Ó Gá Pee Tṍó Ló Gè Dììa Múú

1. Mókà lé bug ní ea náa vaá à bọ́ló kọ ó dììa múú ẽ́?

É KỌ ò vulè Jìhóvà Bàrì ea beè nè ni dùm nè kọ̀láá kà lé nu? É kọ ò gbĩ́ gè zogè bé eo vulè Jìhóvà naa? Kà lé sĩ́deè eo é láá naamá vó dú gè kìn lóó nè Bàrì vaá dììa múú. Ge naa vó é náa kọ ó dũunà pá tọọ̀ Jìhóvà, vaá vó é náa kọ o Tẹ̀ nè o Kóò á kpènà ni vaá ẹ̀b nú ea kil ní ló boo béè kọ ò dì nèe. (Ps. 73:24; Àìz. 43:1, 2) Nagé, tṍó eo kin lóó nè Bàrì vaá dììa múú, òé íe ból dẽesĩ́ gè tõó dùm dọ̀ dè-dè.—1 Pít. 3:21.

2. Éé ní eé ló bel boo mm̀ nakà togó bel ge nòí ẽ́?

² É kọ à íe nú ea náa vaá ò gáà dììa múú? Beè vó, náa dú áá ọ̀ọ̀. À íe gã́bug gãà gbò e ba ni nyááná bé e bà ólò tõó dùm vaá bugi togó naa kọbé bà láá sìm tùlà ge dììa múú. Vaá kátogóí, bà dì e bà gé tú bẹ̀à sã́ bùlà nè ẹ́ẹ́-ẹẹ̀ nyíe siimá tóm nè Jìhóvà. Éé ní eé láá nó lọl ló sìgà gbò e ba beè dììa múú mm̀ túá gbò gbááá ẹ́? Naanii èé ló bel boo sìgà gbò ànà-ànà e ba beè kpeesĩ́ ló, nè nú eé láá nó lọl ló ba nu dòòmà bá.

PÁ SÀMÉRÌÀ BEÈ DÌÌA MÚÚ

3. Mókà nu ànà-ànà ní ea beè dú bíi kọ sìgà pá Sàmérìà á bé èlbá kọbé bà láá dììa múú ẽ́?

³ Mm̀ deè Jíízọ̀sa, pá Sàmérìà beè ié ene kà bõ̀ònaló fã̀, vaá gã́bug ọ̀và beè olòó tõó deè boo gù ea di Jùdíà. Besĩ́ nen ea dú Sàmérìà kálá dììa múú, a beè dú bíi kọ á nó gã́bug nu lọl mm̀ Moǹ Bel Bàrì vaá zigà ló gbò nú ea nó. Áá túá kà vòò kà kpá ea di mm̀ Kpá Káí naamá Jénesìs tẹlẹ Dìtolónomì ní e pá Sàmérìà beè olòó ziga ló é, àé láá du nagé kọọ̀ ba beè zìgà kọ kpá Jóshùà aa bá Bàrì. Sõò pá Sàmérìà géè ẹ̀bmà nàgé dẽe kọọ̀ Mèsáíà é dú, dẹ̀ẹ̀a boo nú e Bàrì beè zìgà ea di mm̀ kpá Dìtolónomì 18:18, 19. (Jọ́ọ̀n 4:25) Kọbé bà láá dììa múú, a beè dú bíi kọ bàá ié zìgà mm̀ Jíízọ̀s kọ ẹlẹ ní ea dú Mèsáíà ẹ. Vaá níà kà lèlà nú e “gbele tõ̀ò pá Sàmérìà” beè naa ẽ́. (Jọ́ọ̀n 4:39) A beè du nagé bíi kọ sìgà ọ̀và á nyaaná bé e bà ólò ẹ̀b gbò e bà dú Júù naa.—Lúùk 9:52-54.

