Karekean Ara Iraorao ae Kaan i Marenara Bon te Bwai ae Raoiroi Ibukira!

1-2. Tera te bwai teuana ae kakawaki iroun Iehova, ao tera ae e tangirira bwa ti na karaoia?

IAI bwaai tabeua aika kakawaki riki iroun Iehova nakon arora nakoia aomata tabemwaang. E angareirei Iesu bwa ti riai n tangiriia raora n aomata n aron tangirara i bon iroura. (Mat. 22:​37-39) E nanonaki naba iai bwainan te akoi nakoia naake a aki beku iroun Iehova. Ngkana ti kaotiota te akoi aei, ti a kakairi iai iroun Iehova ae te Atua, are “e kaotaa taai i aoia aomata aika buakaka ma aika raoiroi, ao e kabwakaa te karau i aoia aomata aika eti aroia ma aika aki eti.”​—Mat. 5:45.

² E ngae ngke e tangiriia aomata ni kabane Iehova, ma e tangiriia riki naake a kakaraoa ae eti. (Ioa. 14:21) E tangirira bwa ti na kakairi irouna. E kaumakira bwa ti na ‘kakorakoraa ara tangira’ ibukia taari n te onimaki ao ni bwaina “te itangitangiri.” (1Bet. 4:8; IRom 12:10) Titeboo te aeka n tangira ao n namakin anne ma are ti namakinna ibukia ara koraki aika ti tangiriia ke raoraora ae ti kaan ma ngaia.

3. Tera ae ti riai n ururingnga ibukin te tangira?

³ Te tangira kaanga ai aron te aroka, ae kainnanoa ribanaakina bwa e aonga n rikirake. E anga te reirei ni kairiri Bauro nakoia Kristian ni kangai: “Kam na kateimatoa ami itangitangiri n tari.” (Ebera 13:1) E tangirira Iehova bwa ti na teimatoa ni karikirakea tangiraia tabemwaang. E na maroroakinaki n te kaongora aei bukina ngkai ti riai ni karekea ara iraorao ae kaan riki ma raora n te onimaki ao ti na kangaa n teimatoa ni karaoa anne.

BUKINA NGKAI TI RIAI NI KAREKEA ARA IRAORAO AE KAAN RIKI I MARENARA

4. N aron ae kabwarabwaraaki n Taian Areru 133:​1, ti na kangaa n teimatoa ni kaotia ae kakawaki iroura ara botaki n itaritari ae katiteuanaaki? (Nori naba taamnei.)

⁴ Wareka Taian Areru 133:1. Ti boraoi n iango ma te tia areru are koreia ae e “raoiroi” ao n ‘rerei’ raoraonakia naake a tangira Iehova. Ma ti kona ni kakeaa bongani katiteuanaakira ni Kristian n aron te aomata ae kakeaa bongan tamaroan te aroka ae e nonoria ni katoabong. Ti aki toki n nonoriia tarira n te onimaki tao iratai n te wiki. Ti na kangaa n teimatoa ni kaotia ae a kakawaki iroura? E na ririkirake tangiraia taari n te onimaki iroura ngkana ti iaiangoa kakawakia n tatabemania nako n te ekaretia ao iroura.

5. Tera rotakia tabemwaang n ara botaki n itaritari ae tatangira?

⁵ A rangi n anaaki nanoia tabeman ake a a tibwa kaea ara bobotaki, n ara itangitangiri i marenara. Ibukin anne a kona ni kakoauaa ae a a kunea te koaua. E taku Iesu: “Ao ane a na ataingkami aomata ni kabane bwa bon taan rimwiu ngkami, n aei: ngkana kam itangitangiri.” (Ioa. 13:35) Iangoa rongorongon Chaithra, ae ataein te reirei n te kuura ae rietata ae reirei ma Ana Tia Kakoaua Iehova. E butimwaea te kakao nakon te bwabwaro. Imwini kaean te moani bong ao e a taku nakon ana tia reirei n te Baibara: “I tuai man irabwati ma au karo. Ma n ami bwabwaro ao I rabwataki 52 te tai n tii tebongina! I namakina ana tangira Iehova rinanoia kaain te utu n te onimaki aei. I kan riki bwa kaain te utu anne.” E teimatoa n rikirake Chaithra ao e bwabetitoaki n 2024. Eng, ngkana a nori ara mwakuri aika raraoi naake a boou, n ikotaki naba ma ara tangira i marenara, a kairaki iai n angiin te tai bwa a na beku iroun Iehova.​—Mat. 5:16.

