Amchea Magnneancho Jehova Koso Zobab Dita?

1-2. Amchea magnneam vixim amkam kitem disonk xokta?

‘JEHOVA mhojim magnnim aikota kai?,’ oxem tumkam kednam-i tori dislam? Hoi zalear, tumchea bhaxen zaitea bhav-bhoinnank, tim oddchonneancho fuddo kortalim tednam, oxench bhoglem mhunn ugddas dovrat. Ami trasant astat tednam, Jehova amchea magnneancho koso zobab dita tem zannam zaunk, amkam kotthin zaunk xokta.

² Tor hea lekhant, Jehova aplea sevokanchea magnneancho zobab dita mhunn ami kiteak khatri dovrunk zata tem ami polloitolim. (1 Ju. 5:15) Toxench, ami hea prosnanche zobab zannam zatolim: Jehova amchea magnneancho zobab dina, oxem amkam thodde pavtti kiteak disot? Jehova aiz amchea magnneancho zobab koxe toren dita?

AMKAM ZAI TOSLOCH ZOBAB JEHOVA GHODDIE DIUNCHONA

3. Ami Jehova lagim magnnem kelʼlem taka kiteak zai?

³ Bible-a thaun amkam kollon ieta ki Jehova amcho khub mog korta, ani tache nodrent ami khub moladik asat. (Hag. 2:7; 1 Ju. 4:10) Tea pasot, magnneant tache lagim modot magonk to amkam urba dita. (1 Ped. 5:6, 7) Tachea sangata ghott ixttagot zoddunk, ani trasancho thiraien fuddo korunk to amkam modot korunk sodhta.

4. Jehova aplea sevokanchim magnnim aikota, oxem ami kiteak mhunnonk zata? (Chitr pasun polloiat.)

⁴ Jehova aplea sevokanchim magnnim aikota mhunn amkam Bible-ant zaite pavtti vachunk melltta. Oslea khoinche-i ghoddnnecho tumkam ugddas ieta kai? Amkam hea vixim Raza Davidachem borem udharonn asa. Tache zaite dusman asle dekhun, tacho jiv sodanch dhokeant aslo. Ani hea pasot tannem zaite pavtti magnneant Jehova lagim modot magli. Ek pavtti, tannem oxi vinoti keli: “Mhojem magnnem aikun ghe, Sorvespora, mhoje vinovnnek kan di! Khorea utracho, neainiticho Tum, tor mhaka zap di!” (St. 143:1) Jehovan Davidachi vinoti aikoli ani dusmanam thaun tachi rakhonn keli. (1 Sam. 19:10, 18-20; 2 Sam. 5:17-25) Hea karonnak lagon, David khatren oxem mhunnonk pavlo: “Apnnak ulo martolea somestank . . . Sorvespor sodam laginch asa.” Davida bhaxen ami pasun oxich khatri dovrunk zata.—St. 145:18.

5. Adlea kallar visvaxi sevokamnim Jehova lagim magnnem kelem tednam, Jehovan sodanch tankam zai teach toren zobab dilo kai? Ek udharonn diat. (Chitr pasun polloiat.)

⁵ Jehova ghoddie amkam zai tosloch zobab diunchona. Hea vixim apostl Pauluchem amkam ek borem udharonn asa. Tannem aplea “angant . . . romblolo ek kantto” kadd mhunn Deva lagim magnnem kelem. Mhunnche, apleak asloli ek kotthin oddchonn kadd mhunn tannem Deva lagim tin pavtti vinoti keli. Tor Jehovan tachea magnneacho zobab dilo kai? Hoi, punn Pauluk zai aslo, tosloch zobab taka diunk na. Tachi oddchonn kaddun uddounchea bodlek, visvaxiponnan apli seva korit ravonk Jehovan taka goroz ti xokti dili.—2 Kor. 12:7-10.

6. Jehova amchea magnneancho zobab dina, oxem amkam thodde pavtti kiteak disonk xokta?

⁶ Toxench, dor ek pavtti amkam zai teach toren, Jehova ghoddie amkam zobab diunchona. Punn amkam koxe toren modot korunk zai tem Jehova ekdom bore bhaxen zannam mhunn ami khatri dovrunk zata. Karonn Jehova vixim Bible-ant sanglam ki taka “amchean magunk zata vo chintum ieta tachea-von mitmer nastanam vhodd vostu korunk xokti” asa. (Ef. 3:20, Povitr Pustok - Novo Korar) Tor ami chintunk zaina toslea vellar ani tea toren Jehova amchea magnneancho zobab diunk xokta.

