Nvèè Bá Nè Gbò Eo Gé Nóòmà Kpá Káí Kọ Bàá Beeláfùl Ge Fã̀ Jìhóvà

1-2. (a) Éé ní ea náa vaá à ólò tavala ló sìgà gbò e bà gé nó Kpá Káí gè beeláfùl ge fã̀ Jìhóvà ẹ? (b) Éé ní eé ló bel boo mm̀ nakà togó bel ge nòí ẽ́?

É KỌ à íe sìgà nú ea beè naa kọ pọ̀ á sií ni ló gè dú enè Neǹ Ditõ̀ò Jìhóvà? É kọ pọ̀ beè sií ni kọ be ò dúè enè Neǹ Ditõ̀ò Jìhóvà, pá o kóò, pá bọọ tọ, àbèè gbò eo ólò gbá siai tóm é nveè ni súng ló. Sẹ̀ pọ̀ beè sií ni kọ nóo é láá tõonìè boo log Jìhóvà ẹ. Beè vó, òé gbóó láá dã́ ból ló íb tọa ló e sìgà gbò e ólò noomà Kpá Káí ólò ié, nè nú ea náa vaá àé láá tàvàlà vá ló gè beeláfùl ge fã̀ Jihóvà.

² Jíízọ̀s beè dã́ ból ló kọọ̀ gbò nú ea dì belí vó é láá òòmà nen lọl ló gè fã̀ Jìhóvà. (Máát. 13:​20-22) Níà nú ea náa vaá a beè kilsĩ́ gè nvèè bá nè gbò e pọ̀ beè sií va ló gè nyoonée nvée ẽ́. Kàsĩ́, a beè nvèè bá nè pá a gbò nyòòne nvée kọ bàá nyimá bé e bà é láá nvèè bá nè íb gbò e bà dì naa vó kọ bàá (1) nyimá nú ea náa vaá à tàvàlà vá ló gè fã̀ Jìhóvà, (2) vùlè Jìhóvà, (3) tú gè fã̀ Jìhóvà naamá túá kà nú mm̀ ba dùm, nè (4) bé èlbá gbò ànà-ànà e bà kpeesĩ́ ló. Tṍó e gé zọ gbò e ólò noomà Kpá Káí noá kpá ea kọlà Dé Kpéè Ló Dùm Dọ̀ọ̀mà Dè-dè! mósĩ́ deè ní eé láá nó Jíízọ̀s vaá nvèè bá nè va kọ bàá beeláfùl ge fã̀ Jìhóvà ẹ?

NVÈÈ BÁ NÈ NEN EO ÓLÒ NOOMÀ KPÁ KÁÍ KỌ Á NYIMÁ LÓ NÚ EA NÁA VAÁ À TÀVÀLÀẸ LÓ GÈ FÃ̀ JÌHÓVÀ

3. Éé ní ea beè láá naa kọ gè nyoone nvéè Jíízọ̀s á tavala ló Nikọdímọ̀s e?

³ Nìkòdímòs ea beè dú pọ̀b neǹ pá Júù beè kpeesĩ́ ló ene kà ànà-ànà ea beè naa kọ ge nyoone nvéè Jíízọ̀s á tàvàlàẹ́ ló. Nìkòdímòs beè nyimá kọ Jíízọ̀s ní ea dú nen e Bàrì beè lẹ̀ẹ̀làẹ tṍó e nú ea é dú ọ̀ọ̀lẹ̀ ẽ́ ni téní aa ló tṍó e Jíízọ̀s beè daamà togó a sìtóm kọ̀ kpẹ̀a. (Jọ́ọ̀n 3:​1, 2) Sõò Nikọdímọ̀s beè beeláfùl ge gũá sí ló Jíízọ̀s boo béè kọ “pọ̀ beè [siíe] ló gbò tùle pá Júù.” (Jọ́ọ̀n 7:13; 12:42) Be à sẹlẹ, pọ̀ beè siíe kọ gã́bug nu é peelìèe be à nyoonèè nvéè Jíízọ̀s.a

