Te Ibuobuoki Ibukia Utu
1. A kanga ni kakabwaiaaki utun I-Iteraera n te bongi n Taabati ni katoa wiki?
1 Bon te babaire ae tatangira mairoun Iehova kawakinan te bongi n Taabati ae a kakabwaiaaki iai utu. A motirawa iai I-Iteraera man aia mwakuri nako ao e reke iai aia tai n iaiangoa raoiroin Iehova ao aia iraorao ma ngaia. A kona ni karaoa te mwakuri ae raoiroi n taai aikai kaaro ni karina te Tua i nanoia natiia. (TuaKau. 6:6, 7) E katauraoaki te tai ibukia ana aomata te Atua bwa a na kaatuua iangoan aia iraorao ma Iehova i nanon te wiki teuana ma teuana n te bongi n Taabati.
2. Tera reireiara ibukin Iehova n te bongi n Taabati?
2 Ni koauana, e a aikoa katauia utu Iehova bwa a na kawakina te bongi n Taabati ngkai. Ma ti reireiaki n te tua anne te bwai teuana ibukin Atuara. E teimatoa n tabeakina mweraoia ana aomata bwa a na kakabwaiaaki man aia iraorao ae kaan ma ngaia. (Ita. 48:17, 18) Ni boong aikai, te anga teuana ae e kaota iai tabeakinara ma te tangira Iehova bon te Taromauri n Utu n te tairiki.
3. Tera bukini karaoan te Taromauri n Utu n te tairiki?
3 Tera Bukini Karaoan te Taromauri n Utu n te Tairiki? I nanon Tianuare 2009, ao e moanaki iai karaoan te Reirei n te Boki n te Ekaretia n te tairiki are a karaoaki naba iai te Kuura ni Kataneiai Ibukia Taan Uarongorongo ao te Botaki Ibukin te Uarongorongo. Teuana bukin te bitaki aei bwa e angania iai utu aia tai ni kakorakoraa riki iai aia iraorao ma Iehova n aia utu, ni bairean raoi te tairiki teuana ni katoa wiki ae e angaraoi irouia ibukin aia taromauri n utu. E kaungaaki te utu teuana ma teuana bwa e na bita tain ana reirei n utu nakon te tairiki are e kakaraoaki iai te reirei n te boki ngkoa, ao ni kamanena te tai aei ibukin te maroro ao te reirei n te Baibara n aki katawe are e katauraoaki ibukini buokaia utu.
4. E riai te utu ngkai n tiana tain ana maroro nakon teuana te aoa? Kabwarabwaraa.
4 Ti kainnanoa te tai ibukini katauraoara, mwanangara ao a bati riki ibukini kaean te Reirei n te Boki n te Ekaretia ngkoa. Angiia mai buakora a kainnanoa te tai ae bati riki nakon ae tii teuana te aoa bwa a aonga ni kaea te botaki aei. Ibukin te bitaki nakoni kaetietin ara botaki, e a reke iai ara tai n te tairiki aei n taromauria Iehova n ara utu. Mangaia are ti aki riai n tiana tain ara Taromauri n Utu n te tairiki nakon tii teuana te aoa. Ma ti riai n tabeakina kainnanoia ao aia kangaanga ara utu ao ni bairea te tai ae ti na kabongana ibukin te Taromauri n Utu.
5. E riai ni kabonganaaki te tai ni kabane n te mamaroro? Kabwarabwaraa.
5 E Riai ni Kabonganaaki te Tai ni Kabane n te Mamaroro? Ngkana a uaia ni maroroakina kanoan te Baibara taanga ni mare ao kaain te utu ma natiia, a ikaungaunga iai i marenaia. (IRom 1:12) A na kaaniaki riki iai kaain te utu. Mangaia are e riai n rangi ni kakawaki te maroro i aon te Baibara n te Taromauri n Utu n te tairiki. Ma a kona naba ni kabanea aia tai kaain te utu n tatabemania nako ni karaoa aia reirei i bon irouia. N te katoto, imwin te maroro n te utu, a kona n teimatoa n ikotaki kaain te utu e ngae ngke a tannako n tatabemania nako n reitaanako karaoan aia reirei, tao ni kabanea aia katauraoi ibukini bobotaki ke warekani maekatin. A teimatoa tabeua utu n aki matakuakina te terewitin n te tairiki anne.
