“Tooro Iroun Iehova”

1. Kaota kaokoron te iango ae taabangaki ibukin te tautoronaki ma are kaungaaki n I-Rom 12:11.

A IANGOIA aomata aika bati bwa e tautaekanaki iroun ana toka te aomata ae te toro ao e karaoaki mwakuri n iowawa nakoina, ma e rangi ni kaokoro anne ma te toro iroun te Atua. A kateia n aia iango bannan te toro ae tautaekanaki ma te iowawa, e karawawataaki ao e ribuakaaki. Ma e taekinaki n Ana Taeka te Atua ae kairaki koreana rinanon te taamnei bwa e irekereke te tautoronaki ma karaoan te mwakuri ma te kukurei nakon te Toka ae tatangira. Ni koauana, ngke e kaumakia Kristian ake n te moan tienture te abotoro Bauro bwa a na “toro iroun Iehova,” e boni kaungaia bwa a na karaoa te mwakuri ae tabu ae ueke man tangiran te Atua. (I-Rom 12:11) Tera ae irekereke ma te tautoronaki anne? Ti na kanga n rarawa n tautoronaki iroun Tatan ao ana aonnaba? Ao baikara kaniwanga man te kakaonimaki ni beku ngkai tooro ngaira iroun Iehova?

“I TANGIRA AU TOKA”

2. (a) Tera ae na kaumaka te I-Iteraera ae te toro bwa e na rawa ni kainaomataaki? (b) Tera ae kaotaki n ewaran taningan te toro ae kukurei nanona ni beku?

² Ti ota raoi n te aeka n tautoronaki ibukin Iehova are e kantaningaia ibukira n te Tua are anganaki tibun Iteraera iroun te Atua. E riai ni kainaomataaki te toro ae te I-Ebera n ana kaitiua n ririki n tautoronaki. (Te Otinako 21:2) Ma e katauraoa te tua ae kakawaki Iehova ibukin te toro ae tangira raoi ana toka ao e kani waakinaanako ana beku. E na kairia ana toka nakon te mataroa ke rarikini bouan te mataroa; ao n ewara taningana n te bwai n ewa taninga. (Te Otinako 21:5, 6, BG) E rangi ni kakawaki ngkai e irekereke te mwakuri aei ma te taninga. E kaotaki n te taetae n Ebera te boto n iango ibukin te ongeaba n te taeka ae irekereke ma te kakauongo ao te ongora. E kani waakinaanako ana beku ma te ongeaba te toro ae kukurei nanona iroun ana toka. Ti buokaki n aei bwa ti na ota n te bwai ae irekereke ma ara katabu nakon Iehova ae bon te ongeaba ae ueke man tangiran te Atua.

3. E boto i aon tera ara katabu nakon te Atua?

³ Ngkana ti anga nanora nakon te bwabetito ni Kristian, ti a kamani motinnanoia ngkanne bwa ti na beku ibukin Iehova ao n riki bwa ana toro. E ueke katabuani maiura mai nanora man te ongeaba nakon Iehova ao karaoan nanona. Akea ae kairoroira bwa ti na karaoa aei. Ni koauana, a karaoa naba aei rooro n rikirake aika a a tia ni bwabetitoaki imwini motinnanoani katabuani maiuia nakon Iehova, ao ibukin naba kakukureiaia aia karo. E boto katabuani maiun te Kristian man tangiran ara Toka are i karawa ae Iehova. E korea ae kangai te abotoro Ioane: “Bon aei tangiran te Atua, ae ti na kakairi n ana tua.”​—1 Ioane 5:3.