4. Mósĩ́ deè ní e Jíízọ̀s beè nvèè bá nè Nikọdímọ̀s kọ á dã́ ból ló nú e Bàrì gbĩ́ kọ á naa ẽ́?

⁴ Nikọdímọ̀s beè nyimá nú e Kpá Káí kọ́, sõò a beè ié bíi ló nen ea é nveè bá nèe kọ á dã́ ból ló nú e Jìhóvà gbĩ́ kọ á naa. Mósĩ́ deè ní e Jíízọ̀s beè nvèè bá nèe ẽ́? Jíízọ̀s beè di kpènà ló gè tú gã́bug tṍó zọ̀ọ̀mà Nikọdímọ̀s loá bel, bã̀àna tṍó e dee ni bílá. Jíízọ̀s beè kọ́ nè Nikọdímọ̀s kọọ̀ kọbé à láá dú nen ea é nyoonèèe nvée, àé íè ge ọgá ló a pọ́lọ́, dììa múú, vaá ié zìgà mm̀ Sã́áná Bàrì.​—Jọ́ọ̀n 3:​5, 14-21.

5. Mósĩ́ deè ní eé láá nvèè bá nè nen e gé nóòmà Kpá Káí kọ á nyimá gbò nú ea gé kpegíe lọl ló gè fã̀ Jìhóvà ẹ?

⁵ Bã̀àna tṍó e nen e gé nóòmà Kpá Káí ni palàge dã́ ból ló nú e Kpá Káí kọ́, èé nveè bá nèe kọ á nyimá ló nú ea gé kpegíe lọl ló gè fã̀ Bàrì. Be à sẹlẹ tóm ea ólò sì, àbèè nàà uú boo ea aa bá pá ba tọ é láá naa kọ á tàvàlàẹ́ ló gè teelá tùlà gbò nú ea beè noo sẹ̀ẹ̀a sĩ́ kọbé à láá fã̀ Bàrì. Vóà naa, di kpènà ló gè nvèè bá nèe. Òé láá kolíe kọ á dù gé zọ̀ ni deá gyã́á, àbèè ge lẹgálá. Ge naa vó é láá nvèè bá nèe kọ á zọ̀ ni loá bel boo gbò ànà-ànà ea gé kpeesĩ́ ló. Sièe kpóó ló kọ á nyaaná bá ló gbò nú ea dú bíi vaá ò kẽeé nyíe kọ bùlà ea di nvéè a gè naa vó á gá dú boo béè ge naa kọ nyíé ni á ẹẹ, sõò á dú boo béè ge naa kọ nyíè Jìhóvà á ẹẹ.

6. Mósĩ́ deè ní eo é láá nvèè bá nè nen eo ólò noomà Kpá Káí kọ á ié agẹló gè fã̀àmà Jìhóvà ẹ? (1 Kọ́riǹt 16:13)

⁶ Àé válí ló nen ea gé nó Kpá Káí gè tú gbò nú ea gé nó siimá tóm, be à agala boo kọọ̀ Jìhóvà é nveenìè bá neèe kọ á láá fã̀e. (Bugi 1 Kọ́riǹt 16:13.) Tóm eo gé sí tṍó eo nóòmà Kpá Káí nen bélí tóm e nen ea ólò noomà nú tọọ̀ kpá ólò sì. Tṍó eo beè di tọọ̀ kpá, mókà neǹ dòbá ea beè noomà ni nu ní ea beè palàge leemá ni ẽ́? Be à sẹlẹ, àé láá dú neǹ dòbá ea beè ié ĩ̀ìmà kìlmà ní ló vaá nvèè bá nè ni kọ ó nyimá kọọ̀ òé láá naa leevè. Mm̀ tẽ̀ènè sĩ́deèá, nen ea ólò láá palàge noomà Kpá Káí náa ólò kọ́ áá nú e Bàrì gbĩ́ kọ nen ea gé nó Kpá Káíá á naa, sõò à ólò naa kọ á agala boo kọọ̀ Jìhóvà é nveè bá nèe kọ á láá naa leevè mm̀ ge fã̀e. Mósĩ́ deè ní eo é láá naa vó é?