6. E na kanga ni kairaki te maroro?
6 E na Kanga ni Kairaki te Maroro? E aki rangi ni kainnanoaki maroroakinan titiraki ao kaeka n taai nako. A mwaiti utu ake a karaoa aia babaire ae e na titeboo ma ara botaki are i nanon te wiki, bwa e aonga ni kamaiu ao ni kaunga te Taromauri n Utu. A tibwatibwai aia maroro ni mwakoro aika mwaiti ao ni karaoi naba n aanga aika kakaokoro. N te katoto, a kona ni wareka te Baibara ni botaki, ni katauraoa teuana mwakoroni bobotaki nako, ao ni kataneiai ibukin te mwakuri ni minita. A katauraoaki reirei ni katoto tabeua n te iteraniba 6.
7. Tera te aroaro ae a riai kaaro ni kakorakoraia ni karekea?
7 Tera te Aroaro ae A Riai Kaaro ni Kakorakoraia ni Karekea? A na reireiaki raoi kaain am utu ngkana e kaotiotaki te aroaro ae raoiroi ao n tatangira. N taai tabetai ao ko kona n reirei i tinanikun am auti ngkana e nakoraoi kanoan te bong. Ko kona ni motirawa teutana ngkana ko tangiria. Tabeua utu a karina te amwarake ao te moi teutana n aia kaetieti. A na aki karika te Taromauri n Utu n te tairiki kaaro bwa aia tai n taetae n un ke ni boaia natiia, ma tao e kainnanoaki riki kabanean te tai teutana ibukini baike a kaaitarai ni maiuia ke kangaanga ake a nang rooti aroaroia. Mangaia are moan te raoiroi riki ngkana ti maroroakina ana kangaanga te tei anne n te tai teuana i nanon te wiki n tii ngaia, bwa ti aonga n aki kamaamaea i mataia raona n ataei. E riai n aki kabotu ao ni kairaki ma te matoa te tairiki ibukin te Taromauri n Utu, ma e riai ni kaotiotaki iai aroaron te Atua ae kukukurei ae ti taromauria.—1Tim. 1:11.
8, 9. Tera te katauraoi ae e kainnanoaki mairouia atun utu?
8 E na Kanga ni Kona ni Katauraoi Atun te Utu? E na rangi ni kakabwaiaaki riki te utu ngkana e a kamani katauraoi atun te utu ibukin te Taromauri n Utu are ni katoa tai, n arona n iangoi baike a na maroroakinaki ao aroni maroroakinan raoi baikanne. (TaeRab. 21:5) E karaoa ae riai te buu te mwaane ngkana e maroro ma buuna ni kaineti ma te bwai ae e na karaoia. (TaeRab. 15:22) Atun utu, bukin tera bwa kam aki naba titirakinia natimi n taai tabetai aia iango ni kaineti ma te bwai ae a kani karaoia? Ni karaoan anne, ao e na reke iai am atatai ae kakawaki ni kaineti ma aia iango ao baika a tangiri natimi.
9 E na aki riai ni kabanea te tai ae abwabwaki ibukin te katauraoi atun te utu ni katoa wiki. E na bae n iai bwaai aika titeboo aika kam na karaoi ni katoa wiki, ao ngkanne e na aki riai ni bairea kanoan te Taromauri n Utu ae kakaokoro ni katoa wiki atun te utu. Tao e na nora raoiroin te katauraoi imwini bwaran te Taromauri n Utu ni katoa wiki ngke e uring baike a kainnanoi kaain ana utu ni kaineti ma aia onimaki. Tabeman atun utu a korei kaetieti ao ni katekei n te tabo are e na kai noraki iai irouia kaain te utu, tao ni katekei i matan te aitibwaoki are e tei. Te aro aei are e a karika te kimwareirei ao te ingaingannano ao n angania kaain te utu aia tai ni katauraoi ngkana e kainnanoaki.
