E Kakawaki Iroura Aran Iehova

1-2. Ti kangaa n ataia ae e kakawaki aran Iehova iroun Iesu?

E RANGI ni kakawaki iroun Iesu aran Iehova. Bon akea temanna ae e a tia ni karaoa ae bati riki n aron Iesu, ibukini kamanoan aran Tamana. N aron ae oti n te kaongora are mai mwaina, e tauraoi ni mate Iesu bwa e aonga n oti raoi ae e tabu Iehova ao a eti arona nako. (Mareko 14:36; Ebera 10:​7-9) Ao imwin ana tai n Tautaeka ae Manna Tenga te Ririki, e na tauraoi ni kaoka te mwaaka ni kairiri, ibukini katabuan aran Iehova. (1Kor. 15:​26-28) E oti mani bwaai ni kabane ake e karaoi Iesu ibukin Iehova, ae e rangi n tangira Tamana.

² E roko Iesu i aon te aba n aran Tamana. (Ioa. 5:43; 12:13) E kaotiota aran Tamana nakoia taan rimwina. (Ioa. 17:6, 26) E angareirei n aran Iehova ao e karaoi kakai n te ara naba anne. (Ioa. 10:25) E bubutii Iesu nakon Iehova bwa e na kawakinia taan rimwina ‘ibukin arana.’ (Ioa. 17:11) Ngaia are ngkana anne ana namakin Iesu ibukin aran Iehova, e na kangaa ngkanne temanna n taku bwa te tia rimwini Kristo ni koaua, ao e aki ataa aran Taman Iesu ao e aki naba kakabongana?

3. Tera ae ti na maroroakinna n te kaongora aei?

³ Ngkai Kristian ngaira aika ti kataia n toua mwini mwanekan Iesu, ti kaotia bwa e kakawaki iroura aran Tamana. (1Bet. 2:21) N te kaongora aei, ao ti na noria bwa e kangaa aran Iehova n riki bwa kinaakia naake a tataekina “te rongorongo ae raoiroi . . . ae taekan te Tautaeka n Uea.” (Mat. 24:14) Ti na maroroakinna naba bwa tera aroni kakawakin te ara ae Iehova iroura n tatabemanira nako.

“TE KORAKI AKE A NA UOUOTA ARANA”

4. (a) Tera are e mwiokoiia iai taan rimwina Iesu imwain raoi okina nako karawa? (b) Tera te titiraki ae rio man te mwioko anne?

⁴ Imwain raoi okin Iesu nako karawa, ao e tuangia taan rimwina ni kangai: “Ane kam na anganaki te mwaaka ngkana e roko i aomi te taamnei ae raoiroi, ao kam na riki bwa taani kakoaua ibukiu i Ierutarem ao i Iutaia ni kabanea, ao i Tamaria ao nakon taabo ake taiani kabanea n raroa n te aonnaba.” (Mwa. 1:8) Ngaia are e na bon tataekinaki te rongorongo ae raoiroi tiaki tii i aon Iteraera. Imwina riki, a nang kona n riki bwa taan rimwin Iesu aomata ake mai buakoia botannaomata nako. (Mat. 28:​19, 20) Ma e kangai Iesu: “Kam na riki bwa taani kakoaua ibukiu.” A riai taan rimwini Kristo aika boou aikai n ataa aran Iehova, ke bon tii taani kakoaua ngaiia ibukin Iesu? Ti na buokaki ni kaekaa te titiraki anne, n te baere e riki are taekinaki ni Mwakuri mwakoro 15.

5. A kangaa abotoro ao unimwaane i Ierutarem ni kaotia ae a riai ni bane aomata n ataa aran Iehova? (Nora naba te taamnei.)

