Agala Boo Kọ Jìhóvà Vulè Ni

1. Éé ní ea beè naa kọ ó kìn lóó nè Jìhóvà ẹ? (Ẹ̀b nàgé fòtó.)

É KỌ ò kẽeà boo tṍó eo beè kìn lóó nè Jìhóvà? O beè nè béèlàfùla boo béè gbò nú eo beè nò ea kilíé ló ea náa kọ ó vùlèe. O beè zìgà kọ òé túè ge fã̀e naamá túá kà nú mm̀ o dùm, nè ge kọ òé kilìè sĩ́ gè vùlèe lọl mm̀ dénè o nyíe, dénè o dùm, dénè o bùlà, nè dénè o kói. (Máàk 12:30) Lọl tṍóá ààmà, vulè eo íè kìlmàé ló beè gbóó palàge bọọ dọ ló. Beè nen bĩ́íná ni kọọ̀, “É kọ ò agàlà gé boo kọ ò vulè Jìhóvà?” òé áálá naa vàẹ? Nóo é pee tṍó ló gè kọ́ nèe kọọ̀, “M̀ palàge vùlè Jìhóvà èlmà kọ̀láá kà nú ea dì!”

2-3. Éé ní e Jìhóvà gbĩ́ kọ é agala boo é, vaá éé ní eé ló bel boo mm̀ nakà togó bel gè nòí ẽ́? (Jèrèmáíà 31:3)

² Be à gá náa vaá nen à bĩiná ni kọọ̀, “É kọ ò agàlà boo kọ Jìhóvà vulè ni?” É kọ àé tavàlà ní ló gè aalá bíbvá, àbèè kọ àé tõó ní ló kọ Jìhóvà náa é láá vùlè ni ẽ́? Ene kà vígà pábia e a tẹ̀ nè a kà náa beè tú lé bá sẹ̀ẹ̀màe tṍó ea beè di pá nvín kọ́ọ̀: “M̀ palàge agala boo kọ m̀ vulè Jìhóvà. Sõò gã́bug tṍó, ním ólò agala boo kọ Jìhóvà vulèm.” Éé ní ea é láá nvèè bá nè ni kọ ó nyimá be Jìhóvà vulè ni ẽ́?

³ Jìhóvà gbĩ́ kọ ó agala boo kọ à vulèè ni. (Bugi Jèrèmáíà 31:3.) À gbĩ́ kọ ó nó nú ea kilìèé ló, vaá duè a kóò. Tṍó eo kin lóó nèe vaá dììa múú, à né ni nú ea palàge bọọ ea dú a vulè ea kyãa mm̀ bọ́ọ̀ló dẹ̀lẹ̀ nyíé boo. Níá tõó dọ̀ kọ Jìhóvà palàge vùlè ni, vaá náa é sãanà ni bá ló gbẹẹ́ kẽ. Boo béè kọ Jìhóvà íe vulè ea kyãa mm̀ bọ́ọ̀ló dẹ̀lẹ̀ nyíé boo kilma ló pá a gyóòlo ní ea náa vaá à ẹ̀b va naamá a “kele íb ìènù” ẽ, ea tõó dọ̀ kọ à palàge nvèè ni ka ló. (Mál. 3:17) Jìhóvà gbĩ́ kọ ó agala boo kọ à palàge vulèè ni belí bé e neǹ tóm Pọ́ọ̀l beè agala boo naaá. Pọ́ọ̀l beè emí kọọ̀: “Boo béè kọ nda palàge agala boo kọọ̀ kọbèè ú àbèè dùm, kọbèè gbò nyómá tóm àbèè gbò kpóó ea gé bẹl, kọbèè gbò nú ea di kátogóí àbèè gbó nú ea é dú sĩ́, kọbèè kpóó, kọbèè nú ea palàge bọọ́ gãboo àbèè nú ea palàge bọọ́ kètẽ́, kọbèè dõona kà dèmnù náa é láá kpòòlài lọl ló vulè Bàrì.” (Róm̀ 8:​38, 39, nw.) Mm̀ nakà togó bel ge nòí, èé ló bel boo nú ea náa vaá à dú bíi kọ é agala boo kọ Jìhóvà vulèi, nè nú ea é nveè bá nèi kọ é zìgà naa vó.

