Devachea Rajea Khala Sogle Kodden Xanti Astoli

Ami vatt polloita tem Devachem Raj beginuch ietolem. Dev akʼkhea prithumer aplem Raj choloitolo tednam sogle kodden xanti ani ekvott astolo mhunn Bible sangta. (Stotr 72:7) Punn, hem Raj kednam ietolem? Devachem Raj akʼkhea prithumer koxem suru zatolem? Hea Rajeachi porza zaunk ami kitem korunk zai?

DEVACHEM RAJ KEDNAM IETOLEM?

Devachem Raj ieunchea poilim kosleo ghoddnneo ghoddttoleo, tem Bible-ant boroilam. Zoxem, des-desam modem zhuzam zatolim, veg-vegllea zagear bhuk poddttoli, duensam vaddttolim, zaite bhuim-kamp zatole ani khotteponn vaddttolem. Heo sogleo ghoddnneo ekach kallar zatoleo. Tor, Devachem Raj beginuch ietolem mhunn hi ek “khunna” zaun asa.—Matev 24:3, 7, 12; Lukas 21:11; Prokasovnni 6:2-8.

Bible-ant anik ek bhasaunni kelʼli asa: “Nimannea disamnim trasan bhorlolo oslo vell ietolo zacho fuddo korop khub kotthin zatolem mhunn zannam zav. Karonn, lok aploch mog kortat tosle, poixeancho mog kortat tosle, . . . avoi-bapaichem aikonant tosle, onupkari, ovisvaxi, dusrea pasot bhavna naslole, koslea-i vixoi-acher kobul zainant tosle, nanv piddʼddear korpi, svotacher tabo naslole, ragixtt, boreponnacho mog korinant tosle, . . . ghatki, dusreanchem aikonant tosle, gorvan fulʼlole, Devacho mog korchea bodlek mouza korunk avoddtta tosle” astole. (2 Timotak 3:1-4) Poilim, thoddea lokank osle gunn asle. Punn atam choddan-chodd lokank osle gunn asat.

Heo bhasaunneo 1914 thaun purnn zaunk lagleo. Zaitea itihaskaramnim, rajki fuddareamnim ani boroupeamnim pasun mhunnttlem ki 1914 thaun sonvsar ekdom bodolʼla. Udharonnak, Denmark-antlea Peter Munch nanvachea itihaskaran boroilem: “1914-chea zhuzam thaun sonvsaracho itihas bodolʼlo. Tea vorsa poili, lokank distalem ki sonvsarachi poristhiti sudharot asa. Punn tea vorsa thaun nisontton, bhirant, ani dves asa toslea kallant ami bhitor sorleant, zoim surokxa na.”

Sokallcho uzvadd zaunchea poilim ekdom kallokh asta toso, heo vaitt ghoddnneo boro vell ietolo mhunn dakhoun ditat. Hea ghoddnneantlean, sonvsarant beginuch Devachem Raj ietolem mhunn kollon ieta. Ani hi khorench ek bori khobor zaun asa. Jezun sanglolem: “Soglea raxttrank govai mellche khatir Rajeachi bori khobor akʼkhea sonvsarant porgott zatoli, ani tea uprant xevott ietolo.”—Matev 24:14.

Hich bori khobor Jehovache Sakxi lokank sangtat. Tanchea eka masikachem nanv asa Pahrogopur Jehovachea Rajea Vixim Porgottʼtta. Hem masik, Devachem Raj prithume pasot ani lokam pasot kitem kortolem tem sangta.

DEVACHEM RAJ AKʼKHEA PRITHUMER KOXEM SURU ZATOLEM?

Hea char mukhel mudʼdeancher dhean diat:

1. Devachem Raj, sonvsarantlea rajki fuddareanchea hatant aschem na.

2. Sonvsarantle rajki fuddari hea Rajeacho virodh kortole. Karonn, tankam aplo raj choloupacho odhikar soddunk naka.—Stotr 2:2-9.

3. Akʼkhea sonvsarant ek zhuz zatolem. Ani tea zhuzant, Devachem Raj sonvsarantlea sorkarancho nas kortolem. (Daniel 2:44,45; Prokasovnni 19:17-21) Hea zhuzak, Bible-ant Armageddon mhunnttlam.—Prokasovnni 16:14, 16.

4. Je lok Devachea Rajeachi porza zaunk sodhtat, tankam Dev Armageddon-a thaun salvar kortolo. Uprant te eka novea sonvsarant xantin jietole. Hea lakʼkhamnim lokancho ek “vhoddlo zomo” astolo mhunn Bible sangta.—Prokasovnni 7:9, 10, 13, 14.

HEA RAJEACHI PORZA ZAUNK AMI KITEM KORUNK ZAI?

Devachea Rajeachi porza zaunk poilem panvl mhunnttlear, tea Rajea vixim xikop. Tea vixim Jezun magnneant aplea Bapak oxem mhunnttlem: “Sasnachem jivit mellonk tannim tuka, ekleach khorea Devak, ani zaka tunvem dhaddla, tea Jezu Kristak vollkhon ghevop gorjechem asa.”—Juanv 17:3.

Lok jednam Jehova Deva vixim xiktat ani tache gunn zannam zatat, tednam tankam khub faido zata. Poilem mhunnttlear, tacher tancho bhavarth ghott zata. Tancho ho bhavarth puraveancher adarit asa dekhun, Devachem Raj khorench ek sorkar ani tem beginuch ietolem mhunn tanchi khatri ghott zata. (Hebrevank 11:1) Dusrem mhunnttlear, te Devacho ani lokancho mog korunk lagtat. Devacho mog aslolean, te khuxemonan tachi adnea pallttat. Ani lokancho mog aslolean te tanchea sangata bore toren vagtat ani Jezun xikoilʼlem hem totv pallunk vavr kortat: “Zoxem tumkam dusreamnim tumchea thaim kelʼlem zai, toxench tumi-i tanchea thaim korat.”—Lukas 6:31.

Eka mogall Bapai bhaxen, amcho Rochnnar Dev amcho mog korta ani taka amchem borem zalʼlem zai. To amkam borem jivit diunk sodhta zaka Bible-ant ‘khorem jivit’ mhunnttlam. (1 Timotak 6:19) Aiz ami jietat tem ‘khorem jivit’ nhoi. Karonn aiz amkam jivitant khub dukh-tras sosche poddtta. Tor, Devachea Rajeant ‘khorem jivit’ koxem astolem, tem zannam zaunk Devachem Raj munxam pasot kitem boreponn haddttolem tem polloiat.