⁵ N 49 C.E., ao a a ikotaki abotoro ao unimwaane i Ierutarem bwa a na maroroakina te bae a riai ni karaoia Tientaire aika tuai ni korotobibiaki, bwa a aonga ni butimwaeaki bwa Kristian. Ni banen aia maroro, ao e a kangai Iakobo are tarin Iesu: “E a tia [Betero] ni karakina raoi aron te Atua ngke e moani mutiakinia aomata aika tiaki I-Iutaia, ni karekeia te koraki ake a na uouota arana mai buakoia.” Antai arana are e kananonaa Iakobo? E reitia ni kangai ni mwanewea ana taeka te burabeti are Amota: “Bwa a aonga n ingainga n ukoukora Iehova nikiraia aomata aikai n ikotaki ma aomata aika tiaki I-Iutaia ake a ingoanaki n arau, e taekina anne Iehova.” (Mwa. 15:​14-18) A na aki tii reiakina taekan Iehova taan rimwini Kristo aika boou aikai, ma a na ‘ingoanaki naba n arana.’ Nanon aei bwa a na uouota aran te Atua ao a na kinaaki naba iai.

6-7. (a) Tera bukin rokon Iesu i aon te aba? (b) Tera riki bukin rokon Iesu i aon te aba ae kakawaki riki?

⁶ Nanon aran Iesu “Iehova Bon te Kakamaiu,” ao e kabonganaaki iroun Iehova ni kamaiuia aomata ake a onimakinna ao Natina. E roko Iesu i aon te aba n anga ngaia ibukia aomata. (Mat. 20:28) E karekea angaia aomata ni kamaiuaki ao ni karekea te maiu are aki toki, ngke e kabwakaa te karea ni kaboomwi.​—Ioa. 3:16.

⁷ Ma bukin tera ngkai a kainnanoa kamaiuaia aomata? Ibukin te baere e riki n te onnaroka are i Eten. N aron ae taekinaki n te kaongora are mai mwaina, a karitei nakon Iehova aia karo te botannaomata ake Atam ma Ewa, ngaia are a aikoa kona ni maiu n aki toki. (KBwaai 3:​6, 24) Ma iai te bwai ae kakawaki riki nakoni kamaiuaia aomata man te bure ae irekereke naba ma rokon Iesu i aon te aba. E uaraoaki aran Iehova. (KBwaai 3:​4, 5) Ngaia are e irekereke kamaiuaia kanoan Atam ao Ewa, ma te bwai ae kakawaki riki ae katabuan aran Iehova. Ibukina bwa e tei Iesu ibukin Iehova ao n uouota arana, e a katabua aran Iehova n te aro ae rianako.

8. Tera ae a riai n ataia taan rimwin Iesu ni kabane?

⁸ A riai taan rimwin Iesu ni kabane, aika I-Iutaia ma Tientaire n ataa Teuare e reke mairouna kamaiuaia, are Taman Iesu ae Iehova ae te Atua. (Ioa. 17:3) N aron Iesu, a na kinaaki naba n aran Iehova. A na riai naba n ataa kakawakini katabuan te ara anne. E boboto iai kamaiuaia. (Mwa. 2:​21, 22) Ngaia are a riai taan rimwin Iesu aika kakaonimaki n reiakina taekan Iehova ao Iesu naba. Maroaka ae e motika ana tataro Iesu are koreaki n Ioane 17 ni kangai: “I a tia ni kaota aram nakoia ao N na boni manga kaotia, bwa e aonga ni mena i nanoia te tangira are ko tangirai iai, ao N na katiteuanaaki ma ngaiia.”​—Ioa. 17:26.

“BON AU TIA KAKOAUA NGKAMI”

9. Ti na kangaa ni kaotia ae e kakawaki iroura aran Iehova?

⁹ E riai ni kakawaki irouia taan rimwin Iesu ni koaua, katabuan aran Iehova. (Mat. 6:​9, 10) A riai n iangoa aran Iehova bwa e kakawaki riki nakon aara nako. E riai n oti n aia mwakuri. Ma tera ngaira irekerekera ma katabuan aran Iehova, ke kaitiakana man ana kewe aika bati Tatan ibukin Iehova?

10. Tera ae ti wareka taekana n te boki ae Itaia mwakoro 42 nakon 44? (Itaia 43:9; 44:​7-9) (Nora naba te taamnei.)

¹⁰ E kaotaki n te boki ae Itaia mwakorona 42 nakon 44 kakawakin tabera ni katabuan aran Iehova. E kaotaki ni mwakoro akanne te keiti ni kaikonaki teuana ae irekereke ma riain temanna n riki n atua. E kakaewenakoia Iehova naake a kan riki n atua bwa a na kaotiia ae bon atua ngaiia. Ao e kakaewenakoia naba aia taani kakoaua bwa a na keerake ao n anga aia kakoaua ae bon atua atuaia. Ma bon akea ae e roko n te keerake!​—Wareka Itaia 43:9; 44:​7-9.

