Te Taromauri n Utu—Ko Kona ni Karaoia Bwa E na Kakukurei Riki?
E taku te karo temanna i Brazil: “A rangi ni mamate nanora ni maroro n tain te Taromauri n Utu n te tairiki n te aro are e a kona ni bwakanako te tai iai ngkana I aki katokiia au utu.” E taekina natina te mwaane ae tebwina ana ririki atun te utu temanna i Tiaban, bwa e kan reitaanako te taromauri n utu ao n aki tabe ma te tai. Bukin tera? E taku te karo anne: “E rangi n unga nanona ao anne are e a karika kukureina.”
Ni koauana, a aki bane ataei n rangi n unga nanoia ao a kona tabeman ni kaota nanoia bwa akea kukureia n te Taromauri n Utu. Bukin tera? E taekina te iango aei te karo temanna i Togo: “E aki riai ni kabotu taromaurian Iehova.” Ngkana ngaia anne, e kona n iangoaki riki aroni kairan te Taromauri n Utu? A bati utu aika a taraa te Taromauri n Utu n aron are e taekinna Itaia ibukin te bongi n Taabati bwa “te bongi ni kukurei.”—Itaia 58:13, 14, BG.
A ataia kaaro aika Kristian bwa a riai ni kateimatoa te rau ngkana a na karekea te kukurei n aia Taromauri n Utu. E taekinna Ralf are iai natina aine aika teniman ao temanna te mwaane bwa aia Taromauri n Utu bon tiaki tii te reirei ma ai aron ae bon te mamaroro irouia n tatabemania nako. Ni koauana, e kona ni kangaanga n tabetai tuangakia kaain te utu bwa a na tangira te reirei ao ni kananoa aia iango iai. E taekina ae kangai te tina temanna: “Bon akea ungan nanou n taai nako n te Taromauri n Utu bwa e aki kakukurei n aron ae I tangiria.” Ko kona ni kaitaraa te kangaanga anne?
BAIKA KAKAOKORO AO NI KAI BITAKI
E taku te karo i Tiaman ae uoman natina: “Ti riai ni kai bitaki.” E taku Nei Natalia ae uoman natina: “Te bwai ae rangi ni kakawaki ibukin ara utu boni karaoani baika kakaokoro, kakaokoro ao ni kakaokoro.” A bati utu aika tibwatibwaa aia Taromauri n Utu nakoni mwakoro aika kakaokoro. E kabwarabwaraa ni kangai Cleiton ae te karo i Brazil ae uoman natina aika tebwi tabun aia ririki: “E kona ni kakukurei riki ao ni karekei aia tai kaain te utu ni kabane n anga aia ibuobuoki.” Ibukina bwa a tibwai taai ibukin te reirei kaaro, a a kona ni kaatuua riki aia iango i aoni baika a kainnanoi natiia n tatabemania nako ngkana e rangi ni korakora kakaokoron aia ririki. A kona kaaro n taekini baika a kainnanoi kaain te utu n tatabemania ao ni kona ni kai bita te reirei are a rineia ma aroni karaoana.
Baikara bwaai aika karaoaki n utu tabeua ibukini kanakoraoani baika kakaokoro? A moana aia Taromauri n Utu tabeman n te anene nakon Iehova. E taku Juan i Mexico: “E reke iai te kukurei ao katauraoan ara iango ibukin te reirei ae na maroroakinaki.” A rinei anene ana utu teuaei aika kaineti ma reirei tabeua ake a na maroroakinaki n te tairiki anne.
A bati naba utu aika a uaia ni wareka mwakoron te Baibara. Ibukin te kakaokoro, a toa kaain te utu ma baika a na wareki man aia taeka aomata aika kakaokoro ake a mwaneweaki ni mwakoron te Baibara. E taekinna te karo mai Tiaban bwa “e kuri ni kangaanga n te moantai bwa e na wareware n aron anne.” Ma a kukurei natina mwaane aika uoman n noriia aia karo bwa a kukurei n te bwai are a karaoia ma ngaiia. Tabeman utu a boni karaoi kaotioti ni kaineti ma karaki n te Baibara. E taku Roger ae te karo i Aberika Maiaki ae uoman natina mwaane: “A a aki toki [natira] n nori baika ti tarariaoi ngaira kaaro ni kaineti ma rongorongon te Baibara.”
