

⁷ E a tia ni waakina ana tautaeka Iehova i aon bwaai ni kabane n aanga aika kakaokoro ao n taai aika kakaokoro. E katea naba iteran ana tautaeka ae boou ibukin kaetan te bwai are e a tibwa riki. E riki aei ngke e karitei natin te Atua ae te anera temanna ae Tatan, ni karirian Atam ma Ewa bwa a na karitei nakon ana tautaeka Iehova. E a karekea te bukibuki te karitei anne nakon riain te Atua n tautaeka i aon bwaai ni kabane. N te aro raa? N tuangakin Ewa iroun Tatan bwa e na ‘bon aki mate’ ngkana e kana uaan te kai are e tabuaki, e a kabuakakaa iai Iehova ao n taekinna bwa e aki taekina te koaua n te aro are e a aki onimakinaki iai. E a manga taku Tatan nakon Ewa: “E ataingkami te Atua ba n te bong ae kam na kanna iai, ao a na kaureaki matami, ao kam na riki ba kaanga te Atua n ata te raoiroi ma te buakaka.” E taekinna Tatan bwa e taraa n ae a na nakoraoi riki Atam ao Ewa ngkana a aki tabeakina ana kaetieti te Atua ao n kaira maiuiia ibon irouia. (Karikani Bwaai 3:1-6) Bon anne te karitei nakon riain te Atua n tautaeka i aon bwaai ni kabane. Tera ae e na karaoia Iehova?

8, 9. (a) E na kanga te aomata ae te tia tautaeka temanna ni kaitaraa te karitei nakon ana tautaeka? (b) Tera are e karaoia Iehova ibukin kaetan te karitei are i Eten?

⁸ Tera ae ti kaantaningaia bwa e na karaoia te tia tautaeka temanna ngkana iai ae e karitei n aonon ana tautaeka? A kona te koraki ake a ataa rongorongon rimoa n uringi waaki tabeua akanne. N onean mwin are a na kakeaa bongan anne, ao n angiin te tai e na boni bae ni motikitaekaia taani karitei ma n taekinna nakoia bwa a bure n eekanako te tautaeka, e ngae naba ngkana e akoi te tia tautaeka anne. Imwina, e na anga te mwaaka te tia tautaeka anne nakon temanna bwa e na tau aroia taani karitei ao ni karekea te rau. N aron naba anne, e kaotia Iehova bwa e bairea raoi kaetan te bwai ae riki n te nne n aroka are Eten ni motikitaekaia taani karitei n te tai ae waekoa. E tuangia Atam ao Ewa bwa a aki tau ni karekea te maiu ae aki toki, ao e kakionakoia man te onnaroka are i Eten.​—Karikani Bwaai 3:16-19, 22-24.

⁹ Ni motikan taekan Tatan iroun Iehova e a kaota iai arona Iehova n tautaeka ae boou i aon bwaai ni kabane, ae ana anga ni kaoka te rau ao te babaire ae eti nakon ana tautaeka ni kabutaa. E taku te Atua nakon Tatan: “N na kaki te kakaiwi i marenam ma te aine aei, ao i marenan am kariki ma ana kariki: e na kaikoaka atum, ao ane ko na kaikoaka bukini waena ngkoe.” (Karikani Bwaai 3:15) Mangaia are e katereterea Iehova bwa bon ana kaantaninga bwa e na angan te “kariki” mwaakana ni kamanatuaa Tatan ma ana taanga ao ni kaota koauan riain Ana tautaeka i aoni bwaai ni kabane.​—Taian Areru 2:7-9; 110:1, 2.

10. (a) Antai are e a riki bwa te “kariki”? (b) Tera are e taekinna Bauro ibukin kakoroan bukin te moan taetae ni burabeti?

¹⁰ E a riki te “kariki” bwa Iesu Kristo, ao n irianaki ma te koraki ae karako mwaitiia aika okoro aika raona n tautaeka. A kaai n riki bwa kaain Ana Tautaeka n Uea te Atua iroun te Mesia. (Taniera 7:13, 14, 27; Mataio 19:28; Ruka 12:32; 22:28-30) A aki bane ni kaotaki baikai n te tai ae waekoa. N etina, e teimatoa kakoroan bukin te moan taetae ni burabeti n riki bwa te “baere raba are e karabaaki n aki taekinaki ma ngkoangkoa.” (I-Rom 16:25) I nanon tienture aika bati, a kariariaa te tai are e nang kaotaki iai te “baere raba” ao ni kakoroaki iai bukin te moan taetae ni burabeti ibukin kakoauan riain Iehova n tautaeka i aon bwaai ni kabane.​—I-Rom 8:19-21.