10. A na kanga ni kamanena aia tai n Taromauri n Utu n te tairiki te koraki ake a maeka n tii ngaiia?
10 Tera Arou Ngkana Tii Ngai Kaain te Onimaki ni Mwengau? A kona ni kamanena te tai n Taromauri n Utu n te tairiki bwa aia tai n ukeuke i bon irouia te koraki ake a maeka n tii ngaiia. Te kaetieti ae manena ibukin te ukeuke i bon iroum e riai n irekereke ma te wareware n te Baibara, te katauraoi ibukini bobotaki, ao te wareware n Te Taua-n-Tantani ao te Awake! Tabeman taan uarongorongo a karaoa aia reirei i bon irouia n te bwai teuana ae okoro. N taai tabetai ao a tangiria ni kaoia taan uarongorongo tabeman ke utu tabeua bwa a na raonia ni kaungaia ni maroroakinani kiibu man te Baibara.
11, 12. Baikara kakabwaia tabeua aika a na reke mani kakaraoan te Taromauri n Utu ni katoa tairiki are baireaki?
11 Baikara Kakabwaia Aika A na Reke Mani Kakaraoan te Taromauri n Utu ni Katoa Tairiki Are Baireaki? A kaaniaki riki ma Iehova te koraki ake a uataboa te taromauri ae koaua ma nanoia ni kabane. Irarikin anne, a kakorakoraa riki te reitaki i nanon te utu, utu ake a botaki n taromauri. E korea ae kangai te taanga ni mare teuana ni kaineti ma kakabwaia ake a kimwareirei iai: “Ngkai taanga ni bwaiania ngaira aika akea natira, ti rangi n ingainga nakon ara Taromauri n Utu n te tairiki. Ti namakinna ae ti a kaaniaki riki i marenara ao Tamara are i kawara. Ngaia are ngkana ti uti n te bong are ti baireia bwa ti na botaki ni karaoa iai ara reirei, ti taekina ae kangai i marenara: ‘Keetinna bwa tera ae ti na karaoia n tairiki? Te Taromauri n Utu n te tairiki!’”
12 E buokiia naba utu aika tatabetabe, te babaire ibukini karaoan te taromauri n utu n te tairiki. E korea ae kangai te tina te aine temanna are e kaikawaia natina aika uoman mwaane ao te regular bwaiania naba: “E rotakibuaka ngkoa ara reirei n utu. Ibukina bwa I a kua, e karaoaki n taai tabetai ma e aki baireaki raoi. I a aki kona n ataa te anga ae e na nakoraoi iai. Mangaia are I a kororeta ni karabwaingkami ibukin te Taromauri n Utu n te tairiki. Ti a rangi ni buokaki ni kakaraoan ara reirei n utu ae baireaki ao a bati kakabwaia aika ti karekei mai iai.”
13. Tera ae e irekereke ma mwaitini kabwaia ake ti na karekei ma ara utu man te babaire aei?
13 N aron te bongi n Taabati, te Taromauri n Utu bon te kakabwaia ae ti anganaki mairoun Tamara are i karawa are e na kona ni buokiia iai utu. (Iak. 1:17) E kaineti mwaitini kabwaia ake a karekei utun I-Iteraera ngkoa ma aroia ni kamanena raoi te bongi n Taabati. N aron anne, e kaineti mwaitini kabwaia ake ti na karekei man arora ni kamanena te tairiki are e a tia ni katauraoaki ibukin te taromauri n utu. (2Kor. 9:6; IKar. 6:7, 8; IKoro. 3:23, 24) Man irakin raoi nanon te babaire aei, a nang kona iai kaain am utu n taekina are e taku te tia areru ni kangai: “Ma e raoiroi i rou te kaania te Atua: I rinea te Uea ae Iehova ba neu ni kamaiu, Ba I aonga n tataekin am makuri ni kabane.”—TaiAre. 73:28.
[Kabwarabwaraan n iteraniba 5]
E riai n aki kabotu ao ni kairaki ma te matoa te tairiki ibukin te Taromauri n Utu, ma e riai ni kaotiotaki iai aroaron te Atua ae kukukurei ae ti taromauria
[Te bwaoki n iteraniba 6]
KAWAKINNA
Katoto Tabeua Ibukin te Taromauri n Utu n te Tairiki
Te Baibara:
• Botaki ni wareka mwakoron te wareware n te Baibara ni katoa wiki. Ngkana a angaraoi rongorongo tabeua man te Baibara ake kam na wareki, e kona te aomata temanna ni wareka kabwarabwaraana ao ake tabeman a kona ni wareki aia taeka aomata aika kakaokoro ake a taekinaki iai.
