Kakairi Irouia Burabeti n Aron Iona
1. Baikara aroaron Iona aika raraoi?
1 Tera ae e na rio n am iango ngkana ko iangoa te burabeti ae Iona? A kona n iangoia tabeman bwa e kimamaaku ke e imanono. Ma e ngae n anne, e kaotiota raoi te nanorinano, te ninikoria, ao te nano ni kan anga ngaia. Ti na kanga ni ‘kakairi’ n aroaron Iona aika raraoi?—Iak. 5:10.
2. Ti na kanga ni kakairi n nanorinanon Iona?
2 Te Nanorinano: Ni koauana, e birinako Iona man te aono are e mwiokoaki iai. E aki kamimi aei bwa e rangi n ataaki Aturia ae korakora iai te tiritiri, ao e aranaki Ninewe bwa “te kawa ae katutu raraa.” (Naum 3:1-3, BG) Ma e ngae n anne, e anga te reirei ni kaetieti Iehova nakon Iona are e kaotiota te nanorinano n arona ni butimwaea te mwioko are e a manga anganaki te kauatai. (TaeRab. 24:32; Iona 3:1-3) E ngae ngke e birinako n te moantai, ma e karaoa nanon Iehova. (Mat. 21:28-31) Ti karaoa naba aron anne n ninikoria n tataekina te rongorongo ae raoiroi, e ngae ngkana ti anganaki te reirei ni kaetieti ke ti mwiokoaki n te aono ae karuanikai?
3. Iteran am mwakuri ni minita raa ae e kainnanoa te ninikoria ao te nano ni kan anga boni ngkoe?
3 Te Ninikoria ao te Nano ni Kan Anga: E kukurei n anga maiuna Iona ngke e a ataia bwa e a ruanikai maiuia kaain te kaibuke n ana rinerine ae buakaka are e karaoia. (Iona 1:3, 4, 12) Imwina, e nakonako n te kaawa ae abwabwaki ni kabane tao ni kakaaea te tabo ae angaraoi ibukin tataekinan ana motikitaeka Iehova, ni kakororaoani mwiokoana i Ninewe. E oti ni mwakuri akanne bwa e aki kimamaaku ana burabeti te Atua, ma e ninikoria! (Iona 3:3, 4) Tera arora ni boong aikai? E kainnanoaki te ninikoria mairoun te Atua bwa ti na tataekina te rongorongo ma te ninikoria ngkana ti kaitaraaki. (Mwa. 4:29, 31) E kainnanoaki naba te nano ni kan anga boni ngaira ni kamanena ara tai ao kaubwaira n te mwakuri ni minita.—Mwa. 20:24.
4. Bukin tera bwa ti riai ni karekea ara tai n iaiangoi aia katoto aika raraoi ana burabeti Iehova?
4 Ni katoaa te tai are ko wareka iai rongorongon temanna mai buakoia ana burabeti Iehova, ko na kakabwaiaaki ngkana ko iaiangoi baika riiriki ni maiuia. Titirakiniko ni kangai: Tera arou ae N na karaoia? N na kanga ni kakairi n aroarona aika raraoi? (Ebera 6:11, 12) A na maroroakinaki ni kaongora man Ara Mwakuri ni Minita aika imwina riki, reirei aika kakawaki aika ti kona n reiakin mairouia tabeman riki ana burabeti aika kakaonimaki Iehova.