Kpá E Pọ́ọ̀l Beè Lẹ̀ẹ̀là Má Pá Róm̀
12 Vó à naa e pá vígà, m̀ túù sàn nyíe e Bàrì íe bànmài kọ ó sẹlẹi bọọ kpáló dì belí vààla gyọ́ọ ea di dùm vaá di káí e Bàrì ténmá, ea dú gè sí tóm ea di káí tení dú ló gè tui bọọ kpóó bug siimai tóm. 2 Kubvii gè naanii nu belí bé e pá bàlà booí ólò naa nu naa, sõò nyaanai bọọ dùm tení dú ló bé eo bugìì togó naa, kọbé ò láá agalaí boo kọọ̀ nú e Bàrì gbĩ́ kọ ó naanii dú lé, gbõoma, vaá leemáe.
3 Tení dú ló sàn nyíe e Bàrì íeḿ ló, m̀ kọ́ọ̀ nè dénè bọ̀ì kọọ̀, tọ́ọ̀ bọ̀ì ó gá bugii togó kilmaí ló bọọ bá èlmà bé ea dú bíi gè bugi togó naa, sõò bugii togó kọbé ò láá iei lé bug dẹ̀ẹ̀à boo zìgà e Bàrì beè nè buù nen. 4 Boo béè kọọ̀ dì belí bé e íè gã́bug ketõ̀ò ea di ló nen, sõò dénè ketõ̀ò náa ólò sí tẽ̀ènè íb tóm naaá, 5 níà bé e náa kal ló béè kọọ̀ e bọọ̀ tõ̀ò, è dúù tẽ̀ènè kà nom̀ kpáló e di mm̀ gbaa ló kilma ló Kráìst naa ẽ́. Sõò buù bẹ̀ì ólò dẹ̀ẹ̀à boo ene. 6 Vó à naa, tã́gíní bé e íè kele-kele dõ̀ònù dẹ̀ẹ̀a boo sàn nyíe e Bàrì íeí ló á; be à dú níí gè kọ́ bùlà Bàrì, naanii mè èé kọ́ dẹ̀ẹ̀a boo zìgà e íè, 7 àbèè kọọ̀ be à dú níí gè sí tóm, naanii mè èé sí. Beè nen e ńlẹ dú níí gè noomà nu, á kilsĩ́ gè noomà. 8 Beè nen e ńlẹ dú níí gè siè kpóó ló gbò nen, á kilsĩ́ gè naa vó. Nen e ńlẹ dú níí gè dõo nu, á kilsĩ́ gè dõo taalẹ bá. Nen e ńlẹ dú gè tulè bõ̀ònatõ̀ò, á kilsĩ́ gè tú sìà kpóó ló naamá. Nen e ńlẹ dú gè ié sàn nyíe, á kilsĩ́ gè naa lọa bùlà.
9 Ó gá sẹlẹi ló belí kọọ̀ ò vulèì gbò nen boo tṍó e nóo vulèì va. Ọbvii nú ea dú pọ́lọ́, vaá ò kilíí sĩ́ gè naanii nú ea dú lé. 10 Palàge vulei ene dì belí pá tọ. Vaá ò gyaamaí sĩ́ mm̀ ge nveenii ka ló ene. 11 Tui agẹ bá siimai tóm, ó gá dui kpọ̀lọ̀. Nyómá káí á naa kọ ó iei bẹ̀à sã́ bùlà. Sii tóm nei Jìhóvà* dì belí gyóòlo. 12 Iei zààvà boo béè bọọ ból dẽesĩ́. Ĩimai tã̀àgã̀. Tãagãi ló Bàrì lee. 13 Dõonii nú eo íèì nei gbò e bà di káí dẹ̀ẹ̀à boo bé e bà íe bíi ló naa. Iei dùm kólì kyáà. 14 Banii Bàrì kọ á tãanè dee bá gbò e bà gé bíìgèi ló. Banii Bàrì kọ á tãanè deè bá gbò nen vaá ó gá gboi pṍò neí va. 15 Zọi gbò e bà íe zààvà iei zààvà vaá ò zọi gbò e bà gé tó, toi. 16 Ẹbvii dõona gbò dì belí bé eo ẹbvìì bọọ bá naa. Ó gá kai bùlà gbẹẹlíí boo nú ea bọọ, sõò iei lèèma mm̀ nú ea kil kẽ. Ó gá bugii togó kọọ̀ boolo ní eo palàge nyimai nu ẽ́.
17 Ó gá tui pọ́lọ́ kpẽemai pọ́lọ́ nei tọ́ọ̀ nen. Bugii togó boo nú ea lelà kèsĩ́ dénè nen. 18 Be à válí, zọi dénè nen tõoaí mm̀ fẹ́ẹ́-fẹẹ̀ ló dẹ̀ẹ̀a boo bé e bọọ kpóó sim tùlà naa. 19 Ó gá kpẽi pọ́lọ́ e pá nà vígà, sõò sọi tọ́ deè kọọ̀ Bàrì á tú a súng tẹlẹ boo gbò e bà sí pọ́lọ́, boo béè kọọ̀ ba beè emí kọọ̀: “Jìhóvà* kọ́ọ̀, ‘Ge kpẽ́ pọ́lọ́ kuu bá nda, nda é kpẽ́.’” 20 Sõò “beè tákói tá ló o neǹ ọ́b, nèe gyã́á. Beè òòe ká kpáá, nèe múú gè õ̀, boo béè kọọ̀ tṍó eo náà vó, ò kọọ̀ gẽ́è sã́ uué togó.” 21 Ó gá zìgà kọọ̀ pọ́lọ́ á bé ni èlbá, sõò kilsĩ́ gè tú lé beemá pọ́lọ́ èlbá.