NÚ EA NÁA VAÁ À DÚ BÍI KỌ É AGALA BOO KỌ JÌHÓVÀ VULÈI

4. Mósĩ́ deè ní eé láá bé èlbá gbò kyèèlè e Sétàn ólò gbĩ́ gè kẹ̀ẹ̀mài ẽ́?

⁴ Ge agala boo kọ Jìhóvà vulèi é náa kọ é láá bé èlbá “pọ́lọ́ kyèèlè” ea di bá Sétàn. (Ẹ́fẹ. 6:11) Sétàn gé piigà kọ̀láá bé e a kpóó sim tùlà naa gè kpègii lọl ló gè fã̀ Jìhóvà. Ene kà kyèèlè e Sétàn ólò siimá tóm dú gè naa kọ gbò nen á zìgà kọ Jìhóvà náa vulèi. Á gá tá ní nyíe kọ Sétàn ólò gbĩ́ nèà deè ge kẹ̀ẹ̀mà nen. À ólò gbĩ́ gè kẹlẹ́i tṍó e nyíéi biilà boo béè lọ̀ e beè ié tṍó ea kil nvéeá, gbò tàvàlà dìtõ̀ò e gé téní bá kátogóí, nè tṍó e íè tã̀àgã̀ bùlà kilma ló dì deèsĩ́. (Pró. 24:10) Sétàn bélí kpẹẹ̀ ea ólò gbĩ́ gè bà gbò nom e bà náa íe kpóó gè kpènà ba bá. Vóà naa, à ólò gbĩ́ gè tú ẹ̀bmà siimáí ló tṍó e lóói ọọ kọbé è ooà aa ló gè fã̀ Jìhóvà. Sõò be è kilsĩ́ gè agala boo kọ Jìhóvà vulèi, èé íe kpóó gè ‘beemá’ Sétàn nè dénè a pọ́lọ́ kyèèlè ea ólò gbĩ́ gè kẹ̀ẹ̀mài.​—1 Pít. 5:​8, 9; Jém̀z 4:7.

5. Éé ní ea náa vaá à palàge dú bíi kọ é agala boo kọ Jìhóvà vulèi, vaá à ólò nvèèi ka ló é?

⁵ Ge agala boo kọ Jìhóvà vulèi é náa kọ bẹẹ gbaa ló kìlmàe ló á kpáá palàge agaló. Nú ea náa vaá è kọ́ vó dú kọọ̀ Jìhóvà beè dèmii naa ní ea é taníi gè vùlè dõona gbò, nè ge kọ dõona gbò á vùlèi. À ólò valíí ló gè vùlè gbò e bà vulèi. Vóà naa, ge agala boo kọ Jìhóvà vulèi, vaá à ólò nvèèi ka ló é náa kọ é kpáá palàge vùlèe. (1 Jṍòn 4:19) Be è palàge vùlè Jìhóvà, àé náa kọ á kpáá palàge vùlèi. Kpá Káí kọ́ọ̀: “Tõonii bãí ló Bàrì, mè àé tõo bã̀í ló.” (Jém̀z 4:8) Sõò éé ní ea é nveè bá nèi kọ é agala boo kọ Jìhóvà vulèi é?

ÉÉ NÍ EA É NVEÈ BÁ NÈI KỌ É AGALA BOO KỌỌ̀ JÌHÓVÀ VULÈI É?

6. Kọbé è agala boo kọ Jìhóvà vulèi, éé ní eé tãàgã̀ ló Bàrì kilma ló é?

⁶ Olòó tã̀àgã ló Jìhóvà kọ á nvèè bá nè ni kọ ó mòn nú ea zógè kọ à vulèè ni. (Lúùk 18:1; Róm̀ 12:12) Bàn Jìhóvà buù dee kọ á nvèè bá nè ni kọ ó ẹ̀b o bá belí bé e a ẹb ni naa. Sìgà tṍó nyíé ni é láá bììlà naa ní ea é tavàlà ní ló gè zìgà kọ Jìhóvà vulè ni, sõò kẽ̀èa boo kọọ̀ Bàrì el boo nyíe ea dì ní m. (1 Jṍòn 3:​19, 20) À nyímái ló èl bé e nyímà ló bẹẹ bá naa; vaá à ólò mòn nú e beele née é láá mòn. (1 Sám. 16:7; 2 Kró. 6:30) Vóà naa, pọ̀ á gá sií ni ló gè ‘kọ́’ bé e nu tọ́a ní ló naa nèe, vaá ò baníe kọ á nvèè bá nè ni kọ ó agala boo kọ à vulèè ni. (Ps. 62:8) Labví láb ea é gbááá ló o tã̀àgã ló, vaá ò tú gbò lọ̀ọ̀gà bùlà ea di kè kẽí siimá tóm.

