Kakoauaa Tangiram Iroun Iehova

1. E aera bwa ko katabua maium nakon Iehova? (Nora naba te taamnei.)

KO KONA n uringa te tai are ko katabua iai maium nakon Iehova? Ko karaoa te motinnano anne ibukina bwa ko a ataa Iehova ao ko tangiria. Ko berita nakoina bwa ko na moanibwaia nanona i nanoni maium ao ko na teimatoa n tangiria ma nanom ni kabane, maium ni kabane, am iango ni kabane, ao korakoram ni kabane. (Mareko 12:30) Ni moa man te tai anne are e a ririkirake naba iai ni korakora tangirana iroum. Ko na kangaa ngkanne ni kaekaa te aomata ae titiraki ni kangai, “Ko koaua raoi bwa ko tangira Iehova?” Ko na boni bae ni kaekaa naba ngkekei ni kangai, “I tangiria riki nakon te aomata temanna ke te bwai teuana!”

2-3. Tera ae e tangiria Iehova bwa ti na kakoauaa, ao tera ae ti na maroroakinna n te kaongora aei? (Ieremia 31:3)

² Ma ko na kangaa ngkanne ni kaeka ngkana e titiraki temanna ni kangai, “Ko koaua raoi bwa e tangiriko Iehova?” Ko na baenikai ni kaeka, ao tao ko na iangoia bwa ko tau n tangiraki iroun Iehova ke ko aki? E taku te tari te aine temanna ae e bati ana kangaanga i nanon ikawairakena: “I ataia ae I tangira Iehova. I aki raraoma n anne. Te bae I raraomaeakinna n angiin te tai, bwa e tangirai Iehova ke e aki.” Ma tera raoi ana namakin Iehova ibukim?

³ E tangiria Iehova bwa ko na kakoauaa ae e bon tangiriko. (Wareka Ieremia 31:3.) Ni koauana, bon Iehova ae katikiko nakoina. Ao ngke ko katabua maium nakoina ao ni bwabetitoaki, ko a karekea iai te bwai ae rangi ni kakawaki, ae ana tangira ae koaua. E korakora te tangira anne ao e teimatoa n aki toki. E kairaki iai bwa e na taraiia taan taromauria aika kakaonimaki, n ikotaki naba ma ngkoe, bwa kaanga ana “bwai ae kakawaki.” (Maraki 3:​17, kbn.) E tangiria Iehova bwa ko na kakoauaa raoi ae e tangiriko n aron naba te abotoro Bauro ae e kakoauaa tangirana iroun Iehova. E korea aei Bauro ma te aki nanououa: “I kakoauaa raoi bwa e aki kona te mate ke te maiu, ke anera ke taian tautaeka, ke bwaini ngkai ke baika a na roko, ke taiani mwaaka, ke baika mena i eta ke i nano, ke te bwai teuana riki ae karikaki, ni karaureira ma tangirara iroun te Atua.” (IRom 8:​38, 39) N te kaongora aei ao ti na maroroakinna bwa bukin tera ngkai ti riai ni kakorakoraa onimakinan ae e bon tangirira Iehova ao te bae kona ni buokira ni karaoa anne.

BUKINA NGKAI TI RIAI NI KAKOAUAA TANGIRARA IROUN IEHOVA

4. Ti na kangaa ni kona ni kaitaraa teuana mai buakon ana bwai n nanowanawana Tatan?

⁴ Ti na kona ni kaitaraa teuana “ana bwai n nanowanawana” Tatan, ngkana ti kakoauaa tangirara iroun Iehova. (IEbe. 6:11) E na kabanea ana konaa Tatan ni katoka ara beku iroun Iehova. Teuana mai buakon ana bwai n nanowanawana Tatan, boni kauekean te kewe ae e aki tangirira Iehova. Tai mwaninga ae e rangi ni kai rereke ana anga Tatan. E aki toki ni kataa temanna ngkana e mamaara, bwa tao e taonakinako n te rawawata ibukini baike e rinanoi rimoa, ke kangaanga aika e rinanoi ngkai, ke e raraomaeakini kanoan taai aika imwaira. (TaeRab. 24:10) Titeboo Tatan ma te raian ae ukoukora mamaarani konana. Ngaia are e kataia ni kabongana ara tai n rawawata ni kabwarai nanora iai. Ma ngkana ti kakorakoraa onimakinan ae e tangirira Iehova, ti na tauraoi riki ngkanne n “tei ni kaitaraa” Tatan ma ana bwai ni kamwane ao ana bwai n nanowanawana.​—1Bet. 5:​8, 9; Iak. 4:7.

