E Teimatoa Ana Tangira te Atua

1-2. Tera te kangaanga ae a kaaitara ma ngaia Kristian aika bati?

KATAAMNEIA te booti ae mena i nukani marawa n tain te angibuaka. E mwemwerake n naao aika ririeta ao e a manga roko i nano. E na bon irira te nao te booti anne nakon taabo nako, ni karokoa iai temanna ae kabwakaa te atinro. E na boni kamatoaa te booti te atinro ao n tukia bwa e na aki beibetinako n tain te angibuaka.

² Ngkana ko rinanon te kataaki teuana ae korakora, ko bae n riki bwa kaanga te booti arei. A kona ni bibitaki am namakin. N te bong teuana ko kakoauaa raoi ana tangira ao ana boutoka Iehova, ao n te bong are imwina ko a manga raraoma bwa e nora te bae ko rinanona ke e aki. (TaiAre. 10:1; 13:1) Tao e anga taeka aika kabebetenano raoraom, ao ko kaungaaki iai i nanon tabeua te tai. (TaeRab. 17:17; 25:11) Ma imwina ko a manga raraoma naba. Ko bae naba n iangoia bwa tao e a kaaki taekam Iehova. Ko na kangaa ni kamatoako ngkana ko kaaitara ma te kataaki? N taekana teuana, ko na kangaa ni kakoauaa ao n teimatoa ni kakoauaa ana tangira Iehova ma ana boutoka?

3. Tera ae nanonaki n “te tangira ae koaua,” n aron ae oti n Taian Areru 31:7 ao 136:​1, ao bukin tera ngkai ti kona n taekinna ae bon te katoto ae rianako iai Iehova? (Nora naba te taamnei.)

³ Te anga teuana ae ko kona iai ni kamatoako n taini kataakim ngkana ko ururinga ana tangira ae koaua Iehova. (Wareka Taian Areru 31:7; 136:1.) Te taeka ae “te tangira ae koaua” e kaotaki iai ana reitaki ae rangi ni kaan ao ae teimatoa te aomata temanna ma are temanna. Bon te katoto ae rianako Iehova ibukin te tangira ae koaua. Ni koauana, e kabwarabwaraaki n te Baibara bwa e “bati irouna te tangira ae koaua.” (TeOti. 34:​6, 7) E taekinaki naba ae kangai n te Baibara ibukin Iehova: “E bati am tangira ae koaua ibukia te koraki ni kabane ake a weteiko.” (TaiAre. 86:5) Iangoa ae nanonaki n anne: E aki kona Iehova ni kitania ana toro aika kakaonimaki! Ururingan ae e kakaonimaki ni koaua Iehova e kona ni kamatoako ngkana ko boo ma te kataaki ae korakora.​—TaiAre. 23:4.

URINGNGA AE ANA TANGIRA IEHOVA BON TE MOAN REIREI MAN TE BAIBARA

4. Taekini katoto ni kaineti ma taiani moan reirei man te Baibara, ao kabwarabwaraa bwa e aera ngkai ti a aki kai katikakinako.

⁴ Te anga riki teuana ae ko kona ni kamatoako iai n taini kataakim, ngkana ko uringnga ae ana tangira Iehova bon te moan reirei man te Baibara. Tera nanon te taeka ae “te moan reirei man te Baibara” iroum? Tao ko bae n iangoi koaua man te Baibara ake ko a tia n reiakin n Ana Taeka te Atua. N te katoto, ko a tia n reiakinna ae Iehova bon aran te Atua, Iesu bon Natin te Atua ae ana rikitemanna, a aki ataa te bwai teuana akana mate, ao e na riki ni bwaretaiti te aonnaba aei ao a na maeka iai n aki toki aomata. (TaiAre. 83:18; TeMin. 9:5; Ioa. 3:16; TeKao. 21:​3, 4) N te tai are ko kakoauai iai reirei akanne, ko a aki kona ni manga katikakinako. Bukin tera? Ibukina bwa ko a ataia ae a boto i aon te koaua. Ti na noria ngkai bwa e kangaa ururingan ae bon te moan reirei man te Baibara ana tangira Iehova, ni kona ni buokiko ni kakewea te iango ae e bon aki tabe ke n nora te bae ko rinanona Iehova.