4. Dẹ̀ẹ̀a boo nú ea di mm̀ kpá Tóm 8:5, 6, 14, sìgà pá Sàmérìà beè labví láb naa vàẹ tṍó e Fílìp géè kọ́ kpẹ̀a nè va ẹ́?

⁴ Éé ní ea beè nvèè bá nè pá Sàmérìà kọ bàá dììa múú ẽ́? Tṍó e Fílìp beè kọ́ nè va kọọ̀ “Jíízọ̀s ní Méné e Bàrì Sa ẹ́,” sìgà pá Sàmérìà beè “tú moǹ bel Bàrì vaá ziga ló.” (Bugi Tóm 8:5, 6, 14.) Fílìp beè dú neǹ Júù, sõò níá náa beè naa kọ bàá gá pãanée tṍ ló. Àé láá dú kọọ̀ ba beè kẽ̀èa boo dọ̀ Kpá Káí ea kọ́ọ̀ Bàrì náa ólò sà sĩ́ nen. (Dìt. 10:17-19) Vó beè naa kọ bàá ‘pãane tṍ ló nú e Fílìp géè kọ̀’ea kil ló Kráìst, vaá ba beè nyimá kọọ̀ Bàrì beè dìé ló. A beè bo nagé gbò zọ̀ ló, kpó zọ lọl mm̀ gbò nen, vaá sí gã́bug tóm dũ̀ùnè.—Tóm 8:7.

5. Éé ní eo é láá nó lọl ló pá Sàmérìà ẹ?

⁵ Pá Sàmérìà gáẹ̀ beè láá kọ bà náa é pãanèè tṍ ló Fílìp boo béè kọ à dú Júù, àbèè boo béè kọọ̀ nú ea géè noomà beè dú ãa lóó va. Sõò, bà náa beè zìgà kọọ̀ níá á naa kọ bàá gá pãanée tṍ ló. Pá Sàmérìà náa beè pee tṍó ló gè diia múú tṍó e bà agala boo kọọ̀ nú e Fílìp géè noomà dú kà-kà. Kpá Káí kọ́ọ̀: ‘Sõò tṍó e bà ziga ló lé kpẹ̀a e Fílìp ló kilma ló lẹ̀ẹ̀là bel Bàrì nè béè Jíízọ̀s Kráìst, a beè gbóó tú va diilé múú, bia nè gbálà.’ (Tóm 8:12) É kọ ò agàlà boo kọọ̀ nú ea di mm̀ Kpá Káí dú kà-kà, nè gè kọ Gbò Neǹ Ditõ̀ò Jìhóvà ólò ié kà-kà vulè e Jíízọ̀s beè noomà kọọ̀ gbò e bà gé nyoonèèe nvée á ié? (Jọ́ọ̀n 13:35) Beè vó pọ̀ á gá sií ni ló gè dììa múú, agala boo kọọ̀ Jìhóvà é tã́ànè ni dee bá.

6. Mósĩ́ deè ní e nu dòòmà bá Ruben é láá nvèè bá nè ni ẽ́?

⁶ Ene kà vígà págbálà e a bée kọlà Ruben, ea ólò tõó Germany, beè meà mm̀ tọ e bà ólò fã̀ Jìhóvà. Sõò tṍó ea beè di mm̀ a deè ãa, náa beè agala boo kọọ̀ Jìhóvà dì. Éé ní ea beè nvèè bá nèe ẽ́? Tṍó ea nyímá kọọ̀ a zìgà náa agàẹ̀ ló, a beè gbóó beeláfùl ge kpáá nó nú ea kil ló Jìhóvà. À kọ́ọ̀: “M beè nó nú boo nà lóó kọbé m̀ nyímá kà-kà bel ea kil ló Jìhóvà. Gã́bug tṍó m beè nó nú ea kil ló togó bel ea kọ́ọ̀ nu beè fùùà bã̀ kẽ.” M beè bugi kpá ea kọlà Is There a Creator Who Cares About You? Kpáá beè palàge nvèè bá nè Ruben. A beè kọ́ nè a bá kọọ̀, ‘À dú kà-kà kọọ̀ Jìhóvà dì.’ Tṍó ea sí gé kãa tọ nàà tóm ea gé ẹb nú ea kil ló sìtóm kọ̀ kpẹ̀a Gbò Neǹ Ditõ̀ò Jìhóvà beeá ló bàlà booí, Ruben beè gbóó kpáá mòn gbaa ló ea di zẹ̀ẹ̀ pá vígà beeá ló zivekà bàlà booí. Tṍó e Ruben ooà kẽ kil Germany, a beè dììa múú tṍó ea ni tóólá 17 gbáá. Be ò íè bàà-bàà bùlà ea kil ló nú eo ni nó lọl mm̀ Kpá Káí, gbĩ́tẽ́ ló nu lọl mm̀ bẹẹ gbò kpá. Be ò íe ‘nyìmànù Bàrì,’ òé láá bé èlbá bàà-bàà bùlà. (Ẹ́fẹ. 4:13, 14) Vaá tṍó eo dã́à nú ea kil ló vulà nè gbaa ló ea di zẹ̀ẹ̀ pá vígà beeá ló bàlà booí nè bọọ bõ̀ònatõ̀ò, àé náa kọ ó kpáá vùlè pá vígà.

