Dev Israel Porjek Gulamponnantli Suttka korta

ZAITIM vorsam Israel porza Egyptant ravli, tanchi dovlot ani sonsot vaddot geli. Uprant ek novo Faroah (raza) raz cholounk laglo. Ho raza Juzek vollkho naslo. Israel porza vaddta tem pollevun ho zulumi raza bhielo ani tannem tankam gulam kelim. Tannem Israelache soglle nove zolmank ailele chede bhurgeank Nil nodint buddovun marche mhonn hukum ghatlo. Punn eke dhirvont avoin aplea supurlea putak, eka lovheanchea panttlent ghalun nodichea degek zaddanim lipovun salvar kelo. To supurlo bhurgo Faroahache dhuvek meulo, ani tinnem taka Moizes hem nanv dilem anink Egyptachea raz-ghoraneant vaddoilo.

Moizes 40 vorsamcho astana, ek Israeli gulamak tachea mukhdomachea hatantlo soddoitana trasant poddta. Moizes eka poixilea desant pollun gelo, thoim to porko koso jielo. Jedna Moizes 80 vorsamcho aslo tedna, Jehovah Dev taka portean Egyptant Faroah mukhar dhaddta ani Devache porjechi suttka magunk laita.

Faroahan ekdom nakarlem. Dekhun Devan Egyptacher 10 pidda dhaddleo. Dor ek vellar Moizesan Faroah fuddeant vochun taka fuddli pidda vattounchi sondhi dili. Punn Faroah darun ravlo, Moizesachi ani tachea Devachi, mhonnge Jehovahchi beporva keli. Xevottak, dhave piddent tea desacher sogllea malgoddea putancher moronn haddlem, punn jea kuttumbamnim Jehovahchem utor aikon aplea daranchea kovddancher boli dilʼlea menddreachem rogot lavun khunna kelʼli, tanchech malgodde put salvar zale. Devan nisonttonn korunk dhaddlolo devdut him ghoram soddun fuddem sorlo. Tea uprant Israel lokan hea ojeapanchea suttkecho ugddas korunk vorsavolli paskamchi ek porob koxi somrombh kortale.

Aplea sotacho malgoddo put melo to pollovun, Faroahan Moizesak ani sogllea Israel porjek Egyptantle vochunk hukum ghatlo. Tannim rokddench Egyptantlim bhair sorunk toeari keli. Punn uprant Faroahan aplem mon bodolʼlem. Zhuzari ani ronʼgadde gheun Faroah tanchea fattik laglo. Tambddea doriachea degek apunn chopkeak sampoddle oxem Israel porjek dislem. Jehovahn tambddo doria doxim kelo, ani udkachea vonttim modlean sukhea zomnicher, Israel porjek passar zavunk dilem! Jedna Egyptkar rokddech tanchea fatta-fatt gele, tedna Devan udok tancher nettan ieumxem kelem, ani Faroahak ani tachea zhuzareank buddoun marle.

Uprant Israel porza Sinai dongraxim ravonk lagli, Jehovahn tanche lagim ek korar kelo. Moizesak modesti korun, Devan Israel porjek, sogllea tanchea jivitant, vatt dakovunk ani rakhonn korunk kaide dile. Jea porian Israel lok visvasan Devache kaide palltole, Jehovah tanchea sangatak astolo, ani tanche vorvim dusrea raxttrank axirvad melloxem kortolo.

Torui, choddxe Israel porjen aplea unnea bhavartak lagon Devak okmanlo. Tea passot Jehovahn te pillgek 40 vorsam porian oronneant bhonvddek dovorlim. Uprant, Moizesan Dev bhirantichea monxak Joshuak aplea fattlean Israel porjecho fuddakar gheunk nemlo. Xevottak, Devan Abrahamank bhasailʼlea ganvant bhitor sorunk, Israel porza toear ravli.

​—Suttka; Levi-xastr; Lokgonnti; Dusri Somurt; Stotram 136:10-15; Dhormdutancho Itihas 7:17-36 hacher adarlelem asa.