5. Kabwarabwaraa bwa a kangaa n uruanaki angareirei aika kairua.

⁵ Tera ae e buokiko ni kanakoi angareirei aika kairua ngke ko moan reiakina te Baibara? Tao ko bae ni buokaki n arom ni kabotaui reirei ake n am Aro ma ana reirei te Baibara. Iangoa te katoto teuana aei: Iangoia ae ko kakoauaa ngkoa ae Iesu bon te Atua ae Moan te Mwaaka. Ma ngke ko a reiakina te Baibara ko a titirakiniko aei, ‘E boni koaua te angareirei aei?’ Imwin neneran te bwai ni kakoaua n te Baibara, ko a kona ni kaekaa bwa e aki koaua. Imwina ko a onea mwin te angareirei are kairua anne n ana koaua te Baibara aei: Iesu bon “te moanibung i buakoni baika karikaki ni kabane,” ao “Natin te Atua ae ana rikitemanna.” (IKoro. 1:15; Ioa. 3:18) Ni koauana, e kona ni kangaanga ‘uruan’ angareirei aika kairua aika “nene wakaaia.” (2Kor. 10:​4, 5) Ma n te tai are ko a kona ni karaoia iai, ko a aki kona ni manga okiri reirei ake ko a tia ni kitani.​—IBir. 3:13.

6. E aera ngkai ko kona ni kakoauaa ae “e teimatoa n aki toki ana tangira ae koaua” Iehova?

⁶ Ko kona ni karaoa ae aron anne ni kaineti ma ana angareirei te Baibara ibukin ana tangira Iehova. Ngkana ko kaaitara ma te kataaki teuana ao ni moanna n raraoma n ana tangira Iehova, titirakiniko aei, ‘E eti te bae I iangoia?’ Kabotaua raraomam ibukin ana tangira Iehova ma taeka ake n Taian Areru 136:1 ae te kibu ae aanaki iai te kaongora aei. Bukin tera ngke e kabwarabwaraa ana tangira Iehova bwa e “koaua”? E aera ngke e kaokiokaki 26 te tai te kibuntaeka ae “e teimatoa n aki toki ana tangira ae koaua” n te areru anne? N aron ae ti a tia n rinanona, bon ana reirei te Baibara ae rangi ni kakawaki taekan ana tangira ae koaua Iehova ibukia aomata, ae titeboo naba ma ana angareirei te Baibara ake tabeua ake ko a tia ni butimwaei. E boni kairua te iango are e iangoiko Iehova bwa akea uaam ke e aki tangiriko. Kanakoa te iango anne, n aron ae ko kanakoi raoi angareirei aika kairua ake tabeua!

7. Taekini kiibu tabeua aika kaota te karaunano ibukin ana tangira Iehova.

⁷ Iai n te Baibara karaunano riki tabeua aika bati ibukin ana tangira Iehova. N te katoto, e taku Iesu nakoia taan rimwina: “Kam kakawaki riki nakoia tibaaro aika mwaiti.” (Mat. 10:31) E kangai Iehova nakoia ana aomata: “N na kakorakorako, eng, N na buokiko. N na boni boutokaiko raoi ni baiu ae te atai ae raoiroi.” (Ita. 41:10) Nora ana taeka ae rangi ni mataata anne. E aki kangai Iesu ‘Kam bae ni kakawaki riki nakoia,’ ao e aki naba taekina aei Iehova ‘N na bae ni buokiko.’ Ma a kangai: “Kam kakawaki riki” ao “N na buokiko.” Ngkana ko raraoma n ana tangira Iehova ngkana ko kaaitara ma te kataaki, a kona kiibu akanne ni buokiko bwa ko na aki tii namakina tangiram ma ko na ataia ae ko bon tangiraki. A boni koaua kiibu akanne. Te tataro ao kananoan am iango i aon anne e na kairiko bwa ko na taekin taeka ake n 1 Ioane 4:16 ae kangai: “Ti a ataa ngaira ana tangira te Atua ibukira ao ti kakoauaa.”a

8. Tera ae ko na karaoia ngkana iai taai ake ko bon raraoma naba iai n ana tangira Iehova?

⁸ Tera arom ngkana iai taai ake ko bon teimatoa naba iai n raraoma n ana tangira Iehova? Kabotaua te bae ko namakinna ma te bae ko ataia. A aki kona ni koaua taian namakin, ma e boni koaua ana tangira Iehova are taekinaki n te Baibara. Ngkana ti aki kakoauaa ae e tangirira Iehova, ti a tarariaoa iai aroarona ae rangi ni kakawaki ae te tangira.​—1Ioa. 4:8.