TI KAINAOMATAAKI MA BON TOORO NGAIRA

4. Tera ae ti riai ni karaoia bwa ti aonga n riki bwa “ana toro te raoiroi”?

⁴ Ai kakaitaura ngaira nakon Iehova ngkai ti kona n toro irouna! Ti kainaomataaki man tautoronakira n te bure man onimakinan ana karea ni kaboomwi Kristo. Ma e ngae ngke ti aki kororaoi, ti boni kukurei naba ni mena i aan ana kairiri Iehova ma Iesu. E kabwarabwaraa aei n te aro ae mataata Bauro n ana reta teuana are kairaki koreana rinanon te taamnei ni kangai: “Kam taku bwa kam a tia ni mate ni kaineti ma te bure, ma kam maiu ibukin te Atua rinanoni Kristo Iesu.” Imwin anne e kauring ni kangai: “Kam aki ataia ae ngkana kam teimatoa n anga ngkami bwa kaanga tooro nakon temanna ma n ongeaba irouna, ao kam a riki iai bwa ana toro? Kam kona n toro iroun te bure ae kairiri nakon te mate, ke kam kona n toro iroun te ongeaba ae kairiri nakon te raoiroi. Ma e na katituaraoaki te Atua, ibukina bwa kam toronaki ngkoa n te bure ma kam a ongeaba ngkai ma nanomi ni koaua n te reirei are kam mwiokoaki iai. Eng, kam a riki bwa ana toro te raoiroi kioina ngkai kam a tia ni kainaomataaki man te bure.” (I-Rom 6:​11, 16-18) Noria bwa e taekina te ‘ongeaba man te nano ni koaua’ te abotoro. Ni koauana, ibukina bwa ti katabui maiura nakon Iehova, ti a riki iai bwa “ana toro te raoiroi.”

5. Tera te buaka i nanora ae ti bane n aitara ma ngaia, ao bukin tera?

⁵ Ma e ngae n anne, iai bwaai n tutuki aika ti riai n tokanikai i aoia bwa ti aonga ni kakoroa nanon ara katabu. Ti boni kaaitara ma buaka aika uoua. Te moan, bon aki kororaoira are e buakanna naba Bauro. E korea ae kangai: “E rangi ni kimwareirei nanou n ana tua te Atua, ma I noria bwa iai riki te tua teuana ae mwamwakuri i rabwatau ae buakana te tua ae n au iango, ao e kairai bwa te taenikai nakon ana tua te bure ae mena i rabwatau.” (I-Rom 7:​22, 23) Ibukin aki kororaoira, ti riai n teimatoa ni buakana tangiran te kaibwabwaru. E kaumakira te abotoro Betero ni kangai: “Kaotingkami bwa kam inaomata, ma tai bwaina inaomatami bwa kaanga karabaan te buakaka, ma kaotingkami bwa ana toro te Atua.”​—1 Betero 2:16.

6, 7. E kanga ni karaoa te aonnaba aei Tatan bwa e na taraa n anainano?

⁶ Te kauoua ni buaka ae ti teimatoa n aitara ma ngaia, boni buakanakin ana waaki te aonnaba ae mena i aan aia kairiri taimonio. E maaireira n ana mitiaera Tatan ae te tia tautaekana te waaki n te aonnaba, bwa e na kakorakoraa n urua kakaonimakira ni koaua nakon Iehova ma Iesu. E ukera ana anga n tautoronira n anaakin nanora bwa ti na butimwaea ana kariri ae buakaka. (Wareka I-Ebeto 6:​11, 12.) Te anga teuana ae karaoa iai aei Tatan, boni mani karaoan te waaki n te aonnaba aei bwa e na taraa n anainano n te aro are ti a kani karaoia. E kauring ni kangai te abotoro Ioane: “Ngkana iai ae tangira aia waaki kaain te aonnaba, ao e aki mena tangiran te Tama i nanona, ibukina bwa aia bwai nako kaain te aonnaba, ae ana kaibwabwaru te rabwata ma baika tangiri maata ma te kainikatonga ni kaubwain te maiu aei, a aki riki mairoun te Tama, ma a riki boni mairouia kaain te aonnaba.”​—1 Ioane 2:​15, 16.

⁷ E a taabangaki tangiran te kaubwai n te aonnaba. E kaungaunga Tatan nakon te koaua ae e reke te kukurei man te mwane ae bati. A a tiraua titooa aika rangi ni bubura. E kaungaaki ni katanoata te aroaro ni maiu ae kaatuuaki iai te kaubwai ao te kakukurei. A karekei kawaini wanikiba botaki ni mwamwananga nakon taabo aika katiki nano ake ko kona iai ni mwananga ma aomata aika tabe ma bwaikorakin te maiu. Eng, ti otabwaniniaki ni baika a anaaki iai nanora bwa aongkoa ti na “karaoiroa riki” arora ma e kaatuuaki iai n taai nako baika kakawaki n te aonnaba.

