A “Irira Te Tiibutetei”
“Te koraki aei bon ake a irira te Tiibutetei nako ike E nako iai.”—TE KAOTIOTI 14:4.
1. Tera aia namakin taan rimwin Iesu ni koaua ni kaineti ma irirana?
NGKE tao ai uoua ao te iterana ana ririki Iesu ni karaoa te mwakuri ni minita, ao “E reirei i Kaberanum” i mataia aomata. Ibukini matoatoan ana taeka, ao “a kerikaki ana reirei aika bati, ao a aikoa manga airiri ma Ngaia.” Ma ngke e titirakinia ana abotoro Iesu ake 12 bwa a kan nako naba ke a aki, ao e kaeka Timoni Betero ni kangai: “Te Uea, ti na nako n antai? e mena i Roum taekan te maiu are aki toki. Ao ti kakoauako, ao ti ataiko, ba Teuare Moan te Raoiroi Ngkoe, are Natin te Atua.” (Ioane 6:48, 59, 60, 66-69) A rawa ni katoka iriran Iesu taan rimwina ni koaua. Imwini kabiraia n te taamnei ae raoiroi, a a bon teimatoa naba n aantaeka i aan ana kairiri Iesu.—Mwakuri 16:7-10.
2. (a) Antai “te toro ae kakaonimaki ae wanawana” ke “te touati ae kakaonimaki”? (b) E kanga te toro n tia n ataaki arona ae moanibaan te raoiroi ae te “irira te Tiibutetei”?
2 Tera ngkanne ae kona n taekinaki ibukia Kristian aika kabiraki ni boong aikai? N ana taetae ni burabeti Iesu are e kaineti ma kanikinaeani ‘menana ma aomata ao tokin te waaki ae ngkai’ ao e arania iai te koraki ake a kabiraki ake taan rimwina i aon te aba bwa “te toro ae kakaonimaki ae wanawana” ke “te touati ae kakaonimaki.” (Mataio 24:3, 45; Ruka 12:42) A a tia te koraki n toro n ataaki n aroia ae moanibaan te tamaroa ae a “irira te Tiibutetei nako ike E nako iai.” (Wareka Te Kaotioti 14:4, 5.) E teimatoa n itiaki aia onimaki ngkai a aki kamwaraeaki n reirei ao waaki ake a kakaraoaki i “BABURON AE KAKANATO” ae te botaki n Aro ae kewe ae katobibia te aonnaba. (Te Kaotioti 17:5) Akea te reirei ni kewe ae e kona ni kuneaki “i nanoni wiia”, ao a teimatoa n aki ‘kabuakakaaki’ n ana waaki Tatan. (Ioane 15:19) N te tai ae imwaira, ao nikiraia taani kabiraki aika i aon te aba a nang ‘ira’ te Tiibutetei nako karawa.—Ioane 13:36.
3. Bukin tera bwa e kakawaki iroura bwa ti na onimakina te koraki n toro?
3 E a tia Iesu n rinea te toro ae kakaonimaki ae wanawana bwa “mataniwiia tabonibaina” ae kaain te koraki n toro ni kabane are e na ‘angangania kanaia n te tai ae riai.’ E a tia naba n rineia bwa “mataniwin ana bwai nako.” (Mataio 24:45-47) ‘Bwaai nako’ aikai a nanonaki naba iai taekaia te “koraki ae uanao” aika “tiibu tabemang” ake a tabe n rikirake mwaitiia. (Te Kaotioti 7:9; Ioane 10:16) E aki ngkanne riai irouia kaain te koraki ake a kabiraki ao “tiibu tabemang” bwa a na onimakinia te toro ae rineaki bwa aia mataniwi? A bati bukina aika kona iai ni kaotaki bwa a bon tau te koraki n toro aei n onimakinaki iroura. Uoua bukina aika rianako: (1) E onimakina te koraki n toro aei Iehova. (2) Ao Iesu e onimakina naba te toro. Ti na nenera ngkai te bwai ni kakoaua bwa Iehova ae te Atua ao Iesu Kristo a bon onimakina raoi te toro ae kakaonimaki ae wanawana.