NVÈÈ BÁ NÈ NEN EO ÓLÒ NOOMÀ KPÁ KÁÍ KỌ Á PALÀGE VÙLÈ JÌHÓVÀ

7. Mósĩ́ deè ní e Jíízọ̀s beè nvèè bá nè gbò e bà géè pãanée tṍ ló kọ bàá kpáá palàge vùlè Jìhóvà ẹ?

⁷ Jíízọ̀s beè nyimá kọọ̀ vulè e nen íe kilma ló Bàrì é nveè bá nèe kọ á tú nú ea nó siimá tóm. A beè nvèè bá nè pá a gbò nyòòne nvée kọ bàá nyimá ló nú ea é nveè bá nè va kọ bàá palàge vùlè ba Tẹ̀ ea di káála. Dì belí nu dòòmà bá, a beè tú Jìhóvà doolé ló nen ea ólò dõo lé nu nè pá a nvín. (Máát. 7:​9-11) Sìgà gbò e bà géè pãane tṍ ló Jíízọ̀s náa beè ié tẹ̀ ea vulè va. Dòòmà dẽe ló íb tọa ló e ba beè láá ié tṍó e Jíízọ̀s ló bel dòòle ló ea kil ló tẹ̀ ea beè íe sàn nyíe ea zaava ló a nvín ea beè àà gé pee dénè a ìènùa. Vó beè naa kọ bàá mòn bé e Jìhóvà vulè va, vaá di kpènà ló gè nvèè bá nè gbò nen naa.​—Lúùk 15:​20-24.

8. Mósĩ́ deè ní eo é láá nvèè bá nè nen eo ólò noomà Kpá Káí kọ á palàge vùlè Jìhóvà ẹ?

⁸ Òé láá nvèè nàgé bá nè nen eo ólò noomà Kpá Káí kọ á palàge vùlè Jìhóvà tení dú ló gè noomàe nú ea kil ló gbò kpãa e Jìhóvà íe. Buù tṍó eo gé nóòmàe nu, nvèè bá nèe kọ á dã́ ból ló bé e gbò nú ea gé nóá zógè bé e Jìhóvà vulèe naa. Tṍó eo gé ló bel ea kil ló nu ààaá, naa kọ á nyimá kọọ̀ vulè e Jìhóvà íe kìlmàé ló ní ea beè naa kọ á sọ̀tọ́ deè kọọ̀ Jíízọ̀s á úé boo é. (Róm̀ 5:8; 1 Jọ́ọ̀n 4:10) Tṍó e nen eo ólò noomà Kpá Káí dã́ ból ló bé e Jìhóvà vulèe naa, àé nveè bá nèe kọ á palàge vùlè Jìhóvà.​—Gàl. 2:20.

9. Éé ní ea beè nvèè bá nè Michael kọ á fã̀ Jìhóvà ẹ?

⁹ Bugi togó boo nu dòòmà bá Michael ea ólò tõó Indonesia. Pá ba tọ beè noomàe gbò kà-kà bel ea di mm̀ Kpá Káí lọl tṍó ea beè di pá nvín, sõò náa beè dììa múú. Tṍó ea ni tóólá 18 gbáá, a beè àà kil dõona kà dó gé dú nen ea ólò teelá pọ̀b faà. Tṍó e tṍó téní, a beè òòà kil Indonesia gé ilí va sõò a beè aa ló pá a tọ gbẹẹ́ kĩá vaá kpáá àà kil dõona kà dó. A va nè a nvín pábia beè gbóó dààmà togó gè nó Kpá Káí vaá tú gbò nú e bà gé nó siimá tóm. Tṍó e a kà ni ú, Michael beè gbóó òòa kẽ kil be kọbé à láá ẹ̀b nú ea kil ló a tẹ̀ vaá a beè dààmà togó gè nó Kpá Káí. Tṍó e Michael bugi togó boo gbò nú ea di kè kẽè kĩée ea kọ́ọ̀ “Kpáá Nó Bọ̀ọ̀vẹ̀” ea di mm̀ 27 nu gè nò ea di mm̀ kpá ea kọlà Dé Kpéè Ló Dùm Dọ̀ọ̀mà Dè-dè! a beè palàge tọáẹ́ ló. Tṍó ea bugi togó boo íb tọa ló e Jìhóvà beè ié tṍó ea mon Jíízọ̀s ea gé mon tã̀àgã̀, a beè gbóó tò. Tṍó ea dã́ ból ló bé e Jìhóvà nè Jíízọ̀s vulèe naa, nyíée beè ẹẹ naa ní ea nyááná bé ea ólò tõó dùm naa vaá dììa múú.

