E Kakawaki Iroun Iesu Aran Iehova

1-2. (a) Tera are e karaoia Iesu n te tairiki are e nang kamateaki iai? (b) Baikara titiraki aika a na rinanoaki n te kaongora aei?

BON TAIRIKIN te Kaabong, Nitian 14, 33 C.E., are e nang kamwaneaki iai Iesu, ni motikaki taekana, ni kabuakakaaki, ni kammarakaki, ao ni kamateaki. E a tibwa tia ni katairiki ma ana abotoro aika kakaonimaki n te ruu are i eta. Imwin ana katairiki anne, ao e a anga ana kabanea n taeka aika kaungaunga Iesu nakoia ana abotoro. Ma teutana te tai imwain raoi ae a bane ni kitana te ruu are mai eta, e tei teutana Iesu ao e a taekina te tataro ae rangi ni kakawaki. E korea te tataro anne te abotoro Ioane, ao e noraki n Ioane mwakoro 17.

² Tera te bwai ae ti noria man ana tataro Iesu are e tabeaianga iai n te tai anne? E kangaa te tataro anne ni kaota te bwai ae rangi ni kakawaki irouna, n ana tai ni mwakuri ni minita ni menana i aon te aba? Ti na maroroakin ngkai kaekaan titiraki aikai.

“I A TIA NI KAOTIOTA ARAM NAKOIA”

3. Tera ae e taekinna Iesu ibukin te ara ae Iehova, ao tera ae e nanonna? (Ioane 17:​6, 26)

³ E kangai Iesu n ana tataro: “I a tia ni kaotiota aram nakoia.” Bon uoua ana tai n taekinna ae e a tia ni kaotiota aran Iehova nakoia taan rimwina. (Wareka Ioane 17:​6, 26.) Tera ae e nanonna? E kaotiota nakoia te ara ae a aki ataia? Bon I-Iutaia taan rimwin Iesu aikai, ngaia are a a boni kaman ataa aran te Atua, ae Iehova. E kaoti te ara anne iraua tenga te tai n te Koroboki ae Tabu n te Taetae n Ebera. Mangaia are e aki nanona Iesu aran te Atua, ma e nanona te bae e nanonaki n te ara anne. E a tia ni kabanea ana konaa Iesu ni kaotiotia bwa te aekaki n Aomata raa Iehova, n ikotaki ma Ana kantaninga, baika e karaoi, ao aroarona.

4-5. (a) Ti na kangaa ni kabwarabwaraa ae nanonaki n ataakin aran te aomata? (b) N te aro raa ae a ataa aran Iehova taan rimwin Iesu?

⁴ Ni kabwarabwaraana, iangoia bwa temanna te unimwaane n am ekaretia ae arana David bon te taokita ae te tia korokoro. Ko a kamani kinaa te tari te mwaane anne i nanon ririki aika bati. Ma n te taina ao e a reke aorakim teuana. Ko ienikuri nakon te onnaoraki are e mwakuri iai te tari te mwaane anne, ike e a kamanoa iai maium ni mwaataina n taokita. Ko a rangi n tangira riki te tari te mwaane anne ngkai, ao ngkana ko ongo arana, ko bon uringa te baere e a tia ni karaoia ibukim. Ko a aikoa taraa ngkai David bwa tii te unimwaane, ma bon te tia korokoro naba ae e kamanoa maium.

⁵ N aron anne, a a kaman ataa naba aran Iehova taan rimwin Iesu. Ma e a bati riki ae nanonaki n te ara anne nakoia, imwin ana mwakuri ni minita Iesu. Bukin tera bwa ti kona n taekina anne? Ibukina bwa e kaotiota aroaron raoi tamana Iesu, ni bwaai ni kabane ake e taekin ao e karaoi. Mangaia are a ‘ataa’ riki Iehova ana abotoro, n aroia n ongongora n aron Iesu n angareirei ao n tarataraa arona nakoia aomata.​—Ioa. 14:9; 17:3.