SỌ́Ọ̀L EA DÚ BOǸ TÁSỌ̀S BEÈ DÌÌA MÚÚ

7. Mókà bug ní ea beè dú bíi kọ Sọ́ọ̀l á nyaaná ẽ́?

⁷ Bugi togó boo nu dòòmà bá Sọ́ọ̀l ea dú boǹ Tásọ̀s. A beè palàge nyimá log pá Júù vaá pá Júù beè palàge nvèèe ka ló. (Gàl. 1:13, 14; Fíl. 3:5) À íe tṍó e gã́bug pá Júù beè ẹ̀b gbò e bà géè nyoone nvéè Kráìst belí gbò e ba beè dọ̀ aa nvéè nòòmànù Kráìst, vó beè naa kọọ̀ Pọ́ọ̀l á palàge biigè va ló. A beè tõoé ló belí kọ à gé náànìè bùlà Bàrì. (Tóm 8:3; 9:1, 2; 26:9-11) Kọbé Sọ́ọ̀l láá ié zìgà mm̀ Jíízọ̀s vaá dììa múú, a beè dú bíi kọ á di kpènà ló ge mòn tã̀àgã̀.

8. (a) Éé ní ea beè nvèè bá nè Sọ́ọ̀l kọ á dììa múú ẽ́? (b) Dẹ̀ẹ̀a boo nú ea di mm̀ kpá Tóm 22:12-16, mósĩ́ deè ní e Ànànáíàs beè nvèè bá nè Sọ́ọ̀l ẹ? (Ẹ̀b nàgé fòtó.)

⁸ Éé ní ea beè nvèè bá nè Sọ́ọ̀l kọ á dììa múú ẽ́? Tṍó e Jíízọ̀s tõó káála ló bel nè Sọ́ọ̀l, ẹ́ẹ́ dee ea aa ló Jíízọ̀s beè gimèe dẽe. (Tóm 9:3-9) Sọ́ọ̀l beè tã̀àgã ló Bàrì mm̀ taà dee vaá bugi togó boo gbò nú ea beè naaáé lóá. Mm̀ kà-kà, nú ea beè naaáá beè naa kọ Sọ́ọ̀l á agala boo kọọ̀ Jíízọ̀s ní ea dú Mèsáíà ẹ vaá gbò nyoone nvéè Jíízọ̀s géè fã̀ Bàrì mm̀ lèlà sĩ́deè. Àé láá dú kọ Sọ́ọ̀l beè palàge ọgá boo béè kọọ̀ ẹlẹ ní ea beè kọ bàá fẹ́ Stívìn ẽ! (Tóm 22:20) Tṍó e taà dee ni téní, enè nen ea ólò nyoone nvéè Jíízọ̀s e a bée kọlà Ànànáíàs beè sí ló Sọ́ọ̀l, bóe, vaá sièe kpóó ló kọ á gá pee tṍó ló gè dììa múú. (Bugi Tóm 22:12-16.) Sọ́ọ̀l beè kìlmà kpá ló kẽ, pãane tṍ ló Ànànáíàs, vaá dììa múú.—Tóm 9:17, 18.

