Aberaam Te Mwaane Ae Onimaki

E tei Aberaam i tinaniku n te tairiki are e bung iai te ariki. Ngke e tararake n taraa otan ma raneanean itoi aika bati i karawa, ao e a kairaki iai bwa e na iaiangoa ana berita te Atua, are a na rangi ni bati ana kariki kaanga mwaitin itoi akanne. (Karikani Bwaai 15:5) A riki itoi ake e nori Aberaam bwa kauring ibukin ana berita Iehova. Boni bwaai naba ni kakoaua. Ni koauana, ngkana iai mwaakan Iehova ni karika te iuniweeti ae moan te bubura ao bwaina nako, e na aki kona naba n angan Aberaam ma Tara te kona ni kariki? Bon anne aekan ana onimaki Aberaam.

TERA TE ONIMAKI? Ni kamanenaakina n te Baibara, e kaineti “te onimaki” ma kakoauaan raoi te bwai ae aki nonoraki. E boto te aeka n onimaki anne i aon te koaua. E kabotoi ana iango te aomata ae onimakina te Atua i aoni kakororaoan ana berita nako Iehova, ao e kakoauaa raoi bwa a na koro bukia.

E KANGA ABERAAM NI KAOTIOTA TE ONIMAKI? E kaotia bwa e bon onimakini ana berita te Atua. Ibukini korakoran ana onimaki Aberaam, e a kitana iai abana ma kakoauaan are e na boni kakoroa bukin Ana berita Iehova bwa e na anganna abana ae kaokoro. Ibukin naba ana onimaki, e a mwamwananga i aoni Kanaan ao e koaua raoi bwa e na bon abana te aba anne ana kariki. Ao ibukin ana onimaki naba anne, e a ongeaba Aberaam n anga Itaaka bwa te karea ma kakoauaan are e na boni kautia Iehova ngkana e riai.—I-Ebera 11:8, 9, 17-19.

E kabotoa ana iango Aberaam i aon taai aika imwaina ao tiaki n taai aika nako. E ngae ngke a maiu raoi riki i Ura Aberaam ma Tara nakon are i Kanaan, ma “a bon aki teimatoa n iaiangoa taekan te aba are a tia ni kitanna.” (I-Ebera 11:15, Today’s English Version) Ma a boni kabotoi aia iango i aon aron te Atua ni kakabwaiaia ma kanoaia nakon taai aika imwaia.—I-Ebera 11:16.

E kakoauaa Aberaam n ana onimaki bwa e na kakoroi bukin ana berita Iehova? Eng. E teimatoa Iehova ni kakoroi bukin ana berita nako. N tokina, e a rangi ni bati ana kariki Aberaam, ae te natannaomata ae kinaaki bwa Iteraera. Imwin tabeua te tai, a a maeka I-Iteraera i Kanaan ae te aba are e beritanna Iehova nakon Aberaam.—Iotua 11:23.

BAIKARA REIREIARA MAI IAI? Ti kona ni kakoauaa naba bwa e na boni kakoroi bukin ana berita Iehova. E ngae ngke e aki konaaki anne irouia aomata, ma ti kakoauaa bwa “e konai bwaai ni kabane te Atua.”—Mataio 19:26.

Ti reireiaki naba n ana katoto Aberaam bwa ti na kabotoi ara iango, tiaki i aon aroni bwaai rimoa ma i aoni baika ti na karekei n taai aika imwaira. Anne are e a tia reiakinna te mwaane ae arana Jason bwa e na karaoia. E rotakibuaka Jason n te aoraki ae kakaiaki are e a tiku iai ni mate rabwatana. E taku Jason: “I kona n taekinna bwa bon iai taai ake I ururingi iai arou n taai aika nako.” E a manga reitia riki n taku: “E korakora ururingani baika uarereke irou n aron rabwatakini buu ae Amanda.”

Ma e ngae n anne, e onimakina raoi Iehova Jason bwa e na boni kakoroa bukin ana berita, n ikotaki ma te berita are e nang riki ara aonnaba aei bwa te bwaretaiti, ao a nangi maiu ni kororaoi n aki toki iai aomata aika kakaonimaki.a (Taian Areru 37:10, 11, 29; Itaia 35:5, 6; Te Kaotioti 21:3, 4) E kabwarabwaraa imwina ni kangai Jason: “I kauringai n taai nako taai aika moan raraoi aika imwaiu. A na waekoa n toki ao a na bon aki manga oki n riki te rawawata, te raraoma, te nanokawaki ao te bure.” Ai tamaroara ana katoto Aberaam ibukin te onimaki!

[Kwabarabwara mai nano]