E Onimakina te Toro Iehova
4. Bukin tera bwa ti riai n onimakina raoi te amwarake n taamnei are e anga te toro ae kakaonimaki ae wanawana?
4 Iaiangoia bwa e kanga ni kona te toro ae kakaonimaki ae wanawana ni kakatauraoi amwarake n taamnei n taia aika riai. E kangai Iehova: “N na reireiko ma n tuangko te kawai ae ko na nakonako iai.” Ao e a manga reitia riki n taku: “N na tuatuangko arom, n tarataraiko.” (Taian Areru 32:8) Eng, bon Iehova ae kairira te toro. Ai ngaia are ti boni kona iai ngkanne n onimakina raoi wanawanana, ana ataibwai ao ana kairiri te toro aika ti karekei aika boto i aon te Baibara.
5. Tera are e kaotaki iai bwa bon taamnein te Atua ae e kakorakoraa te koraki n toro?
5 E kakabwaiaa naba te koraki n toro Iehova bwa e angania taamneina ae raoiroi. Ma e ngae ngke e aki kona n noraki taamnein Iehova, ma baike a riki i nanoia aomata rinanon taamneina a boni bane n noraki. Iangoa te bwai are e a tia ni kakororaoia te toro ae kakaonimaki ae wanawana n arona n tataekina rongorongon Iehova ae te Atua, Natina ao te Tautaeka n Uea ni katobibia te aonnaba. A kakorakoraia taan taromauria Iehova n tataekina rongorongon te Tautaeka n Uea n aaba ao n abamwakoro aika a raka i aon 230 mwaitiia. Tiaki ngaia ngkanne anne te kakoaua ae e aki kona ni kakeweaki ae bon taamnein te Atua ae e kakorakoraa te toro? (Wareka Mwakuri 1:8.) E riai te koraki n toro ni karaoi rinerine aika rangi ni kakawaki ni katauraoan te amwarake n taamnei n taina ae riai ibukia ana aomata Iehova ni katobibia te aonnaba. E kaotiota te tangira, te nimamannei ao tabeua riki uaan te taamnei ae raoiroi, n te tai are e bairei ao ni karaoi iai rinerine aikai.—I-Karatia 5:22, 23.
6, 7. Korakorara onimakinan te toro ae kakaonimaki iroun Iehova?
6 Iaiangoi ana berita nako te Atua ake e a tia ni karaoi nakoia kaain te toro ae kakaonimaki bwa ti aonga ni kona n ota ni korakoran onimakinan te toro iroun Iehova. E korea ae kangai te abotoro Bauro: “Ba ane e na tangi te bu, ao a na manga kautaki maate n aki kona ni mka, ao ti na onikaki. Ba e riai ba e na karina te aki-mka te mka aei, ao e na karina te aki-mamate te mamate aei.” (1 I-Korinto 15:52, 53) A kautaki taan rimwini Kristo aika kabiraki ake a a tia ni kakaonimaki ni beku iroun te Atua n uaa mateia, man rabwataia n aomata ae mka nakon te maiu n taamnei ae te maiu ae aki totoki. Ma irarikin anne a a karekea te bwai ae raoiroi riki bwa e a reke irouia te aki mamate, are te maiu ae aki totoki ao a aki kona naba ni kamaunanakoaki n aki toki. Ma irarikin anne, a a anganaki te rabwata ae e aki mka ae e a bon teimatoa nako naba maiuna. N Te Kaotioti 4:4 e kabwarabwaraia te koraki ake a tia ni kautaki aikai bwa a tekateka i aoni kaintokanuea ma baunuea aika koora i aon atuia. A nang riki Kristian aika kabiraki aikai bwa bwaanuea aika mimitong. Ma a bati riki baika a kakoauaa ae Iehova e bon rangi n onimakinia te koraki aika a kabiraki aikai.
7 E taekinaki ae kangai n Te Kaotioti 19:7, 8: “E a roko marean te Tiibutetei, ao e a tia ni kataea nangina buna. Ao e anganaki neierei te kunnikaia n te rinen ae raoiroi ae raneanea ae itiaki: ba aia makuri aika raraoi aomata ake a itiaki te rinen arei.” E a tia Iehova n rineia Kristian aika kabiraki bwa buun Natina n te tai ae na roko. Te aki mka, te aki mamate, te bwaanuea ao ai ‘mareakia ma te Tiibutetei’ boni bwaai n tituaraoi aika kamimi! A riki baikai bwa bwaai ni kakoaua ae te Atua e bon onimakinia raoi taani kabiraki “ake a irira te Tiibutetei nako ike e nako iai.”