9. Éé ní eo é láá nó lọl ló Sọ́ọ̀l ẹ?

⁹ À íe gã́bug nú eé láá nó lọl ló Sọ́ọ̀l. À gáẹ̀ beè láá sọ̀tọ́ deè kọ dàlà kpá ló boo àbèè ge siiá pọ̀ ló nen á kpègee lọl ló gè dììa múú. Sõò náa beè naa vó. Sọ́ọ̀l beè kìlmà kpá ló kẽ vaá di kpènà ló gè nyaaná bé ea ólò tõó dùm naa kọbé à láá dú nen ea é nyoone nvéè Kráìst. (Tóm 26:14, 19) A beè di kpènà ló gè nyoone nvéè Kráìst bã̀àna tṍó ea nyímá kọ bà é bíìgèèe ló. (Tóm 9:15, 16; 20:22, 23) Tṍó ea ni diia múú lọ̀l, a beè kilsĩ́ gè dẹ̀ẹ̀a boo nvèè bá ea aa bá Jìhóvà kọbé à láá ĩ̀ìmà kele-kele ẹ̀bmà ea kpeesĩ́ ló. (2 Kọ́r. 4:7-10) Tṍó eo ni diia múú vaá dú enè Neǹ Ditõ̀ò Jìhóvà, òé láá kpeesĩ́ ló kele-kele íb ẹ̀bmà àbèè tã̀àgã̀ ea é doà o zìgà, sõò náa dú áá ọ̀ọ̀. Òé láá agala boo kọọ̀ Bàrì nè Kráìst é kilsĩ́ gè nvèè bá nè ni, kọbé ò láá ĩ̀ìmà kọ̀láá kà ẹ̀bmà eo kpeèsĩ́ ló.—Fíl. 4:13.

10. Mósĩ́ deè ní e nu dòòmà bá Anna é láá nvèè bá nè ni ẽ́?

¹⁰ Ba beè bumá ene kà vígà pábia e a bée kọlà Anna gbẹá Kurdi ea di Eastern Europe. Tṍó e a kà ni diia múú, tẹ̀ Anna beè zìgà kọ bàá noomà Kpá Káí Anna tṍó ea ni tóólá 9 gbáá. Sõò, tṍó e pá a dúà ló nyímá kọọ̀ Anna géè zọ̀ Gbò Neǹ Ditõ̀ò Jìhóvà noá Kpá Káí, ba beè dààmà togó gè biigèe ló. Pá a dúà ló beè ẹ̀b kọ ge aa ló bõ̀ònaló fã̀ e ba gbò nómá tẹ̀ beè olòó sì dú nuù kẹ́ẹ. Tṍó e Anna ni tóólá 12 gbáá, a beè bĩiná a tẹ̀ be àé zigà kọ á diiàẹ̀ múú. A tẹ̀ beè gbĩ́ gè nyimá be níà béèlàfùl e Anna ne àbèè kọọ̀ à íe nen ea géè tãgĩ́e bá kọ á dììa múú. Anna beè kọ́ nè a tẹ̀ kọọ̀, “Nda vulè Jìhóvà.” A tẹ̀ beè gbóó zìgà kọ á dììa múú. Tṍó e Anna ni diia múú lọ̀l, pá a dúà ló beè nvèèmàe lẹ́ vaá tú pọ́lọ́ bá sẹ̀ẹ̀màe. Ene kà vígà a tẹ̀ beè kọ́ nèe kọọ̀, “À gáẹ̀ beè dú lé be o beè tõó mm̀ dùm e bè náa õoà vaá ṍ sĩi, èlmà ge dú enè Neǹ Ditõ̀ò Jìhóvà.” Éé ní ea beè nvèè bá nè Anna ẽ? À kọ́ọ̀, “Jìhóvà beè nvèè bá nèm kọ ḿ ié agẹló, vaá ńdáà tẹ̀ nè ńdáà kà beè palàge nvèèm sãa kúm.” Anna beè olòó emí kele-kele tṍó e Jìhóvà ni nveè bá nèe dẽè kpá. Lọl tṍó tẹlẹ tṍó, Anna ólò bugi gbò nú ea beè emí dẽè kpáá, vó beè naa kọọ̀ bé e Jìhóvà ni nveè bá nèe naa á gá táẹ́ nyíe. Be ò gé kpeesĩ́ ló nàà uú boo, kẽ̀èa boo kọọ̀ Jìhóvà é nveè nàgé bá nè ni.—Híb. 13:6.