7. Amkam amchea magnneant bodol kiteak korunk poddot? Ek udharonn diat.

⁷ Jehovachi khuxi kitem tem amkam spoxtt toren kollon ieta tednam, ami amchea magnneant bodol korunk poddot. Hea vixim amkam bhav Martin Poetzinger-acho onubhov asa. Kazar zaun rokddoch, taka Germany-nt Nazichea hukuma khala bondkhonnint ghatlo. Punn taka aplea bailechi kallji gheunk zai asli, ani porot porgottnni korunk zai asli. Hea pasot, survatek apleak bondkhonnintlean suttka diunk tannem Jehova lagim magnnem kelem. Punn don sumana uprant pasun, Jehovan taka bondkhonnintlean suttka diunk vatt toiar kelea oxem taka disonk na. Dekhun bhavan Jehova lagim oxem maglem: “Jehova doia korun hanvem kitem kelʼlem tuka zai, tem mhaka dakhoun di.” Magir, bhav tea bondkhonnint aslolea her bhavam vixim chintunk laglo. Tanchea modlea zaitea zannank aplea bail-bhurgeancho usko zalʼlo. Tednam tannem kitem kelʼlem Jehovak zai tem bhavak kollon ailem, ani tannem oxem magnnem kelem: “Jehova, mhaka hem novem kam dilʼlea pasot tuje khub upkar. Mhojea bhavank urba ani ghottai diunk mhaka modot kor.” Ani fuddlim nnov vorsam porian bhavan toxench kelem.

8. Magnnem kortana ami kitem ugddas dovrop gorjechem?

⁸ Jehova sarkea vellar aplo udʼdhex purnn kortolo mhunn ami ugddas dovrunk zata. Ami sostat te sogle dukh-tras, tem mhunnttlear, odruxttam, duensam ani moronn, to purnn toren ani sasnak kaddun uddoitolo. Ani ho udʼdhex to aplea Rajea udexim purnn kortolo. (Dan. 2:44; Prok. 21:3, 4) Punn tea mhunnosor, tannem Soitanak thoddo vell hea prithumecher raj cholounk dilam.b (Ju. 12:31; Prok. 12:9) Jehovan munxakullacheo sogleo somosia atanch kaddun uddoilear, Soitan bore bhaxen raj choloita oxem amkam disonk xokta. Tea pasot, Jehova apleo umkeoch bhasaunneo purnn korta mhunnosor amkam thoddo vell ravonk poddot. Punn hacho orth oso nhoi, ki tannem amkam modot korinastana soddun dileant. Tor Jehova amkam koxe toren modot korta tem ami polloum-ia.

JEHOVA AMCHEA MAGNNEANCHO AIZ KOSO ZOBAB DITA?

9. Nirnnoi gheunche astat tednam Jehova amkam koso modot korunk xokta? Somzaiat.

⁹ Jehova amkam zannvai dita. Bore nirnnoi gheunk goroz ti zannvai Jehova amkam ditolo mhunn tannem bhas dilea. Amchem jivit bodlunk xoktat tosle mhotvache nirnnoi gheunk, zoxem, kazar zavop vo ankvar ravop, osle nirnnoi gheunk amkam Jehovachi zannvai zai. (Jak. 1:5) Hea vixim amkam Maria nanvache eke ankvar bhoinnicho onubhov asa.c Ti khuxalkaien niemit pioneer seva kortali. Uprant ti eka bhavak mellʼlli. Ti sangta: “Amchi ixttagot vaddli toxi, eka-meka pasot amchim bhavnam pasun vaddonk laglim. Tor hanvem ek nirnnoi korunk zai mhunn mhaka kollon ailem. Hanvem zaite pavtti Jehova lagim tea vixim magnnem kelem. Ho nirnnoi gheunk mhaka Jehovachem margdorxon zai aslem tem khorem. Punn Jehova mhojea pasot nirnnoi gheuncho na mhunn mhaka khobor asli.” Jehovan tichea magnneacho zobab diun tika zannvai dili oxem tika dista. Karonn prokaxonamnim sodh kortana, umkeach lekhamnim, tika aslolea prosnanche zobab tika mellʼlle. Toxench, visvaxiponnan Jehovachi seva korpi tichea avoin tika bore solʼle dile. Te solʼle apnnailolean, aplea bhavnam vixim bariksannen chintunk bhoinnik modot zali. Ani xevottak ti ek boro nirnnoi korunk pavli.