E Onimakinaki te Toro Iroun Iesu
8. E kanga ni kaotia Iesu bwa e onimakinia taan rimwina aika kabiraki n te taamnei?
8 Tera te bwai ni kakoaua ae e kaotaki iai bwa Iesu e bon onimakinia raoi taan rimwina aika kabiraki n te taamnei? N te tairiki are imwaini matena, ao e a karaoa iai ana berita Iesu nakoia ana abotoro aika kakaonimaki ake 11 ae kangai: “Ao ngkami bon aika kam memena ma Ngai ni kaririakiu; ao Ngai I motika ueami nako imi, n ai aron Tamau ngke E motika ueau nako Iu, ba kam na amamarake ma ni momoi n au taibora n ueau, ao ane kam na tekateka i aoni kaintokanuea ni motiki taekaia aia baronga Iteraera ake tengauni ma ua baronga.” (Ruka 22:28-30) Te berita are e karaoia Iesu nakoia ana abotoro ake 11, a na rotaki naba iai Kristian aika kabiraki ake 144,000 mwaitiia. (Ruka 12:32; Te Kaotioti 5:9, 10; 14:1) Ngkana e aki onimakinia Iesu e na kona ngkanne ni beritanna nakoia bwa a na uaia n uea ma ngaia ni mwaakan ana Tautaeka n Uea?
9. Baikara bwaai tabeua ake a aranaki naba bwa “ana bwai nako [Kristo]”?
9 Irarikin anne, e a tia Iesu Kristo n rinea te toro ae kakaonimaki ae wanawana bwa “mataniwin ana bwai nako” ae nanonaki iai bwaai ni kabane aika i aon te aba ake e na tautaekani. (Mataio 24:47) Tabeua mai buakoni baikai boni baike a kamanenaaki ni kautun aia botaki Ana Tia Kakoaua Iehova, n aobiti n tararua aika n aaba aika kakaokoro, n Taabo Ibukin te Runga ma Taabo n Taromauri ni katobibia te aonnaba. Ao n ikotaki naba ma te mwakuri n tataekina te Tautaeka n Uea ao karekeaia taan rimwini Kristo. Iai ae e kona ni mwiokoa te aomata temanna ae e aki onimakinna bwa e na mataniwi n ana bwai aika a rangi ni kakawaki?
10. Tera ae kaotaki iai bwa e bon raoraonia taan rimwina aika kabiraki Iesu Kristo?
10 Teutana te tai imwaini waerakena nako karawa ao e a kaoti Iesu are e a tia ni kautaki nakoia taan rimwina aika kakaonimaki ike e a berita iai nakoia ni kangai: “Noria, I a memena naba i roumi ni boongi ni kabane ni karokoa tokin aonaba.” (Mataio 28:20) E a tia ni kakoroaki nanon te berita aei? E a tia ni birirake mwaitin aia ekaretia Ana Tia Kakoaua Iehova ni katobibia te aonnaba i nanon 15 te ririki n nako, man te mwaiti ae tao 70,000 nakon te mwaiti ae raka i aon 100,000, ae te keerake ae raka i aon 40 te katebubua. Ai iraman ngkai taan rimwini Kristo aika manga tibwa reke riki? E a kaania 4.5 te mirion taan rimwini Kristo ake a tia ni bwabetitoaki i nanon 15 te ririki n nako, ae te mwaiti ae raka i aon 800 ni katoa bong. Te rikirake ae kamimi aei, e a riki bwa te bwai ni kakoaua ae e boni kaiririia taan rimwina aika kabiraki Kristo i nanon aia bobotaki n te ekaretia ao ni boutokaia naba n aia mwakuri ae karekeaia taan rimwina.
E Kakaonimaki ao E Wanawana te Toro
11, 12. E kanga te toro n tia ni kaotiotia bwa e boni kakaonimaki ao e wanawana?
11 Kioina ngke Iehova ae te Atua ao Iesu Kristo a bon onimakina raoi te toro ae kakaonimaki ae wanawana, tiaki ngkanne te koaua bwa ti riai naba ni karaoa anne? I nanon te tai ae maan, ao e a tia te toro ni kaotiotia bwa e boni kakaonimaki ni karaoan tabena are e mwiokoaki iai. N te katoto, e a tia ni boreetiaki te maekatin ae Te Taua-n-Tantani i nanon 130 tabun te ririki. Bobotaki, ruunga ao bwabwaro ake a karaoaki irouia Ana Tia Kakoaua Iehova, a teimatoa n riki bwa kakorakoraan ara onimaki.
