Jeremias

36 Josiacho put, Judacho raza Jehoiakimachea razvottkechea chovthea vorsa, Jehovacho ho sondex Jeremiasak mellʼllo: 2 “Ek kovllo* ghe, ani tantunt tim soglim utram boroi, jim hanvem Izrael, Juda ani soglea raxttram add sangleant. Josiachea disam thaun, mhunnche, jea disa hanvem tujea lagim ulounk suru kelʼlem, tednam thaun aiz meren hanvem tuka sanglam tem soglem tantunt boroi. 3 Hanvem tancher haddunk chintlam tea soglea odruxtta vixim aikon, Judachea ghoranneantle lok ghoddie apleo vaitt vatto soddun porot ieit, jea vorvim hanv tancho guneanv ani tanchem patok bhogxit.”

4 Tednam Jeremiasan, Neriacho put Barukak apoun haddlo. Tannem taka Jehovan sanglolim soglim utram sanglim ani Barukan tim kovlleant* boroun kaddlim. 5 Uprant Jeremiasan Barukak hi adnea dili: “Jehovachea ghorant bhitor soronk mhaka porvangi na. 6 Taka lagon tum mondirant voch, ani hanvem tuka sangla to Jehovacho sondex, zachem dor ek utor tunvem kovlleant boroun kaddlam, to thoim vhoddlean vach. Tum Jehovachea ghorant, upasachea disa lokank to vachun dakhoi. Tum Judachea soglea lokank to vachun dakhoi, je ap-aplea xaram thaun thoim ietole. 7 Te ghoddie Jehova koddem doiechi bhik magot ani to tanchem aikot, ani te apleo vaitt vatto soddun porot ieit. Karonn Jehovan hea lokancher zo rag ani krodh haddttolo mhunn sanglam, to khub bhirankull asa.”

8 Tednam Neriacho put Barukan, Jeremias provadean taka korunk sanglolem tem soglem kelem. Barukan Jehovachea ghorant aslolea lokank, kovlleantlim* Jehovachim soglim utram vhoddlean vachun dakhoilim.

9 Josiacho put, Judacho raza Jehoiakimachea razvottkechea panchvea vorsachea nnovʼvea mhoineant, Jeruzalemanchea soglea lokamnim ani Judachea xaram thaun Jeruzalemant ailolea soglea lokamnim, Jehova mukhar upas dovortole mhunn kollounni keli. 10 Tednam Barukan, Jehovachea ghorant kovlleantlim* Jeremiasachim soglim utram vhoddlean vachun dakhoilim. Tannem tim soglim, kopi boroun kaddpi* Shafanacho put Gemariachea rumant* vachun dakhoilim. Ho rum, Jehovachea ghorant bhitor sortat tea, novea darvonttea koddem aslolea voilea angnnant aslo.

11 Gemariacho put ani Shafanacho natu Mikaian, kovlleant* aslolim Jehovachim soglim utram aikolim tednam 12 to rajmahalant xastreachea rumant gelo, zoim sogle kunvor,* mhunnche, xastri Elishama, Shemaiacho put Delaia, Akboracho put Elnathan, Shafanacho put Gemaria, Hananiacho put Zedekia ani urlole sogle kunvor boson asle. 13 Baruk lokam mukhar kovlleantlean* vachun dakhoitalo tednam, apnnem aikolʼlem tem soglem Mikaian tankam sanglem.

14 Tednam Nethaniacho put, Shelemiacho natu ani Kushicho ponttur Jehudi lagim, soglea kunvramnim Barukak ho sondex dhaddlo: “Tunvem lokam mukhar vachlolo to kovllo gheun hanga ieo.” Tor Neriacho put Baruk aplea hatant kovllo gheun kunvram lagim gelo. 15 Tannim Barukak mhunnttlem: “Upkar korun bos, ani kovlleant asa tem amkam vhoddlean vachun dakhoi.” Tor Barukan tankam tem vachun dakhoilem.