5. E aera ngkai ti kainnanoa ae ti na namakina ae ti tangiraki ao ni kakawaki iroun Iehova?

⁵ Ti na kona ni kaaniaki ma Iehova ngkana ti kakoauaa tangirara irouna. Iangoia bwa e aera ngkai ti kona n taekina anne. E karikira Iehova ma kainnanoan ae ti na tangiriia aomata ao ti na tangiraki naba. Ao ngkana iai ae e tangirira, ti a kairaki bwa ti na manga tangiria. Ngaia are ngkana ti namakinna bwa ti rangi n tangiraki ao ni kakawaki iroun Iehova, ti na rangi n tangiria riki. (1Ioa. 4:19) Ao ngkana e a rikirake tangirana iroura, e na rikirake naba tangirara irouna. E taekinaki ae kangai n te Baibara: “Kaania te Atua, ao ane e na kaaningkami.” (Iak. 4:8) Ti na kangaa ngkanne ni kakorakoraa onimakinan ae e bon tangirira Iehova?

TERA AE KONA NI BUOKIRA NI KAKOAUAA TANGIRARA IROUN IEHOVA?

6. Tera ae ti kona n tataroia bwa ti aonga ni kakoauaa tangirara iroun Iehova?

⁶ Taekina raoi te bae ko nanonna n am tataro ao botumwaaka iai. (Ruka 18:1; IRom 12:12) Ngkana e riai, kabatiaa am bubutii nakon Iehova ni katoabong bwa e na buokiko n taraiko n aron ana taratara. Ni koauana, e kangaanga bwa e na bitaki nanora ae kabuakakaira. Ma uringnga are e rianako riki aron Iehova nakon nanom. (1Ioa. 3:​19, 20) E kinako riki Iehova nakoni kinaakim i bon iroum, ao e nora ae ko aki kona n noria. (1Tam. 16:7; 2Rongo. 6:30) Ngaia are tai baenikai ni “bunrii” am namakin nakoina ao butiia bwa e na buokiko ni kakoauaa tangiram irouna. (TaiAre. 62:8) Ao mwakuria am tataro n arom ni karaoi baika a na taekinaki imwina.

7-8. E kangaa Taian Areru ni karaui nanora bwa e bon tangirira Iehova?

⁷ Kakoauai ana taeka Iehova. E kairiia taani korea te Baibara n taamneina bwa a na kabwarabwaraa bwa antai raoi ngaia. Nora aron te tia areru are Tawita ni kabwarabwaraa Iehova n te aro ae oti iai bwa e tatangira Iehova. “E kaan Iehova ma akana uruaki nanoia. E kamaiuia akana a bwara nanoia.” (TaiAre. 34:​18, kbn.) Ko kona n namakinna ae akea ae e ota iroum ngkana e rawawata nanom. Ma e berita Iehova bwa akanne aekaki n tai ake e a kaan riki iai ma ngkoe, ibukina bwa e noria bwa ko a kainnanoia riki n te tai anne. E korea ae kangai Tawita n te areru riki teuana: “Ikotii rannimatau n am kunniman ae nnen te ran.” (TaiAre. 56:8) E noriko Iehova n taai ake ko kekeiakina iai am kangaanga. E rangi n tabeakiniko ao e atai baika ko rinanoi. Ai aron ae e rikoi rannimatam ao e kawakini, kaanga ai aron te ran ae rangi ni kakawaki n ana kunniman te tia mwamwananga. Ti wareka ae kangai n Taian Areru 139:3: “Ko taneiai ma arou ni kabane [ngkoe ae Iehova].” E nori Iehova arom ni kabane, ma e kaatuua riki taraan te bae ko karaoia ae raoiroi. (Ebera 6:10) Bukin tera? Ibukina bwa a kakawaki irouna am kakorakora ake ko karaoi ibukini kakukureiana.a

⁸ Ai aron ae e kangai Iehova rinanoni kiibu aika kabebetenano aika n ana Taeka: “I tangiria bwa ko na ataa korakoran tangiram ma tabeakinam irou.” Ma n aron ae ti a tia n reiakinna, e kauekea te kewe Tatan ae aongkoa e aki tangiriko Iehova. Ngaia are ngkana ko raraoma n tabetai bwa e tangiriko Iehova ke e aki, teei teutana ao titirakiniko aei, ‘Antai ae N na kakoauaa, “taman te kewe” ke “te Atua ae tataekina te koaua”?’​—Ioa. 8:44; TaiAre. 31:5.

