Jeremias
30 Jehovacho ho sondex Jeremiasak mellʼllo: 2 “Izraelacho Dev Jehova oxem mhunntta, ‘Hanv tuka sangtam tem soglem eka pustokant boroun dovor. 3 Karonn Jehova mhunntta, “Polloi! Osle dis ietat jednam hanv koident aslolea mhojea lokank, Izraelak ani Judak ektthaim kortolom.” Jehova mhunntta, “Hanvem tanchea purvozank dilʼlea desant hanv tankam porot haddttolom, ani tim porot thoim ravtolim.”’”
4 Jehovan Izraelak ani Judak ho sondex dilo.
5 Jehova oxem mhunntta:
“Bhirantin bob martat tancho avaz ami aikola.
Sogleancher akant aila, khoinch xanti na.
6 Upkar korun vicharat, ek dadlo zolm diunk xokta kai?
Toxem zalear, dor ek bollvont dadlo bhurgeak zolm diunchi aslolea baile bhaxen,
Aplea pottar hat kiteak dhorun asa?
Dor ekleachem tondd dhovem-xem* kiteak zalam?
7 Hem kitlem dukhachem! Ho dis kitlo mhunn bhirankull.*
Aiz poriant oslo dis ieunk na,
Jakoba pasot ho sonkoxttacho vell.
Punn to tantuntlean salvar zatolo.”
8 Fouzancho Dev Jehova mhunntta, “Tea disa, hanv tanchea mane voilem zum moddun uddoitolom, ani tache pottʼtte pinzun tanche don kuddke kortolom. Ani hachea uprant, porke* lok tankam aple gulam anik korchenant. 9 Te tancho Dev Jehovachi ani tancho raza Davidachi seva kortole, zaka hanv tancher raz cholounk nemtolom.”
10 Jehova mhunntta, “Mhozo sevok Jakoba, tum bhienaka,
Izraela, tum ghabornaka.
Karonn hanv poisulʼlea desa thaun tuka salvar kortolom,
Ani tujea sonstik koident aslolea desa thaun soddoitolom.
Jakob porot ietolo ani to xant astolo, toxench taka kosloch dhoko aschona,
Ani tankam konnuch bhieonchona.”
11 Jehova mhunntta, “Karonn tuka salvar korunk hanv tujea sangata asam.
Hanvem tuka jea raxttramnim ximpddailʼlo, tea soglea raxttrank hanv pusun kaddttolom,
Punn hanv tuka pusun kaddchom na.
Hanv tuka favo titli xist ditolom,*
Ani hanv tuka khast dilea bogor soddchom na.”
12 Karonn Jehova oxem mhunntta:
“Tuka* zo mar lagla, taka ilaz na.
Tuzo ghavo pekonk xokona.
13 Tujea vatten kes zhogddonk konnuch na,
Tujea foddak pekovnni na.
Tujea pasot kosloch ilaz na.
14 Tujer mortat te tuje sogle mog korpi tuka visorleat.
Tuka sodhunk te anik ienant.
Dusman marta toso hanvem tuka marlam,
Eka krur munxa bhaxen hanvem tuka marlam,
Karonn tuzo guneanv vhodd asa ani tujim patkam zaitim asat.
15 Tuka zo mar lagla, taka lagon tum kiteak roddtta?
Tujea dukhik vokhod na!
Tuzo guneanv vhodd asa ani tujim patkam zaitim asat
Taka lagon, hanvem tuka oxem kelam.
16 Tuzo nas kortolea sogleancho nas zatolo,
Ani tuje sogle dusman pasun koident voitole.
Je tuka luttʼttat, tankam dusre luttʼttole,
Ani je tuji girestkai kaddun ghetat, dusre tanchi girestkai kaddun ghetole.”
17 Jehova mhunntta, “Tum nakarlolem mhunn somzon, tannim mhunnttlem:
‘Tem Sion, taka vichartolo konn na.’
Punn hanv tuka novean bholaiki ditolom ani tuje ghave pekoitolom.”
18 Jehova oxem mhunntta:
“Hanv Jakobachea tombuntlea koidi aslolea lokank ektthaim korunk voitam.
Hanv tanche churchure korun tanche ravpache zage porot bandun kaddttolom.
Hem xar adim aslem tea dongrar porot bandun kaddlolem astolem,
Vhoddlo gopur jea zagear asonk zai, thoim ubo astolo.
19 Thoim thaun upkar attoitat to ani khuxalkai monoitat to avaz aikonk ietolo.
Hanv tancho ankddo vaddoitolom, te unne zaunchenant.
Hanv tankam mezunk zainant title kortolom,*
Ani konnuch tankam valor naslolea bhaxen lekhchenant.
20 Adim asle toxe tache put khuxal astole,
Mhojea mukhar tachi porza thiraien stapon zatoli.
Tacher zulum korpeank hanv khast laitolom.
21 Tacho fuddari tacheach thaun ietolo,
Ani tacher raz korpi tachea lokam modloch upzotolo.
Hanv taka mhojea lagim ieunk ditolom, ani to mhojea lagim ietolo.”
“Na zalear, mhojea lagim ieunk konnank dhir* asa?” oxem Jehova mhunntta.
22 “Tumi mhoje lok zatole, ani hanv tumcho Dev zatolom.”
23 Polloi! Jehovacho krodh bhirankull vadolla bhaxen suttʼttolo,
Tacho krodh noxtteanchea mathear zhaddun uddoitolea vadolla bhaxen ghunvtolo.
24 Jea meren, aplea kallzant jem tharailam tem Jehova purnn korina ani taka tantunt ies mellona,
Tea meren tacho zolltto rag xant zaunchona.
Xevottachea disamnim tumkam hem somzotolem.