Dongrar Dilʼli Xikounn

Jezu 12 apostlank vinchun kaddlea uprant, dongra thaun sokol ailo. To eka oslea zagear ailo, zoim zaite lok ektthaim zalʼle. He lok Galili, Judeia, Tir, Sidon, Siria ani Jordan nodichea dusre vattentlean ailole. Te duent lokank, toxench zankam noxtte dut sotaitale tea lokank aplea sangata gheun ailole. Jezun tankam sogleank bore kele. Uprant Jezu dongrachea eke vatten boslo ani tankam xikounk laglo. Devache ixtt zaunk ami kitem korunk zai tem tannem somzailem. Amkam Jehovachi goroz asa mhunn ami zannam zaunk zai ani tacho mog korunk xikonk zai. Punn ami lokancho mog korinant zalear, ami Devacho mog korunk pavchimnant. Ami konnakuch vaitt korchem nhoi ani dusmana koddem pasun ami bore bhaxen vagonk zai.

Jezun sanglem: ‘Ami fokot amchea ixttancho mog kelear puro nhoi, punn ami amchea dusmanancho pasun mog korunk zai, ani lokank kallzan thaun bhogsunk zai. Konnui amcher ragar asa mhunn amkam kollʼllem zalear ami rokddench vochon tachea lagim bhogsonnem magonk zai. Zoxem dusreamnim amchea sovem vaglolem amkam zai toxem ami dusream sangata vagonk zai.’

Jezun lokank poixe ani vostum vixim bore solʼle dile. Tannem sanglem: ‘Zaite poixe aslolea poros Jehova sangata ixttagot asop chodd gorjechem. Tumche poixe konnui chorunk xokta, punn Jehova sangata tumchi ixttagot konnuch chorun vhoronk xokona. Tumi kitem khatolim, kitem pietolim, vo kitem nhestolim, hea vixim uske korinakat. Suknneank polloiat. Tankam Dev khaunk sodanch kitem-na-kitem ditach. Uske korun ami amchea jivitacho ek dis pasun vaddounk xokonant. Ugddas dovrat, tumkam kiteachi goroz asa hea vixim Jehova bore bhaxen zannam.’

Lokamnim poloilem ki Jezu jea toren lokank xikoitalo, toso anik konnuch xikoinaslo. Tanchea dhormik fuddareamnim tankam heo vostu xikounk nasleo. Tor Jezu ek vorto xikxok kiteak zaun aslo? Karonn jem kitem to xikoitalo, tem soglem Jehova thaun aslem.