39 NU GÈ NÒ
Bé E Bàrì Ẹb Mii Naa
Mii palàge dú bíi. Tọ́ọ̀ bẹ̀ì née é láá tõó dùm be á géí m. Bàrì ní ea beè dèmii ẽ́, vóà naa ẹlẹ ní ea bọ́ló kọ á kọ́ bé eé tú mii siimá tóm naa ẽ́. Éé ní ea kọ́ kilmá ló mii ẽ́? É kọọ̀ èé láá bà àbèè ge nvea ló? Vaá mósĩ́ deè ní eo é láá nè lé béèlàfùl kilma ló níí ẽ́?
1. Jìhóvà ẹb mii naa vàẹ?
Jìhóvà beè kọ́ nè pá a gbò mm̀ tṍó e bà géè emí Kpá Káíá kọọ̀: “Dùm kọ̀láá kà nú ea di dùm dú a mii.” (Lìvítikọ̀s 17:14) Kilma kiẽ́e e Jìhóvà dì, mii tõó dọ̀ dùm. Tã́gíní bé e dùm dú dõ̀ònù ea aa bá Bàrì vaá à di káíá, mii dì nàgé káí.
2. Móbá gè tú mii naamá nu ní e Bàrì náa ténmá ẽ́?
Jìhóvà beè nè log gbò e bà géè fã̀e besĩ́ Kráìst à kálá dù kọ bàá gá bà mii. (Bugi Jénesìs 9:4 nè Lìvítikọ̀s 17:10.) A beè kpáá tẹlẹ̀ nàgé logí bàlà kẽ tṍó e gbò e bà géè tulè tóm gbò nyòòne nvéè Kráìst beè nè log kọọ̀, “Ó gá bai mii.”—Bugi Tóm 15:28, 29.
Éé ní e gè kpòòlà lóó lọl ló mii tõó dọ̀ ẹ? Beè neǹ dóm biè kọ́ nè ni kọ ó gá ṍ míí ea é láá tení dẽè nen, nóo é ṍ. Sõò, é kọọ̀ òó dé gyã́á e míí ea é láá tení dẽè neǹ di gbàà sẹ̀ òé tià tenmá mm̀ o ní ẽ́? Nóo é náa vó. Mm̀ tẽ̀ènè sĩ́deèá, log e Bàrì néi kọ é kpòòlà lóó lọl ló mii tõó dọ̀ kọ née é ṍ mii àbèè ge bà nom e bà náa lọl mii ló. Àbèè ge dé nú e ba beè tú mii bùlmà.
Èé kọ́ vàẹ kilma ló bóa e mii bãaa m ẽ́? Sìgà sĩ́deè ge tú mii boomá nen bé uú boo log Bàrì. Níí bãaa mm̀ ge nvèà mii ló àbèè ge tú ene kà zẹ̀ẹ̀ ténì kà nú ea bṍóná dú mii ea dú red cell, white cell, platelet, nè plasma nvea ló. Àé láá dú kọọ̀ sìgà sĩ́deè bóa náa aa deè bé uú boo log Bàrì. Dì belí nu dòòmà bá, sìgà sĩ́deè bóa bãàa mm̀ ge tú báàsĩ́ ea dú ló ene kà zẹ̀ẹ̀ ténì kà nú ea bṍóná dú mii boomá nen. Dõòna kà gbò sĩ́deè bãàa mm̀ gè tú mii ea aa ló nen boomá áá ẹ̀ẹ̀. Tṍó e gé bugi togó boo gbò sĩ́deè bóaí, àé bọ́ló kọọ̀ buù nen á nè a béèlàfùl.a—Gàlésìà 6:5.
KPÁÁ NÓ BỌ̀Ọ̀VẸ̀
Nyimá bé eo é láá nè béèlàfùl ea kil ló bóa e mii bãàa m naa.
3. Beeláfùl gè tú bóa ea é léémá Jìhóvà
Mósĩ́ deè ní eo é láá nè béèlàfùl ea gbááá ló bé e Bàrì ẹb mii naa ẽ́? Bìlà VÍDIÒÍ, vaá ò gbóó loai sọ́l boo bé ea dú bíi gè tú gbò láb tọ ea nyoone naa.
Bàn nyìmànù lọl bá Bàrì.—Jém̀z 1:5.
Gbĩ́tẽ́ ló gbò nòòkúu ea di mm̀ Kpá Káí nè bé eo é láá siimá tóm naa.—Próvẹẹ̀b 13:16.
Gbĩ́ gè nyimá gbò sĩ́deè bóa ea tọla kẽ kiẽ́e eo dì.
Nvèè kpíí ló gbò ní e náa bọ́ló kọ ó tù.
Nè béèlàfùl ea é náa kọ ó kilsĩ́ gè ié õ̀òa bug.—Tóm 24:16.b
Nyimá kọọ̀ náa bọ́ló kọ tọ́ọ̀ nen—bã̀àna o dóm àbèè o va, neǹ kànen, àbèè nen ea ólò noòmà ni Kpá Káí á nè béèlàfùl ea kil ló gbò nú eo é náa kọbé ò íe õ̀òa bug.—Róm̀ 14:12.
Emí o béèlàfùl gbẹẹ́ kẽ kọbé dõòna gbò nyímá.
