Jeremias
2 Jehovacho ho sondex mhojea lagim pavlo: 2 “Voch ani Jeruzalemak oxi kollounni kor, ‘Jehova oxem mhunntta:
“Mhaka ugddas asa, tornattponnar tunvem mhaka kitlem aplemponn dakhoilʼlem,*
Amchi kazarachi mudi zalʼli tednam tunvem mhozo kitlo mog kelʼlo,
Oronnʼnneant tum koxem mhojea fatta-fatt ailʼlem,
Eka oslea zagear, zoim bim vompunk na.
3 Izrael Jehova pasot povitr aslem, tachea lunvnnechea poilea pike sarkem.”’
Jehova mhunntta, ‘Zo konn taka khaunk voita to guneanvkari zatolo.
Tancher odruxtt ietolem.’”
4 O Jakobachea ghorannea ani Izraelachea ghoranneantlea soglea familimno,
Jehovacho sondex aikat.
5 Jehova oxem mhunntta:
“Tujea purvozank mhojea bhitor kosli chuk mellʼlli,
Zaka lagon te mhoje koddlean itle pois gele,
Ani upeog naslolea murteam fattlean cholon te-ui upeog naslole zale?
6 Tannim oxem vicharunk na,
‘Amkam Ejiptt desantlean bhair haddlim, to Jehova khoim asa?
Zannem amkam ranvott vattarantlean vatt dakhoili,
Zoim oronnʼnnem ani fondd asle,
Zoim dukoll ani kallo-kitt kallokh aslo,
Zoim khoinchoch munis bhonvonaslo,
Ani zoim ekui munis ravonaslo, oslea vattarantlean zannem amkam bhair haddlim to khoim asa?’
7 Uprant hanv tumkam follanchi bag aslolea desant gheun ailom,
Jea vorvim tumi tachem pik ani boreo vostu khaunk pavtole asle.
Punn tumi hanga ieun mhozo des oxudʼdh kelo,
Mhojem daiz vitt ieta toslem kelem.
8 Iadnikamnim oxem vicharunk na, ‘Jehova khoim asa?’
Zankam Kaido xikounchi zobabdari asli, tannim mhaka vollkhonk na,
Gonvlli mhojea add gele,
Provadeamnim Baalachea nanvan bhasaunneo keleo,
Ani te oslea devanchea fattlean gele je tankam kosloch faido korunk xokonant.
9 Jehova mhunntta, ‘Taka lagon, hanv tumcher anikui arop ghaltolom,
Ani tumchea putanchea putancher arop ghaltolom.’
10 ‘Tumi par korun poltoddi Kittimachea doria deger* vochat ani polloiat.
Hoi, Kedarak sondex dhaddat ani bariksannen choukoxi korat,
Ani oxem kitem-i thoim ghoddlam zalear polloiat.
11 Khoinchea-i raxttran aplea devank soddun, dev nhoi toslea devank apnnaileat?
Punn mhoje lok, mhoji mhoima korchea bodlek upeog naslolea vostunchi mhoima korunk lagleat.
12 Mollba, thottakun hem polloi,
Ani bhirantin koddkodd,’ oxem Jehova mhunntta.
13 ‘Karonn mhojea lokamnim don vaitt kamam keleant:
Tannim mhaka, jivea udkache zhorik soddun dila,
Ani aplea pasot osli baim* marlea,*
Ji funttlea ani zantunt udok urona.’
14 ‘Izrael ek sevok kai, vo eka ghoranneant zolmolʼlo chakor kai?
Toxem zalear, taka luttun vhoronk kiteak dilo?
15 Tachea add tornatte xinv goroztat,
Tannim tancho avaz vaddoila.
Tannim tanchea desachi poristhiti oxi kelea ki polloitoleank bhirant dista.
Tachea xarank uzo laila, zaka lagon thoim konnuch ravona.
16 Nof* ani Tefanesache lok tuzo hoddʼddo tasun uddoitat.*
17 Tuzo Dev Jehova tuka vatt dakhoitalo tednam,
Tunvem taka soddun dilo.
Oxem korun, tunvem hem tujeruch voddun haddunk na kai?
18 Atam tum Ejipttant vochon,
Shihorachem* udok kiteak pieunk sodhta?
Tum Asirient vochon,
Nhoim-chem* udok kiteak pieunk sodhta?
19 Tunvem tujea noxtteponna thaun xikonk zai,
Tujea ovisvaxiponnak lagon tuka khast mellonk zai.
Jehova tujea Devak soddun dilolean,
Tacho porinnam kitlo vaitt ani koddu zatolo tem zannam zav ani somzon ghe.
Tunvem mhoji ilʼli pasun bhirant dhorunk na,’ oxem Akʼkhea Vixvacho Dhoni, fouzancho Dev Jehova mhunntta.
20 ‘Khub poilim hanvem tujem zum moddun uddoilʼlem,
Ani tujeo sanklleo toddun uddoilʼleo.
Punn tunvem mhunnttlem: “Hanv tuji seva korchina.”