7-8. Mósĩ́ deè ní e nú ea di mm̀ kpá Psalm náa kọ é agala boo kọọ̀ Jìhóvà vulèi é?

⁷ Zìgà kọ gbò nú e Jìhóvà kọ́ dú kà-kà. Jìhóvà beè tú a nyómá káí nè gbò e ba beè emí Kpá Káí, kọbé bà láá emí gbõ̀ònà nú ea kil ló íb nen e Jìhóvà dú. Bugi togó boo lé bá e Dévìd beè bààmàtẽ́ bé e Jìhóvà ólò ẹ̀b nú ea kilíí ló naa. A beè emí kọọ̀: “Jìhóvà di kuló gbò e nyíé va biilà; à ólò dùùlà gbò e lóó va ọọ.” (Ps. 34:18) Tṍó e nyíé ni biilà, àé láá tõó ní ló belí kọ à dúè áá ọ̀ọ̀. Jìhóvà zigà kọ àé nveenìè bá neè ni, boo béè kọ à mon kọ ò palàge ié bíi ló a nvèè bá tṍó ea meà naa vó èlmà déné tṍó. Dévìd beè emí mm̀ dõona ketõ̀ò ea di mm̀ kpá Psalm kọọ̀: “Tú o bẹ̀lẹ̀ kpá nom bẹ̀ẹ̀mà nà gĩ́ì tó.” (Ps. 56:8) Jìhóvà ólò mòn tṍó e nyíé ni biilà àbèè tṍó eo di kèbá nyaaló. À palàge vùlè ni vaá tṍó e nu zọ́ ni, à ólò tọáẹ́ ló. Belí bé e nen ea di boo kpáà bàlà ól e múú á gé ólò palàge nvèè ka ló kọ̀láá kà bílà múú ea di mm̀ a nuù múú naaá, níà bé e Jìhóvà ólò nvèè ka ló gĩ́i ea aa dẽè pá a gyóòlo tṍó e bà di kèbá nyaaló naa ẽ́. Kpá Psalm 139:3 kọ́ọ̀: “[Oló Jìhóvà] palàge nyimá dénè nú em gé náa.” Jìhóvà nyímá kọ̀láá kà nú ea kil ní ló, sõò à ólò ká bùlà gbẹẹ́ boo gbò lé kpãa eo íè. (Híb. 6:10) Ló éé? Boo béè kọ à vulè ni, vaá nvèè ka ló kọ̀láá kà nú eo náà kọbé ò láá fã̀e.a

⁸ Tení dú ló gbò bel nvèè nyíé gbàà ea di mm̀ Kpá Káí, Jìhóvà zógè kọ à palàge ẹbvìè nú ea kilìèi ló vaá à vulèèi. Sõò dì belí bé e ni nó naa, Sétàn gbĩ́ kọ é ẹ̀b kọọ̀ Jìhóvà náa vulèi. Vóà naa, tṍó ea tõo ní ló belí kọ Jìhóvà náa vulè ni, bĩiná o bá kọọ̀, ‘Mée ní ea bọ́ló kọ ḿ zìgà bel ea aa gã́ ẽ́?’ ‘É kọ m̀ é zigà bel ea aa gã́ Sétàn ea dú “tẹ̀ kyáá bel” sẹ̀ ní ea aa gã́ Jìhóvà ea dú “Bàrì kà-kà bel” é?’​—Jṍòn 8:44; Ps. 31:5.

9. Éé ní e Jìhóvà zigà nè gbò e bà vulèe é? (Ẹ́xọdọ̀s 20:​5, 6)