10. 2 Korintkarank 4:7-a pormonnem, Jehova aplea sevokank modot korunk kitem kortolo? Ek udharonn diat. (Chitr pasun polloiat.)

¹⁰ Amche tras sosunk Jehova amkam xokti dita. Jehovan apostl Pauluk xokti dili te bhaxen, amche tras sosunk to amkam pasun goroz ti xokti ditolo. (2 Korintkarank 4:7 vachat.) Kotthin poristhitincho fuddo korunk, Benjamin nanvachea bhavak Jehovan koxi modot keli tem ami polloum-ia. Tornnattponnar thaun to aplea famili sangata Afrikent refugee mhunn ravtalo. Bhav mhunntta: “Jehovak manvota tem korunk mhaka xokti di mhunn hanv tachea lagim magot ravtalom. Ani tannem mhaka monachi xanti diun, porgottnni korit ravonk dhir diun, ani tachea sangata mhoji ixttagot ghott korunk prokaxonam diun, mhojea magnneank zobab dilo.” To fuddem mhunntta: “Bhav-bhoinnanche onubhov vachlolean ani Jehova tankam koxi modot korta tem zannam zalolean, taka visvaxi ravonk mhozo nichov ghott zalo.”

11-12. Amchea magnneancho zobab diunk Jehova amchea bhav-bhoinnank koso uzar korunk xokta? (Chitr pasun polloiat.)

¹¹ Jehova amchea bhav-bhoinnank uzar korta. Aplem jivit bolidan korchea adlea rati, Jezun Jehova lagim magnneant khub vinoti keli. To Devachem nanv piddʼddear korta mhunn lokamnim tacher arop ghalina zaunk, tannem vinoti keli. Punn hi vinoti manun gheunchea bodlek, Jehovan eka ainzak dhaddun taka ghottai dili. (Luk. 22:42, 43) Aiz pasun, ek bhav vo bhoinnichea bhette udexim vo fon call-a vorvim, Jehova amkam ghottai diunk xokta. Tea pasot, ami dor ekleamnim, “doiall utor” uloun eka-mekak ghottai diunk sondhi sodhunk zai.—Mho. 12:25.

¹² Ami Miriam nanvache eke bhoinnichem udharonn polloum-ia. Ticho ghov bhair poddon thoddinch sumanam zalʼlim. Ti ghorant ekttich asli ani khub niraxi ani dukhi asli. Ti roddot asli ani konna lagim tori ulounk sodhtali. Ti mhunntta: “Mhoji poristhiti oxi asli ki mhojean konnakuch fon korunkuch zainaslem. Dekhun hanvem Jehova lagim magnnem kelem. Hanv roddon magnnem kortanach mhozo fon vazlo. To ek vhoddil ani amcho ek boro ixtt aslo.” To bhav ani tache baile thaun Miriam-ak bhuzvonn mellʼlli. Tika khatri zali ki Jehovanuch tea bhavak fon korunk urba dili.

13. Amchea magnneancho zobab diunk, apli bhokti korinant tea lokank Jehova koso uzar korta tem somzonk ek udharonn diat.

¹³ Apli bhokti korinant tankam pasun Jehova uzar korunk xokta. (Mho. 21:1) Thodde pavtti, Jehova oslea lokank amkam modot korunk fuddem kaddtta, jim tachi seva korinant. Zoxem, Nehemiasachem aikonk Jehovan, Raza Artaxerxes-ak fuddem kaddlo. Ani tea pasot Nehemias Jeruzalemant vochon xar porot bandpachem kam korunk pavlo. (Ne. 2:3-6) Toxench, aiz pasun amkam goroz tea vellar modot korunk, Jehova oslea lokank fuddem kaddunk xokta jim tachi bhokti korinant.