16 Him soglim utram aikotanch, te bhirantin eka-mekak pollounk lagle ani tannim Barukak mhunnttlem: “Ami hem soglem razak sangonkuch zai.” 17 Tannim Barukak vicharlem: “Tunvem hem soglem koxem boroilem tem upkar korun amkam sang. Tuka hem soglem Jeremiasan borounk lailʼlem?” 18 Barukan mhunnttlem: “Hoi, Jeremias mhaka sangot gelo, ani to sangta tem dor ek utor hanv inkan kovlleacher* boroit gelom.” 19 Tednam kunvramnim Barukak sanglem: “Tum ani Jeremias vochon khoim tori lipat, ani tumi khoim lipleat tem konnankuch kollonk dinakat.”

20 Uprant, kunvor raza lagim angnnant gele ani tannim to kovllo xastri Elishamachea rumant dovorlo, ani apnnem aikolʼlem tem soglem tannim razak sanglem.

21 Tednam razan Jehudik to kovllo haddunk dhaddlo, ani tannem to xastri Elishamachea rumantlean haddlo. Raza ani tachea lagim ube aslolea soglea kunvram mukhar, Jehudi to vachunk laglo. 22 To nnovʼvo mhoino* aslo, ani raza thonddeche dis sartalo tea aplea ghorant boson aslo. Tachea mukhar xigddi pettloli asli. 23 Jehudin kovlleache tin-char bhag vachun zalea uprant, raza to bhag xastreachi suri gheun katortalo ani xigddent pettlolea ujeant uddoitalo. Akʼkho kovllo lason tacho gobor zai meren, to hem korit ravlo. 24 Raza ani tachea soglea sevokamnim kovlleant aslolem soglem aikolem, punn te bhieunk nant vo tannim aple kopdde-i pinzunk nant. 25 Elnathanan, Delaian ani Gemarian, to kovllo lasoinaka mhunn raza lagim vinoti keli, tori astana tannem tanchem aikonk na. 26 Itlench nhoi, xastri Barukak ani Jeremias provadeak dhorcho mhunn, razacho put Jerahmelak, Azrielacho put Seraiak ani Abdelacho put Shelemiak, razan hukum dilo. Punn Jehovan tankam dogainkui lipoun dovorle.

27 Jeremiasan sangloleo vostu Barukan jea kovlleacher boroilʼleo, to kovllo razan lasoilea uprant, Jehovacho ho sondex porot ek pavtt Jeremiasak mellʼllo: 28 “Tum anik ek kovllo ghe, ani Judacho Raza Jehoiakiman lasoilʼlo tea poilea kovlleacher aslolim tim soglim utram tacher boroun kadd. 29 Ani tum, Judacho Raza Jehoiakima add oxem sang, ‘Jehova oxem mhunntta: “Tunvem ho kovllo lasoilo ani mhunnttlem, ‘Tunvem hacher oxem kiteak boroilam: “Babilonacho raza ietoloch ani hea desacho nas korun uddoitolo, ani hea desant ekui munis vo zonvar urchem na”?’ 30 Taka lagon, Judacho Raza Jehoiakima add Jehova oxem mhunntta, ‘Davidachea xinvasonar bosonk tacho konnuch aschona. Ani tachem moddem, disache gorment ani ratche thonddaient, bhair poddlolem astolem. 31 Hanv tache koddlean, tachea sonsti* koddlean ani tachea sevokam koddlean hixob ghetolom. Hanv tancher, Jeruzalemant ravtoleancher ani Judachea lokancher tim soglim odruxttam haddttolom, jim hanvem sanglolim, punn tannim aikonk na.’”’”

32 Uprant Jeremiasan anik ek kovllo ghetlo ani to Neriacho put, xastri Barukak dilo. Jeremiasan mhunnttlem tem dor ek utor Barukan kovlleacher* boroilem. Judacho Raza Jehoiakiman lasoilʼlea kovlleantlim soglim utram tannem tantunt boroilim. Tea bhair, osleo anikui zaiteo vostu tannem kovlleant boroileo.