KỌNÍLÌỌ̀S BEÈ DÌÌA MÚÚ

11. Mókà dìtõ̀ò ní e Kọnílìọ̀s beè kpeesĩ́ ló é?

¹¹ À íe nú ea dú bíi eé láá nó lọl ló Kọnílìọ̀s. Kọnílìọ̀s beè dú “neǹ togó gbò bé,” a beè di togó nú ea é láá dú 100 gbò bé pá Róm̀. (Tóm 10:1.) Vó beè naa kọọ̀ gbò bé nè pá ba bon á nvèèe ka ló. A beè olòó “nvèè bá nè gbò tãa” e bà dú Júù. (Tóm 10:2) Jìhóvà beè lẹ̀ẹ̀là neǹ tóm Pítà kọ á gé vee lé kpẹ̀a nèe. É kọọ̀ dọ̀ tóm e Kọnílìọ̀s beè ié beè naa kọ á pee tṍó ló gè dììa múú?

12. Éé ní ea beè nvèè bá nè Kọnílìọ̀s kọ á dììa múú ẽ́?

¹² Éé ní ea beè nvèè bá nè Kọnílìọ̀s kọ á dììa múú ẽ́? Kpá Káí kọ́ọ̀ “Dénè pá a tọ nè ẹ̀ẹ̀ beè olòó fã̀ Bàrì.” Vaá Kọnílìọ̀s beè olòó tã̀àgã ló Bàrì. (Tóm 10:2) Tṍó e Pítà kọ́ kpẹ̀a nè Kọnílìọ̀s, pá a tọ nè ẹ̀ẹ̀ beè ié zìgà mm̀ Kráìst vaá gbẹá boo dììa múú. (Tóm 10:47, 48) Mm̀ kà-kà, Kọnílìọ̀s beè di kpènà ló gè naa kọ̀láá kà nú ea dú bíi kọbé pá a tọ nè ẹ̀ẹ̀ láá fã̀ Jìhóvà.—Jós. 24:15; Tóm 10:24, 33.

13. Éé ní eo é láá nó lọl ló Kọnílìọ̀s e?

¹³ Dì belí Sọ́ọ̀l, Kọnílìọ̀s náa beè sọ̀tọ́ deè kọọ̀ pọ̀b dọ̀ ea beè ié á naa kọ á gá dú nen ea é nyoone nvéè Kráìst. É kọ à íe gbò nú ea dú bíi kọ ó nyaaná bá ló kọbé ò láá dììa múú? Beè vó, Jìhóvà é dú o Neǹ Nvèè Bá. Àé tã́ànè ni dee bá be ò bééláfùl ge tõó boo gbò nòòkúu ea di mm̀ Kpá Káí kọbé ò láá fã̀ ẽ.

14. Éé ní e nu dòòmà bá Tsuyoshi nóòmà ni ẽ́?