8, 9. Tera te kangaanga ni koaua ae riiriki ao bukin tera?

⁸ E kauringia Kristian Betero ibukia te koraki ake n ekaretia n te moan tienture ake a kakairi n aia iango kaain te aonnaba ni kangai: “A taku bwa e kakukurei katokan nanoia ni kaibwabwarun te rabwata, n te ngaina. Boni baareka ao memea naakai, ao a maiu nanoia ni mwamwanaa te aba n aia reirei aika kewe, ngkana a raoningkami n ami baka n amwarake. Bwa a kamoamoa n taeka ni karang aika akea manenaia, ao a mwamwanaiia te koraki ake a a tibwa buutakinako mairouia taani kakaraoa ae bure, ni kaibwabwarun te rabwata ma mwaan aika kammaira. A berita nakoia bwa a na inaomata, ma a bon toronaki ngaiia n te buakaka, bwa ane konaaki iroun temanna ao e bon tautoronaki irouna.”​—2 Betero 2:​13, 18, 19.

⁹ E bon aki kainaomataaki te aomata ae katoka nanona ni “baika tangiri maata.” Ma e a tautoronaki iroun tokan te aonnaba aei ae aki kona n noraki ae Tatan te Riaboro. (1 Ioane 5:19) Bon iai te kangaanga ni koaua ae kakaiaki ae te tautoronaki n te mataai ni kanibwaibwai ae kangaanga te birinako mai iai.

TE NAKOA AE TEIMATOA AE KAREKEA TE RAUNNANO

10, 11. Antai ni boong aikai ake e mamatania riki Tatan, ao a na kanga reirei aika rietata riki n te aonnaba ni karikii kangaanga nakoia?

¹⁰ E mamatania ni boong aikai naake e karako aia atatai Tatan n aron naba are e karaoia i Eten. E kani mamatania riki rooro n rikirake. E aki kukurei Tatan ngkana e anga nanona te roro n rikirake ke temanna riki bwa e na toro iroun Iehova. E tangiria te tia kairiribai nakon te Atua bwa e na kabwakaia aomata nako ake a katabui maiuia nakon Iehova bwa a na aki kakaonimaki ni koaua ao n aki kaotiota tangiran te Atua.

¹¹ Ti na okira te katoto ibukin te toro are e kariaia ewarakin taningana. E boni bae ni maraki te toro aei i nanon te tai ae uarereke, ma e waekoa n toki ike e a riki iai te kanikina ae teimaan ibukin nanona ni kan toronaki. E kona ni kangaanga iroun te roro n rikirake rinean te maiu ae kaokoro ma are a maiuakinna tabonrorona ao e boni maraki naba iai. E kaungaaki te iango are e rau nanon te aomata ae iai nakoana ae teimatoa n te aonnaba aei iroun Tatan, ma a riai Kristian n iangoa raoi kakawakin raun nanoia ni baika a kainnanoi ibukin aia onimaki. E reirei Iesu ni kangai: “A a kukurei akana ataia bwa a kainnanoa te Atua.” (Mataio 5:3) A katabui maiuia Kristian ibukini karaoan nanon te Atua ma tiaki Tatan. A kimwareirei n ana tua Iehova ao a ururingnga ni ngaina ao ni bong. (Wareka Taian Areru 1:​1-3.) Ma e ngae n anne, a bati ni boong aikai reirei aika rietata riki n te aonnaba aika tii teutana iai ana tai ana toro Iehova ibukini kananoan ana iango ao raun nanona ni kaineti ma kainnanoan te Atua.