12 E bon wanawana naba te toro ae kakaonimaki n arona n aki kainikatonga, ao n aki biririmoan ana kairiri Iehova ke tao n iremwe n ongeaba nako iai ngkana e bon mataata raoi nakoia. N te katoto, e teimatoa te toro ni kauringira bwa ti na aki reketaati ni bwaai ni kamwane aika n ana waaki ae buakaka Tatan, e ngae ngke mataniwi n Aaro aika kewe a butimwaea ke a kariaia naba aroaroia aomata ni bangaomata ao n aki maaka te Atua. E kona te toro ni katauraoi kauring aika a kawanawanaira ao aika roko raoi n taia, kioina ngkai a kakabwaiaaki iroun Iehova ae te Atua ao Iesu Kristo. Ai ngaia are e bon tau te toro n onimakinaki raoi iroura. Ma n te aro raa ngkanne ae ti na kaotiota iai onimakinan te toro ae kakaonimaki ae wanawana?
“Airi ma” te Koraki Aika Kabiraki Ngkai A Tabe n Irira te Tiibutetei
13. E kanga ni kaotiotaki onimakinan te toro ae kakaonimaki ae wanawana ni kaineti ma are e taekinaki n ana taetae ni burabeti Tekaria?
13 E taekinaki ni bokin te Baibara ae Tekaria taekaia “tengaun te aomata” ake a kawara “temanna ae te I-Iutaia” ao a taku: “Ti na airi ma ngkami, ba ti ongo ba E memena te Atua i roumi.” (Wareka Tekaria 8:23.) Kioina ngkai e aranaki are “temanna te I-Iutaia” bwa “ngkami,” nanona ngkanne bwa bon te rabwata ae mwaiti kaaina. N ara bong aikai, ao e tei ane temanna te I-Iutaia anne ibukia nikiraia Kristian aika kabiraki ake kaain naba “ana Iteraera te Atua.” (I-Karatia 6:16) Ao e tei are “tengaun te aomata mai buakon taetaeia botanaomata ni kabane” ibukia te koraki ae uanao aika tiibu tabemwaang. N aroia Kristian aika kabiraki ake a irira Iesu nako ike e nako iai, ai bon aroia naba te koraki ae uanao n “airi ma” ke n raona te toro ae kakaonimaki ae wanawana. A aki riai ni maamaa te koraki ae uanao aei ni kaotiia bwa a kaai ni mwakuri ma taani “weteaki mai karawa.” (Ebera 3:1) E aki naba maamaa Iesu n arania te koraki aika kabiraki bwa “tarina.”—Ebera 2:12.
14. A na kanga ni boutokaaki ma te kakaonimaki tarini Kristo?
14 E iangoa boutokaakia tarina Iesu Kristo bwa bon boutokaana naba. (Wareka Mataio 25:40.) N te aro raa ngkanne ae a boutokaa naba tarini Kristo aika kabiraki n te taamnei, te koraki ake a kantaningaa te maiu i aon te aba? N aroia ae kakawaki riki ni buokiia n te mwakuri ae tataekinan te Tautaeka n Uea. (Mataio 24:14; Ioane 14:12) E ngae ngke e tabe ni kekerikaaki mwaitiia taani kabiraki i aon te aba i nanon tatabebwi te ririki n nako, ma mwaitiia tiibu tabemwaang a bon tabe ni kekerake. Ngkana a uataboa te mwakuri n uarongorongo te koraki ake a kantaningaa te maiu i aon te aba, ao ni kabanea riki aia tai n aron ae a kona n riki bwa taan tataekina te rongorongo ae raoiroi, a a boutokaia iai ngkanne taani kabiraki n te taamnei ni kakororaoa mwiokoaia ae karekeaia taan rimwini Kristo. (Mataio 28:19, 20) E aki naba riai n tarariaoaki aroni boutokaan te mwakuri aei rinanon ara anganga ara bwaintangira te mwane n aanga aika kakaokoro.
15. Tera aroia ae riai Kristian ni kabane ni kaineti ma te amwarake n taamnei ae roko n taina ae riai mairoun te toro ao babaire n ara botaki ake e karaoi te toro?
15 Tera arora ngaira aika Kristian n iangoa te amwarake n taamnei ae roroko raoi n taina ae riai mairoun te toro ae kakaonimaki are e anganga rinanoni booki aika boto i aon te Baibara ao bobotaki ni Kristian? E koaua bwa ti katoong ma te nano ni kakaitau ao ti kani maiuakini baike ti reiakini mai iai? Tera arora nakoni babaire n ara botaki ake mairoun te toro? Kukureira n ongeaba nakoni kairiri ake a katauraoaki, e a riki naba bwa te bwai ni kakoaua ae ti bon onimakina raoi aron Iehova n anganira kairirara.—Iakobo 3:17.
