Jeremias
31 Jehova mhunntta, “Tea vellar, hanv Izraelachea soglea ghoranneancho Dev zatolom, ani te mhoje lok zatole.”
2 Jehova oxem mhunntta:
“Izrael aplea visov gheupachea zagear voitalo tednam,
Tolvari thaun vanchon urloleat tea lokank, ranvott vattarant Devacho favor mellʼllo.”
3 Pois thaun Jehova mhojea lagim ailo ani tannem mhaka mhunnttlem:
“Hanvem tuzo mog kela ani sasnak poriant korit ravtolom.
Taka lagon, hanvem tuka visvaxi mogan mhojea lagim voddun haddla.*
4 Hanv tuka porot bandtolom ani tum porot ek raxttr zatolem.
Izraelache ankvar dhuve, tum porot tuji ddofli* hatant ghetolem,
Ani khuxalkaien nachot* bhair sortolem.
5 Tum Samariechea porvotancher porot drakxanche molle laitolem,
Molle laitat te, tachim follam khaun khuxal zatole.
6 Karonn to dis ietolo, jednam Efraimachea porvotancher aslole rakhonndar oxem mhunnon bob martole:
‘Utthat, ami amcho Dev Jehova lagim voir Sionant vochom-ia.’”
7 Karonn Jehova oxem mhunntta:
“Jakoba pasot khuxalkaien bob marat.
Khuxalkaien bob marat, karonn raxttram modem tumi sogleant fuddem asat.
Hachi kollounni korat, Devak vakhannat ani mhunnat,
‘Jehova Deva, tujea lokank, Izraelachea urloleank salvar kor.’
8 Hanv tankam utʼtorechea desa thaun porot haddttam.
Hanv tankam prithumechea sogleant poisulʼlea vattaram thaun ektthaim kortolom.
Tanchea modem kuddʼdde ani longdde astole,
Toxench, gorbest ani ballontiniche vollvolle suru zalʼleo bailo astoleo, tim soglim sangata ietolim.
Ek vhoddli sobha koxi tim hanga porot ietolim.
9 Tim roddot ietolim.
Tim doiechi bhik magot ietolim ani hanv tankam vatt dakhoitolom,
Ani hanv tankam udkachea zhorim* lagim vhortolom.
Tim addkhollon poddona zaunk hanv tankam ek-sarkea* rostea voilean vhortolom.
Karonn hanv Izraelacho Bapui zaun asam, ani Efraim mhozo poilo put zaun asa.”
10 Raxttramno, Jehovacho sondex aikat,
Ani pois aslolea zunveancher tachi kollounni korat:
“Zannem Izraelak ximpddailim, toch tankam ektthaim kortolo.
Gonvlli aplea hinddacher nodor dovorta toso, to tacher nodor dovortolo.
11 Karonn Jehova Jakobak soddoitolo,*
Jakoba poros bollixtt asa, tachea hatantlean to taka vanchoitolo.
12 Te ietole ani Sionachea tengxer khuxalkaien bob martole,
Tanchea tonddancher khuxalkai porzollttoli, karonn Jehova tankam boreponn dakhoitolo,*
To tankam dano, novo drakxancho soro ani tel ditolo,
Ani tanchea hinddak ani gorvank khub poram zatolim.
Te bore bhaxen ximplolea bage sarke zatole,
Ani porot kednanch oskot zaunchenant.”
13 “Tea vellar, ankvar cheddvam khuxalkaien nachtolim,
Toxench, tornatte ani zanntte pasun sangata nachtole.
Hanv tanchem dukh, khuxalkaien bodoltolom.
Hanv tankam bhuzvonn ditolom, ani tanchea dukha bodlek hanv tankam khuxalkai ditolom.
14 Hanv iadnikank bhorpur jevonn diun dhadoxi kortolom,
Ani mhoje lok mhojea boreponnak lagon dhadoxi astole,” oxem Jehova mhunntta.
15 “Jehova oxem mhunntta:
‘Ramant dukh korta to ani vhoddlean roddtta to avaz aikonk ieta:
Rakel aplea putam* khatir roddtta.
Tika kitli-i bhuzvonn dilear pasun tika bhuzvonn mellona,
Karonn tichim bhurgim atam uronk nant.’”
16 Jehova oxem mhunntta:
“’Atam anik roddonaka, tujea dolleantlim dukam pus,
Karonn tuka tujea kamancho inam mellcho asa.
Te aplea dusmanachea desantlean porot ietole,’ oxem Jehova mhunntta.
17 Jehova mhunntta, ‘Tuka fuddarak bhorvonso asa.
Tuje put aplea vattarant porot ietole.’”
18 “Hanvem Efraimachem roddnnem khorench aikolam,
‘Zum gheunk xikounk naslolea paddkulea sarko hanv aslom.
Punn tunvem mhaka sudhrailo, ani hanv sudhorlom.
Mhaka portun hadd ani hanv rokddoch portun ietolom,
Karonn tum mhozo Dev Jehova zaun asa.
19 Mhaka khub dukh zalem ani hanv porot ailom,
Mhaka somzailea uprant, hanvem dukhak lagon mhojea zangllar marlem.