“ARAM AE KO KATOKAA I AOU”

6. Tera ae nanonaki n ae e katokaa arana Iehova i aon Iesu? (Ioane 17:​11, 12)

⁶ E tataro ni kangai Iesu ibukia taan rimwina: “Kawakinia ibukin aram ae ko katokaa i aou.” (Wareka Ioane 17:​11, 12.) E kananonaa Iesu n aei bwa e nang aranaki bwa Iehova? E aki. Ngkana ti nora ana tataro ao e taekina ae kangai ibukin te ara ae Iehova: “aram.” Ngaia are e bon aki riki aran Iehova bwa aran Iesu. Ma tera ngkanne are e kananonaa Iesu ngke e taekinna ae e katokaaki i aona aran te Atua? Te moan, Iesu bon te tia tei ibukin Iehova ao ana tia Taetae. E roko n aran Tamana ao e karaoi mwakuri aika kamimi n te ara anne. (Ioa. 5:43; 10:25) Irarikina naba, nanon te ara ae Iesu bon “Iehova Bon te Kakamaiu.” Eng, e rangi n irekereke aran te Atua ma aran Iesu.

7. Kabwarabwaraa bwa e kangaa Iesu ni kona n taetae n aran Iehova.

⁷ Ni kabwarabwaraana, e taetae te embaetita n aran te tia tautaeka, ibukina bwa e tei ibukin te tia tautaeka. Ngaia are bon titeboo mwaakan ana taeka te embaetita ma mwaakan ana taeka te tia tautaeka. N aron anne, e tei naba Iesu ibukin Iehova ao e taetae nakoia aomata n Arana.​—Mat. 21:9; Ruka 13:35.

8. E kangaa Iesu n “uouota” aran Iehova imwain rokona n te aonnaba? (Te Otinako 23:​20, 21)

⁸ Ni mwiokoan Iesu ae te Taeka, e a beku iai bwa ana tia Taetae Iehova, n arona n taekin rongorongo ao kaetieti nakoia natin te Atua aika anera ao aomata naba. (Ioa. 1:​1-3) N taraana ao bon Iesu te anera are e kanakoa Iehova bwa e na tararuaia tibun Iteraera ni menaia n te rereua. E kangai Iehova ngke e tuangia tibun Iteraera bwa a na ongeaba iroun te anera anne: “Ibukina bwa e uouota arau.”a (Wareka Te Otinako 23:​20, 21.) E “uouota” aran Iehova Iesu, n arona n tei ibukin Iehova ao ni kabanea ana konaa ni kaitiaka aran Tamana ao ni katabua naba.

“TAMAU, NEBOA ARAM”

9. Tera aroni kakawakin aran Iehova iroun Iesu? Kabwarabwaraa.

⁹ N aron ae ti a tia ni maroroakinna, ao e rangi ni kakawaki aran Iehova iroun Iesu imwain naba rokona n te aonnaba. Ni menan Iesu n te aonnaba ao e oti naba mani bwaai ake e karaoi aroni kakawakin aran Iehova irouna! N raabanen ana mwakuri ni minita Iesu, ao e a wewete Iesu ni kangai: “Tamau, neboa aram.” E a kaeka naba ngkekei Tamana n te bwanaa ae korakora mai karawa ae kangai: “I a tia n neboia ao N na manga neboia riki.”​—Ioa. 12:28.

10-11. (a) E kangaa Iesu n neboa aran Iehova? (Nora naba te taamnei.) (b) Bukin tera ngkai e riai ni katabuaki aran Iehova ao ni kaitiakaki?

¹⁰ E neboa naba aran Tamana Iesu. N te aro raa? Te anga teuana, e tataekin aroaron Tamana ma ana mwakuri aika raraoi nakoia aomata. Ma e bati riki ae nanonaki n neboan te ara anne. E riai ni katabuaki aran Iehova ao ni kaitiakaki taekana.b E kaota kakawakin aei Iesu ngke e reireinia taan rimwina te tataro ni katoto. E kangai: “Tamara are i karawa, e bia katabuaki aram.”​—Mat. 6:9.