9. Tera ana karaunano Iehova nakoia akana a tangiria? (Te Otinako 20:​5, 6)

⁹ Iaiangoa ana namakin Iehova ibukia naake a tangiria. Iangoa ana taeka Iehova nakoni Mote ao tibun Iteraera. (Wareka Te Otinako 20:​5, 6.) E berita Iehova bwa e na teimatoa ni kaotiota te tangira ae koaua nakoia akana tangiria. Ti kabebeteaki n taeka akanne bwa ngkana e namakina tangirana Atuara ae kakaonimaki ni koaua irouia taan taromauria, e na bon tangiriia naba. (Neem. 1:5) Ngaia are ngkana ko a manga nanououa n tabetai bwa e tangiriko Iehova ke e aki, teei moa ao titirakiniko aei, ‘I tangira Iehova?’ Ao iangoa aei: Ngkana ko tangiria ao ko kataia ni kabanea am konaa ni kakukureia, ao ke e karauaki nanom bwa e tangiriko naba. (Tan. 9:4; 1Kor. 8:3) N taekana teuana, ngkana ko koaua raoi bwa ko tangira Iehova, e aera bwa ko na aki kona ni kakoauaa ae e tangiriko naba? E na bon teimatoa n tangiriko ao e na bon aki kitaniko.

10-11. E tangiria Iehova bwa ko na iaiangoa te kaboomwi n te aro raa? (I-Karatia 2:20)

¹⁰ Kananoa am iango i aon te kaboomwi. Ana bwaintangira ae rianako Iehova nakoia aomata bon ana karea ni kaboomwi Iesu Kristo. (Ioa. 3:16) Ma te bwaintangira naba nakoim? Eng! Iangoa rongorongon te abotoro Bauro. Uringnga are e karaoi buure aika kakaiaki tabeua imwain rikina bwa te Kristian ao e riai n teimatoa ni buakana aki kororaoina. (IRom 7:​24, 25; 1Tim. 1:​12-14) Ma e ngae n anne, e teimatoa n iangoa te kaboomwi bwa te bwaintangira nakoina mairoun Iehova. (Wareka I-Karatia 2:20.) Uringnga are e kaira Bauro rinanon taamneina Iehova bwa e na korei taeka akanne. Ao a a riki bwaai ni kabane aika n te Baibara bwa reireiara. (IRom 15:4) E oti n ana taeka Bauro bwa e tangiria Iehova bwa ko na iaiangoa te kaboomwi bwa Ana bwaintangira nakoim. Ngkana ko iangoa te kaboomwi n te aro aei, ko a kakorakoraa iai onimakinan ae e bon tangiriko Iehova.

¹¹ Ti kaitaua Iehova ni kanakoan Iesu nakon te aonnaba bwa e na mate ibukira. Ma bukin riki rokon Iesu n te aonnaba, boni kaongoaia aomata te koaua ibukin te Atua. (Ioa. 18:37) Ae nanonaki naba iai ana namakin Iehova ibukia natina.

ARON IESU NI BUOKIRA NI KAKOAUAA TANGIRARA IROUN IEHOVA

12. E aera ngkai ti kona ni kakoauaa kabwarabwaraan Iehova iroun Iesu?

¹² Ni menan Iesu n te aonnaba ao e tauraoi ni kaotiotia bwa aekakira Iehova. (Ruka 10:22) Ti bon riai ni kakoauaa kabwarabwaraan Iehova iroun Iesu. Bwa ni koauana, e memena Iesu i rarikin Iehova i karawa i nanon te tai ae rangi ni maan, imwain ruona nakon te aonnaba. (IKoro. 1:15) E a tia Iesu n namakina ao n nora naba aron tangirana iroun Iehova ao tangiraia natina aika kakaonimaki. E kangaa Iesu ni buokiia tabemwaang bwa a na kakoauaa tangiraia iroun te Atua?

13. E tangirira Iesu bwa ti na iangoa Iehova n te aro raa?

¹³ E tangiria Iesu bwa ti na iaiangoa Iehova n ai arona. N taian Euangkerio ao e arana Iehova Iesu bwa “Tamana” 160 tabun te tai. Ao ngke e taetae nakoia taan rimwina, e kamanenai taeka aika “Tamami” ke “Tamami are i karawa.” (Mat. 5:16; 6:26) E taekinaki ae kangai n te study note are ni Mataio 5:16: “N taai ake rimoa ao a kakabonganai nakoa aika rietata aika bati ana toro te Atua ni kabwarabwaraa ao ni wetea iai Iehova, n aroni ‘Moan te Mwaaka,’ ‘Teuare Moan te Rietata,’ ao te ‘tia Karikiriki ae Moan te Kakannato,’ ma e oti kaanin ana reitaki te Atua ma taan taromauria man aron Iesu ni kabongana te taeka ae taneiai te aba iai ae ‘Tamami.’ ” E oti raoi bwa e tangirira Iesu bwa ti na katotongnga, n arora n iangoa Iehova bwa Tamara ae tatangira ae a kakawaki Irouna natina. Ti na rinanoi ngkai ana katoto aika uoua Iesu ngke e kamanena te taeka ae “te Tama.”

14. E kangaa ni kaotia Iesu ae ti rangi ni kakawaki i matan Tamara are i karawa ngaira n tatabemanira nako? (Mataio 10:​29-31) (Nora naba te taamnei.)