NVÈÈ BÁ NÈ NEN EO ÓLÒ NOOMÀ KPÁ KÁÍ KỌ Á TÚ GÈ FÃ̀ JÌHÓVÀ NAAMÁ TÚÁ KÀ NÚ MM̀ A DÙM

10. Mósĩ́ deè ní e Jíízọ̀s beè nvèè bá nè pá a gbò nyòòne nvée kọ bàá tú gè fã̀ Jìhóvà naamá túá kà nú mm̀ ba dùm ẽ? (Lúùk 5:​5-11) (Ẹ̀b nàgé fòtó.)

¹⁰ Gbò nyòòne nvéè Kráìst mm̀ túá gbò gbááá beè nyimá kọ Jíízọ̀s ní ea dú Mésáíà ẹ, sõò ba beè ié bíi ló nvèè bá kọbé bà láá tú gè fã̀ Jìhóvà naamá túá kà nú mm̀ ba dùm. Pítà nè Ándrù beè zẹ́ẹ́ dú gbò nyòòne nvéè Jíízọ̀s, besĩ́ Jíízọ̀s à kalá kolí va kọ bàá tú dénè tṍó biimàèe nvée. (Máát. 4:​18, 19) Ba beè olòó zọ̀ Jém̀z nè Jọ́ọ̀n sí dọọ̀ vaá ba beè olòó ié gã́bug kpègè lọl ló ba pííla. (Máàk 1:​16-20) Tṍó e Pítà nè Ándrù beè “sọ̀bá ba gbṍò gbẹẹ́ kẽ” vaá nyoone nvéè Jíízọ̀s, àé láá dú kọ ba beè noo nú e bà é náa kọbé bà láá ẹ̀b nú ea kil ló pá ba tọ boo tṍó e bà gé nyoone nvéè Jíízọ̀s. Éé ní ea beè nvèè bá nè va kọ bàá tú gè fã̀ Jìhóvà naamá túá kà nú mm̀ ba dùm ẽ? Nòòtẽ́ ea di mm̀ kpá Lúùk kọ́ nèi kọ Jíízọ̀s beè sí tóm dũ̀ùnè ea náa kọ bàá agala boo kọ Jìhóvà é ẹb nú ea kil ló ba bíi.​—Bugi Lúùk 5:​5-11.

11. Éé ní eo é láá kọ́ nè nen eo ólò noomà Kpá Káí kọbé a zìgà agaló é?

¹¹ Née é láá sí tóm dũ̀ùnè belí bé e Jíízọ̀s beè naaá, sõò èé láá kọ́ nè dõona gbò bé e Jìhóvà ólò nvèè bá nè gbò e bà tú gè fã̀e naamá túá kà nú mm̀ ba dùm naa. Dì belí nu dòòmà bá, é kọ òé láá kẽ̀èa boo bé e Jìhóvà beè nvèè bá nè ni naa túá tṍó eo beè dààmà togó gè sí nònù? Be à sẹlẹ, o beè sí ló nen ea beè tú ni ló tóm gé baatẽ́ nú ea náa vaá nóo é láá tu ná gã́bug tṍó siimá tóm deé eo ólò sí nònù. Tṍó eo gé kọ́ gbò nú eo beè tení bá nè nen eo ólò noomà Kpá Káí, baatẽ́ nèe bé eo zìgà beè agaló tṍó eo monì bé e Jìhóvà nveè bá nè ni kọ ó láá tú gè fã̀e naamá túá kà nú mm̀ o dùm naa.