12. Tera te motinnano ae a kaitaraa rooro n rikirake aika bati ni boong aikai?

¹² E kona te toka n te aonnaba aei ni karikii kangaanga nakoni waakini maiun te Kristian ae te toro. E titiraki Bauro n ana moan reta nakoia kaaini Korinto ni kangai: “Ko weteaki ngke te toro ngkoe?” E a manga angania te taeka n reirei ni kangai: “Tai katabeaiangako iai, ma ngkana e kona n reke inaomatam, ao karekea.” (1 I-Korinto 7:21) E kainnanoaki riki te kainaomataaki man te tautoronaki. Ni boong aikai, bon iai n aaba aika bati te tua ibukini mwaitin te ririki ae na kabanea te teei n reirei. Imwin anne, a inaomata ataein te reirei ni karaoi aia motinnano. Ngkana e reitaanako ana reirei temanna ibukini karekean nakoana ae teimatoa n te aonnaba aei, e a kona n tiatianaki iai inaomatana n ukera kabwaninan ana tai n te mwakuri ni minita.​—Wareka 1 I-Korinto 7:23.

TE REIREI AE RIETATA RIKI KE AE MOAN TE RAOIROI?

13. Tera te reirei ae a na kakabwaiaaki riki iai ana toro Iehova?

¹³ E kauringia Kristian ake i Korote Bauro ni kangai: “Kam na tarataraingkami bwa e kaawa n iai temanna ae e na raweingkami bwa konana ni wanawanan aon te aba ao n te mwamwanaa te aba ae akea uaana, ae boto i aon aia katei nikawai aomata ao i aoni baike a boboto iai aia waaki kaain te aonnaba, ma tiaki ni kaineti ma Kristo.” (I-Korote 2:8) E a kai noraki “wanawanan aon te aba ao n te mwamwanaa te aba ae akea uaana” n aia iango kaain te aonnaba ni boong aikai ae boutokaaki irouia taan rabakau aika bati. A aki toki n otinako ataein te reirei ae rietata riki are aki kaatuuaki iai reiakinan aron te mwakuri ma rabakauia ni mwakuri ae karako ke bon akea, n te aro are a aikoa tauraoi ni kaaitarai baika riiriki ni maiuia. Ni kaitaraan anne, a rinea te reirei ae na buokia ni karikirakei rabakauia ni mwakuri ana toro Iehova bwa a aonga ni kona ni kateimatoa maiuia ae bebete ae te beku ibukin te Atua. A mutiakina te reirei ni kairiri are e anganaki Timoteo irouni Bauro ae kangai: “Ma ni koauana, e boni korakora reken aron te aomata n tangiran te Atua n ikotaki ma te raunnano. Mangaia ae ngkana iai kanara ma karabaara ao katanara, ao a na rau nanora ni baikai.” (1 Timoteo 6:​6, 8) N oneani mwin are a na karekei aia beeba aika bubura n te reirei ao nakoaia ibukini kamoamoaaia, a boni kaatuui aia iango Kristian ni koaua i aoni karekean “reeta ibukini kakoauaani” karaoan te mwakuri ni minita n aron aia kabanea ni kona.​—Wareka 2 I-Korinto 3:​1-3.

14. Ni kaineti ma I-Biribi 3:8, tera aroni Bauro n iangoa mwiokoana ae te toro iroun te Atua ao Kristo?

¹⁴ Iangoa rongorongon te abotoro Bauro. E reireiaki iroun te tia reirei n te Tua ae te I-Iutaia ae Kamariera. E kona ni kabotauaki te reirei ae reke irouni Bauro ma te reirei n te kuura ae rietata ni boong aikai. Ma tera aroni Bauro n iangoa aei ngke e kabotaua ma mwiokoana ae te toro iroun te Atua ao Kristo? E korea ae kangai: “I taku bwa e bon riai buani bwaai ni kabane ibukin te atatai ae moanibaan te raoiroi ae taekan au Uea ae Kristo Iesu.” E manga taku riki: “I kariaia buani bwaai ni kabane ibukin teuaei, ao I tarai bwa maange bwa I aonga ni karekea Kristo irou.” (I-Biribi 3:8) A kona ni buokaki rooro n rikirake aika Kristian ma aia karo aika mamaaka te Atua man ana iango Bauro, bwa a na karaoi aia motinnano aika manena ni kaineti ma te reirei. (Nori taamnei.)