E a Kaotaraeaki te “Baere Raba” Teutana Imwin Teutana

11. Tera are e kaotia Iehova nakon Aberaam?

¹¹ Imwin tabeua te tai, e a kaotaki teutana imwin teutana iteran nako te “baere raba are bwain uean te Atua” iroun Iehova. (Mareko 4:11) Ibuakoia te koraki ake e kaota ana rongorongo Iehova nakoia, bon Aberaam are e atongaki bwa ‘raoraon te Atua.’ (Iakobo 2:23) E berita Iehova nakon Aberaam bwa e na ‘karika te botannaomata ae abwabwaki’ mairouna. Imwina riki, e a manga tuangnga ni kangai: “A na oti nako uea mai roum,” ao “a na bane botanaomatan aonaba ni kabaia iroun am kariki.”​—Karikani Bwaai 12:2, 3; 17:6; 22:17, 18.

12. E a kanga ni kaotaraeaki ana kariki Tatan imwin te Ieka?

¹² A a kaman kataia aomata n tautaekania aomata nako ma rimoa ni karokoa ana tai Aberaam. N te katoto, e taekinaki ae kangai n te Baibara ni kaineti ma Nimrota, are tibutorun Noa: “E tibwa riki ba temanna ae aintoa i aon te aba teuaei. Te tia kaeia maan ae aintoa i aon te aba ao e karitei nakon Iehova.” (Karikani Bwaai 10:8, 9, NW) E teretere bwa Nimrota ao tabeman riki ake a karikiia i bon irouia bwa taan tautaeka, a a tauaki aroia iroun Tatan. A a riki te koraki aikai ma taani boutokaiia bwa iteran ana kariki Tatan.​—1 Ioane 5:19.

13. Tera ae e taetae ni burabetinna Iehova rinanon Iakoba?

¹³ E bon waakinako naba ana kaantaninga Iehova, e ngae ngke e kakorakoraa Tatan ni kateirakeia aomata bwa taan tautaeka. E kaota ae e na riki Iehova rinanon tibun Aberaam ae Iakoba ni kangai: “E na aki nako te kainuea mairoun Iuta, Ao okon te tia tautaeka mai marenani waena, Ni karokoa Tiro; Ao bwaina te iraki nanona irouia botanaomata.” (Karikani Bwaai 49:10) Nanon te taeka ae “Tiro” “Teuare Bon Ana Bwai.” Mangaia are e oti man taetae ni burabeti aikai bwa e na roko temanna ae riai n anganaki te “kainuea,” ao “okon te tia tautaeka” ke te tautaeka i aoia “botanaomata” ni kabane. Antai ngkanne ae E na tautaeka?

“Ni Karokoa Tiro”

14. Tera te berita are e karaoia Iehova ma Tawita?

¹⁴ Te moan aomata n rineaki iroun Iehova bwa e na uea i aoia ana aomata mai buakoia kanoan Iuta, bon te tia kawakintiibu are Tawita are natin Iete.a (1Tamuera 16:1-13) E akoaki Tawita iroun Iehova ibukin kakaonimakina n aantaeka nakon riain Iehova n tautaeka i aon bwaai ni kabane, e ngae ngke iai ana bure ao ana kairua. Ni kaotaan riki nanon te moan taetae ni burabeti are i Eten, e a karaoa te berita ma Tawita Iehova ni kangai: “N na kateirakea am kariki i mwim, ae na oti nako mai nanon birotom, ao N na kateimatoa ueana.” E bati riki ae nanonaki n anne nakon ae tii natin Tawita ao te tia bwaibwai imwina ae Toromon, bwa e kangai te berita: “N na kateimatoa kaintokan ueana n aki toki.” E teretere man te berita ma Tawita bwa e na roko te “kariki” are e beritanaki ibukin te Tautaeka n Uea ma ni kanoana.​—2 Tamuera 7:12, 13.

15. Bukin tera bwa e iangoaki te tautaeka n Iuta bwa bannan Ana Tautaeka n Uea te Atua?

¹⁵ E moanaki mairoun Tawita bwaa n uea ake a kabiraki n te bwaa ae tabu iroun te ibonga ae rietata. A kona n atongaki ueea aikai bwa taani kabiraki, ke taiani mesia. (1 Tamuera 16:13; 2 Tamuera 2:4; 5:3; 1 Uea 1:39) A taekinaki te koraki aikai bwa a tekateka i aon ana kaintokanuea Iehova ao a tautaeka bwa ueea i Ierutarem. (2 Rongorongo 9:8) N te aro anne, e a tei te tautaeka n Iuta ibukin Ana Tautaeka n Uea te Atua, ae e riki bwa bannan ana tautaeka Iehova i aon bwai ni kabane.

