Nvèè Ka Ló Dùm E Bàrì Néi

Èé láá dé kpéè ló gè naa gã́bug nu mm̀ dùm. Bã̀àna tṍó e di kèbá tã̀àgã̀, èé láá de nágé kpéè ló sìgà nu mm̀ bẹẹ dùm. Mósĩ́ deè ní eé láá zogè kọọ̀ è nveenìè ka ló dùm e Bàrì néi ẽ́? Vaá éé ní ea náa vaá à palàge bọ́ló kọ é naa vó é?

1. Éé ní ea náa vaá à bọ́ló kọ é nvèè ka ló dùm ẽ?

À bọ́ló kọ é nvèè ka ló dùm boo béè kọ à dú dõ̀ònù ea aa bá Jìhóvà ea dú bẹẹ Tẹ̀ ea vulèi. Ẹlẹ ní e “dùm aa bá ẹ́”—ẹlẹ ní ea beè dèm kọ̀láá kà nú ea di dùm ẽ. (Psalm 36:9) “Dùm nè séi ea di mm̀ nen nè dénè nu e nen íe aàẹ́ bá.” (Tóm̀ 17:25, 28) Jìhóvà ólò nèi nú e íè bíi ló gè tõ̀òma dùm. Sõò bọọ èlmà vó, à ólò naa kọ é láá dé kpéè ló dùm.—Bugi Tóm 14:17.

2. Mósĩ́ deè ní eé láá naa kọọ̀ Jìhóvà á nyimá kọọ̀ è nveenìè ka ló dùm ẽ?

Jìhóvà beè ẹ̀b nú ea kil ní ló lọ̀l gé tṍó eo beè di gbàà o kà. Kèbá tùle nyómá káí, Dévìd beè kọ́ nè Bàrì kọọ̀: “O beè mònim tṍó em beè di dí báà mii gbẹá gbàà kà.” (Psalm 139:16) Jìhóvà palàge nvèè ka ló o dùm. (Bugi Máátìù 10:29-31.) Àé palàge biilée nyíe beè nen fẹ́ a bá àbèè dõòna nen.a (Ẹ́xọdọ̀s 20:13) Àé palàge bẽemá nágé Jìhóvà be è náa nú ea tú bẹẹ dùm nvee kèbá gẹẹ-gẹẹ ló, àbèè kọ née túù ọ̀ẹ̀ dẽe naamá nu mm̀ ge kpenà dùm dõòna gbò. Tṍó e ẹ̀b nú ea kil ló bẹẹ dùm vaá nvèè ka ló dùm dõòna gbò, è zógè kọọ̀ è nveenìè ka ló gbele lé dõ̀ònù e Bàrì néi—ea dú bẹẹ dùm.

KPÁÁ NÓ BỌ̀Ọ̀VẸ̀

3. Ẹ̀b nú ea kil ló o válá ló

Kà kà gbò nyòòne nvéè Kráìst ólò tú kọ̀láá kà gá ea di ló ba dùm fã̀àmà Jìhóvà, belí nú e bà tú ba lóó vaamá gyọ́ọ nèe. Bugi Róm̀ 12:1, 2, vaá ò gbóó aalai gbò bíbví:

• Éé ní ea náa vaá à bọ́ló kọ ó ẹ̀b nú ea kil ló o válá ló é?

• Mókà gbò sĩ́deè ní eo é láá naamá vó é?

4. Ọẹ̀ dẽe kọbé nóo naa nú ea é nveè ni kom ló àbèè ge tú o dùm

Kpá Káí síèi kpóó ló kọ é gá naa gbò nú ea é tú bẹẹ dùm nvee kèbá gẹẹ-gẹẹ ló. Bìlà VÍDIÒÍ kọbé ò nyímá sìgà nú eo é láá naa gè kpènà o dùm.

VÍDIÒ: Olòó Tú Ọ̀ẹ̀ Dẽe Naamá Nu (8:34)

Bugi Próvẹẹ̀b 22:3, vaá ò gbóó loi sọ́l boo bé e olo nè dõòna gbò é láá di mm̀ kpènà naa . . .