¹⁴ A beè dú bíi kọ ene kà vígà págbálà ea ólò tõó Japan e a bée kọlà Tsuyoshi, á nyaaná íb tóm ea ólò sì kọbé à láá dììa múú. Ẹlẹ ní ea beè bẽene nen ea di togó pọ̀b tọọ̀ kpá ea ólò noomà bé e gbò nen é sẹlẹ fàlávà naa ẽ́. Tṍó e nen ea di togó tọọ̀ kpáá náa láá sí kètó, Tsuyoshi ólò eláẹ́ dọ̀ vaá naa nàànù kunukẽ̀ ge fã̀ zọ e bà ólò naa gbẹá kètó. Sõò, tṍó e Tsuyoshi nó kà-kà bel ea kil ló gbò e ba beè ù, a beè gbóó nyimá kọọ̀ be à kilsĩ́ gè siè tómá náa é láá diiàẹ̀ múú. Vó beè naa kọ á beeláfùl kọ náa é zọ nàè va naa nàè nàànù kunukẽ̀ ge fã̀ zọá. (2 Kọ́r. 6:15, 16) Tsuyoshi beè zọ̀ nen ea di togó tọọ̀ kpáá loá bel boo a béèlàfùl. Éé ní ea beè sìlà aa m ẽ́? Ba beè kọọ̀ Tsuyoshi é láá sí tómá kọbèè náa gbááá ló tọ́ọ̀ kà nú ea kuu gè fã̀ zọ. A beè dììa múú enè gbáá aa ló tṍó ea beè dààmà tógó gè nó Kpá Káí.a Be à dú bíi kọ ó aa ló tóm eo ólò sì kọbé ò láá fã̀ Bàrì, agala boo kọọ̀ Jìhóvà é ẹb nú ea kil ló pá o tọ nè ọ̀ọ̀.—Ps. 127:2; Máát. 6:33.

PÁ KỌ́RÌNT BEÈ DÌÌA MÚÚ

15. Éé ní ea gáẹ̀ beè láá naa kọọ̀ pá Kọ́rìnt á gá dììa múú ẽ́?

¹⁵ Ba beè palàge nyimá ló pá Kọ́rìnt naamá gbò e bà ólò vùlè gyọ́ vaá tõó mm̀ dùm e bè náa õoà. Gã́bug gbò e bà dú boná ólò labví láb ea bẽ́émá Bàrì, vó beè naa kọ á tavala ló gã́bug ọ̀và ge fã̀ Jìhóvà. Sõò tṍó e neǹ tóm Pọ́ọ̀l íná boná vaá kọ́ lé kpẹ̀a ea kil ló Kráìst nè va, “gã́bug gbò nen e ba è di Kọ́rìnt e bà dã́ nágé lé kpẹ̀aá beè dẹlẹ nyíé boo Jíízọ̀s vaá bà tú [va diilé] múú.” (Tóm 18:7-11) Tṍóá, Jíízọ̀s beè kùùlà dẽè Pọ́ọ̀l vaá kọ́ nèe kọọ̀: “gã́bug gbò nen e ba é fã nda di boní.” Vó beè naa kọọ̀ Pọ́ọ̀l á tú enè gbáá nè sìgà tõ̀òma boná kọọmá kpẹ̀a.

16. Éé ní ea beè nvèè bá nè pá Kọ́rìnt kọ bàá láá bé èlbá ba pọ́lọ́ dùm vaá dììa múú ẽ́? (2 Kọ́rìnt 10:4, 5)

¹⁶ Éé ní ea beè nvèè bá nè pá Kọ́rìnt kọ bàá dììa múú ẽ́? (Bugi 2 Kọ́rìnt 10:4, 5.) Kpá Káí nè nyómá káí Bàrì beè nvèè bá nè va kọ bàá láá nyaaná bé e bà ólò tõó dùm naa. (Híb. 4:12) Gbò e ba beè di Kọ́rìnt e ba beè dã́ lé kpẹ̀a ea kil ló Kráìst beè gbóó láá aa ló gè ṍ míí tẽeá dẽe, zìb nu, gbò bia náa beè ma na ló gbò bia, vaá gbò gbálà náa beè ma na ló gbò gbálà.—1 Kọ́r. 6:9-11.b

17. Éé ní eo é láá nó lọl ló pá Kọ́rìnt e?

¹⁷ Nvèè kpíi ló kọ a beè dú bíi kọọ̀ gbò e bà di Kọ́rìnt á nyaaná gbò pọ́lọ́ láb e bà beè olòó labví, sõò ba náa beè bugi togó kọọ̀ à bọọgẹ̀ tàvàlà ge dú nen ea é nyoone nvéè Kráìst. Tãa vó ba beè pììga boo gè naa nú ea é náa kọọ̀ bàá ié dùm e bè náa tá. (Máát. 7:13, 14) É kọ à íe pọ́lọ́ láb eo gé piiga boo gè bé èlbá kọbé ò láá dììa múú? Beè vó, lóó ni á gá ọọ! Bàn Jìhóvà kọ á ne ni a nyómá káí kọbé ò láá kìn tàn ge naa nú ea dú pọ́lọ́.

