Moizes Jehovachi Bhokti Korunk Vinchun Kaddtta

Ejipttant, Jakobache familik Izraelitkar mhunn nanv poddlem. Jakob ani Juze melea uprant, ek novo Faraoh Ejipttacher raj cholounk lagta. Ejipttkaram poros Izraelitkar bollixtt zait asle mhunn to bhietalo, dekhun tannem Izraelitkarank gulam kele. To tankam forsan vitte korunk laitalo. Ani xetantlem kotthin kam tanche koddlean korun ghetalo. Punn Izraelitkarank itle tras diun pasun tancho ankddo vaddot gelo. Ani hem Faraohk avddonk na dekhun Izraelitkarank zolmolʼlea soglea cheddea bhurgeank marun uddounk tannem adnea dili. Hem aikon Izraelitkaram kitlim bhielʼlim astolim nhoi?

Jokebed nanvache eke Izraelitkar bailek ek sobit put zolmota. Tachi rakhonn korunk ti taka eka panttleant (basket-ant) ghalta. Ani to panttlo Nile nodichea deger, zhaddam modem lipoun dovorta. Ani tea bhurgeachem kitem zatolem tem pollounk tea bhurgeachi bhoinn, Miriam thoim laginch ubi ravta.

Faraohchi dhuv tea nodi-xim nhavonk aili tednam, tika to panttlo dixtti poddtta. Tea panttleant bhurgem roddtta tem ti polloita ani tika tea bhurgeache churchure distat. Hem polloun Miriam tika vicharta: ‘Hea bhurgeak dudh diunk hanv tuka ek bail sodhun haddum?’ Faraohchi dhuv hadd mhunn sangtam tednam, Miriam vochon aplech avoik gheun ieta. Faraohchi dhuv tika sangta, ‘hea bhurgeak vhor ani taka dudh di ani hanv tuka farik kortolim.’

Bhurgo vaddlo tednam, Jokebedan taka Faraohche dhuv koddem haddlo. Tinnem bhurgeak Moizes mhunn nanv dilem ani taka aploch put koso vaddoilo. Moizes ek raj kunvor zalʼlean taka zai tem soglem mellonk xoktalem. Punn to Jehovak kednanch visronk na. Apunn Ejipttkar nhoi, punn ek Izraelitkar mhunn taka khobor asli. Dekhun tannem Jehovachi seva korunk vinchun kaddlem.

Moizes 40 vorsancho astana, to aplea lokank modot korunk sodhta. Ek pavtt ek Ejipttkar eka Izraelitkarak martalo tem Moizesan polloilem. Tednam tannem tea Ejipttkarak itlo forsan marlo ki to thoinch melo. Moizes tachi kudd renvent lipoita. Ani hea vixim Faraohk kolltta tednam to Moizesak jivexim marunk sodhta. Punn Moizes Midian desant pollon voita. Ani thoim Jehova taka samballtta.