12. (a) Éé ní ea náa vaá èé fáálá kele-kele pá vígà tṍó eé gé noomà Kpá Káí nen ẽ́? (b) Mósĩ́ deè ní eo é láá tú vídiò nvèèmà bá nè nen eo ólò noomà Kpá Káí kọ á tú gè fã̀ Jìhóvà naamá túá kà nú mm̀ a dùm ẽ? Nè nu dòòmà bá.

¹² Tṍó e pá vígà kọ́ gbò nú e ba beè nyaaná bá ló kọbé bà láá tú ge fã̀ Jìhóvà naamá túá kà nú mm̀ ba dùm nè nen eo ólò noomà Kpá Káí, àé nveè bá nèe. Vóà naa, olòó faalá kele-kele pá vígà tṍó eo é gé noomà Kpá Káí nen. Kọ́ nè va kọ bàá baatẽ́ bé e ba beè bã mm̀ bõ̀ònatõ̀òí naa, nè gbò nú e ba beè naa kọbé bà láá tú gè fã̀ Jìhóvà naamá túá kà nú mm̀ ba dùm. Nagé, tú gã́bug tṍó zọ̀ọ̀mà nen eo gé nóòmà Kpá Káíá ẹ̀b gbò vídiò ea di kè kẽè “Kpáá Nó Bọ̀ọ̀vẹ̀” nè “Kpáá Gbĩ́ Tẽ́ Ló” ea di mm̀ kpá ea kọlà Dé Kpéè Ló Dùm Dọ̀ọ̀mà Dè-dè! Dì belí nu dòòmà bá, tṍó eo gé zọ́ẹ noá 37 nu gè nò, vaá o ẹbvii vídiò e togó bel kọ́ọ̀ Jìhóvà É Ẹb Nú Ea Kìl Ló Bẹẹ Bíi lọ̀l, ló bel boo vídiòa vaá ò nveè bá nè nen eo gé nóòmà Kpá Káíá kọ á nyimá kọọ̀ Jìhóvà é nveè bá nèe be à tú gè fã̀e naamá túá kà nú mm̀ a dùm.

NVÈÈ BÁ NÈ NEN EO ÓLÒ NOOMÀ KPÁ KÁÍ KỌ Á LÁÁ BÉ ÈLBÁ GBÒ ÀNÀ-ÀNÀ EA KPEESĨ́ LÓ

13. Mósĩ́ deè ní e Jíízọ̀s beè kpoogè dee ló pá a gbò nyòòne nvée nyòòmà nàà uú boo é?

¹³ Jíízọ̀s beè olòó kọ́ nè pá a gbò nyòòne nvée kọ bà é kpeesĩ́ ló nàà uú boo ea aa bá dõona gbò, bã̀àna pá ba dúà ló. (Máát. 5:11; 10:​22, 36) Gbálà ńkem̀ tṍó besĩ́ Jíízọ̀s à kalá ù, a beè kọ́ nè pá a gbò nyòòne nvée kọ bà é láá fẹ́ va boo béè kọ bà gé fã Jìhóvà. (Máát. 24:9; Jọ́ọ̀n 15:20; 16:2) A beè kọ́ nè va kọ bàá palàge ié ọ̀ẹ̀ dẽe tṍó e bà gé kọ́ kpẹ̀a. A beè kọ́ nagé nè va kọ bàá gá zọ̀ tọ́ọ̀ nen e náa zigà ge pãané va tṍ ló tàlà bel, nè ge kọ bàá ié ọ̀ẹ̀ dẽe kọbé bà láá kilsĩ́ gè kọ́ kpẹ̀a.