⁹ Bugi togó boo bé e Jìhóvà ólò ié tọa ló kilma ló gbò e bà vulèe naa. Bugi togó boo nú e Jìhóvà beè kọ́ nè Mózìs, nè pá Ízrẹẹ̀l. (Bugi Ẹ́xọdọ̀s 20:​5, 6.) Jìhóvà beè zìgà kọ àé kilìè sĩ́ gè ié vulè ea kyãa mm̀ bọ́ọ̀ló dẹ̀lẹ̀ nyíé boo kilma ló gbò e bà vulèèe. Boo béè kọ Jìhóvà bọ́ló dẹ̀lẹ̀ nyíé boo, èé láá agala boo kọ náa é aa ló gè vùlè gbò e bà vulèe. (Nìh. 1:5) Vóà naa, tṍó eo íè bàà-bàà bùlà ea kil ló be Jìhóvà vulè ni, bĩiná o bá kọọ̀, ‘É kọ m̀ vulè gé Jìhóvà?’ Bugi togó boo níí: Be ò vulè Jìhóvà vaá ò gé piigà bé eo kpóó sim tùlà naa gè naa nú ea léémáe, òé láá agala boo kọ Jìhóvà palàge vùlè ni. (Dán. 9:4; 1 Kọ́r. 8:3) Níí tõó dọ̀ kọọ̀ be ò agala boo kọ ò vulèè Jìhóvà, náa dú bíi kọ ó ié bàà-bàà bùlà be Jìhóvà vulè ni. Agala boo kọ à palàge vùlè ni, vaá náa é sọ́ ni bá gbẹẹ́ kẽ.

10-11. Mósĩ́ deè ní e Jìhóvà gbĩ́ kọ ó ẹ̀b nu ààaá ẹ́? (Gàlésìà 2:20)

¹⁰ Bugi togó boo nú e nu ààaá tõó dọ̀. Ú vààa gyọ́ọ̀ Jíízọ̀s Kráìst dú kà pọ̀b kà nènù e Jìhóvà ne gbò nen. (Jṍòn 3:16) É kọ Jìhóvà beè lẹ̀ẹ̀là a Sã́áná kọ á u nagé boo olo? Ẽei! Bugi togó boo nú e neǹ tóm Pọ́ọ̀l beè tení bá. A beè sí kà agẹbá pọ́lọ́ besĩ́ à kalá dú nen ea gé nyoone nvéè Kráìst, vaá a beè kilsĩ́ gè bé gbò nú ea gáẹ̀ beè ọọvẹ́ẹ ló. (Róm̀ 7:​24, 25; 1 Tím. 1:​12-14) Sõò a beè ẹ̀b nu ààaá naamá nènù e Jìhóvà neèe. (Bugi Gàlésìà 2:20.) Kẽea boo kọ Jìhóvà ní ea beè kọ Pọ́ọ̀l á emí nú ea kil ló nu ààaá mm̀ Kpá Káí é, vaá ba beè emí kọ̀láá kà nu ea di mm̀ Kpá Káí boo béè ge dòòmà bá nu nèi. (Róm̀ 15:4) Gbò bel e Pọ́ọ̀l beè emíá tẹ́lẹ bàlà kẽ kọ Jìhóvà gbĩ́ kọọ̀ ó ẹ̀b nu ààaá naamá nènù ea neè ni. Tṍó eo ẹbvì nu ààaá naa vó, òé gbóó láá palàge agala boo kọ Jìhóvà vulè ni.

¹¹ È ṍà Jìhóvà zaa kọ à lẹẹlà Jíízọ̀s domá boo kunukẽ̀í kọ á úí boo. Sõò dõona kà bug ea beè naa kọ Jíízọ̀s á dú boo kunukẽ̀í dú gè ló kà-kà bel ea kil ló Bàrì nè gbò nen. (Jṍòn 18:37) Kà-kà belá bãàa mm̀ bé e Jìhóvà ólò ẹ̀b nú ea kil ló pá a nvín naa.

JÍÍZỌ̀S BEÈ NOOMÀI BÉ E JÌHÓVÀ VULÈI NAA

12. Éé ní ea náa vaá èé láá dẹlẹ nyíé boo nú e Jíízọ̀s beè kọ́ kilma ló Jìhóvà ẹ?

¹² Tṍó e Jíízọ̀s beè di boo kunukẽ̀í, a beè kọ́ nú ea kil ló íb nen e Jìhóvà dú. (Lúùk 10:22) Èé láá palàge dẹlẹ nyíé boo nú e Jíízọ̀s beè kọ́ kilma ló Jìhóvà. Boo béè kọ Jíízọ̀s beè tú gã́bug gbáá tõ̀òma ló Jìhóvà gbẹá káála besĩ́ à kalá dú boo kunukẽ̀í. (Kọ́l. 1:15) Jíízọ̀s beè mòn bé e Jìhóvà vulè pá a gbò nyómá tóm e bà bọ́ló dẹ̀lẹ̀ nyíé boo, nè pá a gyóòlo e bà di boo kunukẽ̀í naa. Mósĩ́ deè ní e Jíízọ̀s beè naa kọ dõona gbò á agala boo kọ Bàrì vulè va ẹ́?