Tornattponnar hanvem jem kelʼlem,
Taka lagon mhaka loz bhogli ani opman zalo.’”
20 Jehova mhunntta, “Efraim mhozo moladik put ani mogacho bhurgo nhoi kai?
Jitle pavtti hanv tachea add uloitam, title-i pavtti hanv tacho ugddas pasun kortam.
Takach lagon, tachea pasot mhojem kalliz* kollvolltta.
Ani hanv khorench, tache churchure kortolom.”
21 “Tum tujea pasot rostear fatrache khambe ube kor,
Ani vatt dakhounk khunna mhunn khambe ube kor.
Jea vatten tuka voichem asa, to mha-marg dhean diun polloi.
Izraelache ankvar dhuve, tujea hea xaramnim porot ieo.
22 Ovisvaxi dhuve, tum kednam poriant bhottkot ravtoli?
Jehovan prithumer kitem tori novem rochlam:
Ek bail khub urben eka dadlea fattlean lagtoli.”
23 Izraelacho Dev, fouzancho Dev Jehova oxem mhunntta: “Tanchea koident aslolea lokank ektthaim korun hanv porot haddttolom tednam, Juda desant ani tachea xaramnim te lok porot oxem mhunnttole: ‘Nitivontponnachea zagea, povitr porvota, Jehovan tuka besanv dium.’ 24 Thoim Juda ani tachim soglim xaram, xetkar ani gonvlli, sogle sangata mellon ravtole. 25 Karonn hanv thokloleak dhadoxi kortolom, ani oskot aslolea dor ekleak ghottai ditolom.”
26 Itlean hanv zago zalom ani hanvem mhoje dolle ugoddle. Mhaka bori nhid lagloli.
27 Jehova mhunntta, “Polloi! Te dis ietat, jednam hanv Izraelachea ghoranneant ani Judachea ghoranneant, munxanchem bim* ani gorvam-menddranchem bim vomptolom.”
28 Jehova mhunntta, “Jea toren tankam umttun kaddunk, sokol uddounk, moddun uddounk, nas korunk ani tanchem luksonn korunk, hanv tancher nodor dovrun aslom tosoch, tankam bandun haddunk ani rovunk, hanv tancher nodor dovortolom.” 29 “Tea disamnim te porot kednanch oxem mhunnchenant, ‘Bapaimnim ambott khailem, punn putanche dant ambott zale.’ 30 Tachea bodlek, dor eklo apleach guneanvak lagon mortolo. Zo ambott drakxam khatolo, tachech dant ambott zatole.”
31 “Jehova mhunntta, ‘Polloi! Oxe dis ietat jednam hanv Izraelachea ghorannea sangata ani Judachea ghorannea sangata ek novo korar kortolom. 32 Hanvem tanchea purvozancho hat dhorun tankam Ejiptta thaun bhair haddlim tea disa, tanchea lagim kelʼlea korara sarko ho korar aschona.’ Jehova mhunntta, ‘Hanv tancho khoro dhoni* aslom, tori astana, tannim mhozo korar moddlo.’”
33 Jehova mhunntta, “Tea disam uprant,* hanv Izraelachea ghorannea sangata oso korar kortolom: Hanv mhozo kaido tanchea monant ghaltolom, ani tanchea kallzacher boroitolom. Hanv tancho Dev zatolom, ani te mhoje lok zatole.”
34 Jehova mhunntta, “Tea uprant, konnuch aplea xezareak ani aplea bhavak oxem mhunnon xikounchona: ‘Jehovachi vollokh korun ghe!’ Karonn lhanam thaun vhodd, soglim mhaka vollkhotolim. Karonn hanv tancho guneanv bhogxitolom, ani tanchem patok porot kednanch ugddasak haddchom na.”
35 Jehova, zannem disacho uzvadd diunk suria kela,
Ratchea vellar uzvadd diunk chondrim ani noketrank kaide ghatleat,
Zo doriak arto-porto korun uddoita ani tachim lharam uchamboll korta,
Zachem nanv fouzancho Dev Jehova,
To oxem mhunntta:
36 “‘Zoxe nem-kaide sodankal urtat,
Toxench, ek raxttr koxem Izraelachi sonsot mhojea mukhar sodankal urtoli,’ oxem Jehova mhunntta.”
37 Jehova oxem mhunntta: “‘Voir mollob mezunk zalʼlem zalearuch ani sokol prithumechea buniadincho thav gheunk zalʼlo zalearuch, hanv Izraelachea sonstik tannim kelʼlea soglea kamank lagon nakartolom aslom,’ oxem Jehova mhunntta.”
38 Jehova mhunntta, “Polloi! Te dis ietat jednam Hananelachea Gopura thaun tem Konnxeachea Darvonttea meren, hem xar Jehova pasot bandun kaddttole. 39 Ani mezpachi dori nitt Garebachea dongra meren voitoli ani thoim thaun ghunvon Goah voitoli. 40 Moddim ani gobor* aslolem akʼkhem falkem,* pois aslolea Kidron Falkeachim soglim xetam, ani udente vatten Ghoddeachea Darvontteachea konnxea meren asloli sogli zomin, he sogle vattar Jehova pasot povitr zatole. Taka porot kednanch umttun kaddchenant vo moddun uddounchenant.”