Te anga riki teuana ibukini karaoani baika kakaokoro bon te kaai ni mwakuria te bwai teuana, n aroni karaoani katotongan ana aake Noa ke ana tembora Toromon. A kona ni kaunga mwakuri akanne bwa a irianaki ma te kakaae. N te katoto, a karaoa aia takaakaro i aon te raubaba n te katangaina ni kaineti ma mwanangan te abotoro Bauro ni mitinare, te utu teuana mai Atia ae te teinnaine ae nimaua ana ririki ma ana karo ao tibuna te unnaine. A a tia utu tabeua riki ni karaoa aia takaakaro i aon te raubaba ni kaineti ma rongorongo aika n te boki ae Te Otinako. E taku Donald ae 19 ana ririki i Togo: “E a kakukurei riki ara Taromauri n Utu ao ara utu naba” mani karaoani baika kakaokoro. Ko kona n iangoa karaoan te bwai teuana ae e na kona ni kakukurei riki iai am Taromauri n Utu?
KAKAWAKIN TE KATAURAOI
E ngae ngkai a kona ni kaunga ao n rangi n ibuobuoki karaoani baika kakaokoro ao kai bitakini kanoan te Taromauri n Utu, ma e kainnanoaki naba te katauraoi irouia ni kabane. N tabetai, a a kua ataei, ngaia are a riai kaaro ni kaman iaiangoa te reirei are a rineia ao ni karekea aia tai ae tau ibukin aia katauraoi raoi. E taku te karo temanna: “A karekei reirei aika rangi ni manena riki au utu n tatabemania nako ngkana I katauraoi.” Ao te karo temanna i Tiaman, e a kaman tuangia kaain ana utu te reirei are a na rinanona ni wiki ake imwaia. Ma te karo riki temanna ae onoman natina aika kaka tebwi tabun aia ririki i Benin, e a kamani katauraoi titiraki ngkana e bairea kanoan aia Taromauri n Utu bwa a na matakuakina te DVD ae boto man te Baibara. Ni koauana, bon iai kaokoroni kakukurein ara Taromauri n Utu man te katauraoi.
Ngkana a a kaman ataa te reirei ae na rinanoaki n te tai ae imwaia kaain te utu, a na kona ni maroroakinna i nanon te wiki, ike e a kakorakoraaki iai ingaingan nanoia. Ao ngkana a toa n tatabemania nako n te bwai ae a na karaoia, e na kona temanna irouia n namakinna bwa bon ana Taromauri n Utu.
TE KAKORAKORA NI KATOATAI
A bati utu aika kaaitara ma kangaangani karaoan aia Taromauri n Utu ni katoatai.
A a bati kaaro aika kabanea te tai ae bati ni mwakuri tii ibukini karekeani maiuia aia utu. N te katoto, e kitana mwengana te karo temanna i Mexico n te aoa onoua n te moaningabong ao e oki n te aoa wanua n te tairiki. Irarikin anne, iai taai ake e a kainnanoaki iai bitakin tain te Taromauri n Utu ibukin te botaki teuana riki n te ekaretia.
Ma e ngae n anne, ti riai ni kakorakoraira ni karaoa ara Taromauri n Utu ni katoatai. E taekina aei Loïs ae tebwi ma teuana ana ririki i Togo ibukin aia kakorakora ana utu: “E ngae ngke n tabetai ti rimwi ni waakina ara Taromauri n Utu ibukini baika karina n riki n te bong anne, ma ti bon teimatoa ni karaoa ara Taromauri n Utu.” Ko a kona n ota ngkai bwa e aera ngkai a bairea aia Taromauri n Utu ni moan te wiki utu tabeua. Ngkana iai te bwai ae riki ae aki kantaningaaki, a kona ni manga bairea aia Taromauri n Utu rimwi riki i nanon naba te wiki anne.
N aron ae kaotaki ni kabwarabwaraan te “Taromauri n Utu,” boni kanoan naba ami taromauri nakon Iehova. A bia ‘angakarea ni matanriaia n aroia kaao mwaane’ kaain utu ni kabane nakon Iehova ni katoa wiki. (Otea 14:2, BG) Ao e bia kakukurei te tai anne irouia kain te utu n tatabemania nako ngkai ‘boni korakoraia kimwareireia iroun Iehova.’—Neemia 8:9, 10, BG.