¹¹ Bukin tera bwa e riai ni katabuaki ao ni kaitiakaki aran Iehova? Ibukina bwa e a tia Tatan te Riaboro ni kamatauningaa ao n uaraoa Iehova ae te Atua, n te onnaroka are i Eten. E bukibuki Tatan n taku bwa bon te tia kewe Iehova ao e taua te bwai ae raoiroi mairoun Atam ao Ewa. (KBwaai 3:​1-5) E kaotia naba iai Tatan bwa e aki karaoi bwaai Iehova n te aro ae eti. E a kabarekaaki taekan Iehova ke arana, man ana bukibuki Tatan aikai. Imwina riki n ana bong Iobi, ao e a manga bukibuki naba Tatan n taku bwa a beku aomata iroun Iehova tii ibukin te bwai ae a kona ni karekea mairouna. E nanonaki naba n te kewe anne bwa a aki kona aomata n teimatoa ni beku iroun Iehova ngkana a kataaki, ibukina bwa a aki tangira raoi te Atua. (Iob 1:​9-11; 2:4) E kainnanoaki te tai ae maan teutana ibukini kaotan ae antai te tia kewe, Iehova ke Tatan.

“I ANGA MAIUU”

12. Tera are e tauraoi ni karaoia Iesu ibukin tangiran aran Iehova irouna?

¹² Ibukin tangiran Iehova iroun Iesu, e a kani kabanea ana konaa ni katabua ao ni kaitiaka aran Iehova. E kangai Iesu: “I anga maiuu.” (Ioa. 10:​17, 18) Eng, e tauraoi ni mate ibukin aran Iehova.c A karitei nakon Iehova ara moan aomata ake a kororaoi ake Atam ma Ewa, ao a tei n ana itera Tatan. Ni kaitaraan anne, e tauraoi Iesu n ruo nakon te aonnaba ao ni kaota tangiran Iehova irouna. E karaoa anne Iesu n arona n ongeaba nakon Iehova ni bwaai ni kabane ake e karaoi ao n taekin. (Ebera 4:15; 5:​7-10) E kateimatoa kakaonimakina n te aro ae eti i nanoni maiuna, n uaa matena i aon te kai ni kammaraki. (Ebera 12:2) N te aro aei e a kaota iai ana tangira ibukin Iehova ao arana.

13. Bukin tera ngkai bon tii Iesu ae kona ni kaotia ae bon te tia kewe Tatan? (Nora naba te taamnei.)

¹³ E kaotia Iesu ni maiuna bwa bon te tia kewe Tatan, ao tiaki Iehova! (Ioa. 8:44) Bon tii Iesu ae kinaa raoi Iehova. Ngke arona bwa a koaua bukinan Iehova iroun Tatan, e na bon ataia Iesu. Ma e kakorakoraa Iesu ni kaitiaka taekan Iehova, ke arana. E ngae naba ngke e taraa n ae e a kaaki taekan Iesu Iehova, ma e boni kukurei naba Iesu ni mate n oneani mwin ae e na aki ongeaba iroun Tamana.​—Mat. 27:46.d

“I A TIA . . . NI [KATIAA] TE MWAKURI ARE KO ANGANAI BWA N NA KARAOIA”

14. E kangaa Iehova n angan Iesu kaniwangana ibukini kakaonimakina?

¹⁴ N te tairiki are imwaini maten Iesu, ao e a tataro ni kangai: “I a tia . . . ni [katiaa] te mwakuri are ko anganai bwa N na karaoia.” E onimakinna ae e na anganna Iehova kaniwangana ibukin ana kakaonimaki. (Ioa. 17:​4, 5) E aki kaingingaki onimakinan Tamana irouna. E aki kariaia Iehova bwa e na tiku Iesu n te ruanimate. (Mwa. 2:​23, 24) E kauta Iesu ao e anganna te nakoa ae rietata riki i karawa. (IBir. 2:​8, 9) Imwina riki, e a kairiri Iesu bwa te Uea n Ana Tautaeka n Uea te Atua. Tera ae e na kakororaoia te Tautaeka n Uea anne? Ti tuangaki ae kangai ni kauouan iteran te tataro ni katoto: “E bia roko am Tautaeka n Uea. E na kakororaoaki [nanon Iehova] i karawa ao n te aonnaba naba.”​—Mat. 6:10.