16. Baikara mwin aia tautaeka uean Iuta?

¹⁶ Ngkana e aantaeka te uea ao aomata nakon riain Iehova n tautaeka i aon bwaai ni kabane, a na boni kamanoaki Irouna ao ni kakabwaiaki. E okoro ana tai n tautaeka Toromon bwa e korakora iai te rau ao te mweeraoi ae akea kabotauana. Rinanon aei e katauraoaki bannan te maeka i aan Ana Tautaeka n Uea te Atua ike e a kamaunaki iai ana kairiri Tatan ni kabane ao ni kakoauaki iai riain Iehova n tautaeka i aon bwaai ni kabane. (1 Uea 4:20, 25) E kananokawaki bwa angiia bwaa n uea ni kanoan Tawita, a kabwaka ni kaboraoi maiuia ma ana kaetieti Iehova ao a a taromaurii boua ao ni wene ni bure naba. N tokina, e a kariaia Iehova bwa e na kamaunaki te tautaeka aei irouia kaain Baburon n 607 B.C.E. E a taraa n tokanikai iai ana kekeiaki Tatan ni kabuakakaa riain Iehova n tautaeka i aon bwaai ni kabane.

17. E oti man tera bwa e teimatoa Iehova n taua bairean raoi bwaai ni kabane n aki ongea bwakan te tautaeka are e beritanaki nakon kanoan Tawita?

¹⁷ Kabwakaan te tautaeka are e beritanaki nakon kanoan Tawita, ao kabwakaan ngkoa te tautaeka are Iteraera meang, e kakoauaa mwin ana kairiri Tatan ao inaomataia aomata mairoun te Atua ae kananokawaki, ao tiaki matebuakan ana tautaeka Iehova. (Taeka N Rabakau 16:25; Ieremia 10:23) E katanoata Iehova rinanon te burabeti are Etekiera ngke e kaotiota teimatoan waakin ana tautaeka ni kangai: “Kaki te bara ae te maita, ao buuta te baunuea: . . . N na kabwaka, ma ni kabwaka, ma ni kabwaka: ao e na tiaki arona nako naba te baei, ni karokoa Teuare bon ana tei te baei; ao N na anganna.” (Etekiera 21:26, 27) E kaotaki man taeka aikai bwa e na bon roko te “kariki,” ae beritanaki are “Teuare bon ana tei te baei.”

18. Tera ana taeka te anera ae Kabiriera nakon Maria?

¹⁸ Ti na iangoa ngkai te bwai are e riki imwina n 2 B.C.E. E kanakoaki te anera ae Kabiriera nakon te teinnaine ae Maria i Natareta, ni kaawan Kariraia i Baretain meang ao e taku: “Noria, ane ko na kariki i nanoni birotom, ao ane ko na bungia te nati te mwane, ao ko na aranna ba Iesu. Ane E na kakanato, ao E na aranaki ba Natin Teuare Moan te Rietata: ao te Uea are te Atua E na anganna ana kaintokanuea tamana are Tawita: ao ane E na uea i aon te bata are Iakoba n aki toki.”​—Ruka 1:31-33.

19. Bwaai ni kakukurei raa aika a kaan roko?

¹⁹ Ai tibwa ngkai, are e a uakaan iai te tai are e nang kaotaraeaki te “baere raba.” E a kaani kaoti Teuare moan te kakannato mai buakon te “kariki” are e beritanaki. (I-Karatia 4:4; 1 Timoteo 3:16) E na kaikoakaki bukin waena iroun Tatan. Ma imwina, e na kamanatuaki atun Tatan iroun te “kariki,” ike e nang kamaunaia iai Tatan ma taani boutokaia ni kabane. E na kakoauaa naba bwa a na bane n okiri moan aroia bwaai ni kabane ake a uruaki iroun Tatan rinanon ana Tautaeka n Uea te Atua ao e nang kakoauaki iai riain Iehova n tautaeka i aon bwaai ni kabane. (Ebera 2:14; 1 Ioane 3:8) E na kanga ni kakororaoa aei Iesu? Baikara katoto ake e karaoi bwa ti na kakairi iai? Ti kona n nori kaekaan titiraki aikai n te kaongora ae imwina.

[Kabwarabwara ae nano]

Ko Kona ni Kabwarabwaraa?

• Tera ae karika Iehova bwa te tia tautaeka ae riai i aon bwaai ni kabane?

• E aera ngke e iangoa katean te Tautaeka n Uea Iehova?

• Tera aron Iehova ni kaotaraea te “baere raba” teutana imwin teutana?

• Tera ae e kaotaki iai bwa e taua bairean raoi bwaai ni kabane Iehova, e ngae ngke e a bwaka te tautaeka are e beritanaki nakon kanoan Tawita?