Kabatiaa Am Tai ma Naake A Tangira Iehova

E aera bwa ti riai ni kabatiaa ara tai ma naake a tangira Iehova? Ibukina bwa a kona raoraora ni kaungaira bwa ti na karaoi mwakuri aika raraoi ke aika buakaka. (TNR 13:20) N te katoto, e karaoa “ae eti i matan Iehova” te Uea ae Ioati ngke e kabatiaa ana tai ma te Ibonga ae Rietata ae Ieoiata. (2Ro 24:⁠2) Imwini maten Ieoiata, e a kitana Iehova Ioati ibukina bwa e iraorao ma aomata aika buakaka.​—2Ro 24:​17-19.

N te moan tienture C.E., e kabotaua te ekaretia ni Kristian te abotoro Bauro ma “te auti ae bubura” ao kaain te ekaretia ma “mwangko,” ke bwain nanon te auti. Ti na teimatoa n riki bwa “te mwangko ae e na kabonganaaki n te aro ae rine” ngkana ti rarawa n iraorao ma naake a karaoi baike e aki kukurei iai Iehova, e ngae naba ngkana kaain ara utu ke kaain te ekaretia. (2Ti 2:​20, 21) Ngaia are ti bia teimatoa n iraorao ma naake a tangira Iehova ao te koraki ake a kaungaira bwa ti na beku iroun te Atua.

MATAKU N TE TAAMNEI AE REIREINIKO N RARAWA NAKON TE IRAORAO AE BUAKAKA, AO KAEKAI TITIRAKI AIKAI:

• Baikara aanga tabeua ake ti kona n iraorao iai ma aomata aika buakaka n akea ataakina iroura?

• Tera ae buokiia Kristian ake teniman ake n te taamnei bwa a na katoka aia iraorao ae buakaka?

• Baikara ana boto n rerei te Baibara aika kona ni buokiko n rineiia raoraom ma te wanawana?