11. Tera ana taeka Iehova ibukia ana aomata n Itaia 43:​10-12?

¹¹ Wareka Itaia 43:​10-12. E kangai Iehova ibukia ana aomata: “Au tia kakoaua ngkami, . . . ao bon te Atua ngai.” E tuangia Iehova bwa a na kaekaa te titiraki aei: “Iai riki te Atua temanna i rarikiu?” (Ita. 44:8) Ngaia are ti a kakabwaiaaki bwa ti a kona ni kaekaa te titiraki anne. Ti anga ara kakoaua rinanon ara taeka ao ara mwakuri ae Iehova bon tii ngaia te Atua ae koaua. E kakawaki riki arana nakoia aara nako. Ti kaotia ni maiura bwa ti bon tangira Iehova ao ti kakaonimaki ni koaua nakoina, n aki ongea ana kariri Tatan nakoira. N te aro aei, ti a kona iai ni buoka katabuan arana.

12. E kangaa ni kakororaoaki te taetae ni burabeti are n Itaia 40:​3, 5?

¹² Ngkana ti boutokaa aran Iehova ke taekana, ti a kakairi iai iroun Iesu Kristo. E a kaman taekinna naba Itaia ae iai ae e na roko moa ni “kamwawaa [ke, ni “katauraoa,” kbn.] kawain Iehova.” (Ita. 40:3) E kangaa ni kakororaoaki anne? E katauraoa kawain Iesu Ioane te tia Bwabetito, are e roko n aran Iehova ao e taetae naba n aran Iehova. (Mat. 3:3; Mareko 1:​2-4; Ruka 3:​3-6) E kangai naba te taetae ni burabeti anne: “E na kaotaki mimitongin Iehova.” (Ita. 40:5) E kangaa ni koro bukin anne? Ngke e roko Iesu i aon te aba, ao e tei ibukin Iehova n te aro ae kororaoi, n aron ae kaanga e a bon roko Iehova i aon te aba​—Ioa. 12:45.

13. Ti na kangaa ni kakairi iroun Iesu?

¹³ N aron Iesu, ngaira naba ana tia kakoaua Iehova. Ti uouota aran Iehova ao ti tuangia aomata nako ake ti boo ma ngaiia taekani kamimin ana mwakuri. Ma ngkana ti kani mwaatai ni karaoa anne, ti riai n tataekina mwiokoan Iesu ae kakawaki ni katabuan aran Iehova. (Mwa. 1:8) Bon te tia Kakoaua Iesu ibukin Iehova ae rianako arona, ao ti toua mwini mwanekana. (TeKao. 1:5) Ma tera aroni kakawakin aran Iehova iroura n tatabemanira nako?

KAKAWAKIN ARAN IEHOVA IROURA N TATABEMANIRA NAKO

14. N aron ae kateretereaki n Taian Areru 105:​3, tera ara namakin ibukin aran Iehova?

¹⁴ Ti kakatonga n aran Iehova. (Wareka Taian Areru 105:3.) E rangi ni kimwareirei Iehova ngkana ti kamoamoaa taekan arana. (Ier. 9:​23, 24; 1Kor. 1:31; 2Kor. 10:17) Ngkana ti “kamoamoa iroun Iehova” e nanonaki iai bwa ti kakatonga ngkai Iehova Atuara. Ti taraia bwa bon te kakabwaia karinean aran Iehova ao kaitiakan taekana. Ti aki riai ni maamaa n tuangia raora ni mwakuri, raora n reirei, kaain rarikira, ao tabemwaang riki, ae Ana Tia Kakoaua Iehova ngaira! E tangirira te Riaboro bwa ti na katoka tataekinan aran Iehova nakoia aomata. (Ier. 11:21; TeKao. 12:17) Ni koauana, a tangiria Tatan ma ana burabeti ni kewe bwa a na mwanuokina taekan te ara ae Iehova aomata. (Ier. 23:​26, 27) Ma ngaira ti na bon teimatoa ni kakatonga n aran Iehova “ni kabongnga” ibukin tangirana.​—TaiAre. 5:11; 89:16.