IAIANGOA ‘TANGIRAKIMI’ IROUN IEHOVA

9-10. Tera te rongorongo are n ana taeka Iesu ae kangai, “E bon tangiringkami te tama,” n aron ae koreaki n Ioane 16:​26, 27? (Nora naba te taamnei.)

⁹ Ti kona n reiakina ae bati riki ibukin ana tangira Iehova n iaiangoan ana taeka Iesu nakoia taan rimwina ae kangai: “E bon tangiringkami te Tama.” (Wareka Ioane 16:​26, 27.) E aki taekin taeka aikai Iesu bwa a na tii namakina iai te kukurei taan rimwina. Ni koauana, e kaotaki ni kanoan te kibu aei bwa e aki taekin aia namakin n te tai anne. Ma e maroroakina te bwai teuana ae kaokoro ae te tataro.

¹⁰ E a tibwa tia Iesu n tuangia taan rimwina ae a riai n tataro rinanona ma tiaki nakoina. (Ioa. 16:​23, 24) E kakawaki irouia bwa a na ataa anne. Imwini mangautin Iesu ao a boni bae ni kan tataro nakoina taan rimwina. Ni koauana, a a kinaa Iesu bwa raoraoia. A kona n iangoia ae tangiraia irouna e na kairia bwa e na ongoraei aia bubutii ao ni karokoa iroun te Tama. Ma e taekinna Iesu bwa a aki riai n iango n aron aei. Bukin tera? Ibukina bwa e tuangia ni kangai: “E bon tangiringkami te Tama.” Te koaua anne boni kanoan ana moan reirei te Baibara ibukin te tataro. Iangoia bwa tera nanon anne ibukim: Rinanon reiakinan te Baibara iroum, ko a kinaa ao n tangira Iesu. (Ioa. 14:21) Ma n aroia taan rimwini Kristo n te moan tienture, ko kona n tataro nakon te Atua n ataakin ae ‘e bon tangiriko.’ Ko kaota onimakinan taeka akanne n taai ake ko tataro iai nakon Iehova.​—1Ioa. 5:14.

ATAIA BWA TERA AE KARIKA RARAOMAM

11. Bukin tera ngkai e kukurei Tatan ngkana ti a raraoma n ana tangira Iehova?

¹¹ Tera ae karika te raraoma n ana tangira Iehova? Ko bae ni kaekaa bwa bon Tatan, ao e boni koaua anne. E “ukoukora ae e na ongnga” te Riaboro ao e na boni kukurei ngkana ti raraoma n ana tangira Iehova. (1Bet. 5:8) Ma e kairaki Iehova n ana tangira bwa e na katauraoa te kaboomwi ae te bwai ae tangiria Tatan bwa ti na namakinna ae ti aki tau ni karekea. (Ebera 2:9) Ma antai ae kakabwaiaaki ngkana ti raraoma n ana tangira Iehova? Bon Tatan. Ao antai nanona ae karaoaki ngkana ti kabwarai nanora i aani kangaanga? Bon Tatan naba. E tangiria Tatan bwa ti na iangoia ae e aki tangirira Iehova. Ma bon Tatan ae aki tangiraki iroun Iehova. Teuana mai buakon ana “bwai n nanowanawana,” e kataia ni kairira bwa ti na iangoia ae bon ngaira ae ti aki tangiraki ao n ribaaki iroun Iehova. (IEbe. 6:11) Ngkana ti ataa te bwai ae kataia ni karaoia te tia riribaira, ti a kona ngkanne ni kananomatoaira riki n “rarawa nakon te Riaboro.”​—Iak. 4:7.

12-13. E kangaa rikiara ae te bure ni karekea te raraoma iroura n ana tangira Iehova?