15. Tera ae e na kakororaoia Iesu?

¹⁵ E a kaan te tai are e nang buakania iai Iesu naake a kairiribai nakon te Atua ao ni kamaunaia aika buakaka n Aremaketon. (TeKao. 16:​14, 16; 19:​11-16) Teutana te tai imwin anne, ao e nang karenakoa Tatan nakon “te kinono” ike e nang kabaeaki iai ao n aki kona ni karaoa te bwai teuana. (TeKao. 20:​1-3) E na kaoka Iesu te rau ma te kororaoi nakoia aomata n ana tai n Tautaeka ae Maanna Tenga te Ririki. E na manga kautiia maate. E na karika te aonnaba bwa te bwaretaiti. E nang kakororaoaki ana kantaninga Iehova!​—TeKao. 21:​1-4.

16. Tera ae e na kakororaoaki n tokin te Tautaeka ae Maanna Tenga te Ririki?

¹⁶ Tera ae ti kona ni kantaningaia n tokin te Tautaeka ae Maanna Tenga te Ririki? A nang aki manga bubure aomata ao a nang kororaoi. A nang aki manga kainnanoa kabwaraan aia bure rinanon te karea ni kaboomwi aomata, ao a nang aki naba kainnanoa te tia raoiakinia ma Iehova ke te ibonga. Ao “e na boni kamaunaaki te tia kairiribai are te kabane, are te mate” are riki mairoun Atam. A nang bane n akea kaain taian ruanimate. A nang bane ni kautaki maate. A nang bane ni kororaoi kaain te aonnaba.​—1Kor. 15:​25, 26.

17-18. (a) Tera ae e na riki n tokin te Tautaeka ae Maanna Tenga te Ririki? (b) Tera ae e na karaoia Iesu ngkana e a toki ana tai ni kairiri? (1 I-Korinto 15:​24, 28) (Nora naba te taamnei.)

¹⁷ Tera riki ae e na riki n tokin te Tautaeka ae Maanna Tenga te Ririki? E na riki n te tai anne te bwai ae rangi n okoro. E nang toki te kauntaeka are irekereke ma katabuan aran Iehova. N te aro raa? E bukibuki Tatan n te onnaroka are i Eten, n taku bwa bon te tia kewe Iehova ao E tautaekania aomata n te aro ni bangaomata. Ni moa man te tai anne ao e okioki ni katabuaki arana irouia naake a karinea. Ngaia are n tokin te Tautaeka ae Maanna Tenga te Ririki, ao e nang kaitiakaki raoi taekan Iehova. E nang oti raoi koauan ae bon te Tama ngaia ae tatangira ae mena i karawa.

¹⁸ E nang kaotaki kewen ana bukibuki Tatan. Tera ae e na karaoia Iesu ngkana e a toki ana tai ni kairiri? E na katotonga Tatan ao ni karitei nakon Iehova? Tiaki ngaia anne! (Wareka 1 I-Korinto 15:​24, 28.) E na kaoka te Tautaeka n Uea Iesu nakon Tamana. E na aantaeka nakon ana kairiri Iehova. Eng, e tauraoi Iesu ni kakeai bwaai ni kabane ibukin tangiran Iehova, tiaki n aron Tatan.

19. Kakawakira aran Iehova iroun Iesu?

¹⁹ Maroaka ae e kukurei Iehova ni katokaa arana i aon Iesu! E a tia ni kaotia Iesu ae bon te tia tei ae kororaoi ngaia ibukin Tamana. Ngaia are tera aroni kakawakin aran Iehova iroun Iesu? E rangi ni kakawaki riki nakoni bwaai ni kabane. E kukurei Iesu ni mate ibukin te ara anne ao e na kukurei naba ni kaoki bwaai ni kabane nakon Iehova n tokin ana Tautaeka ae Maanna Tenga te Ririki. Ti na kangaa ni kona ni kakairi n ana katoto Iesu? Ti na maroroakina kaekaan te titiraki anne n te kaongora are imwina.