Jeremias
3 Lok vichartat: “Eka dadlean aple bailek soddun dili zalear ani ti dusrea munxa lagim kazar zali zalear, to tika porot apnnaitolo kai?”
Ho akʼkho des purnn toren boxttonk na kai?
Jehova mhunntta: “Tunvem zaitea sangateam borabor xindollki kelea,
Ani tum atam porot mhoje lagim ieunk sodhta?”
2 “Tuje dolle ubarun, voir porvotank* polloi.
Oslo khoincho-i zago asa, zoim tujer bolotkar zaunk na?
Ranvott vattarant Arbi munis bosta toso,
Tanchi vatt polloit tum rostea kuxik boson ravli.
Xindollki ani noxttim kamam korun,
Tum des boxttait asa.
3 Taka lagon pausak addaun dovorla,
Ani uprant ieta to paus* poddona.
Xindollki korun pasun jika koslich loz bhogona toslea baile sarki tum asa,
Tuka matui loz na.
4 Punn atam tum mhaka ulo marun mhunntta,
‘Tum mhozo Bap, tum mhojea tornattponnacho sangati!
5 Tor tunvem sodanch mhozo rag dhorun ravop sarkem asa kai?
Vo mhojea add monant koddsann dovorchi kai?’
Tum oxem mhunntta tem khorem,
Punn tum korunk xokta tim soglim vaitt kamam tum korit ravta.”
6 Raza Josiachea disamnim Jehovan mhaka mhunnttlem: “‘Ovisvaxi Izraelan kitem kelam tem tunvem polloilam? Tem dor eka unch dongrar ani dor eka hirvea rukha ponda voita ani xindollki korta. 7 Tannem heo sogleo vostu keleo, tori astana mhojea lagim porot ieo mhunn hanv taka sangot ravlom. Punn tem mhojea lagim porot ieunk na. Ani Juda, aplea visvasghatki bhoinnik polloit ravlem. 8 Hanvem hem polloilem tednam hanvem ovisvaxi Izraelak divors potr diun dhaddlem, karonn tannem pordvar kelo. Punn tachi visvasghatki bhoinn hem polloun bhieunk na, tinnem pasun vochon pordvar kelo. 9 Tinnem aplim xindollkechim kamam kainch nhoi koxim chintlim ani akʼkho des boxttait geli. Ani ti fatram ani zhaddam sangata pordvar korit geli. 10 Itlem soglem ghoddon pasun, tachi visvasghatki bhoinn Juda purnn kallzan mhojea lagim porot ieunk na, tinnem fokot mhojea lagim ieupachem dhong kelem,’ oxem Jehova mhunntta.”
11 Uprant Jehovan mhaka mhunnttlem: “Visvasghatki Juda poros, ovisvaxi Izraelan apunn chodd nitivont mhunn dakhoun dilam. 12 Tum utʼtorek vochon ho sondex kolloi:
“‘Jehova mhunntta, “Ghatki Izraela, mhojea lagim porot ieo.”’ ‘Jehova mhunntta: “Hanv tuka ragan pollounchom na, karonn hanv visvaxi.”’ ‘“Hanv sodankal tuzo rag dhorun ravchom na. 13 Tum* fokot tuzo guneanv manun ghe, karonn tum Jehova tujea Deva add gelam. Tum dor eka hirvea rukha ponda porkeam* sangata sombond dovrit ravlem, punn tunvem mhojem aikonk na,” oxem Jehova mhunntta.’”
14 Jehova mhunntta, “Ghatki putamno, mhoje lagim porot ieiat. Karonn hanv tumcho khoro dhoni* zalam. Hanv dor eka xarantlean ekleak ani dor eke familintlean dogank ektthaim kortolom, ani tumkam porot Sionant haddttolom. 15 Hanv tumkam mhoje khuxe pormonnem* kam kortat tosle gonvlli ditolom, ani te tumkam ginean ani kholaiechi somjikai chorov koso khaunk ditole. 16 Tea disamnim, tumi vaddttole-choddttole ani zaite zatole,” oxem Jehova mhunntta. “Te porot oxem kednanch mhunnchenant, ‘Jehovachea korarachi pett!’ Ti tanchea kallzant porot kednanch ieunchina, toxench tankam ticho ugddas ieunchona vo tankam tichem unnemponn bhogchem na ani tim porot kednanch ti pett bandchinant. 17 Tea vellar, te Jeruzalemak Jehovachem xinvason mhunnttole. Ani soglea raxttrank Jehovachea nanvachi mhoima korunk Jeruzalemant ektthaim haddttole. Te porot kednanch hottʼtti zaun aplea noxttea kallzachem aikochenant.”
18 “Tea disamnim, Judachem ghorannem ani Izraelachem ghorannem sangata choltolem, ani tim ektthaim mellon utʼtorechea desa thaun tea desant ietolim, zo hanvem tumchea purvozank daiz mhunn dilʼlo. 19 Hanvem oxem chintlolem, ‘Hanv tuka* mhojea putam modem ek zago ditolom ani tuka raxttram modlo* sogleant sobit des daiz mhunn ditolom!’ Hanvem oxem-i chintlolem ki tumi mhaka, ‘Mhozo Bap!’ mhunn ulo martole, ani mhojea fatta-fatt cholchem tumi soddun diunchenant. 20 Jehova mhunntta, ‘Punn Izraelachea ghorannea, ek bail aplea ghovacho* visvasghat korun taka soddun dita tea toren, tunvem mhojea sangata visvasghat kela.’”
21 Porvotancher* avaz aikonk ieta,
Izraelache lok roddttat ani vinoti kortat to avaz aikonk ieta,
Karonn te vankdde vatten geleat,
Tancho Dev Jehovak te visorleat.
22 “Ghatki putamno, mhojea lagim porot ieiat.
Hanv tumkam boro kortolom ani tumi porot kednanch add voichenant.”
“Polloi, ami hanga asat! Ami tujea lagim aileat,
Karonn Jehova, tum amcho Dev.
23 Porvotancher ani dongrancher bovall korun ami amkanch fosoile.
Amcho Dev Jehova khoreponnim Izraelacho taronn diupi zaun asa.
24 Punn amchea tornattponnar thaun tea lojechea vostun* amchea purvozamnim kelʼlo soglo vavr khaun uddoila,
Tanchea menddram-bokddeank ani gai-boilank,
Putank ani dhuvank khaun uddoilim.
25 Ami lojen zomnir poddom-ia,
Ani amchea opmanan amkam dhampum-di,
Karonn ami amcho Dev Jehova add patok kelam,
Tornattponnar thaun tem hea disa poriant, ami ani amchea bapaimnim patok kelam,
Ani ami amcho Dev Jehovachem aikonk na.”