• Karaoa te kaotioti mani mwakoron te wareware n te Baibara teuana.
• Rinea temanna kaain te utu bwa e na kamani wareki mwakoron te Baibara ake a na warekaki ao ni korea teuana ke uoua te titiraki ake a reke man te wareware. Ngkanne karaoa am ukeuke i aon aia titiraki kaain te utu ni kabane.
• Katauraoa te beeba ke te card teuana ni katoa wiki ae mena te kibu man te Baibara n iterana teuana ao iterana are teuana e mena iai kanoan te kibu anne, are a na kataia aomata n uring ao ni kabwarabwarai. Kamwaiti taiani card akanne iroum, ao rinanoi ni katoa wiki n noria bwa mwaitira kiibu aika ko uringi.
• Kakauongo nakon te wareware n te Baibara ae e a tia n raweaki ao n irira naba anne man te Baibara.
Bobotaki:
• Uaia ni katauraoa teuana mwakoroni bobotaki nako.
• Reiakin anenen te Tautaeka n Uea ake a baireaki ibukin te wiki ae imwaira.
• Ngkana iai temanna ae iai ana kabwarabwara n te Kuura ni Kataneiai Ibukia Taan Uarongorongo ke e na kaotioti n te Botaki Ibukin te Uarongorongo, maroroakini kanoan reirei akanne n taekin ke ni kataneiai bwa a na noria kaain te utu.
Kainnanon te Utu:
• Rinanoi reirei mani booki aika te Young People Ask ke Learn From the Great Teacher.
• Karaoa te reirei ni kataneiai i aon aroni kaaitaran te kangaanga are e kona n riki n te tabo n reirei.
• Karaoa te reirei ni kataneiai ike a kaibibita iai tabeia kaaro ao ataei. A karaoa aia ukeuke n reirei ataei i aon te bwai teuana bwa aongkoa kaaro ngaiia ao ni manga maroroakinna ma aia karo bwa aongkoa naati ngaiia.
Te Mwakuri ni Minita:
• Karaoi reirei ni kataneiai ni katauraoi baike a na maroroakinaki n aia mwakuri ni minita n te wikeen.
• Maroroakin tiia aika a kona ni katei kaain te utu bwa a aonga ni kabatiaa riki iai uataboan te mwakuri ni minita n namwakainan te Kauring ke ni boong ni motirawa.
• Kariaia temanna imwin temanna kaain te utu bwa e na karaoa ana ukeuke n reirei ibukin tabeua te miniti i aoni kaekaan titiraki aika kakaokoro ake a kona n tabekaki n tain te mwakuri ni minita, ao ngkanne karaoi iai reirei ni kataneiai.
Reirei Tabeua Aika Manena:
• Botaki ni wareka te kaongora teuana man te maekatin.
• Rinea temanna kaain te utu bwa e na kamani wareka te kaongora man te maekatin are e rangi ni kakaongora irouna, ao imwina taekina mwin ana wareware.
• Kaoa naba te tia uarongorongo ke te taanga teuana bwa a na ira am Taromauri n Utu n te tairiki, ao tao ko kona naba ni maroro ma ngaiia.
• Matakuakina ao maroroakina kanoan teuana mai buakon ara birim.
• Botaki ni maroroakina kanoan te “Young People Ask” ke te atu man te Awake ae “For Family Review.”
• Botaki ni maroroakini atu man Te Taua-n-Tantani ae “Teach Your Children” ke “For Young People.”
• Wareka ao maroroakina mwakoron te Yearbook ke teuana mai buakoni booki aika boou ake a otinako n tain te bwabwaro ae nako.
• Imwini kaean te bwabwaro ke te runga ao rinanoi kanoani botaki akanne.
• Tarai baika e karikii Iehova ao ni maroroakin i nanon te utu, ao maroroakinna naba bwa tera ae ti reireiaki iai ibukin Iehova.
• Botaki ni mwakuri i aoni bwaai tabeua n ai aroni karaoani katotongan te bwai teuana, te mwabe, ke te tiate.