TE KAONGORA IBUKIN TE REIREI 15
ANENE 30 Tamau, Atuau ao Raoraou
“Kaanian te Atua Bon te Bwai ae Raoiroi” Ibukira!
“Irou, kaanian te Atua bon te bwai ae raoiroi ibukiu.”—TAIARE. 73:28.
TE BOTO N IANGO
Arora ni kona ni kaania riki Iehova ao kakabwaia aika kona n reke mani karaoan anne.
1-2. (a) Tera ae ti riai ni karaoia bwa ti aonga ni karikirakea ara iraorao ae kaan ma temanna? (b) Tera ae ti na maroroakinna n te kaongora aei?
IAI raoraom ni kaan? Ko kangaa ni karikirakea am iraorao ma ngaia? Ko bae ni kakabanea am tai ma ngaia, n atai ana kangaanga ao baika e tatangiri ao baika e ribai. Ko a atai aroarona aika rianako aika ko kani kakairi iai. Ao ko taatangira raoraom anne.
2 E kainnanoaki te tai ae bati ao te kakorakora ngkana ko na karikirakea am iraorao ae kaan ma temanna. E kainnanoaki naba anne ngkana ko na karikirakea am iraorao ae kaan ma Iehova ae te Atua. E na maroroakinaki n te kaongora aei arora ni kona ni kaania riki Atuara ao kakabwaia aika reke mani karaoan anne. Ti na noria moa bwa e aera ngkai e raoiroi kaanian Raoraora ni koaua ae Iehova.
3. Bukin tera ngkai ti riai ni kananoa ara iango i aoni kakabwaia aika reke mani kaanian Iehova? Taekina te katoto.
3 Ko bae ni kakoauaa ae kaanian Iehova bon te bwai ae raoiroi. Ma ngkana ti kananoi ara iango i aon raoiroini kaanian Iehova, ti kona ni kairaki iai bwa ti na teimatoa ni kaania riki. (TaiAre. 63:6-8) N te katoto, ti ataia ae boni bwaai aika raoiroi ibukira tararuaani kanara, te kamarurung, karekean te motirawa ae tau, ao te momoi n te ran. Ma a bati aika aki rangi ni kaatuua aia iango i aoni baikai, ao a aki tabe ma marurungia. Ma ngkana ti iaiangoa kakabwaiaara mani karaoani baikai ibukini kamarurungara, ti na boni kateimatoa riki kakaraoaia. N aron anne, ti bae n ataia ae kaanian Iehova bon te bwai ae raoiroi ibukira, ma ngkana ti kananoa ara iango i aoni kakabwaia mani karaoan anne, ti kona ni kairaki iai bwa ti na teimatoa ni kaania riki Raoraora.—TaiAre. 119:27-30.
4. N aron ae oti n Taian Areru 73:28, tera are e taekinna te tia Areru?
4 Wareka Taian Areru 73:28. Bon tibun Rewi te tia korea te Areru 73 ae mwiokoaki bwa te tia anene n ana tembora Iehova. E bae ni kakaonimaki n taromauria Iehova i nanon ririki aika bati. Ma e ataia ae e riai ni kakauringnga ma tabemwaang ae “kaanian te Atua” bon te bwai ae raoiroi ibukina ao ibukia. Baikara kakabwaia tabeua mani karaoan anne?
E KAREKEA TE KUKUREI “KAANIAN TE ATUA”
5. (a) Bukin tera ngkai ti kona ni karekea te kukurei ngkana ti kaania riki Iehova? (b) Ni kaineti ma Taeka N Rabakau 2:6-16, aanga katoto n aroni wanawanan Iehova ni kona ni kakabwaiako ao ni kamanoko.
5 Ti na kukurei riki ngkana ti kaania riki Iehova. (TaiAre. 65:4) A bati bukina ngkai e koaua anne. N te katoto, ti kakabwaiaaki ni maiuakinan te wanawana are n ana Taeka ae te Baibara. Ti kamanoaki n te wanawana anne mani kariri aika bubuaka ao mani karaoani kairua aika kakaiaki. (Wareka Taeka N Rabakau 2:6-16.) Anne bukina ngke e taekinaki ae kangai n te Baibara: “E a kukurei te aomata ae kunea te wanawana ao te aomata ae karekea te ataibwai.”—TaeRab. 3:13.