4. Gbò Neǹ Ditõ̀ò Jìhóvà ólò gbĩ́ gè ié lé bóa
Èé láá gbàntṍ ló log e Bàrì ne kilma ló mii vaá è tú lé bóa e bà náa é nveèi mii ló. Bìlà VÍDIÒÍ.
Bugi Táítọ̀s 3:2, vaá ò gbóó aalai nakà bíbví:
Éé ní ea náa vaá à bọ́ló kọ é fã̀ dẽè gbò dóm biè vaá tú gbọ́ọ́-gbọọ̀ ló loomá bel nèva ẹ́?
Ní e náa bọ́ló gè tù |
Ní e neǹ Kráìst é ne béèlàfùl boo |
|---|---|
A. Plasma. |
Báàsĩ́ ea dú ló plasma |
B. White cell. |
Báàsĩ́ ea dú ló white cell |
C. Platelet. |
Báàsĩ́ ea dú ló platelet |
D. Red cell. |
Báàsĩ́ ea dú ló red cell |
5. Tṍó e bóa bãaa mm̀ báàsĩ́ ea dú ló ene kà zẹ̀ẹ̀ ténì kà nú ea bṍóná dú mii
Ténì kà nu ní ea bṍóná dú mii ẽ́, vaá bà dú red cell, white cell, platelet, nè plasma. Buù kà nuí íe gã́bug dõòna kà gbò báàsĩ́ ea di ló.c Bà ólò tú báàsĩ́ ea dú ló ene kà zẹ̀ẹ̀ ténì kà nú ea bṍóná dú miií naamá biè e bàé boomá nen àbèè ge fùlmà mii.
Àé bọ́ló kọọ̀ buù nen ea gé nyoone nvéè Kráìst á nè béèlàfùl dẹ̀ẹ̀a boo a kpóó bug e Kpá Káí ni búmá, be àé zigà kọ bàá tú báàsĩ́ ea dú ló ene kà zẹ̀ẹ̀ ténì kà nú ea bṍóná dú mii boomàèe àbèè kọ bàá gá naa vó.
Tṍó eo gé ne béèlàfùl, bugi togó boo nakà bíbví:
Mósĩ́ deè ní em é láá baatẽ́ nè neǹ dóm biè nú ea náa vaá m̀ḿ zigà kọọ̀ bàá tú báàsĩ́ ea dú ló ene kà zẹ̀ẹ̀ ténì kà nú ea bṍóná dú mii boomám àbèè kọ bàá gá boomám ẽ́?
NEN É LÁÁ BĨINÁ KỌỌ̀: “Mókà pọ́lọ́ ní ea di ló gè nvèà mii ló é?”
O bùlà kọ́ vàẹ?
NÚ E NI NÓ
Jìhóvà náa gbĩ́ kọ é tú mii siimá tóm boo bá e náa bọ́ló.
Ge Òòa Boo
Éé ní ea náa vaá Jìhóvà à ẹ̀b mii naamá nú ea di káí é?
Éé ní ea náa vaá è nyimá kọọ̀ log Jìhóvà ea kọ é kpòòlà lóó lọl ló mii bãàa mm̀ ge nvèà mii ló é?
Mósĩ́ deè ní eo é láá nè lé béèlàfùl ea kil ló bóa ea bãàa mm̀ mii ẽ́?
KPÁÁ GBĨ́ TẼ́ LÓ
Gbò éé ní ea bọ́ló kọ ó bugi togó boo besĩ́ ò kálá nè béèlàfùl kọ bàá tú áá ńlóò mii boomàè ni ẽ́?
“Questions From Readers” (Kpá Tọ Kùdẽe Ló, October 15, 2000)
Éé ní ea bọ́ló kọ ó bugi togó boo tṍó eo gé ne béèlàfùl kọ bàá tú báàsĩ́ ea dú ló ene kà zẹ̀ẹ̀ ténì kà nú ea bṍóná dú mii boomàè ni ẽ́?
Éé ní ea beè naa kọọ̀ ene kà neǹ dóm biè á zìgà kọọ̀ nyìmànù di mm̀ bé e Jìhóvà ẹb mii naa ẽ́?
Nyimá bé e gbò kànen e ba dṹùnà Hospital Liaison Committee ólò nvèè bá nè pá vígà págbálà nè pábia naa.
a Ẹ̀b 35 Nu Gè Nò ea kọ́ọ̀, “Bé Eé Láá Nè Lé Béèlàfùl Naa.”
b Ẹ̀b 5 gá ea kọ́ọ̀, “Tṍó E Bóa Bãaa Mm̀ Báàsĩ́ Ea Dú Ló Ene Kà Zẹ̀ẹ̀ Ténì Kà Nú Ea Bṍóná Dú Mii”; nè 3 Émì Nu Ea Di Dee Deè Nvéè Kpáí, “Gbò Sĩ́deè Ge Tú Mii Boomá Nen”; nè Our Kingdom Ministry, níí November 2006, 3-6 náásĩ́.
c Sìgà gbò dóm biè ólò ẹ̀b ténì kà nú ea bṍóná dú miií naamá báàsĩ́ e bà tú lọl ló ene kà zẹ̀ẹ̀ ténì kà nú ea bṍóná dú miií. Vóà naa, àé dú bíi kọ ó baatẽ́ o béèlàfùl ge kọọ̀ nóo é nveàè mii ló, kọbèè red cell, white cell, platelet, àbèè plasma.