15. Tera ae nanonaki n taboan aran Iehova?

¹⁵ Ti teimatoa n taboa aran Iehova. (Ioera 2:32; IRom 10:​13, 14) E bati riki ae nanonaki n taboan aran Iehova, nakon tii ataakin aran te Atua ao kakabonganaana. Ti a kinaa riki te Atua, ti a onimakinna, ao ti tang nakoina ibukini buokara ma kairirara. (TaiAre. 20:7; 99:6; 116:4; 145:18) Ti tataekina naba arana ao aroarona nakoia aomata, ao ni kaumakiia bwa a na rairi nanoia ao ni mwakuria aia rairannano, bwa a aonga ni kona ni karekea akoaia iroun Iehova.​—Ita. 12:4; Mwa. 2:​21, 38.

16. Ti na kangaa ni kaotia ae bon te tia kewe Tatan?

¹⁶ Ti tauraoi ni karawawataaki ibukin aran Iehova. (Iak. 5:​10, 11) Ngkana ti teimatoa ni kakaonimaki ni koaua nakon Iehova ngkana ti rawawata, ti a kaotia iai bwa bon te tia kewe Tatan. N ana bong Iobi, ao e bukibuki ni kangai Tatan ibukia naake a toro iroun Iehova: “E na anga ana bwai nako te aomata ibukini kawakinani maiuna.” (Iobi 2:4) E bukinia aomata Tatan bwa a beku iroun Iehova tii ngkana e nakoraoi maiuia, ao a na boni kitana Iehova ngkana a rinanon taiani kangaanga. E kaota kairuan te bukibuki anne te mwaane ae kakaonimaki ae Iobi. E reke naba ara tai ni kaotia ae ti na bon aki tannako mairoun Iehova, n aki ongei baika e karekareira iai Tatan. Ti kona ni kakoauaa raoi ae e na boni kawakinira Iehova ibukin arana.​—Ioa. 17:11.

17. Tera riki te anga ae ti kona iai n neboa aran Iehova, n aron are e taekinaki n 1 Betero 2:12?

¹⁷ Ti karinea aran Iehova. (TaeRab. 30:9; Ier. 7:​8-11) Ibukina bwa ti tei ibukin aran Iehova ao n uouotia, ti a kona ni karekea neboana ke kamatauningaana. (Wareka 1 Betero 2:12.) Ai ngaia are ti kani kabanea ara konaa n neboa Iehova, rinanon ara taetaenikawai ao baika ti kakaraoi. N te aro aei, ti a karekea iai neboan arana n aron are ti konaa, e ngae ngke ti aki kororaoi.

18. Tera te anga riki teuana ae ti kona ni kaotia iai bwa e kakawaki iroura aran Iehova? (Nora naba te kabwarabwara mai nano.)

¹⁸ Ti tabe riki ma aran Iehova nakon taekara. (TaiAre. 138:2) Bukin tera bwa e rangi ni kakawaki? Ibukina bwa tangiran Iehova iroura, e kona ni karekea kabuakakaara irouia raora n aomata.a E tauraoi Iesu n rinanon te mate ae kamaamaa bwa kaanga te tia iowawa, ibukini karinean aran Iehova. E “aki mutiakina kamaamaeana” n arona n aki kabanea ana tai ke n raraomaeakinna bwa tera aia iango aomata ibukina. (Ebera 12:​2-4) E tii tabe ma karaoan nanon te Atua.​—Mat. 26:39.

19. Tera am namakin ibukin aran Iehova, ao bukin tera?

¹⁹ Ti kamoamoa n aran Iehova ao ti kakatonga ngkai ti aranaki bwa Ana Tia Kakoaua Iehova ngaira. Ibukin anne, ti tauraoi ni boo ma te kabuakaka. E kakawaki riki aran Iehova nakoni kaitiakan taekara. Ngaia are ti bia teimatoa n neboa aran Iehova n aki ongeia bwa tera ae karekareira iai Tatan. N te aro aei, ti a kaotia iai ae bon te kabanea ni kakawaki aran Iehova iroura, n aroni kakawakina iroun Iesu Kristo.