Jeremias
1 Him Jeremiasachim* utram zaun asat, zo Benjamin vattarantlea Anathoth xarant ravpi iadnik Hilkiacho put aslo. 2 Amonacho put ani Judacho raza, Josiachea razvottkechea 13-vea vorsa, Jehovacho* sondex Jeremiasak mellʼllo. 3 Ho sondex taka Josiacho put, Judacho raza Jehoiakim hachea disamnim pasun mellʼllo, ani Josiacho put, Judacho raza Zedekiachea* razvottkechem 11-vem voros sompo meren mellot ravlo. Mhunnche, panchvea mhoineant Jeruzalemache lok koident vocho poriant to sondex taka mellot ravlo.
4 Jehovacho ho sondex mhaka mellʼllo:
5 “Hanvem tuka avoichea kusveant rochʼchea poilinch, hanv tuka vollkhotalom,*
Hanvem tuka raxttram pasot ek provadi mhunn nemlo.”
6 Punn hanvem mhunnttlem: “Akʼkhea Vixvachea Dhonia Jehova Deva!
Mhaka tor ulounk pasun kollona, hanv ek lhan bhurgo.”*
7 Tednam Jehovan mhaka mhunnttlem:
“‘Hanv ek lhan bhurgo,’ oxem mhunno naka,
Karonn hanv tuka dhaddttam, tea sogleam lokam lagim tunvem vochonk zai,
Ani hanv tuka jem sangonk adnea ditam, tem soglem tunvem tankam sangonk zai.
8 Tankam polloun tum bhienaka,
Karonn Jehova mhunntta: ‘Hanv tuka salvar korunk tujea sangata asam.’”
9 Uprant Jehovan aplo hat fuddem kaddun mhojea tonddak lailo. Jehovan mhaka mhunnttlem: “Hanvem mhojim utram tujea tonddant ghatleant. 10 Polloi, umttun kaddunk ani sokol uddounk, nas korunk ani moddun uddounk, bandunk ani rovunk hanvem tuka hea disa raxttrancher ani rajeancher odhikar diun nemla.”
11 Jehovacho sondex mhaka porot ek pavtt mellʼllo. Tannem mhaka mhunnttlem: “Jeremias, tuka kitem dixtti poddtta?” Hanvem mhunnttlem: “Mhaka eka badamachea zhaddacho* khando dixtti poddtta.”
12 Jehovan mhaka mhunnttlem: “Tunvem sarkem polloilam, karonn mhojea utra pormonnem kam korunk hanv samko zago asam.”
13 Jehovacho sondex mhaka porot ek pavtt mellʼllo. Tannem mhaka mhunnttlem: “Tuka kitem dixtti poddtta?” Hanvem mhunnttlem: “Mhaka khotkhotʼta tem aidon* dixtti poddtta, ani tachem tondd utʼtore thaun dokxinne vatten bagovlolem asa.” 14 Uprant Jehovan mhaka mhunnttlem:
“Utʼtore thaun odruxtt ietolem,
Desantlea soglea lokancher tem ietolem.
15 Karonn Jehova mhunntta, ‘Hanv utʼtorechea rajeanchea soglea familink apoitam,
Teo ietoleo, ani Jeruzalemachea darvontteam mukhar
Tancho dor eklo raza aplem xinvason bosoitolo.
Te Juda bhonvtonnim aslolea soglea durgancher
Ani Judachea soglea xarancher akromonn kortole.
16 Tanchea soglea noxtteponnak lagon hanv tancher khastichem formonn martolom,
Karonn tannim mhaka soddla,
Ani te dusrea devam mukhar bolidanam* bhettoitat,
Apleach hatanchea kamam mukhar te man bagoitat.’
17 Punn tunvem panvl gheunk toiar ravonk zai,*
Ani tunvem ubo ravonk zai ani hanv tuka sangtam tem soglem tankam sangonk zai.
Tum tankam bhienaka,
Na zalear hanv tujer tanchi anikui bhirant ghaltolom.
18 Aiz hanvem tuka bhonvtonnim ghott durgam aslolea xara bhaxen kela,
Hanvem tuka lokhnnachea khambea sarko ani tambeachea vonttim sarko kela,
Jea vorvim, tum akʼkhea desacho, Judachea razancho ani kunvrancho,
Tachea iadnikancho ani desantlea lokancho fuddo korunk pavtolo.
19 Te tujea add zhuz kortolech,
Punn tankam zoit mellchem na,*
Karonn Jehova mhunntta, ‘Tuka salvar korunk hanv tujea sangata asam.’”