Tóm Gbò E Jíízọ̀s Beè Lẹ̀ẹ̀là

4 Boo tṍó e pálaa ọ̀và dì e bà gé ló bel nè gbòa, gbò vààla gyọ́ọ, nen ea di togó tọọ̀ káí, nè pá Sádùsíì beè gbóó dú vá ló. 2 Nyíè gbòí beè palàge bììlà, boo béè kọọ̀ gbò e Jíízọ̀s lẹẹlàa géè noomà nuù gbòa vaá kọ́ tẹlẹ bàlà kẽ kọọ̀ Jíízọ̀s beè kẽ̀èà aa kemà ú. 3 Vó à naa, bà gbóó sií va nvee tọọ̀ kpọ́gọ́lọ́ dọ̀ọ̀mà tṍó e dee zilà, boo béè kọọ̀ tṍóá beè dú ló èlà. 4 Sõò gã́bug gbò e ba beè pãané va tṍ lóá beè ié zìgà mm̀ Jíízọ̀s vaá dénè ọ̀và beè gbóó toolá nú ea é láá dú 5,000 nen.

5 Tṍó e dee zilà, gbò e bà gé bẹl va, gbò kàneǹ pá Júù, nè gbò émì kpá beè gbóó bõoná Jèrúselẹ̀m, 6 bií ló Ánàs, ea dú neǹ togó vààla gyọ́ọ, Kéíàfàs, Jṍòn, Àlẹ̀xzándà, nè dénè pá dúa ló neǹ togó vààla gyọ́ọá. 7 Bà gbóó tú Pítà nè Jṍòn elè vá zẹ̀ẹ̀, vaá bĩiná va kọọ̀: “Kpóó mée àbèè béè mée ní eo síìmàì tómí ẽ́?” 8 Tṍóá, nyómá káí à gbóó bã mm̀ Pítà naa ní ea kọ́ nèva kọọ̀:

“Booló gbò eo gé bẹlii nè gbò kàneǹ pá Júù, 9 be ò gé bĩ́inai bel beele boo béè kọ è náà lé gbálà ea beè gbẹái kọ̀vàí, vaá ò gbĩ́ gè nyimai ló nen ea náa kọọ̀ kpáló gbálàí á valí, 10 beè vó, nyimai vaá dénè pá Ízrẹẹ̀l á nyimá nágé kọọ̀ boo béè Jíízọ̀s Kráìst, ea dú Názarẹ̀t, eo beè tuíe kaí kú té vaá Bàrì à kẽée lọl kemà úá ní ea náa kọọ̀ gbálàí á ié válá ló vaá eláí kèsĩ́ kĩí ẽ́. 11 Jíízọ̀s ní ea dú kpò dem e booló gbò tìb tọ beè gbẹmai nvée, vaá baa oòa kẽ nòòmà gából deè tọ ẹ́.’ 12 Nagé, née íè tọ́ọ̀ kà neǹ dùùlà daalá lọl ló ẹlẹ, boo béè kọọ̀ náa íe tọ́ọ̀ kà dõona kà bée ea di boo kunukẽ̀í e gbò nen é láá tení dú ló ié dùùà.”

13 Tṍó e bà mon bé e Pítà nè Jṍòn tú agẹ ló loomá bel naa, vaá bà nyímá kọ bà náa beè sí tọọ̀ kpá vaá gbò nen náa bọọgẹ̀ nyimá va ló, à gbóó palàge bọọ́ vá ló. Bà gbóó kẽ̀èa boo kọọ̀ ba beè olòó di ló Jíízọ̀s. 14 Boo béè kọ bà gé mon gbálà e bà beè bóeá ea di éla vá ló kĩá, bà náa beè láá ló tọ́ọ̀ kà bel tẹlẹ dẽe. 15 Vó à naa, bà gbóó kọ́ nè táàa ọ̀và kọ bà á zẹ́ẹ́ aa mm̀ Pọ̀b Tọ Bèèlaá dọ kèdẹi. Bà gbóó zọ̀ ene bilá ló 16 kọọ̀: “Éé ní eé náa gbòí é, boo béè kọọ̀, kà-kà bel ea dì dú kọọ̀, baa sí tóm dũ̀ùnè naa ní e dénè gbò e bà di Jèrúselẹ̀m ni monmà dẽe, vaá née é láá àmà sàn. 17 Vó à naa, kọbé níí náa kpáá zààlà nà, naanii èé síìmà va pọ̀ vaá kọ́ nèva kọọ̀ bà á gá kpáá tu ná béeí lóómá ná bel nè tọ́ọ̀ nen.”