¹² E kona naba n riki te raraoma n ana tangira Iehova man te bwai teuana. Tera te bwai anne? Bon rikiara ae te bure. (TaiAre. 51:5; IRom 5:12) E karaurenakoia aomata te bure mairoun te tia Karikiriki. E urua naba ana iango te aomata, nanona, ao rabwatana.

¹³ E rotakibuaka ara namakin n te bure, ao e kairira bwa ti na namakina te uringaaba, te raraoma, te aki mano raoi, ao te kamaamaeaki. Ti kona ni karekei namakin akanne ngkana ti karaoa te bure teuana. Ma a kona naba n ueke ibukina bwa ti ataia ae ti bubure, ae te bwai ae e rangi ni kaokoro ma karikara. (IRom 8:​20, 21) N aron te kaa ae tira rabwana ae e aki kona n roko raoi ni butina, ngaira naba e aki kona n roko raoi aroni mwamwakurira n aroni moani karikara, ibukina bwa ti aki kororaoi. Ngaia are ti aki mimi ae ti a manga raraoma n tabetai ibukin ana tangira Iehova. Ngkana e riki anne, ti riai n uringnga ae Iehova bon “Atuani karawa, ae te Atua ae kakannato ao ae kamimi ae . . . kaota te tangira ae koaua nakoia te koraki ake a tangiria ma ni kawakin ana tua.”​—Neem. 1:5.

14. E na kangaa kananoan ara iango i aon te kaboomwi ni buokira ni kanakoa te iango ae e aki kona n tangirira Iehova? (I-Rom 5:8) (Nora naba te bwaoki ae “Tarataraiko Mani ‘Mwaakan te Bure ae Mwamwanaa te Aba.’ ”)

¹⁴ E koaua ae ti kona n namakinna n tabetai bwa ti aki tau n tangiraki iroun Iehova. Ao ni koauana, ti bon aki tau ni karekea ana tangira, ao anne bukina ae e rangi n okoro iai ana tangira. Ti aki karekea tangirara iroun Iehova man ara kakorakora. Ma e rabuni ara bure te kaboomwi ao e katauraoa Iehova te bwaintangira anne ibukina bwa e tangirira. (1Ioa. 4:10) Uringnga naba are e roko Iesu ni kamaiuia taani bure ao tiaki aomata aika kororaoi. (Wareka I-Rom 5:8.) Akea i buakora ae kona ni karaoi bwaai n te aro ae kororaoi ao e aki kantaningaira Iehova bwa ti na karaoa anne. Ngkana ti ataia ae ti kona n raraoma n tangirara iroun Iehova ibukin rikiara ae te bure, ti a kona ni kananomatoaira riki bwa ti na aki kariaia rikin aei.​—IRom 7:​24, 25.

RINEIA BWA KO NA TEIMATOA NI KAKAONIMAKI NI KOAUA

15-16. Ngkana ti teimatoa ni kakaonimaki ni koaua nakon Iehova, tera ae ti kona ni kakoauaa raoi ao bukin tera? (2 Tamuera 22:26)

¹⁵ E tangirira Iehova bwa ti na karaoa ara motinnano ae eti n arora n “nimtia.” (TuaKau. 30:​19, 20) Ngkana ti karaoa anne, ti kona ni kakoauaa ae e na bon teimatoa ni kakaonimaki ni koaua nakoira. (Wareka 2 Tamuera 22:26.) Tii ngkana ti teimatoa ni kakaonimaki ni koaua nakon Iehova, ti a kona ngkanne n onimakinna ae e na boni buokira ngkana iai te kangaanga ae riki ni maiura.

¹⁶ N aron ae ti a tia ni maroroakinna, iai bukina ngkai ti riai ni kamatoaira ngkana ti kaaitara ma kataaki. Ti ataia ae e tangirira Iehova ao e na boutokaira. Anne ana angareirei te Baibara. Ngkana ti raraoma n ana tangira Iehova, ti kona n iaiangoa te bae ti ataia ibukin ana tangira ao tiaki i aon te bae ti namakinna n te tai anne. Ti bia teimatoa n onimakina ana koaua te Baibara ae e teimatoa n aki toki ana tangira Iehova.