Jeremias
11 Jehovacho ho sondex Jeremiasak mellʼllo: 2 “Lokamno, hea korarantlim utram aikat!
“Heo vostu Judantlea lokank ani Jeruzalemant ravtoleank kolloi,* 3 ani tankam oxem sang, ‘Izraelacho Dev Jehova oxem mhunntta: “Zo munis hea korarantlim him utram pallina to xirap poddlolo, 4 jim pallunk hanvem tumchea purvozank adnea diloli. Jea disa hanvem hea lokank Ejipttantlean, tea lokhonn pigllaupi bhottʼttentlean bhair haddlole, tea disa hanvem tankam sanglolem, ‘Mhozo tallo aikat, ani hanv adnea ditam tem soglem korat. Tednam tumi mhoje lok zatole, ani hanv tumcho Dev zatolom. 5 Ani hanvem tumchea purvozank, dudh ani mhonv vhanvta toslo des ditolom mhunn soput gheun ji bhas dilʼli, ti hanv purnn kortolom. Ani aiz meren ti bhas purnn zait asa mhunn tumi polloitat.’”’”
Tednam hanvem zobab diun mhunnttlem: “Jehova Deva, Amen.”*
6 Uprant Jehovan mhaka mhunnttlem: “Judachea xaramnim ani Jeruzalemachea rosteancher hem soglem kolloi: ‘Hea korarantlim utram aikat ani tim pallat. 7 Karonn jea disa hanvem tumchea purvozank Ejipttantlean bhair haddlole, tea disa hanvem tankam somzaun sanglolem: “Tumi mhoji adnea pallat.” Aiz hanv tumkam somzaitam toso, hanvem tankam porot-porot somzailʼle. 8 Punn tannim mhojem aikonk na, vo mhaka kan diunk na. Tachea bodlek, dor eklo hottʼtti zaun aplea noxttea kallzachem aikot ravlo. Taka lagon, hanvem tankam korarant sanglolea utram pormonnem khast dili, karonn hanvem tankam jem pallunk sanglolem tem tannim pallunk na.’”
9 Uprant Jehovan mhaka mhunnttlem: “Judachea lokamnim ani Jeruzalemant ravtoleamnim mhojea add manddnni kelea. 10 Te tech guneanv kortat je tanche purvoz survatek thaun korit aileat, zannim mhojeo adnea pallunk nakarleo. He lok pasun dusrea devanchea fattlean voitat ani tanchi seva kortat. Izraelachea ghorannean ani Judachea ghorannean hanvem tanchea purvozam sangata kelʼlo to korar moddla. 11 Taka lagon Jehova oxem mhunntta, ‘Atam hanv tancher ek oslem odruxtt haddchom asam, zachea thaun te salvar zaunchenant. Te modoti pasot mhaka ulo martole tednam hanv tanchem aikochom na. 12 Tednam Judachea xarantle ani Jeruzalemant ravtat te lok tea devam lagim voitole zankam te bolidanam* bhettoitat, ani modoti pasot ulo martat. Punn odruxttachea vellar tanchea hea devam lagim tankam koxech salvar korunk zaunchem na. 13 Juda, jitlim tujim xaram asat, title tuje dev zaleat, ani Jeruzalemant jitle roste asat titleo vedi tunvem tea lojechea vostuk* bandleat. Baalak bolidanam bhettounk tunvem teo vedi bandleat.’
14 “Punn tum,* hea lokam pasot magnnem korinaka. Tum tanchea pasot roddonaka vo magonaka, karonn tanchea odruxttak lagon te mhaka ulo martole tednam hanv tanchem aikochom na.
15 Mhojea mogachea lokam modle zaite zann aplea manddnneam pormonnem kam kortat zalear,
Tankam mhojea ghorant ravonk koslo hokʼk asa?
Povitr masan* tujer* ieta tem odruxtt tanchean addaunk zatolem kai?
Tea vellar tumi* mouza kortole kai?
16 Ek vell aslo jednam Jehovan tuka hirvea panamnim bhorlolem zoitunachem zhadd mhunnttlolem,
Borea follamnim bhorlolem sobit zhadd mhunnttlolem.
Punn tannem ek vhoddlo gorozta toslo avaz korun zhaddak uzo lailo,
Ani tannim tache khande moddun uddoile.
17 “Tuzo Rovpi, fouzancho Dev Jehovan kolloilam ki Izraelachea ghorannean ani Judachea ghorannean noxttim kamam keleant, tannim Baalak bolidanam bhettoun mhaka rag haddla dekhun tujer odruxtt ietolem.”
18 Mhaka kollchem mhunn Jehovan mhaka khobor dili,
Te kitem kortale tem tunvem mhaka tea vellar dakhoilem.
19 Marunk haddlolea eka xant menddurlea bhaxen hanv aslom.
Te mhojea add hi manddnni kortale mhunn mhaka khobor nasli:
“Ami hea zhaddacho tachea follam sangata nas korum-ia,
Ani taka marun uddoum-ia,
Jea vorvim fuddarak konnuch tachem nanv ugddas korchona.”
20 Punn fouzancho Dev Jehova nitivontponnan neai korta,
To kholaiechim chintnam* ani kalliz topasta.
Deva, tum tanche koddlean koso sudd ghetolo tem mhaka pollounk di,
Karonn hanvem mhoji kes tujea hatant ghatlea.
21 Taka lagon, Anathotache je lok tuzo jiv kaddunk sodhtat ani je tuka mhunnttat, “Jehovachea nanvan bhasaunni korinaka, na zalear ami tuka marun uddoitole,” tanchea add Jehova oxem sangta, 22 fouzancho Dev Jehova mhunntta: “Hanv tanche koddlean hixob gheunchom asam. Tanche tornatte tolvarin mortole ani tanche put ani dhuvo bhuken mortoleo. 23 Tanchea modlo eklo-i urchona, karonn jea vorsa hanv Anathotachea lokancho hixob ghetolom, tea vorsa hanv tancher odruxtt haddttolom.”