Vilap
5 Jehova Deva, amkam jem sosunk poddlam tacher dhean di.
Amcho kitlo opman zala to polloi.
2 Amchem daiz porkeank dilam, amchim ghoram pordexiank dileant.
3 Ami onath zaleant, amkam bapui na ani amcheo avoi-o vidvam sarkeo zaleat.
4 Amkam amchench udok viktem gheunchem poddtta, ani amcheach zollva pasot mol farik korchem poddtta.
5 Amche dusman amchea fattik lagleat ani te amkam dhorchech asat.
Ami thokleat, punn amkam matso pasun visov dinant.
6 Amkam jevunk goroz titlem jevonn mellchem mhunn ami Ejiptta mukhar ani Asirie mukhar hat posraitat.
7 Amchea purvozamnim patok kelem ani te moron gele, punn amkam tanchea guneanvancho porinnam bhogunk poddtta.
8 Atam amcher sevok raz choloitat, amkam tanchea hatantlean soddounk konnuch na.
9 Ranvott vattarantlea tolvarik lagon, ami amcho jiv dhokeant ghalun unddo haddttat.
10 Bhukechea vollvolleak lagon amchi kat bhottʼtte sarki tapta.
11 Tannim Sionantlea kazar zalʼlea bailank ani Judachea xarantlea ankvareank lojek ghatleant.*
12 Tannim kunvrank tanchea eka hatan umkallaileat, ani vhoddilank matui man diunk na.
13 Tornatte dantem ubartat, ani chedde zollvachem vojem ubartana loktat.
14 Atam vhoddil xarachea darvontteacher bosonant, tornatte songit vazoinant.
15 Atam amchea kallzant khuxalkai uronk na, amchem nachop roddnneant bodolʼlam.
16 Amchea mathea voilo mukutt sokol poddla. Amcher hai, karonn ami patok kelam.
17 Taka lagon, amchem kalliz duent asa,
Ani hea vostunk lagon amchi nodor oskot zalea.
18 Sion Dongor padd zaun gela, atam thoim kole bhonvtat.
19 Punn Jehova Deva, tum zalear sasnak tujea xinvasonacher boson asa.
Tujem xinvason pillgean-pillgi poriant togta.
20 Tum amkam sasna pasot kiteak visorla, itlo kall poriant tunvem amkam kiteak soddun dileant?
21 Jehova Deva, amkam tujea lagim porot hadd ani ami khuxen tujea lagim ietolim.
Amche poilinche dis amkam porot di.
22 Punn tunvem tor amkam purnn toren nakarleant.
Tum azunui amcher khub ragar asa.