16. Bukin tera bwa a riai Kristian ni kabane ni kakauongo nakoia tarini Kristo?
16 E taku Iesu: “A ongo bwanau au tiibu, ao I kinaia, ao a irirai.” (Ioane 10:27) Bon anne raoi taekaia ni koaua Kristian aika kabiraki. Tera aroia ake a “airi ma” ngaiia? A riai ni kakauongo nakoni bwanaan Iesu. A riai naba ni kakauongo irouia tarin Iesu. Bwa ni koauana, a a tia n anganaki oini mwiokoaia te koraki aei ae tararuaan marurungin aia onimaki ana aomata te Atua ao ni kaiririia. Tera ae irekereke ma te kakauongo nakoni bwanaaia tarini Kristo?
17. Tera ae irekereke ma te kakauongo nakon te koraki n toro?
17 E tei ibukin te toro ae kakaonimaki ae wanawana te Rabwata n Tautaeka, are ngaiia aika kaira te waaki ao ni babairea te mwakuri ae tataekinan te Tautaeka n Uea ni kabutaa te aonnaba. Bon unimwaane aika mwaatai aika kabiraki n te taamnei kaain te Rabwata n Tautaeka. Ibukin anne a kona n aranaki bwa ‘taani kairiri’ i buakora. (Ebera 13:7) E rangi ni ‘korakora aia mwakuri ibukin te Uea’ mataniwi aika kabiraki aikai kioina ngkai a tararuaia taan tataekina te Tautaeka n Uea ae kaania 7,000,000 mwaitiia n ekaretia aika a riaon 100,000 mwaitiia. (1 I-Korinto 15:58) Te kakauongo nakon te koraki n toro e nanonaki naba iai ara boutoka ni koaua nakon ana Rabwata n Tautaeka.
A Kakabwaiaaki Akana Kakauongo Nakon te Toro
18, 19. (a) A kanga ni kakabwaiaaki akana kakauongo nakon te toro ae kakaonimaki ae wanawana? (b) Tera ae ti riai ni motinnanoia?
18 E a tia te toro ae kakaonimaki ae wanawana ni kona n “rairiia aomata aika bati nakon te raoiroi” kioina ngkai e bon rineaki te toro iroun te Atua. (Taniera 12:3) I buakoia te koraki akanne bon naake a kantaningaa te kamaiuaki mai imwini kamaunaan te waaki ae buakaka ae ngkai. Ai bon tamaroara te kakabwaia ae ko a taraaki iroun te Atua bwa ko raoiroi!
19 Tera are e na riki nakoia te koraki ake a kakauongo nakoni bwanaan te toro n te tai are e na roko iai ‘te kaawa ae tabu, are Ierutarem nabangkai [ae kaainaki irouia 144,000] are e ruo mai karawa mairoun te Atua, are e katauraoaki n ai aron te aine ae nangi mareaki ae katamaroaaki imwaini buuna?’ E taku te Baibara: “Te Atua E na boni memena i rouia, ao E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki: ba a mauna nako bwaai rimoa.” (Te Kaotioti 21:2-4) Ai ngaia are ti bia bane ni kakauongo raoi nakoni Kristo ma tarina aika kabiraki n te taamnei ake e onimakinia raoi.
Tera ae Ko a Tia n Reiakinna?
• Tera te bwai ni kakoaua bwa Iehova e onimakina raoi te toro ae kakaonimaki ae wanawana?
• Tera ae kaotaki bwa Iesu Kristo e bon onimakina raoi te koraki n toro?
• Bukin tera bwa e bon tau te touati ae kakaonimaki n onimakinaki iroura?
• Ti na kanga ni kaotiotia ae ti onimakina te toro?
[Taamnei n iteraniba 25]
Ko ataia bwa antai are e rineia Iehova bwa buun Natina nakon te tai ae na roko?
[Taamnei n iteraniba 26]
E a tia Iesu Kristo ni mwiokoa te toro ae kakaonimaki ae wanawana bwa e na tararuai ana “bwai nako”
[Taamnei n iteraniba 27]
Ti boutokaia taani kabiraki n arora n uataboa te mwakuri n uarongorongo