KAREKEA KAKABWAIAAM MAN TE REIREI AE MOAN TE RAOIROI

15, 16. Tera te reirei ae katauraoaki n ana botaki Iehova, ao tera ae kaatuuaki iai?

¹⁵ Tera aron reirei aika rietata riki n te aonnaba n taabo aika bati? A namakina te inaomata ni karitei ao ni kaotiota unia nakon te tautaeka ke taani kairiri tabeman n taai tabetai? (I-Ebeto 2:2) Ni kaitaraan anne, e katauraoaki te reirei ae moan te raoiroi n ana botaki Iehova n te ekaretia ni Kristian ae rau. Ti bane ni kona ni karekei kakabwaiaara man Te Kuura ni Kataneiai Ibukia Taan Uarongorongo ae kakaraoaki ni katoa wiki. Iai riki irarikin anne reirei aika okoro ibukia mwaane aika bwaiania ae (te Kuura n Reirei n te Baibara Ibukia Taari Mwaane Aika Akea Buuia) ao ibukia naba taanga aika bwaiania ae (te Kuura n te Baibara Ibukia Taanga Aika Kristian). Ti buokaki n ongeaba iroun Iehova ae ara Toka i karawa mani kuura akanne.

¹⁶ Ti kona n ukeri kakabwaia n taamnei aika rangi ni bati n te Watch Tower Publications Index ke te Watchtower Library man te CD-ROM. E kaatuuaki taromaurian Iehova n te reirei man te Baibara akanne. Ti reireiaki iai arora ni kona ni buokiia aomata bwa a na raoiakinaki ma te Atua. (2 I-Korinto 5:20) Ibukin aei, a a kona ni buokaki iai bwa a na manga reireinia tabemwaang.​—2 Timoteo 2:2.

KANIWANGAN TE TORO

17. Baikara kakabwaia imwin rinean te reirei ae moan te rietata?

¹⁷ Iai uoman tooro aika kakaonimaki n ana kaikonaki Iesu ibukin tarena ake a kamoamoaaki ao n uataboa kimwareirein aia toka ngke a a anganaki mwiokoaia aika bati riki. (Wareka Mataio 25:​21, 23.) E karekea te kimwareirei ao taiani kakabwaia rinean te reirei ae moan te rietata ni boong aikai. Iangoa ana katoto Michael. E rangi n raoiroi mwin ana kekeiaki n te reirei ao e a kaoaki irouia ana tia reirei bwa a na maroro ma ngaia bwa a kan ataa nanona ibukini kaean te reirei ae rietata riki. A mimi irouni Michael bwa e rawa n te iango anne ma e rineia bwa e na ira te kataneiai n te tai ae kimototo i aoni karaoan te mwakuri bwa e aonga ni waekoa ni kona ni boutokaia ibukin ana regular bwaiania. E namakinna teuaei bwa iai te bwai ae bua mairouna? E taku: “A rangi ni kakawaki reireiau mairoun te Atua n au tai ni bwaiania ao mwiokoau ae te riki bwa te unimwaane n te ekaretia. A rangi ni kakawaki riki kakabwaia ao mwiokoau aika I karekei nakon te mwane are I kona ni karekea. I rangi ni kukurei bwa I a tia ni motinnanoia bwa N na aki ukera te reirei ae rietata riki.”

18. Tera ae kaungako bwa ko na rinea te reirei ae moan te raoiroi?

¹⁸ Ti reireiaki ana kantaninga te Atua n te reirei ae moan te rietata, ao ni buokaki naba iai n riki bwa ana toro Iehova. E kaota nakoira te kantaninga ibukini ‘kainaomataani baika karikaki man te tautoronaki i aan te mka,’ ao e na reke “te inaomata ae rianako arona ae reke irouia natin te Atua” teutana imwin teutana. (I-Rom 8:21) Ma ae kakawaki riki, ti reiakina iai arora ae moan te tamaroa ibukini kaotiotan tangiran ara Toka i karawa ae Iehova.​—Te Otinako 21:5.