14. Mósĩ́ deè ní eé láá nvèè bá nè nen e ólò noomà Kpá Káí kọ á kpoogá dee ló nyòòmà bíígá ló é? (2 Tímotì 3:12)

¹⁴ Dì belí bé e Jíízọ̀s beè naaá, èé láá baatẽ́ nè gbò e ólò noomà Kpá Káí kọ gbò e bà ólò gbá siá tóm, pá ba kóò, nè pá ba tọ é láá biigè va ló boo béè kọ bà gé nó Kpá Káí. (Bugi 2 Tímotì 3:12.) Sìgà gbò e bà ólò gbá siá tóm é láá nvèèmà va lẹ́ boo béè kọ bà gé piigà ge tõó boo gbò nòòkúu ea di mm̀ Kpá Káí. Dõona gbò bií ló pá ba tọ é láá bé uú boo gbò nú e bà gé nó lọl mm̀ Kpá Káí. Tṍó e valẹ̀bá kọ́ gbò bíígá ló e gbò e gé nóòmà Kpá Káí é láá kpeesĩ́ ló nè va, àé náa kọ bàá nyimá ló nu gè naa tṍó e bà kpeesĩ́ ló gbò dìtõ̀òá.

15. Éé ní ea é láá nvèè bá nè nen ea gé nó Kpá Káí kọ á láá ĩ̀ìmà bíígá ló ea aa bá pá ba tọ ẹ́?

¹⁵ Tṍó e nen eo ólò noomà Kpá Káí gé kpeesĩ́ ló bíígá ló ea aa bá pá ba tọ, nvèè bá nèe kọ á bugi togó boo sìgà nú ea é láá naa kọ pá ba tọ á nvèèe súng ló boo béè kọ à nó Kpá Káí. Bà é láá dòòmà kọ bà gé nóòmàe gbò nú e bè náa lèlà, àbèè kọ bà doomà kọ Gbò Neǹ Ditõ̀ò Jìhóvà níà gbò pọ́lọ́. Bã̀àna nyíè sìgà gbò e Jíízọ̀s nè ọ̀và beè duá ló náa beè ẹẹ ló tóm e Jíízọ̀s géè sì. (Máàk 3:21; Jọ́ọ̀n 7:5) Noomà nen eo ólò noomà Kpá Káí kọ á ié ĩ̀ìmà vaá á tú gbọ́ọ́-gbọọ̀ ló loomá bel nè pá ba tọ nè dõona gbò e bà gé bíìgèe ló.

16. Mósĩ́ deè ní eo é láá nvèè bá nè nen eo ólò noomà Kpá Káí kọ á tú kalì nè gbọ́ọ́-gbọọ̀ ló kọọmá gbò nú ea ziga ló é?

¹⁶ Beè gbò e bà dṹùnà nen ea gé nó Kpá Káí íe lèèma mm̀ gbò nú ea gé nó, àé dú lé kọ á gá kọ́ dénè nú ea ni nó nè va tẽ̀ènè tóm. Be à náa vó, àé ḿ-má va vaá náa é tan ná va gè zọ̀ẹ loá sọ́l boo gbò nú ea gé nó. Vóà naa, siè kpóó ló nen eo ólò noomà Kpá Káí kọ á baatẽ́ gbò nú ea zigà ló mm̀ sĩ́deè ea válí bá naa ní ea é tan va gè zọ̀ẹ loá sọ́l boo dõona tṍó. (Kọ́l. 4:6) Àé láá kọ nàgé nè pá a dúà ló kọ bàá sí boo jw.org. Vó é náa kọ bàá láá nó nú ea kil ló Gbò Neǹ Ditõ̀ò Jìhóvà boo ba lóó kọ̀láá tṍó ea léémá va.

17. Mósĩ́ deè ní eo é láá nvèè bá nè nen eo ólò noomà Kpá Káí kọ á láá aalá bíb e gbò nen bĩ́ínáe ea kil ló Gbò Nen Ditõ̀ò Jìhóvà ẹ? (Ẹ̀b nàgé fòtó.)

