Tóm Gbò E Jíízọ̀s Beè Lẹ̀ẹ̀là

20 Tṍó e tã̀àgã̀a ni kil kẽ, Pọ́ọ̀l à gbóó kolí nagbò nyòòne nvéeá, vaá tṍó ea ni síè va kpóó ló vaá kọ bà á agẹlẹ ló lọ̀l, à gbóó àà kil Màsìdónìà. 2 Tṍó ea ni téní zivèkà bálásĩ́á vaá siè kpóó ló gbò e bà di kĩá lọ̀l, à gbóó kil Gríìs. 3 A beè tú taà ẽ́ tõ̀òma kĩá, sõò boo béè kọọ̀ pá Júù beè noo gè síe pọ́lọ́ tṍó ea é gé bã mm̀ mìàlo kil Sìríà, à gbóó beeláfùl ge òòa kẽ tení Màsìdónìà. 4 Gbò e ba beè nyoonée dú Sọ́patà ea dú nvín Pírọ̀s ea dú Bẹ̀ríà, Àrístakọ̀s nè Sẹ̀kóndọ̀s e bà dú Tẹ̀sàlónaikà, Géíọ̀s ea dú Dẹ́bì, nè Tímotì, bií ló Tíkikọ̀s nè Trọ́fimòs e bà aa bálásĩ́ Ésìà. 5 Gbò gbálàí beè gyàài sĩ́ kẽ kil Tróàs gé elá bànài. 6 Tṍó e gbò deé e bà ólò dé Fétúlú E Nú Ea Ólò Gbuuve Nu Á Gé Gbààa ni tá sĩ́, e beè gbóó bã faà sĩ́ múú aa Fílipaì vaá iná vá ló gbẹá Tróàs tṍó e vòò dee ni téní, vaá e beè tú àlàbà dee tõ̀òma kĩá.

7 Kà lèlà túá dee ló sèa, tṍó e dénè bẹ̀ì ni bṍóná kọbé è dé gyã́á, Pọ́ọ̀l beè gbóó dààmà togó ló bel nèva boo béè kọ à é aa deé ea bẽene. A beè ló belá dọ̀ọ̀mà taa tóm dáá. 8 Té sã́ ea beè di mm̀ tọ gbàn deè e beè bõonáá beè bọọ́ tõ̀ò. 9 À íe ene kà nvín ãa gbálà ea kọlà Yútikọ̀s, ea beè di ĩ́ìtẽ́ deè nvíǹdò tṍó e Pọ́ọ̀l géè ló belá. Dáá beè palàge bã̀é dẽe, vaá tṍó ea ni dáa, à gbóó vẹẹá aa boo taà kpãà tọá dọ̀. Bà gá ínaé ló, a ú. 10 Sõò Pọ́ọ̀l beè dọ kunukẽ̀, màé boo, pììlàẹ bá ló, vaá kọọ̀: “Ó gá tãagãi, mè à di dùm.” 11 À gbóó òòà kil mm̀ to gbàn deèa gé baagi fétúlúá. Bà gbóó dè. A beè kilsĩ́ gè zọ̀ va loá bel dọ̀ọ̀mà tṍó e dee zilà, à gbóó àà. 12 Ba beè gbóó faalá nvín ea ni dumá ààmà, vaá nyíé va beè palàge ẹẹ.

13 E beè gbóó bã mm̀ mìàlo kil Ásọ̀s kọbé e dalà Pọ́ọ̀l gbẹá kĩá, boo béè kọọ̀ a beè kọ à é kyãamàè tọ kilìè kĩá. 14 Tṍó ea ínaí ló gbẹá Ásọ̀s, e beè gbóó túe nvee mm̀ mìàlo vaá àà kil Mìtìlínà. 15 Deé ea bẽene, e beè bã mm̀ mìàlo iná kuló Kíọ̀s, deé ea bẽene, è iná Sémòs, vaá deé ea bẽene, e beè gbóó iná Màìlítọ̀s. 16 Pọ́ọ̀l beè beeláfùl kọ náa é élàẹ Ẹ́fẹsọ̀s kọbé náa peelìè tṍó gbẹá bálásĩ́ Ésìà, boo béè kọ à géè gbalá kil Jèrúselẹ̀m kọbé à tulàẹ̀ Sẹ̀lẹ̀nù Deè Péntikọ̀st be à válí.