6. Ti na kangaa ni kamanoaki n ara iraorao ae kaan ma taari n te onimaki?

⁶ E kona n riki bwa kamanoara ara iraorao ae kaan ma taari n te onimaki. E kaungaia raona ni Kristian Bauro ni kangai: “Kam na teimatoa n ikaungaunga i marenami ni katoabong . . . bwa e kaawa temanna iroumi ni kamatoatoaaki nanona ni mwaakan te bure ae mwamwanaa te aba.” (Ebera 3:13) Ngkana a bwara nanora ao e a moanna n tibanako waera mani kawain te raoiroi, e kona Iehova ni kaira raora n te onimaki temanna bwa e na katauraoa buokara ae ti kainnanoia. (TaiAre. 73:​2, 17, 23) Bon te bwai ae raoiroi ibukira te kaungaunga anne.

7. Tera irekereken te tangira ao te katiteuanaaki? (I-Korote 3:​13, 14)

⁷ Ti kaaina te kurubu n aomata aika mwakuri korakora ni kaotiota te tangira i marenaia ngaia are ti karekei kakabwaia aika bati. (1Ioa. 4:11) N te katoto, ti kairaki n te tangira bwa ti na ‘teimatoa n taotaon nanora i marenara,’ ao anne ae karekea katiteuanaakira ni Kristian. (Wareka I-Korote 3:​13, 14; IEbe. 4:​2-6) Ngaia are ti namakina riki te kukurei n ara bobotaki, nakoia aomata n te aonnaba.

KAOTIOTA TE IKARINERINE

8. Tera are e karaoia Iehova ni buokira ni karekea katiteuanaakira?

⁸ Bon te kakai katiteuanaakira ni katobibia te aonnaba. E karekea anne Iehova nakoira e ngae ngke ti aki kororaoi. (1Kor. 12:25) E taekinaki n te Baibara bwa ti “reireinaki iroun te Atua bwa [ti] na itangitangiri.” (1Tet. 4:9) Nanon aei bwa e tuangira Iehova rinanon te Baibara te bwai ae ti riai ni karaoia bwa ti aonga ni kaan riki i marenara. Ti kona n “reireinaki iroun te Atua” ngkana ti neneri raoi ana angareirei ao ni maiuakini. (Ebera 4:12; Iak. 1:25) Ao anne raoi te bwai ae a kakorakoraia Ana Tia Kakoaua Iehova ni karaoia.

9. Tera reireiara n I-Rom 12:​9-13 ibukini kaotiotan te ikarinerine?

⁹ Ti kangaa n reireinaki n Ana Taeka te Atua bwa ti na karekea ara iraorao ae kaan riki i marenara? Iangoa ana taeka Bauro i aon aei, ae kaotaki n I-Rom 12:​9-13. (Warekia.) Nori ana taeka aika “biririmoa ni kaotiota te ikarinerine.” Tera ae nanonaki iai? Ti riai ni biririmoa ni kaotiota te “itangitangiri” nakoia tabemwaang n aanga aika bati n arora ni kabwarai buure, n akoakoiia iruwa, ao n tituaraoi. (IEbe. 4:32) Ko aki riai n tataningaa tarim n te onimaki bwa ngaia ae e na karekea ana iraorao ae kaan ma ngkoe. Ko kona ni “biririmoa” ni karaoia. E taku Iesu: “E kakukurei riki te anga nakon te anganaki.”​—Mwa. 20:35.