¹⁷ Òé láá tú kĩée e bà émí “Frequently Asked Questions” ea di boo jw.org nvèèmà bá nè nen eo ólò noomà Kpá Káí kọ á láá kpoogá dee ló nyòòmà gbò bíb e gbò e bà ólò gbá siá tóm nè pá a dúà ló é láá bĩináe. (2 Tím. 2:​24, 25) Tṍó eo zọọ̀ẹ noá ene kà nu gè nò ea di mm̀ kpá ea kọlà Dé Kpéè Ló Dùm Dọ̀ọ̀mà Dè-dè! lọ̀l, á gá tá ní nyíe gè bĩináe bíb ea di kẽ kẽè “Sìgà Gbò Kọ́ọ̀” ea di mm̀ kpáá. Siè kpóó ló nen eo ólò noomà Kpá Káí kọ á olòó nó bé ea é láá baatẽ́ gbò nú ea ziga ló nè gbò nen naa. Olòó nvèè bá nèe kọ á láá kọ́ gbò nú ea ziga ló nè dõona gbò. Tṍó eo ólòó zọ̀ẹ tení boo gbò gáí, àé nveè bá nèe kọ á láá baatẽ́ gbò nú ea ziga ló nè dõona gbò.

18. Mósĩ́ deè ní eo é láá siè kpóó ló nen eo ólò noomà Kpá Káí kọ á zọ̀ pá vígà e bà di bõ̀ònatõ̀ò kọ́ kpẹ̀a ẹ́? (Máátìù 10:27)

¹⁸ Jíízọ̀s beè kọ́ nè pá a gbò nyòòne nvée kọ bàá vee lé kpẹ̀aí nè dénè nen. (Bugi Máátìù 10:27.) Tṍó e nen ea gé nó Kpá Káí valẹ̀bá kọ́ gbò nú ea gé nó nè dõona gbò, àé nveè bá nèe kọ á nó gè dẹlẹ nyíé boo Jìhóvà. Mósĩ́ deè ní eo é láá siè kpóó ló nen eo ólò noomà Kpá Káí kọ á tú gè kọ́ kpẹ̀a naamá a nu sẹ̀ẹ̀a sĩ́ ẽ́? Tṍó e bọọ bõ̀ònatõ̀ò noo nú ea kil ló vèènù ge kolmá nen síímá kẽè pọ̀bkà bõ̀ònaló àbèè Sẹ̀lẹ̀nù Ge Kẽ̀èa Boo Ú Kráìst, nvèè bá nèe kọ á bugi togó boo gbò nú ea é láá naa kọbé à sim tùlà ge kọ́ kpẹ̀a. Baatẽ́ nèe kọ à ólò valí ló gã́bug nen gè nó gè kọ́ kpẹ̀a nè gbò nen ẽ́ e vèènù dì. Àé láá ié nágé bélè lọl ló gbò búma e ólò ié ea kil ló bé eé láá kọ́ kpẹ̀a naa gbẹá bẹẹ gbò nònù èèlè nyíè zẹ̀ẹ̀ sè. Tṍó ea piiga boo gè teelá tùlà gbò nu sẹ̀ẹ̀a sĩ́í, àé nveè bá nèe kọ á láá kọ́ kpẹ̀a nè dõona gbò.

ZOGÈ KỌ Ò DẸLẸ̀ NYÍÉ BOO NEN EO ÓLÒ NOOMÀ KPÁ KÁÍ

19. Mósĩ́ deè ní e Jíízọ̀s beè zogè kọ à dẹlẹ̀ẹ̀ nyíé boo pá a gbò nyòòne nvée ẽ́, vaá mósĩ́ deè ní eé láá nóe ẽ́?

¹⁹ Besĩ́ Jíízọ̀s à kalá kil káála, a beè kó nè gbò e bà ólò nyoonée nvée kọ bà é beè dièé ló. Bà náa beè dã́ ból ló kọ Jíízọ̀s géè kọọ̀ bà é beè dièe ló gbẹá káála. Náa kal ló béè kọ pá a gbò nyòòne nvée náa beè dã́ ból ló bel ea géè lòa, Jíízọ̀s beè agala boo kọ bà é náa nú ea é léémá Jìhóvà. (Jọ́ọ̀n 14:​1-5, 8) A beè nyimá kọ àé dú bíi kọ sìgà tṍó á tení kọbé bà láá dã́ ból ló sìgà nu, dì belí ból dẽesĩ́ gè kil káála e bà íe. (Jọ́ọ̀n 16:12) Belí bé e Jíízọ̀s beè naaá, beele é láá zogè nàgé gbò e ólò noomà Kpá Káí kọ è agala boo kọọ̀ bà é náa nú ea é léémá Jìhóvà.