6. Tera ae kabuaa kimwareirein te tia areru?
6 Iai naba taai ake a nanokawaki iai raoraon Iehova. E bua kimwareirein te tia korea te Areru 73 ngke e iaiangoi baika aki riai. E un ao ni bakantang ibukina bwa n ana iango e rangi ni bebete maiuia aomata aika buakaka ake a aki tabe ma te Atua ke Ana kaetieti. E kairua ana iango bwa irouna a kaubwai riki aomata aika iowawa ma ni marurung riki ao a aki naba rorotaki n te rawawata. (TaiAre. 73:3-7, 12) E rangi n tabeaianga te tia areru ao n te taina e a nanououa bwa e materaoi ana kakorakora ni beku iroun Iehova ke e aki. E nanokawaki ao e taku: “E boni matebuaka kateimatoaan itiakin nanou, ao tebokani baiu ni kaotai bwa akea au bure.”—TaiAre. 73:13.
7. Tera ae ti kona ni karaoia ngkana ti nanokawaki? (Nora naba te taamnei .)
7 E aki kariaia nanokawakina te tia areru bwa e na katoka ana beku. Iai te bwai ae e karaoia. E “rin n ana tabo ae tabu ae kakannato te Atua” ike e a kaetaki iai ana iango iroun Iehova. (TaiAre. 73:17-19) E ataia Iehova ae Raoraora ni koaua ngkana ti nanokawaki. Ngkana ti tataro nakoina ibukini kairirara ao ni butimwaea ana ibuobuoki are e katauraoia rinanon ana Taeka ao te ekaretia, e na reke korakorara n nanomwaaka i aan nanokawakira. E na boni kabebeteira ao ni karaui nanora Iehova ngkana ti taonakinako naba n te raraoma.—TaiAre. 94:19.a
Tibun Rewi are korea te Areru 73, ngke e tei n “ana tabo ae tabu ae kakannato te Atua” (Nora barakirabe 7)
E KAREKEA MAIURA AE MANENA AO TE KANTANINGA “KAANIAN TE ATUA”
8. Baikara riki aanga aika kakawaki aika kaotia ae kaanian te Atua bon te bwai ae raoiroi ibukira?
8 Kaanian te Atua bon te bwai ae raoiroi ibukira n aanga riki aika uoua aika kakawaki. Te moan, e karekea maiura ae manena. Te kauoua, e karekea ara kantaninga ae nene nakon taai aika a na roko. (Ier. 29:11) Ti na maroroakini riki kakabwaia aikai.
9. E kangaa kaanian Iehova ni karekea maiura ae manena?
9 E reke maiura ae manena ngkana ti kaania Iehova. A bati ni boong aikai ake a aki kakoauaa te Atua ae a iangoia bwa akea manenan te maiu aei ao i aoni kawaina ni mauna te botannaomata. Ma imwin ara reirei n ana Taeka te Atua, ao ti a kakoauaa ae bon “iai . . . [te Atua] ao bon te tia karekei kaniwangaia te koraki ake a ingainga n ukoukoria.” (Ebera 11:6) E kakukurei riki naba maiura ngkai ibukina bwa ti karaoa te bwai ae ti karikaki bwa ti na karaoia, ae te beku iroun Tamara are i karawa ae Iehova.—TuaKau. 10:12, 13.
10. Tera ae kaotaki n Taian Areru 37:29 ibukin te tai ae imwaira ibukia naake a kantaningaa Iehova?
10 A bati aika akea aia kantaninga ibukin te tai ae imwaira. A tii nako ni mwakuri, a karekea aia utu ao a kaikoa aia mwane imwain ae a ritaea. Akea iangoan te Atua ni maiuia. Ma ana toro Iehova a kabotoa aia kantaninga i aon Iehova. (TaiAre. 25:3-5; 1Tim. 6:17) Ti onimakina te Atua are ti kaania, ao ti onimakina te baere e beritanna nakoira. Ti kantaningaa naba te tai are ti nang taromauria iai n aki toki n te Bwaretaiti n te tai ae imwaira.—Wareka Taian Areru 37:29.