14. Bhoinn Soo Hing-achea onubhovantlean tumi kitem xiklim? (Chitr pasun polloiat.)

¹⁴ Hea vixim, amkam Soo Hing nanvache eke bhoinnicho onubhov asa. Jehova eka dotorak uzar korun tichea magnneancho zobab dita mhunn tika khatri zali. Ticho put lhan aslo tednam thaun, taka mansik ritin zaiteo somosia asleo. Ani uprant, to eka vhodd opghatak sampoddlo. Tor tachi kallji gheunk, bhoinnin ani tichea ghovan, dogaimnim aplem kam soddlem. Punn magir tankam poixeanchem unnemponn zaunk laglem. Tea vellar, teo oddchonneo tichean anik sosunkuch zauncheo nant, oxem bhoinnik dislem. Tor aplea kallzantle sogle uske tinnem Jehova mukhar otoile ani tache lagim modot magli. Ani ojapachem mhunnttlear, tanchea putacho ilaz kortalo to dotor, tankam modot korunk fuddem sorlo. Taka lagon, bhoinnichea familik sorkara koddlean modot mellʼlli, ani unnem bhaddem farik korun ravonk ek zago mellʼllo. Uprant, bhoinn Soo Hing-an oxem mhunnttlem: “Hea soglea fattlean Jehovacho hat aslo mhunn amkam kollʼllem. To khorench ‘magnnem aikopi Dev zaun asa.’”—St. 65:2.

JEHOVA DITA TO ZOBAB SODHUNK ANI MANUN GHEUNK AMKAM BHAVARTH ZAI

15. Jehova aplea magnneancho zobab dita hem zannam zaunk eke bhoinnik koxi modot zali?

¹⁵ Jehova amchea magnneancho zobab, sodanch ojapache ritin dina zait. Punn jea ritin to amchea magnneank zobab dita, tem taka visvaxi ravonk amkam puro asta. Tor Jehova tumchea magnneancho koso zobab dita tacher dhean diat. Yoko nanvache eke bhoinnik, Jehova tichea magnneancho zobab dina oxem distalem. Punn uprant ti jem kitem magtali, tem ti eka book-ar boroun dovrunk lagli. Thoddea tempa uprant tinnem tea book-ant porot polloilem tednam, Jehovan tichea zaitea magnneancho zobab dila mhunn tika kollon ailem. Ani tantuntlea thoddea magnneam vixim ti visron gelʼli. Tor ami pasun, Jehova amchea magnneacho koso zobab dita tea vixim chintunk vell kaddunk zai.—St. 66:19, 20.

16. Amkam Jehovacher bhavarth asa mhunn ami koxem dakhounk zata? (Hebrevank 11:6)

¹⁶ Ami fokot magnnem korunuch nhoi, punn Jehova amchea magnneank zo zobab dita, to manun gheun, amkam tacher bhavarth asa mhunn dakhounk zai. (Hebrevank 11:6 vachat.) Hea vixim amkam Mike ani Chrissy, hea zoddpeacho onubhov asa. Tim Bethel-ant seva korunk sodhtalim. Bhav Mike sangta: “Ami zaite pavtti Bethel-ant seva korunk fom bhorlem, ani tea vixim Jehova lagim porot-porot magnnem kelem. Punn amkam apounnem mellonkuch na.” Tori astana, aplea sevent tankam koxim uzar korunk zai, tem Jehova bore bhaxen zannam mhunn tankam khatri asli. Tea pasot, Jehovache sevent tim apleachean zata tem soglem korit ravlim. Tim porgottnnaranchi chodd goroz asa tea zagear niemit pioneer mhunn seva kortalim ani songottnnechea bandkamant pasun tenko ditalim. Aiz tim dogaim sorkittachea kamant asat. Bhav Mike mhunntta: “Jehovan amchea magnneank, sodanch amkam zai teach toren zobab diunk na tem khorem. Punn tannem zobab dilo. Ani to zobab, ami chintʼtalim tachea poros anikui boro aslo.”

17-18. Stotr 86:6, 7-a pormonnem, ami kosli khatri dovrunk zata?

¹⁷ Stotr 86:6, 7 vachat. Jehova aplim magnnim aikota ani zobab pasun dita hea vixim stotrkar Davidak purnn khatri asli. Ami pasun Davida bhaxen oxich khatri dovrunk zata. Hea lekhant ami polloilea onubhovantlean, Jehova amchea magnneancho koso zobab dita tem ami xiklim. To amkam zannvai dita, ani tras sosunk goroz ti xokti dita. Tea bhair, to bhav-bhoinnank vo apli bhokti korinant tankam pasun uzar korun amkam modot korta.

¹⁸ Jehova ghoddie dor ek pavtt amkam zai teach bhaxen zobab diunchona. Punn to zobab ditoloch mhunn ami zannant. Amkam goroz asa tem to sarkea vellar ditoloch. Tor Jehova amchem aikotolo mhunn bhavarth dovrun ami magnnem korit ravom-ia. Toxench, aiz to amchi kallji ghetolo ani novea sonvsarant ‘sogle rochnnek dhadoxi kortolo’ mhunn ami khatri dovrum-ia.—St. 145:16.