Elizabet-ak Bhurgo Zolmota

Jeruzalemacheo vontteo bandun atam 400 poros chodd vorsam zalʼlim. Hea xara lagim, Zekaria nanvacho ek iadnik aslo. Tache bailechem nanv Elizabet aslem. Tankam kazar zaun zaitim vorsam zalʼlim, punn tankam ekui bhurgem naslem. Ek dis mondirant, Zekarias dhump zolloitana, devdut Gabriel tachea mukhar ieta. Tea devdutak polloun, Zekarias samko bhieta. Punn Gabriel mhunntta: ‘Bhienaka Zekarias. Jehova thaun hanv tuka ek bori khobor gheun ailam. Tuji bail, Elizabet eka putak zolm ditoli ani tumi taka Juanv mhunn nanv diunk zai. Karonn Jehovan taka eka khas kamak vinchun kaddla.’ Tednam Zekarias mhunntta: ‘Tum sangta tacher hanv koso visvas dovrum? Atam mhoji bail ani hanv zanttim zaleant. Amkam bhurgo koso zolmotolo.’ Tednam Gabriel taka sangta: ‘Hi khobor sangonk Devan mhaka tujexim dhaddla. Punn torui hanv sangtam tacher tunvem visvas dovrunk na dekhun, to bhurgo zolmo porian tum mono zaun urtolo.’

Zekariak Devmondira thaun bhair ieunk sodam poros chodd vell laglo. Ani to kednam bhair ietolo kai mhunn lok taka ravtale. Ani to bhair ailo tednam, bhitor kitem ghoddlem tea vixim lok zannam zaunk sodhtale. Punn Zekarias ulounk xokonaslo, to fokot hatamnim khunnam korunk xoktalo. Hem polloun taka Deva koddlean koslo tori sondex mellʼlla mhunn lokank kollon ailem.

Thoddea tempa uprant, devdutan sanglolem toxem, Elizabet gorbest zaun eka putak zolm dita. Hi khobor aikon tichim ixttam ani ghorchim khub khuxal zatat ani tea bhurgeak pollounk ietat. Elizabet sangta: ‘Tachem nanv Juanv dovrunk zai.’ Tednam tim mhunnttat: ‘Punn hea nanvacho tumchea familint konnuch na. Ami taka tachea bapaichem nanv, Zekarias mhunn dovor-ia.’, Tednam Zekarias boroun dakhoita: ‘Tachem nanv Juanv.’ Ani teach vellar to porot ulounk lagta! Tea bhurgeachea zolmachi khobor akʼkhea Judeiant pavta. Ani ho bhurgo vhodd zaun konn zatolo kai mhunn lok chintunk lagtat?

Uprant Zekarias, povitr xokten bhorta ani oxi bhasaunni korta: ‘Jehovak vakhannʼnni. Tannem Abrahamak promise kelʼli ki amkam salvar korunk to Mesiasak dhaddttolo. Tor Juanv, ek provadi zatolo ani Mesiasak ek vatt toiar kortolo.’

Elizabetak, Marie nanvachi ek soiri asli. Tichea sovem pasun oxench kitem khas ghoddtta. Hea vixim ami fuddlea lisanvant polloum-ia.