11. Tera aron rotakira ngkana ti kaania te Atua, ao tera aron rotakina iai?
11 Kaanian te Atua bon te bwai ae raoiroi ibukira n aanga riki aika bati. N katoto, e berita Iehova bwa e na kabwarai aia bure naake a rairi nanoia aika a kaan ma ngaia. (Ita. 1:18) Ibukin aei, ti a aki taonakinako n tabetaben mataniwin nanora ibukin ara bure ake rimoa. (TaiAre. 32:1-5) Ao ti kukurei ngkai ti kakukureia Iehova. (TaeRab. 23:15) Ni koauana, a bati riki kakabwaia aika reke man ara iraorao ae kaan ma te Atua. Ma ko na kangaa n teimatoa ni kaania te Atua?
ARORA N TEIMATOA NI ‘KAANIA TE ATUA’
12. Tera ae ko a tia ni karaoia ni kaaniko riki ma te Atua?
12 Ngkana te Kristian ngkoe ae ko a tia ni bwabetitoaki, a bati bwaai aika ko a tia ni karaoi ni kaania iai Iehova. Ko a tia n reiakini koaua aika bati ibukin Iehova ae te Atua ao Kristo Iesu, ko raira nanom man am bure ake rimoa, ko kakorakoraa onimakinan te Atua, ao ko kekeiaki ni karaoa ae boraoi ma nanona. Ma ti riai n teimatoa ni karaoi baikai ngkana ti kani kaania riki te Atua.—IKoro. 2:6.
13. Baikara bwaai aika tenua aika kona ni buokira n teimatoa ni kaania riki Iehova?
13 Tera ae e na buokira n teimatoa ni kaanira riki ma Iehova? (1) Ti riai n teimatoa ni wareware ao n ukeuke n te Baibara. Ngkana ti karaoa anne, tiara bwa ti na reiakina riki ae bati nakon tii moan reirei ibukin te Atua. Ti riai ni kataia n ota bwa tera nanon Iehova ibukira ao ni kairiraki ni booto n reirei ake e kaotii n ana Taeka. (IEbe. 5:15-17) (2) Ti riai ni kakorakoraa ara onimaki n arora ni kananoa ara iango i aoni bwaai ni kakoaua aika bati aika kaota tangirara irouna. (3) Ti riai n teimatoa n ribai baika e un iai Iehova ao n aki iraorao ma aomata aika kakaraoi baikanne.—TaiAre. 1:1; 101:3.
14. Ni kaineti ma 1 I-Korinto 10:31, baikara bwaai tabeua aika ti kona ni karaoi ni katoabong ni kakukureia iai Iehova? (Nori naba taamnei.)
14 Wareka 1 I-Korinto 10:31. E kakawaki ae ti teimatoa n ukeri baika kakukureia Iehova. E bati riki ae ti riai ni karaoia nakon tii te mwakuri ni minita ao kaakaeani bobotaki. Mwakuri aika raraoi aika kakukureia Iehova e nanonaki naba iai baika ti kakaraoi ni katoabong. N te katoto, ngkana ti bwabwaina te koaua ni bwaai ni kabane ao n tibwai baika iai iroura nakoia tabemwaang, ti a kakukureia iai Iehova. (2Kor. 8:21; 9:7) E tangirira naba bwa ti na kaota kakawakin te bwaintangira ae te maiu. Ti kaania riki te tia Anga te maiu ngkana ti kateimatoa tararuaan aron amwarakera ao nimara ao n tararuaa marurungira n aanga riki tabeua. Ti na tangiraki riki iroun Iehova ngkana ti kakorakoraira ni kakukureia ni bwaai naba aika uarereke.—Ruka 16:10.
