Ko Kona ni Kakoauai Kakai Ake A Koreaki n te Baibara?
NGKANA e karakinaki te rongorongo ae kamimi nakoim, ko na onimakina te aomata anne n te aro ae ko na kakoauaa? E aki tau tii onimakinan aron te aomata ane karaki, ma e kainnanoaki naba ataakin raoi rongorongona ae e bwabwaina te koaua. Ni koauana ngkana e aki toki n taekina te koaua nakoim i nanon ririki aika bati ao e tuai man taekina te kewe, ko na bae ni kakoauaa te bwai are e taekinna ngkai.
Bon tii te arona naba ma kakai ake a koreaki n te Baibara. Akea mai buakora ae maiu ngke a karaoaki kakai akanne. Ma ti kona ni kakoauaa bwa a onimakinaki karaki man te Baibara ngkana iai koauaia. N te aro raa? Aikai iango tabeua ake a buoka onimakinan riki rongorongoni kakai ake n te Baibara.
bati mwakuri ni kakai ake a karaoaki n aia tabo botannaomata. N taai tabetai ao a noraki baikanne irouia taani mamataku aika nga ma nga ke mirion ma mirion mwaitiia. (Te Otinako 14:21-31; 19:16-19) A aki karaoaki n te aro ae raba mai mataia aomata.
Kakai aika a kakaraoaki n te aro ae mataata. Bon akea baika a okoro ke bwaai ni katamaroa aika katikimata ake a kabonganaaki ao akea naba iangoan ae a riki baikanne n aroia are a aki toki n nonoraki. Ma ni koauana, a karaoaki kakai ake a koreaki n te Baibara ibukini baika karina n riki ao aia bubutii aomata nako. (Mareko 5:25-29; Ruka 7:11-16) N aroni baika riiriki akanne, tiaki n ae e nang boni karaoia naba teuare e karaoa te kakai n akea bukina.
A aki karaoi kakai aomata ibukini kan atongaia, kamoamoaaia ao karekeani kaubwaia. Ma bon ibukin neboakin te Atua. (Ioane 11:1-4, 15, 40) A kabuakakaaki aomata ake a kani karekei kaubwaia mani kabonganaakin aeka ni kakai aika mwaaka aikai.—2 Uea 5:15, 16, 20, 25-27; Mwakuri 8:18-23.
E kaotaki ni kakaokoroni kakai ake a koreaki n te Baibara bwa tiaki tii aia mwakuri aomata. N te katoto, nein taari ao bwakan te ang, bitakin te ran nakon te wain, tokin te karau ao manga bwakana, kamarurungaia aomata aika aoraki, ao kaureani mataia ake a mataki. A kaotaki ni kakai aikai ni kabane ao aika a bati riki bwa iai te mwaaka ae korakora riki nakon are irouia aomata are e kona n taui aroni kakai aika kakaokoro aikai.—1 Uea 17:1-7; 18:41-45; Mataio 8:24-27; Ruka 17:11-19; Ioane 2:1-11; 9:1-7.
A aki naba taekinna taani kakaaitara ake a nori kakai bwa a aki riki. Ngke e kauta raoraona Iesu are Rataro ao a aki nanououa taani kairiribai man Aaro ni maten Rataro. E aera ngke e kona n riki anne? Ibukina bwa e a kaman taunaki Rataro aua te bong n nako. (Ioane 11:45-48; 12:9-11) I nanon tienture aika bati imwini maten Iesu, ao a teimatoa taani kororongorongo ibukin aia Tua Iutaia ni kakoauaa bwa bon iai mwaakan Iesu aika kamimi. Ma a tii nanououa ibukin nibwani mwaakana akanne. N aron naba anne, ngke a kairaki taan rimwin Iesu nako matan te kaboowi n Iutaia, ao a aki titirakinaki ni kangai: “Kam karaoa te kakai?” Ma a titirakinaki ni kangai: “Kam karaoa aei ni mwaakan antai ke n aran antai?”—Mwakuri 4:1-13.
Ngaia are ko kona ni kakoauai baike a taekinaki n te Baibara ibukini kakai? E mataata ni baike ti a tibwa tia n rinanoi, bwa boni kanikinaean onimakinan rongorongoni kakai ake n te Baibara. Iai riki tabeua bukin onimakinan rongorongo aika n te Baibara aikai. N te katoto, ngkana e taekinaki rongorongon te bwai teuana n te Baibara, e aki toki ni kaotaki iai te tai, te tabo ao ai araia aomata ake a irekereke iai. A mimi naba taan tiriburea te Baibara n aron etin raoi rongorongon rimoa ake iai. A bane ni koro bukin taetae ni burabeti aika bubua ma bubua mwaitiia ake n te Baibara, ni moa man te rongorongo ae uarereke. N ikotaki ma anne, a bati taeka n reirei i nanon te Baibara ibukini kanakoraoan aia reitaki aomata ae nakoraoi, ae te taeka n reirei are e a tia ni buokiia aomata aika kakaokoro nako aia ririki ma aroia. Ngkana e na kanakoraoaki aia reitaki aomata, e a tia ni kakoauaaki bwa bon akea te taeka n reirei ae raoiroi riki nakon ae n te Baibara.
E aera ko aki karekea am tai ni karaua n nenera raoi te Baibara ngkana ko tuai ni kakoauaa? Ngkana e rikirake riki ataakina iroum, e na rikirake naba iai onimakinana. (Ioane 17:17) Ane ko nang ataia bwa ko a kona n onimakini baike a taekinaki ibukini kakai ake a tia n riki ngkoa. Ngkana ko a kakoauai rongorongo akanne, e nang nene iai aan onimakinan te bwai ae taekinaki n te Baibara ae na riki n taai aika a na roko.
[Taamnei n iteraniba 5]
A aki nanououa taani kakaitaraa Iesu ni maten Rataro