Ko a Tia ni Karaoa Am Babaire ni Kaonota Am Tai Ibukin Am Ukeuke n Reirei n te Baibara?
N TE ririki ae nako, e katanoataa te Rabwata n Tautaeka te bitaki teuana ibukini botakin te ekaretia, ike e a reke iai te tai ae bati riki ibukin te ukeuke n reirei n te Baibara ao maroroakinana n te utu. Ngkana atun te utu ngkoe, taraia raoi bwa ko na katoatai ni kaira te ukeuke n reirei n te Baibara n te utu ma buum ao natimi n te aro ae manena. A boni kani kaai ni kamanena te tai aei ibukin aia ukeuke n reirei n te Baibara taanga ni mare aika akea natiia. A kona naba ni kamanena raoi te tai aei taari mwaane ao aine aika akea buuia ao akea tabeia n aia utu, ibukin aia ukeuke n reirei n te Baibara i bon irouia.
A bati aika a a tia ni kaotii nanoia ni kakaitau n te babaire ni kaineti ma te tairiki ibukin te Taromauri n Utu. N te katoto, e korea ae kangai Kevin ae te unimwaane n te ekaretia: “E aki tau atongan taeka aika ‘ko rabwa’ n tii ngaia ibukini kaotan nanora ni karabwarabwa ngaira kaain te ekaretia. Ngkai unimwaane ngaira, ti a tia ni maroroakin arora ni kamanena te tairiki ae mwaawa aei, bwa ti na karaoa raoi iai te baere e tuangira te Rabwata n Tautaeka, are ti na ukeuke n reirei iai ma ara utu.”
E korea ae kangai Nei Jodi ae buun te unimwaane n te ekaretia temanna: “Iai teniman natira aine, aika 15, 11, ao 2 aia ririki. Ti a tibwa tia ni mwaing nakon te ekaretia ae kamanenaaki iai te taetae n te bai. E kainnanoaki te tai ae bati ao te kakorakora n te katauraoi ibukini botaki ni kabane aikai. E a reke ngkai ara tairiki ae raka man te bitaki aei, are ti a kona ni kaatuui iai ara iango i aon te taromauri n utu!”
A korea ae kangai John ao JoAnn aika taanga ni mare aika a regular bwaiania: “Ti aki katoatai ni karaoa ara ukeuke n reirei n te Baibara n ara utu, ibukina bwa ti kataia ni karekea taina i marenan ara mwakuri aika kakaokoro n te ekaretia. Bon te bwaintangira mairoun Iehova te babaire ae boou aei bwa e a manga kakorakorai riki ara onimaki ngkana ti kamanena raoi te tai aei n aron tuangakira.”
E kaokoroa tairikin te Kauabong te tari te mwaane ae Tony ae akea buuna ae ai 20 tabun ana ririki, bwa ana tairiki n ukeuke n reirei i bon irouna. E kamanenai taai riki tabeua n te wiki ni katauraoi iai ibukini bobotaki n te ekaretia. Ma e ngae n anne, e taku Tony, “I ingarake ni kariariaa te bong ae te Kauabong.” Bukin tera? “Ibukina bwa te tairiki anne bon au tai ae e okoro ma Iehova.” E kabwarabwaraa ni kangai Tony: “I nanon tao uoua te aoa, I ukeuke n reirei i aoni baika kakorakoraa riki au iraorao ma Iehova. I a kona ni kananoa au iango ni kiibu n te Baibara ake I wareki kioina ngkai e a bati riki au tai.” Tera uaana? “E a korakora riki ringan nanou n ana reirei Iehova nakon are mai mwaina.” Tera ana katoto teuaei? “I wareka taekan aia iraorao Tawita ao Ionatan n te boki ae te Insight. E bati reireiau man aron Ionatan n tabeakinia riki aomata nakon nanona. E buokai ana katoto bwa N na ota raoi riki n te bwai ae nanonaki ngkana N na riki bwa te rao ni koaua. Ni koauana, I bon rangi n ingainga nakoni kuneani baika boou aika bati riki n tairikin te Kauabong koraki!”
Akea te nanououa bwa a na rangi ni kakabwaiaaki ana toro nako Iehova ni kabonganaan raoi te tai ae raka aei, ibukini karaoan te ukeuke n reirei n te Baibara ao te taromauri n utu aika rangi ni manena.