Karonn dor eka unch porvotar ani dor eka vhoddlea zhadda ponda,
Tum posortali ani xindollki kortali.
21 Hanvem tuka roilʼli tednam tum borea bim-am thaun vaddloli tambddi drakxanchi val asli.
Tor atam tuje khande koxe kusonk lagle ani tum mhojea mukhar eka porkea vali bhaxen koxi zali?’
22 Akʼkhea Vixvacho Dhoni Jehova mhunntta, ‘Tunvem tuka kitlo-i sabanv* lailear pasun ani soddan* tuka kitlo-i dhuilear pasun,
Tujea guneanvacho dag mhojea mukhar tosoch urtolo.’
23 Tum koxem mhunnonk xokta, ‘Hanvem mhakach boxttaunk na.
Hanv Baal devam fattlean vochonk na’?
Falkeant tunvem kitem kelam tem polloi.
Tunvem koslim kamam keleant tacher dhean di.
Tum eka vegan* dhanvtolea tornatte unttini sarkem,
Ji kainch karonn nastana bexttich hevtten-tevtten dhanvta.
24 Tum oslea ranvotti gaddva bhaxen asa zaka ranvott vattarant ravpachi sonvoim zalea,
Ji khub umedin* gaddvak sodhunk varem hungot voita.
Ticheo loingik itsa challvolea uprant tika konn addaunk xokta?
Tika sodhtat tankam chodd vavr korunk poddchona,
Tichea tea mhoineant* ti tankam sompeponni mellttoli.
25 Upeog naslolea vostum fattlean dhanvon tuje paim zhoronk,
Ani tuzo tallo sukonk dinaka.
Punn tunvem mhunnttlem, ‘Na, atam oxem zaunk xokona!
Karonn hanv porkeanchea* mogan poddlam,
Hanv tancheach fattlean voitolem.’
26 Chor sampoddtta tednam taka loz bhogchi poddtta toxi,
Izraelachea ghoranneak lojek ghatlam,
Tankam, tanchea razank ani kunvrank,
Tanchea iadnikank ani provadeank lojek ghatleat.
27 Te eka rukhak mhunnttat, ‘Tum mhozo bapui,’
Ani eka fatrak mhunnttat, ‘Tunvem mhaka zolm dila.’
Mhaka tondd dakhounche bodlek, te mhaka fatt kortat.
Ani odruxttachea vellar te mhunnttole,
‘Utth ani amkam salvar kor!’
28 Tunvem tujeach pasot kelʼle te dev atam khoim gele?
Te tuka odruxttachea vellar salvar korunk xoktat zalear, tannim ieun tuka salvar korchem,
Karonn Juda, jitlim tujim xaram asat title tuje dev zaleat.
29 Jehova mhunntta: ‘Tumi mhojer arop kiteak ghaltat?
Tumi sogle mhojea add kiteak voitat?’
30 Tumchea putank khast lavun* kainch faido zaunk na.
Te xist manun ghenasle,
Girasun khatolea xinva bhaxen,
Tumcheach tolvarin tumchea provadeank khaun uddoile.
31 O pillge, Jehovachea sondexacher dhean di.
Hanv Izraela pasot ek ranvott vattar zalam kai?
Vo bhorpur kallokh aslolo ek des zalam kai?
Hea lokamnim, mhojeach lokamnim oxem kiteak mhunnttlem, ‘Amkam zai thoim ami bhonvtole.
Ami porot kednanch tujea lagim ieunchenant’?
32 Ek ankvar cheddum aplem bhangar-xingar kednam-i visronk xokta kai?
Ek vhokol aplo kazaracho pottʼtto* ghalunk kednam-i visronk xokta kai?
Punn mhojech lok mhaka kitlea disam thaun visron geleat.
33 Age baile, mog sodhunk tum kitlea naddbudʼdhen tuji vatt vinchun kaddtta!
Tunvem tukach noxttea vatten cholonk xikoilea.
34 Tujea ghagreacher pasun niropradi ani goribanchea rogtache dag poddleat,
Tujem ghor foddun bhitor sortana hanvem tankam pollounk na tem khorem,
Punn tujea kopddeancher hanvem tanchea rogtache dag polloile.
35 Punn tum mhunntta, ‘Hanv niropradi asam.
Mhojea voilo tacho rag pois zala mhunn hanv zannam.’
Atam hanv tuji zhoddtti kortolom,
Karonn tum mhunntta, ‘Hanvem patok korunk na.’
36 Tuzo bodlot ravta toslo sobhav, tum kainch nhoi zalʼlea bhaxen kiteak lekhta?
Asiriek lagon tuka zoxi loz bhogunk poddli,
Toxi Ejipttak lagon pasun tuka loz bhogchi poddttoli.
37 Tea pasot, tum lojek lagon tuje hat mathear dovrun voitoli,
Karonn tunvem zancher bhorvonso dovorlo tankam Jehovan nakarleat,
Te tujea adarak pavchenant.”