13. Jíízọ̀s gbĩ́ kọ é ẹ̀b Jìhóvà naa vàẹ?

¹³ Jíízọ̀s gbĩ́ kọ é nyimá ló íb tọa ló e Jìhóvà íe kìlmàí ló. Mm̀ kpá Máátìù, Máàk, Lúùk nè Jṍòn, Jíízọ̀s beè ló bel ea kil ló Jìhóvà dì belí “Tẹ̀” mm̀ nú ea é sígá ló 160 tóm. Tṍó ea géè ló bel nè pá a gbò nyòòne nvée, a beè olòó tú gbò moǹ bel ea kọ́ọ̀ “bọọ Tẹ̀” àbèè “bọọ Tẹ̀ ea di káála” loomá bel nè va. (Máát. 5:16; 6:26) Study note ea di ló kpá Máátìù 5:16 kọ́ọ̀: “Tṍó ea kil nvéeá, gbò gyóòlo Bàrì beè olòó tú gã́bug sòbée bààmàtẽ́ àbèè ge loomá bel ea kil ló Jìhóvà. Sìgà gbò sòbéeá dú ‘Nen Ea Ié Kpóó Lọ̀l Vaá À Lee,’ ‘Nen Ea Bọọ Lọ̀l Vaá À Lee,’ nè ‘Neǹ Dèmnù.’ Sõò ge kọ Jíízọ̀s tú bée ea válí bá ea kọlà ‘Tẹ̀’ kolmá Jìhóvà tẹ́lẹ bàlà kẽ bé e Jìhóvà gbĩ́ kọ gbò e bà gé fãèe á tõonìè bãèé ló, belí bé e nvín ólò tõo bã ló a tẹ̀ naa.” Vóà naa, Jíízọ̀s géè noomài kọ Jìhóvà vulèi belí bé e lé tẹ̀ ólò vùlè a nvín ea palàge nvèè ka ló naaá. Naanii èé ló bel boo bàà kà nu dòòmà bá ea kil ló bé e Jíízọ̀s beè tú sòbée ea kọlà “Tẹ̀” loomá bel kilma ló Jìhóvà naa.

14. Mósĩ́ deè ní e Jíízọ̀s beè tẹlẹ bàlà kẽ kọọ̀ bẹẹ Tẹ̀ ea di káála palàge nvèè ka ló buù bẹ̀ì e? (Máátìù 10:​29-31) (Ẹ̀b nàgé fòtó.)

¹⁴ Túá kà, bugi togó boo nú e Jíízọ̀s beè kọ̀ ea di mm̀ kpá Máátìù 10:​29-31. (Bugi.) Ńgá kṍò dú kà ńdígílí ńnóm e náa é láá vùlè, àbèè ge fã̀ Jìhóvà. Sõò bẹẹ Tẹ̀ nveè ka ló ńgá kṍò naa ní ea ólò nyimá tṍó e ene kà dọ́ kẽ. Be Jìhóvà palàge nvèè ka ló ene kà ńdígílí ńnóm naa vó, èé láá agala boo kọ Jìhóvà palàge vùlèi boo béè kọ è vulèe, vaá è gé fã́e! Jíízọ̀s beè kọọ̀ Jìhóvà nyímá gã́bug paà gyáa ea dìí togó. Tã́gíní bé e Jìhóvà nyímá bã̀àna ńkem̀ nú ea kilíí lóá, èé láá agala boo kọ à ólò palàge ẹ̀b nú ea kilíí ló. À palàge dọa bàlà kẽ kọọ̀ Jíízọ̀s gbĩ́ kọ é agala boo kọọ̀ bẹẹ Tẹ̀ ea di káála palàge nvèè ka ló buù bẹ̀ì.

15. Éé ní e bel e Jíízọ̀s beè lò ea di mm̀ kpá Jṍòn 6:44 tẹ́lẹ bàlà kẽ ea kil ló o Tẹ̀ ea di káála ẹ́?