18 Bà gbóó kolí va vaá nèva log kọ bà á gá kpáá lo ná tọ́ọ̀ kà bel àbèè ge noomà nu boo béè Jíízọ̀s. 19 Pítà nè Jṍòn à gbóó aalá nèva kọọ̀: “Beelai neai bọọ bá, be à lelà kesĩ́ Bàrì kọ é gbàntṍ ló boolo èlmà Bàrì. 20 Sõò kilma ló beele, née é láá òòà aa ló gè ló bel kilma ló gbò nú e beè mòn vaá dã̀.” 21 Vó à naa, tṍó e ba ni kpáá siimà va pọ̀ lọ̀l, bà gbóó sọ̀va bá, boo béè kọ bà náa beè mòn nú e bà é láá élá boo nèèmà va kpọ̀té nè ge kọọ̀ pọ̀ beè sií va ló gbò e ba beè di kĩá, boo béè kọọ̀ dénè ọ̀và géè lèèlà Bàrì boo béè nú ea nááá. 22 Gbálà e ba beè sí tóm dũ̀ùnè boomáeí beè sigá ló 40 gbáá.

23 Tṍó e bà sọ́ va bá, bà gbóó àà nyoone pà vígà vaá kọ́ kọ̀láá kà nú e gbò togó vààla gyọ́ọ nè gbò kàneǹ pá Júù beè kọ́ nèva á. 24 Tṍó e bà dã́ naa vó, bà gbóó gbá tã̀àgã ló Bàrì kọọ̀:

“Nen Ea Íei Ea Lẹ̀ẹ̀là Bel Bọọ Lọ̀l Vaá à Lee, olo ní eo dúù Nen eo beè dèm káála nè kunukẽ̀ ne pène nè dénè nú ea di m ẽ́. 25 O beè tú o nyómá loomá bel tenmá gã́ bẹẹ nómá tẹ̀ Dévìd, ea dú o gyóòlo kọọ̀: ‘Éé ní ea náa gbò dó àla à bã̀ súng vaá gbò nen à bugi togó boo nú ea dú kóló m ẽ́? 26 Gbò méné e bà di boo kunukẽ̀í a noo bé vaá gbò e bà gé bẹl a bṍóná kọbé bà náa uú boo Jìhóvà* nè nen ea beè sà.’ 27 Mm̀ kà-kà, Hẹ́rọ̀d nè Póntiọ̀s Páílèt, bií ló gbò e bà aa gbò dó àla, nè pá Ízrẹẹ̀l beè bõoná nakà pọ̀b boní boo béè ge naa uú boo o gyóòlo ea di káí, ea dú Jíízọ̀s eo beè sàa, 28 kọbé à ḿm̀-mè nú e olo beè tú tṍó gbẹẹ́ sĩ́ beeláfùl kọ à é nááá. 29 Kátogóí e Jìhóvà,* pãane tṍ ló gbò bel síìà pọ̀ e bà gé lóí vaá ò náa kọọ̀ pá o gyóòlo á láá kilsĩ́ gè tú agẹ ló loomá o moǹ bel, 30 vaá ò kilsĩ́ gè bó gbò zọ̀ló vaá sí tóm dũ̀ùnè tení dú ló béè o gyóòlo ea di káí, ea dú Jíízọ̀s.”

31 Tṍó e baa ni palàge bàn Bàrì lọ̀l, kĩée e ba beè bõonáá beè gbóó zùgà, vaá nyómá káí à gbóó bã mm̀ dénè ọ̀và naa ní e bà tú agẹ ló loomá moǹ bel Bàrì.

32 Nagé, dénè gbò e ba beè ié zìgà mm̀ Kráìsta beè gbaaá ló vaá ié tẽ̀ènè kà bùlà, vaá tọ́ọ̀ nen náa beè kọọ̀ nú ea íèè níà ńlẹ, tãa vó, ba beè gbá dõ̀ònà kọ̀láá kà nú e bà íe. 33 Vaá gbò e Jíízọ̀s lẹẹlàa beè kilsĩ́ gè tú agẹ bá siimá neǹ ditõ̀ò ea kil ló kẽ̀èà aa kemà ú Jíízọ̀s, ea dú Nen Ea Íéi, vaá Bàrì beè palàge tãanè dee bá dénè ọ̀và. 34 Kàsĩ́, tọ́ọ̀ nu náa beè bii tọ́ọ̀ ọ̀và, boo béè kọọ̀ dénè gbò e bà íe ól àbèè tọ beè oo vaá tú kpègè ea dú ló 35 nè gbò e Jíízọ̀s lẹẹlàa, vaá baala beè gbóó dõo nè buù nen dẹ̀ẹ̀a boo bíi ea di ló buù ọ̀và. 36 Vó à naa, Jósẹ̀f, e gbò e Jíízọ̀s lẹẹlà ólò kolí náe gé Bánabàs (ea tõó dọ̀, “nen ea ólò nvèè nyíe gbàà dõona gbò” tṍó e bà tab), ea dú gãà Lívaì, vaá dú nvín sãà Sáíprọ̀s, 37 beè oo ene kà kunukẽ̀ ea beè ié vaá tú kpègè ea dú ló má gbò e Jíízọ̀s lẹẹlàa.