20. Mósĩ́ deè ní e ene kà vígà pábia ea ólò tõó Malawi beè zogè kọ à dẹlẹ̀ẹ̀ nyíé boo nen ea ólò noomà Kpá Káí é?

²⁰ È agàlà boo kọ gbò e ólò noomà Kpá Káí gbĩ́ gè naa nú ea dú lé. Bugi togó boo nu dòòmà bá ene kà vígà pábia e a bée kọlà Chifundo, ea ólò tõó Malawi. A beè dààmà togó gè zọ̀ ene kà nvín pábia e a bée kọlà Alinafe e a ólò sí Tọ Bàrì Fádá noá kpá ea kọlà Dé Kpéè Ló Dùm Dọ̀ọ̀mà Dè-dè! Tṍó e ba ni nó 14 nu gè nò ea di mm̀ kpáá lọ̀l, Chifundo beè bĩiná Alinafe bé e gè tú nú e bà náàmà bá nèèmà fã̀ tõo ẽ́ ló naa. Alinafe beè nvèè súng vaá kọ́ nèe kọọ̀, “Níà béèlàfùl buù nen!” Chifundo beè gbóó dòòmà kọọ̀ Alinafe náa é nó ná Kpá Káí. Sõò a beè ié ĩ̀ìmà vaá kilsĩ́ gè noomàe Kpá Káí boo béè kọ a beè ẹ̀b kọ be à sẹlẹ tṍó e tṍó é téní, àé beè dã́ ból ló kọ gè tú nú e bà náàmà bá nèèmà fã̀ náa dú lé. Tṍó e sìgà ẽ́ ni téní, Chifundo beè bĩináe bíb ea di mm̀ 34 nu gè nò ea kọ́ọ̀: “Mósĩ́ deè ní e gè nó Kpá Káí nè ge nó nú ea kil ló Jìhóvà ea dú kà kà Bàrì ni dọ bélè nè ni ẽ́?” Chifundo kọ́ọ̀, “Alinafe beè kọ́ gã́bug nú ea ni nó, e ene kà ea di zẹ̀ẹ̀ dú kọọ̀ Gbò Neǹ Ditõ̀ò Jìhóvà náa ólò labví gbò láb e Kpá Káí náa nveè sãa kúm.” Pọ́ì ńkem̀ tṍó aa ló tṍóá, Alinafe beè kùb ge tú gbò nú e bà náàmà bá nèèmà fã̀ vaá sìm tùlà ge dììa múú.

21. Mósĩ́ deè ní eé láá nvèè bá nè gbò e ólò noomà Kpá Káí kọ bàá beeláfùl ge fã̀ Jìhóvà ẹ?

²¹ À dú kà-kà kọ Jìhóvà ní ea ólò naa kọ gbò e gé nóòmà Kpá Káí á tú nú e bà gé nó siimá tóm ẽ́, sõò beele é láá nvèè nàgé bá nè va kọ bàá sìm kilsĩ́. (1 Kọ́r. 3:7) Níì áá gè noomà va gbò nú e Jìhóvà gbĩ́ kọ bàá naa ní eé náa ẽ́ nì, sõò èé nveè nàgé bá nè va kọ bàá palàge vùlè Jìhóvà. Èé síè va kpóó ló nàgé kọ bàá tú Jìhóvà naamá túá kà nú mm̀ ba dùm, vaá noomà va kọ bàá dẹ̀ẹ̀a boo Jìhóvà tṍó e bà kpeesĩ́ ló ànà-ànà. Tṍó e dẹlẹ̀ va nyíé boo kọ bà é tú gbò nú e bà gé nó siimá tóm, àé náa kọ bàá agala boo kọ bà é láá tõonìè boo gbò nòòkúù Jìhóvà.