¹⁵ Nvèè kpíí ló ní ea égè bàà kà nu dòòmà bá ea kil ló tṍó e Jíízọ̀s beè ló bel kilma ló Jìhóvà belí “Tẹ̀.” (Bugi Jṍòn 6:44.) Bẹẹ Tẹ̀ ea di káála beè nvèè bá nè ni kọ ó nyimàèe ló, vaá ó vulèèe. Éé ní ea náa vaá a beè naa vó é? Níí dú boo béè kọ à mon gbò lé kpãa ea dì ní m. (Tóm 13:48) Study note ea di ló kpá Jṍòn 6:44 kọ́ àé láá dú kọọ̀ Jíízọ̀s géè ló bel kilma ló bel e Jèrèmáíà beè lò, e togó bel ge nòí dẹẹa boo ea kọ́ọ̀: “M beè tú vulè ea kyãa mm̀ bọ́ọ̀ló dẹ̀lẹ̀ nyíé boo dùùmà ni nvea ló.” (Jèr. 31:3; doolé ló Hòsíà 11:4.) Bugi togó boo nú e níá tõó dọ̀. Bẹẹ Tẹ̀ ea di káála ólò mòn gbò lé kpãa ea dì ní m, e olo nóo monì.

16. (a) Éé ní e Jíízọ̀s nóòmài ẽ́, vaá éé ní ea náa èé dẹlẹ nyíé boo bel ea ló é? (b) Éé ní ea náa vaá òé láá agala boo kọ Jìhóvà ní ea dú kà lé Tẹ̀ ea bọ́ló kọ ó ié é? (Ẹ̀b ńkpó ea kọ́ọ̀ “Tẹ̀ Ea Bọ́ló Kọ Dénè Bẹ̀ì É Ié.”)

¹⁶ Tṍó e Jíízọ̀s kólí Jìhóvà kolíe bẹẹ Tẹ̀, à géè naa kọ é nyimá kọọ̀ Jìhóvà náa dúè áá ńlẹ́ẹ̀ Tẹ̀, sõò à dú nágé beélè Tẹ̀. Jíízọ̀s gbĩ́ kọ ó agala boo kọọ̀ Jìhóvà vulè ni, vaá à palàge ẹ̀b nú ea kil ní ló. Vóà naa, be à íe tṍó e nóo agàlà boo kọ Jìhóvà vulè ni, bĩiná o bá kọọ̀, ‘É kọ náa bọ́ló kọ ḿ dẹlẹ nyíé boo bel e Sã́áná Bàrì ea palàge nyimá ló bẹẹ Tẹ̀, vaá à ólò ló kà-kà bel lóí?’​—1 Pít. 2:22.

KILSĨ́ GÈ AGALA BOO KỌ JÌHÓVÀ VULÈ NI

17. Éé ní ea náa vaá à dú bíi kọ é kilsĩ́ gè agala boo kọ Jìhóvà vulèi é?

¹⁷ À dú bíi kọ é kilsĩ́ gè agala boo kọ Jìhóvà vulèi. Belí bé e ni nó naa, è monì kọọ̀ Sétàn ea dú bẹẹ neǹ ọ́b dì ea gé piigà kọ̀láá bé ea kpóó sim tùlà naa gè naa ní eé aa ló gè fã̀ Jìhóvà. Sétàn gbĩ́ kọ lóói á ọọ. Boo béè vó, à dì ea gé piigà bé e a kpóó sim tùlà naa, gè naa kọ é zìgà kọọ̀ Jìhóvà náa vulèi. Née é zigà kọ Sétàn á èlii bá!​—Jóòb 27:5.

18. Éé ní eo é láá naa kọbé ò kilsĩ́ gè agala boo kọ Jìhóvà vulè ni ẽ́?

¹⁸ Kọbé è láá agala boo kọ Jìhóvà vulèi, à dú bíi kọ é kilsĩ́ gè tã̀àgã ló Bàrì kọ á nvèè bá nèi kọbé è láá mòn gbò lé kpãa ea moníí m. Bugi togó boo gbò dọ̀ Kpá Káí ea baatẽ́ bé e Jìhóvà ólò ẹ̀b nú ea kil ló gbò e bà vulèe naa. Kẽ̀èa boo kọ Jìhóvà é kilsĩ́ gè vùlè gbò e bà vulèe. Á gá tá ní nyíe kọ Jìhóvà beè nè nu ààaá boo béè olo. Dẹlẹ nyíé boo bel e Jíízọ̀s beè kọ̀a, kọ Jìhóvà ní ea dú o Tẹ̀ẹ. Be à íe nen ea bĩ́íná ni kọọ̀: “É kọ ò agàlà boo kọ Jìhóvà vulè ni?” òé gbóó láá aalá nèe kọọ̀: “Ẽei, m̀ agàlà boo! Vaá m̀ gé piigà bé e nà kpóó sim tùlà naá buù dee gè zogè kọ m̀ vulèe!”