Jeremias
9 Mhoji tokli udkan bhorloli baim,
Ani mhoje dolle dukanchi zhor asli zalear,
Hanv jivexim marlolea mhojea lokam pasot,
Dis ani rat roddot ravtolom aslom.
2 Mhoje koddem ranvott vattarant provas korpi ravtat toslo ek zago aslo zalear,
Hanv mhojea lokank soddun pois voitolom aslom.
Karonn te sogle pordvar korpi
Ani visvasghat korpi lokancho zomo zaun asat.
3 Te apli jib dhonu bhaxen bagoitat,
Desant visvas dovorpa sarko konnuch na, thoim fokot fottingponnam choltat.
Jehova mhunntta, “Te eka-fattlean-ek noxttim kamam korit ravtat,
Ani te mhojer dhean dinant.”
4 “Dor eklean aplea xezarea koddem samballun ravchem,
Aplea bhavacher pasun visvas dovorcho nhoi.
Karonn dor ek bhav visvasghatki zaun asa,
Ani dor ek xezari nanv piddʼddear korpi zaun asa.
5 Dor eklo aplea xezareak fosoita,
Konnuch sot uloina.
Tannim aplea jibek fott ulounk xikoilea.
Te vaitt kamam korun-korun thokon voitat.
6 Tum fosoupi lokam modem ravta,
Te fott uloitat ani mhaka vollkhonk nakartat,” oxem Jehova mhunntta.
7 Taka lagon, fouzancho Dev Jehova mhunntta:
“Hanv tankam pigllaitolom ani topastolom,
Karonn hanv mhojea lokanchea dhuvek anik kitem mhunn korunk xoktam?
8 Tanchi jib jiv gheupi banna sarki asa, ji fott uloita.
Te tonddan aplea xezarea lagim xanticheo vostu uloitat,
Punn bhitorlea-bhitor te fas manddttat.”
9 Jehova mhunntta, “Oslea korneank lagon hanvem tancho hixob gheunchom nhoi kai?
Oslea raxttra koddlean hanvem sudd gheuncho nhoi kai?
10 Hanv dongram pasot dukam golloitolom ani roddttolom,
Ranvott vattarantlea chorvachea mollam pasot hanv dukhachem git* gaitolom,
Karonn tim oxim lasoun uddoileant ki thoinchean konnuch pasar zaina,
Ani thoim gorvam-menddrancho avaz aikonk iena.
Ani mollba voilim suknnim ani zonvaram thoim thaun pollon geleant, tim atam thoim nant.
11 Hanv Jeruzalemak fatranchi ras ani koleanchi* dhol kortolom,
Hanv Judachea xarak padd korun uddoitolom. Thoim ekui munis urchona.
12 Hem soglem somzonk zannvaiecho konn asa?
Hem vochon sang mhunn Jehovan konnank sanglam?
Desacho kiteak nas zala?
Konnuch thoinchean pasar zaunk xokona,
Toslea zollon gelʼlea ranvott vattara sarko to kiteak zala?”
13 Jehovan zobab dilo: “Karonn tannim mhozo kaido* nakarlo. Tannim to pallunk na ani mhojem aikonk na. 14 Tachea bodlek, te hottʼtti zale ani aplea kallzant ailem tem tannim kelem, ani tanchea purvozamnim tankam xikoilʼlem toxem te Baal murteam fattlean gele. 15 Taka lagon, Izraelacho Dev, Fouzancho Dev Jehova oxem mhunntta, ‘Hanv mhojea lokank koddu zhadd* khaunk ani vikari udok pieunk laitolom. 16 Tankam ani tanchea purvozank pasun khobor nasli tea raxttramnim hanv tankam ximpddaitolom, ani hanv tancho purnn toren nas korun uddoina tea meren, hanv tanchea fattlean ek tolvar dhaddttolom.’
17 Fouzancho Dev Jehova oxem mhunntta,
‘Somjikaien vagat.
Dukhachim gitam* gaitat tea bailank apoiat,
Oslim gitam gaunk huxar asat toslea bailank apoiat.
18 Tannim begin ieunchem ani amchea pasot roddchem mhunn tankam sangat,
Jea vorvim amchea dolleantlean dukancheo zhori vhanvtoleo,
Ani amchea dolleanchea pateantlean* udok vhanvtolem.
19 Siona thaun roddnneacho avaz aikonk ieta:
“Amcho nas zala!
Amchi kitli loz zalea!
Karonn amkam amcho des soddcho poddlo ani tannim amchim ghoram moddun kabar kelim.”
20 Bailamno, Jehovacho sondex aikat.
Ani tannem jem mhunnttlam taka kan diat.
Tumi tumchea dhuvank hem roddnneanchem git xikoiat,
Ani eka-mekak hem dukhachem git* xikoiat.
21 Karonn moronn amchea zonelantlean bhitor sorlam,
Tem amchea vhoddlea gopuramnim bhitor ghuslam,
Rosteam voilea lhan bhurgeank,
Ani nakeam voilea tornattea cheddeank gheun vochonk tem bhitor ghuslam.’
22 Tum tankam sang, ‘Jehova oxem mhunntta:
“Zoxem xetant sarem poddlolem asta,
Zoso lunvnni korpi, xetantlim daneanchim konnsam katrun aplea fattlean uddoita, punn tim ektthaim korunk konn na dekhun tim thoinch poddon urtat,
Toxim lokanchim moddim zomnir poddlolim astolim.”’”
23 Jehova oxem mhunntta:
“Zannvaiechea munxan aple zannvaiechi boddai marchi nhoi,
Xoktivont munxan aple xoktechi boddai marchi nhoi,
Ani girest munxan aple girestkaiechi boddai marchi nhoi.”
24 “Punn zo konn boddai marta,
Tannem mhojea vixim taka ji somjikai ani ginean asa tachi boddai marchi.
Hanv Jehova, hanv visvaxi mog korpi Dev ani prithumer neai ani nit stapon korpi Dev mhunn tannem mhojea vixim boddai marchi,
Karonn heach vostumnim mhaka khuxalkai melltta,” oxem Jehova mhunntta.
25 Jehova mhunntta, “Polloi! Osle dis ietat jednam hanv oslea soglea lokam koddlean hixob ghetolom, je sunot korun pasun sunot korunk nasloleam bhaxen asat. 26 Hanv Ejiptt, Juda, Edom, Moab ani Amonitkar ani zanchea tokleche saiddiche kens taslole asat tea ranvott vattarantlea soglea lokam koddlean hixob ghetolom. Karonn soglim raxttram sunot korunk naslolim asat, ani Izraelachea soglea ghoranneachim kallzam sunot korunk naslolim asat.”