18. Mósĩ́ deè ní e nu dòòmà bá Monika é láá nvèè bá nè ni ẽ́?

¹⁸ Ene kà vígà pábia e a bée kọlà Monika, ea ólò tõó Georgia, beè pììga boo gè aa ló gè ló pọ́lọ́ bel nè gbò kólì kyáà e náa bọ́ló kọbé à láá dììa múú. À kọ́ọ̀: “Tṍó em beè di mm̀ nà òb nè sìgà gbáá, ge tã̀àgã ló Bàrì ní ea beè nvèè bá nèm kọ ḿ láá bé èlbá gè naa nú ea dú pọ́lọ́ ẹ́. Jìhóvà beè nyimá kọ m gbĩ́ gè naa nú ea dú lé, vaá à ólò nvèè bá nèm vaá kpènàm.” Monika beè gbóó dììa múú tṍó e a ni tóólá 16 gbáá. É kọ à íe gbò láb ea dú bíi kọ ó aa ló kọbé ò láá fã̀ Jìhóvà boo bá ea bọ́ló? Beè vó, kilsĩ́ gè bàn Jìhóvà kọ á nvèè bá nè ni kọbé ò láá nyaaá. Be ò náa vó, Jìhóvà é né ni a nyómá káí.—Jọ́ọ̀n 3:34.

O ZÌGÀ É LÁÁ NAA KỌ GÙ Á AA DỌ̀

19. Éé ní ea é nveè bá nè ni kọ ó láá bé èlbá kọ̀láá kà tã̀àgã̀ eo kpeèsĩ́ ló é? (Ẹ̀b nàgé fòtó.)

¹⁹ Agala boo kọ Jìhóvà vulè ni vaá à gbĩ́ kọ ó dũunà pá a tọ. Kọ̀láá bé e tã̀àgã̀ eo gé kpeesĩ́ ló kọbé ò láá diia múú agabá naa, Jìhóvà vulè ni. Jíízọ̀s beè kọ́ nè gbò e bà géè nyoonée nvée mm̀ túá gbò gbááá kọọ̀: “Kà bèè bọọ gè dẹlẹ́m nyíé boo tõò ene kà ńdígílí súú té, mè òé láá kọi nei gùa ela kọọ̀, ʽKyãà aa dọ̀,’ vaá à kyãà. Tọ́ọ̀ nu náa é tavàlàí ló.” (Máát. 17:20) Gbò e Jíízọ̀s géè ló bel nèa beè tú sìgà gbáá dììma ló Jíízọ̀s, sõò a beè dú bíi kọ báà kpáá agẹlẹ ló ba zìgà. Jíízọ̀s beè naa kọ bàá agala boo kọọ̀ kọ̀láá bé e tã̀àgã̀ e bà gé kpeesĩ́ ló agabá naa, Jìhóvà é nveè bá nè va kọ bàá láá bé èlbá. Vaá Jìhóvà é nveè nàgé bá nè ni kèbá kọ̀láá kà tã̀àgã̀ eo kpeèsĩ́ ló!

20. Mósĩ́ deè ní e nu dòòmà bá gbò e bà géè nyoone nvéè Kráìst mm̀ túá gbò gbááá nè gbò e bà di mm̀ beélè dee e ni nó nú ea kil lóí, é síè ni kpóó ló é?

²⁰ Be ò mon kọọ̀ à íe nú ea é láá kpèg ni lọl ló gè dììa múú, vàlẹ̀bá pììga boo gè bé èlbá. Nu dòòmà bá gbò e ba beè di mm̀ túá gbò gbááá nè gbò e bà di mm̀ beélè deeí, á síè ni kpóó ló. Ba nu dòòmà bá á siè ni kpóó ló vaá naa kọ ó di kpènà ló gè kìn lóó nè Jìhóvà vaá dììa múú. Ge naa vó ní ea dú kà lé béèlàfùl ea dú lé lọ̀l vaá à lee é!