10. Ti na kangaa n taningamarau ni “kaotiota te ikarinerine”? (Nora naba te taamnei.)

¹⁰ E kakaongora bwa imwin tuangakira irouni Bauro are ti na biririmoa ni kaotiota te ikarinerine ao e a manga kaumakira bwa ti na “taningamarau, ao [n aki] taningaroti.” Te aomata ae taningamarau e ingainga nanona ao e mwakuri korakora. Ngkana e anganaki te mwakuri ae e na karaoia ao e karaoia raoi. Ti kaungaaki n Taeka N Rabakau 3:​27, 28 ae kangai: “Tai taua te bwai ae raoiroi mairouia akana ko riai n angania, ngkana iai korakoram ni kona n ibuobuoki iai.” Ngaia are ngkana ti nora temanna ae kainnanoa buokana, ti karaoa ae ti konaa ni buokia iai. Ti aki tabwarabwara ke n iangoia bwa e na boni karaoia temanna.​—1Ioa. 3:​17, 18

11. Tera ae kona ni buokira ni karekea ara iraorao ae kaan i marenara?

¹¹ Te anga riki teuana ae ti kona ni kaotiota iai karineaia tabemwaang, bon arora ni waekoa ni kabwarai aia bure ngkana a kaunira. E kangai I-Ebeto 4:26: “Tai kariaia unimi bwa e na ooaki ni bungin taai.” Bukin tera? E taekinaki ni kibuna 27 bwa ngkana ti karaoa anne ti “kakatokaa boran te Riaboro” iai. E aki toki Iehova n tutuangira n ana Taeka bwa ti na ikabwarabure. Ti kaungaaki n I-Korote 3:13 bwa ti na “teimatoa . . . [n] tauraoi n ikabwarabure.” Teuana mai buakon aanga aika ti kona ni karekea iai ara iraorao ae kaan ma tabemwaang bon tarariaoan aia kairua ao baika kaunira iai. Karaoan aei ti buoka iai “te aro ni katiteuanaaki rinanon te taamnei n te bwai ni kabaebae are te raoi.” (IEbe. 4:3) E mataata raoi bwa e kona te kabwarabure ni karekea te katiteuanaaki ao te raoi.

12. E kangaa Iehova ni buokira bwa ti na kabwarai buure?

¹² E koaua ae e kona ni kangaanga kabwaraan aia bure naake a a tia ni kammarakira. Ma ti kona n tokanikai n ana ibuobuoki taamnein te Atua. Imwini kaungaakira bwa ti na ‘itangitangiri i marenara’ ao n “taningamarau,” ti a manga kaungaaki n te Baibara ni kangai: “Ma kam na ingainga rinanon taamnein te Atua.” Ae nanona bwa ti kona n rangi n ingainga man taamnein te Atua. (IRom 12:11) Ngaia are e kona taamnein te Atua ni buokira bwa ti na itangitangiri i marenara ao n tauraoi n ikabwarabure. Anne bukina ngkai ti kakorakoraira ni bubutiia Iehova bwa e na buokira.​—Ruka 11:13.

“E RIAI N AKEA TE IRARAURE I MARENAMI”

13. Tera ae kona ni karika te iraraure i marenara?

¹³ E kaainaki te ekaretia irouia “aeka n aomata nako” aika a roko man taabo aika kakaokoro. (1Tim. 2:​3, 4) Ngkana ti aki taratara raoi, a kona arora aika kakaokoro aikai ni karika te iraraure ni baika ti karaoi iai oin ara motinnano n aroni kunnikaira ma katamaroaara, ara bwainnaoraki ke ara kaakibotu. (IRom 14:4; 1Kor. 1:10) Ibukina bwa e a tia n reireinira te Atua bwa ti na itangitangiri, ti riai n taratara raoi bwa ti na aki imanonoa ae raoiroi riki ara motinnano nakoia ake tabemwaang.​—IBir. 2:3.