17 Sõò a beè tõó Màìlítọ̀s lẹ̀ẹ̀là tóm kolmá gbò kànen e bà di bõ̀ònatõ̀ò ea di Ẹ́fẹsọ̀s. 18 Tṍó e bà dú ináé ló, à gbóó kọ́ nèva kọọ̀: “Ò palàge nyimai bé em beè tõo naa gbẹáí zẹ̀ẹ̀ lọ̀l gé túá dee em beè iná bálásĩ́ Ésìà. 19 M beè tú kìlmà kpáló kẽ siimá tóm nè Nen Ea Íéi. M beè tò vaá mòn tã̀àgã̀ tṍó e pá Júù géè gbĩ́ gè fẹ́m. 20 Vaá ním beè òòà aa ló gè kọ́ gbò nú ea é dọ bélè nèi àbèè ge òòà aa ló gè noomài nu gbẹá kĩée e gbò nen dì nè aa tọ dọ tọ. 21 Sõò m beè tú agẹ bá kọọmá kpẹ̀a nè gbò e bà dú Júù nè gbò e bà dú Gríìs kọ bà á ọgá, kììa kẽ nyoone Bàrì, vaá ié zìgà mm̀ Nen Ea Íéi, ea dú Jíízọ̀s. 22 Vaá kátogóí, ẹbvii! dì belí bé e nyómá káí gé túlèm naa, m̀ gé aà kil Jèrúselẹ̀m, náa kal ló béè kọọ̀ ním nyímà ló nú ea é náaḿ ló gbẹá kĩá, 23 sõò áá nú em nyímà dú gè kọọ̀, nyómá káí beè kilsĩ́ gè kọ́ nèm kọọ̀, bà é síím nvee kpọ́gọ́lọ́ vaá biigèm ló aa bon dọ bon. 24 Sõò nà dùm náa bọọḿ ló. Áá nú ea bọọḿ ló dú gè sí tóm e Nen Ea Íéi, ea dú Jíízọ̀s beè nèmá lọl dẽe, ea dú gè tú agẹ bá kọọmá lé kpẹ̀a ea kil ló sàn nyíè Bàrì.

25 “Kátogóí, ẹbvii! M̀ nyímà kọọ̀ tọ́ọ̀ bọ̀ì em beè kọ́ kpẹ̀a ea kil ló Boǹ Méné Bàrì nèa nóo é mon naḿ mi. 26 Vó à naa, m̀ kólìi kọ ó sii neǹ ditõ̀ò nieí kọọ̀, miì tọ́ọ̀ nen á gém ból, 27 boo béè kọọ̀ m̀ gáà aa ló gè kọ́ nú ea dú bùlà Bàrì nèi. 28 Kuai dẽe ló vaá ò kui dẽe ló dénè naanà ból e nyómá káí beè íi bá ló kọ ó kui dẽe lóá. Kui dẽe ló bõ̀ònatõ̀ò Bàrì ea beè tú miì a Sã́áná zalmáá. 29 M̀ nyímà kọọ̀ tṍó e nda é aà, gbò kpọ́í e bà é gbo gyã̀à é bã́í zẹ̀ẹ̀, vaá bà náa é tú gbọ́ọ́-gbọọ̀ ló faamá gbò naanà bólá. 30 Vaá gbò e bà aa zẹ̀ẹ̀ boolo é beè dù vaá kpọ́ kyáá bel boo béè ge kẹlẹ gbò nyòòne nvéeá nvea nvéé va.

31 “Vó à naa, kuai dẽe ló vaá ò kẽeaí boo kọọ̀ mm̀ taà gbáá, m̀ gáà aa ló gè tú gĩ́i gbẹá dẽe dùùmà bá deè tṍ buù bọ̀ì ẹ́ẹ́ elà nè bílá dee. 32 Kátogóí, m̀ túùi lọa bá nè Bàrì nè a moǹ bel ea kil ló a sàn nyíe, ea dú moǹ bel ea é síèi kpóó ló vaá naa kọ ó iei nú e Bàrì beè kọ à é neè gbò e bà di káíá. 33 Ním beè ié tàn nyòòmà ẹ́ẹ́ kpé àbèè nóò kpé àbèè kọ̀là ló ea aa bá tọ́ọ̀ nen. 34 Boolo nyímàì kọọ̀ m beè tú ńdáà bá gbĩimá nú ea dú bíi ló nda nè gbò e ba beè dìḿ ló. 35 Mm̀ kọ̀láá kà sĩ́deè, m beè zogèi kọ ò é íè ge sii tóm agẹlẹi bá kọbé ò láá nveenii bá nei gbò e lóó va ọọ, vaá ò é íè ge kẽeaí boo kọọ̀ Nen Ea Íéi, ea dú Jíízọ̀s beè kọọ̀: ‘Ẹ́ẹ́-ẹẹ̀ nyíe di ló gè nè èlmà ge tù.’”

36 Tṍó ea ni ló gbò belí lọ̀l, à gbóó zọ̀ dénè ọ̀và kumí dúnú kẽ vaá tã̀àgã ló Bàrì. 37 Mm̀ kà-kà, dénè ọ̀và beè tó pììlà bá ló Pọ́ọ̀l vaá pyobvíe bẹ́ẹ́, 38 boo béè kọ a beè palàge tọá vá ló tṍó ea kọọ̀ bà náa é mon nàèe. Tṍóá, bà gbóó tulèe imá ló mìàloá.