• gbẹá tọ.

• gbẹá boo tóm.

• tṍó eo gé ganei ló.

• tṍó eo gé ọ́ví faà àbèè kọọ̀ dõòna nen ọ́ví ni, tṍó eo di boo ńtòb-tòb, àbèè boo kpé.

5. Nvèè ka ló dùm nvín ea gáà mèà

Mm̀ sọ́l e Dévìd beè emí, a beè baatẽ́ bé e nvín ea di gbàà kà palàge bọọ́ ló Jìhóvà naa. Bugi Psalm 139:13-17, vaá ò gbóó aalai nakà bíbví:

• Kèsĩ́ Jìhóvà, é kọọ̀ dùm nen daaà togó lọl tṍó ea di gbàà a kà sẹ̀ tṍó ea ni meà ẽ?

Gbò log e Jìhóvà beè nè pá Ízràẹ̀l deè kéléá beè kpènà gbò kà nè nvín ea dì vá gbàà. Bugi Ẹ́xọdọ̀s 21:22, 23, vaá ò gbóó aalai gbò bíbví:

• Móbá ní e Jìhóvà ólò ẹ̀bmà nen ea fẹ́ nvín ea gáà mèà tṍó e bè náa sẹlẹ ẹ́?

• Àé tõoé ló naa vàẹ beè nen sẹlẹ naa vó é?b

• Móbá ní e bé e Bàrì ẹb nu naa tọ́á ló olo é?

Bìlà VÍDIÒÍ.

VÍDIÒ: Nvèè Ka Ló Di Dùm Belí Bé E Bàrì Nveè Ka Ló Naa (5:00)

Bã̀àna pábia ea ólò nvèè ka ló dùm é láá tuumá kọọ̀ áá gè làb nvín ní ea dú nú ea bọ́ló kọ á naanìè kèbá sìgà dìtõ̀ò ẽ. Bugi Àìzáíà 41:10, vaá ò gbóó aalai gbò bíbví:

• Be à gá náa vaá à ié pábia ea kpeesĩ́ ló tã́gĩ̀ bá gè kọ á làb nvín, mée ní ea é láá gbĩ́ nvèè bá lọl bá ẹ́? Ló éé?

NÚ E NI NÓ

Kpá Káí nóòmài kọ é vùlè, nvèè ka ló, vaá kpènà dùm e Jìhóvà beè nèi. Níí bãàa mm̀ beélè dùm nè níí dõòna gbò.

Ge Òòa Boo

• Éé ní ea náa vaá Jìhóvà à nvèè ka ló dùm gbò nen ẽ́?

• À ólò tọá ló Jìhóvà naa vàẹ tṍó e nen fẹ́ nen ẽ́?

• Éé ní ea léémá ni ea di ló dùm e Bàrì néi ẽ́?

KPÁÁ GBĨ́ TẼ́ LÓ

Mósĩ́ deè ní eé láá õá Jìhóvà zaa ló dùm ea néi ẽ́?

Sọ́l ea Gã́bug dú 141—Bé E Dùm Dú Dũ̀ùnè Naa (2:41)

Gbĩ́ ààlaà bíb ea kọ́ọ̀, É kọọ̀ Bàrì é ia ló nè pábia ea beè làb nvín?

“What Does the Bible Say About Abortion?” (Web article)

Nyimá bé e gè ẹ̀b dùm belí bé e Bàrì ẹb naa é láá nvèè bá nèi kọ é sà gàne ló e náa é tú bẹẹ dùm nvèè kèbá gẹẹ-g̣ẹẹ ló naa.

“‘Extreme Sports’—Should You Take the Risk?” (Awake!, October 8, 2000)

É kọọ̀ Kpá Káí é láá nvèè bá nè nen ea gé bugi togó boo gè fẹà a bá?

“I Want to Die—Can the Bible Help Me When I Have Suicidal Thoughts?” (Web article)