14. Tera ae ti riai ni kakorakoraira ni karaoia n taai nako, ao bukin tera?

¹⁴ Ti kona naba n totokoa rikin te iraraure n te ekaretia ngkana ti kakorakoraira ni kabebeteia ao ni kaungaia tabemwaang n taai nako. (1Tet. 5:11) N taai aika tibwa nako, ao a bati ake a katoka aia beku ke a kanakoaki man te ekaretia aika a manga kaokaki ngkai. Ti kukurei ni butimwaeiia! (2Kor. 2:8) Iangoa te baere riki nakon te tari te aine temanna are e a manga roko n te Tabo n Taromauri imwin aki rorokona i nanon tebwina te ririki. E taku neiei, “I butimwaeaki ma te moangare ao I kamauraki.” (Mwa. 3:19) Tera rotakin neiei n te mwakuri n akoi ae uarereke aei? E taku, “I namakinna bwa e kairai Iehova ni baina nakon te kukurei.” Ngkana ti riki bwa taani kaungaunga nakoia aomata nako, ti kona ni kamanenaaki irouni Kristo bwa ti na kabebeteia naake a “korakai ma n rawawata.”​—Mat. 11:​28, 29.

15. Tera te anga teuana ae ti kona ni boutokaa iai te katiteuanaaki? (Nora naba te taamnei.)

¹⁵ Te anga teuana ae ti kona ni boutokaa iai te katiteuanaaki boni man ara taetaenikawai. E kangai Iobi 12:11: “Tiaki e tuoi raoi taeka te taninga, n aron te newe ngkai e nora kangkangin te amwarake?” N aron te tia kuuka ae bwakuaku ae nora moa kangkangin ana kuuka bwa e boni kangkang imwain ae e angania aomata, e raoiroi naba ngkana ti iaiangoa raoi te bae ti na taekinna imwain taekinana. (TaiAre. 141:3) Tiara bwa e na kaungaunga n taai nako te bae ti na taekinna, e na kabebetenano, ao a na “buokaki iai akana ongora.”​—IEbe. 4:29.

16. Antai riki aika riai ni kaungaunga n aia taetaenikawai?

¹⁶ A riai riki buumwaane ao kaaro n taraia raoi bwa e na kaungaunga aia taetaenikawai. (IKoro. 3:​19, 21; Tit. 2:4) A riai naba unimwaane n riki bwa taani kabebetenano ao ni karaunano ngkai bon taani kawakinia ana nanai Iehova. (Ita. 32:​1, 2; IKar. 6:1) Ti kauringaki n te taeka n rabakau n te Baibara ae kangai: “Ai raoiroira te taeka ae taekinaki n te tai ae riai!”​—TaeRab. 15:23.

ITANGITANGIRI “N TE MWAKURI AO N TE KOAUA”

17. Ti na kangaa ni kakoauaa raoi ae e bon nako raoi mai nanora ara tangira ibukia tarira n te onimaki?

¹⁷ E kaungaira te abotoro Ioane bwa “ti aki riai n itangitangiri n tii te taeka ke n te wi, ma ti riai n itangitangiri n te mwakuri ao n te koaua.” (1Ioa. 3:18) Ti tangiria bwa e na nako raoi mai nanora ara tangira ibukia tarira n te onimaki. Ti na kangaa ni karaoa anne? Ngkana ti kakabanea riki ara tai ma ngaiia, ane e na rikirake ni kaan ara iraorao i marenara ao e na korakora riki ara itangitangiri i marenara. Ngaia are kakaaei aanga aika ko na kabanea iai am tai ma tabemwaang, n taini bobotaki ao n te mwakuri ni minita. Karekea am tai ni kawariia tabemwaang. Karaoan anne ti kaotia iai bwa ti “reireinaki iroun te Atua bwa [ti] na itangitangiri.” (1Tet. 4:9) Ao ane ti na noria ae ai bon “raoiroira ao ai rereira ikotakia taari ni maeka ma te katiteuanaaki!”​—TaiAre. 133:1.