¹⁴ Te moan, iangoi ana taeka Iesu ake ni Mataio 10:​29-31. (Warekia.) Mannikiba aika uarereke aika taian tibaaro a bon aki kona n tangira Iehova ao n taromauria. Ma e ngae n anne, a kakawaki iroun Tamara bwa e ataa temanna ngkana e bwaka. Ai batira riki ngkanne kakawakia irouna taan taromauria aika kakaonimaki ake a beku irouna ibukin tangirana! Ni kibuna 30 ao e kangai te study note ibukin te kibuntaeka ae “a bane ni warekaki naba irannatumi”: “Ngkai e atai naba Iehova baika uarereke aikai ibukira, ti a kakoauaa iai bwa a boni kakawaki irouna taan rimwini Kristo n tatabemania nako.” E bon tangirira Iesu bwa ti na kakoauaa ae ti rangi ni kakawaki i matan Tamara are i karawa ngaira n tatabemanira nako.

15. Tera reireiam ibukin Tamam are i karawa man ana taeka Iesu ake n Ioane 6:44?

¹⁵ Nora ana kauoua ni katoto Iesu ni kabongana te taeka ae “te Tama.” (Wareka Ioane 6:44.) Bon Tamam are i karawa ae katikiko ke e anoiko nakon te koaua. Bukin tera? Ibukina bwa e noria ae e tauraoi nanom ni butimwaea te koaua. (Mwa. 13:48) E taekinaki n te study note n Ioane 6:44 bwa e bae Iesu ni mwanewei ana taeka Ieremia ake a oti n ara kibu ae aana ara kaongora aei ae kangai: “I katikiko nakoiu n te tangira ae koaua [ke, teimatoa ni kaota nakoim te tangira ae kona n onimakinaki.” (Ier. 31:3; kbn.; kabotaua ma Otea 11:4.) Iangoa anne. E teimatoa Tamara are i karawa n nora raoiroim ae ko aki noria.

16. (a) Tera raoi ae tuangira Iesu, ao e aera ngkai ti riai ni kakoauaa? (b) Ko na kangaa ni kakorakoraa onimakinan ae Iehova bon te Tama ae ko kainnanoia? (Nora te bwaoki ae “Te Tama ae Ti Bane ni Kainnanoia.”)

¹⁶ Ni kabwarabwaraan Iehova iroun Iesu bwa Tamara, ai aron ae kangai Iesu nakoira: “Tiaki tii Tamau Iehova, ma bon Tamami naba. Ao I berita nakoimi bwa e bon tangiringkami ao e tabeakiningkami n tatabemaningkami nako.” Ngaia are ngkana e a manga roko ae ko raraoma bwa e tangiriko Iehova ke e aki, teei moa ao titirakiniko aei, ‘Tiaki I riai ni kakoauai ana taeka te Nati are bon tii ngaia ae kinaa raoi Tamara ao e tataekina te koaua n taai nako?’​—1Bet. 2:22.

TEIMATOA NI KAKORAKORAA ONIMAKINANA

17. E aera bwa ti riai n teimatoa ni kakorakoraa onimakinan ae e bon tangirira Iehova?

¹⁷ Ti riai n teimatoa ni kakorakoraa onimakinan ae e bon tangirira Iehova. N aron ae ti a tia n reiakinna, e na boni kabanea ana konaa te tia kairiribai nakoira ae wanawana ae Tatan, ni katoka ara beku iroun Iehova. E na teimatoa Tatan ni kataia ni kamamaraa iroura onimakinan ae e tangirira te Atua bwa ti aonga ni mamaara. Ti bon aki riai ni katokanikaia Tatan!​—Iobi 27:5.

18. Ko na kangaa ni kakorakoraa onimakinan ae e bon tangiriko Iehova?

¹⁸ Ko kakorakoraa onimakinan ae e bon tangiriko Iehova, ngkana ko teimatoa n tataroa buokam bwa ko na iaiangoiko n aron ana iango. Kananoa am iango i aon aroia taani korea te Baibara ni kabwarabwaraa ana tangira ae akoi. Iaiangoi arona ngkana e namakina tangirana. E bon aki kona n ae e na aki manga kaotiota te tangira. Kananoa am iango bwa e aera ngkai ko kona n iangoa te karea ni kaboomwi bwa te bwaintangira nakoim. Ao onimakina ana taeka ni karaunano Iesu ae Iehova bon Tamam are i karawa. Ngkana iai ae e kangai: “Ko koaua raoi bwa e tangiriko Iehova?” ko na boni kaeka ma te aki nanokokoraki ni kangai: “Eng e tangirai! Ao N na kabanea au konaa ni katoabong ni kaota tangirana irou!”