Aanga tabeua aika ti kona ni kakukureia Iehova, bon te taratara raoi ni butira, tabeakinan rabwatara ni kakamarurung ao ni kang amwarake aika kamarurung, ao bwainan te akoi (Nora barakirabe 14)
15. Tera ae kantaningaia Iehova bwa ti na karaoia nakoia tabemwaang?
15 E akoi Iehova nakoia aomata aika eti aroia ma aika aki eti. (Mat. 5:45) E kantaningaira bwa ti na akoia naba tabemwaang n ai arona. N te katoto, ti na “aki taetae ni kabuakakaa temanna, ke ni kan unun, . . . [ti] na kaotiota te nimamannei nakoia aomata nako.” (Tit. 3:2) Ngkana ti iaiangoa aei, ti na bon aki kamangoria aomata tii ibukin ae a kaokoro ara koaua ma ngaiia. (2Tim. 2:23-25) Ti kaania riki Iehova ngkana ti bwaina te akoi n taai nako ao ni kaotiota tabeakinaia aomata ni kabane.
TI KONA NI KAANIA “TE ATUA” E NGAE NGKANA TI BWAKA
16. Tera are e a moanna n namakinna te tia korea te Areru 73 imwin tabeua te tai?
16 Ma tera arom ngkana ko a moanna n namakinna n tabetai bwa ko a aki tau n tangiraki iroun Iehova? N aron ae e a tia ni maroroakinaki, e riki naba anne nakon te tia korea te Areru 73. E bwaebwaeti n taku: “A kuri n tibanako waeu, ao a kuri ni marannako waeu.” (TaiAre. 73:2) E boni kaotia ae e a “karawawataaki” ao n “ronnano” “kaanga te man ae nanobaba” i matan Iehova. (TaiAre. 73:21, 22) Ma te koaua bwa e iangoia ae ai akea uaana ao e aki tau n tangiraki iroun Iehova ibukin ana kairua?
17. (a) Tera are e karaoia te tia areru e ngae ngke e a rangi n rawawata? (b) Tera reireiara man rongorongona? (Nori naba taamnei.)
17 Ngkana arona bwa e namakinna te tia areru bwa e a kaakaki taekana iroun Iehova, e boni bae n tii namakina anne i nanon tabeua te tai. E ngae ngke e rangi n rawawata ma e ataia ae e riai ni kaania riki te Atua n aron ae oti n ana taeka aikai: “Ma I a teimatoa ngkai i rarikim [Iehova] ao ko taua baiu ae ataiu. Ko kairirai n am taeka n reirei, ao imwina ko na kairai nakon te karineaki.” (TaiAre. 73:23, 24) Ti riai naba n onimakina Iehova ngkai ngaia ara bwaa ae aki kaingingaki ngkana ti namakina te mamaara ke te bwarannano. (TaiAre. 73:26; 94:18) E ngae ngkana a tibanako waera tabeua te tai, ma ti kona n okira Iehova n ataakin ae e “tauraoi ni kabwarabure.” (TaiAre. 86:5) Ti riai ni kaania riki Atuara moarara riki ngkana ti a rangi n rawawata.—TaiAre. 103:13, 14.
Ngkana ti namakinna ae ti a mamaara n te onimaki, ti riai ni kaania Iehova n arora ni kabatiaa riki ae ti karaoia n ara taromauri nakoina (Nora barakirabe 17)
‘KAANIA TE ATUA’ N AKI TOKI
18. Bukin tera ngkai akea tiani kaanian Iehova iroura?
18 Akea tiani kaanian Iehova iroura ao karekeani kinaakina. E taekinaki n te Baibara bwa e ‘kangaanga kuneakini’ kawain Iehova, wanawanana, ao ana atatai.—IRom 11:33.
19. Tera te karaunano nakoira n Taian Areru?
19 E taekinaki ae kangai n Taian Areru 79:13: “Ngaira aika am aomata ma tiibun am tawaana, ti na kakaitau nakoim n aki toki, ao ti na tataekina karaoiroam man te rorona nakon te rorona.” Ngkai ko teimatoa ni kaania te Atua, ko kona naba ni kakoauaa ae ko na karekei kakabwaia aika akea tokia ao n taekina aei ma te aki nanokokoraki: “Bon te bwaa te Atua ae I kona n onimakinna ma nanou ni kabane, ao tibwangau n aki toki.”—TaiAre. 73:26.
ANENE 32 Teei n Ana Itera Iehova!
a A bae ni kainnanoa te ibuobuoki mairouia taokita naake a kabokorakora ma te rawawata ae teimaan, te tabeaianga ao te nanokawaki. Ibukin rongorongona riki, nora Te Taua-n-Tantani, Na. 1 2023.