Zanntte Piraier Pasun Tumi Khuxal Ravonk Xoktat

1-2. Aplea zannttea sevokam vixim Jehova kitem chintʼta? (Stotr 92:12-14; Chitr pasun polloiat.)

AIZ sonvsarantlo thoddo lok, zannttim zavop mhunnttlear tankam ek man oso mhunn lekhtat. Punn thoddim zannttim disona zaunk, apleachean zata tem soglem kortat. Zoxem tanchea toklecho ek kens pikla zalear, tim to rokddoch kaddttat. Punn kitlo-i proitn kelear pasun, zanntteponn ami addaunk xokonant.

² Punn aplea zannttea sevokam vixim amcho sorgincho Bap kitem chintʼta? (Mho. 16:31) To tankam sobit zhaddank sor korta. (Stotr 92:12-14 vachat.) Kiteak? Khub vorsam thaun aslolim zhaddam ekdom sobit distat. Karonn tankam zaitim panam vo fulam astat. Oslech torechem ek zhadd, Japan-ant zata ani tem zaitim vorsam porian togta. Oslech torechim thoddim zhaddam, ek hozaram poros chodd vorsam poriant urtat ani tim pollounk sobit distat. Heach bhaxen, zannttim zalʼlim Jehovachim sevokam tachea nodren khub sobit asat. Karonn Jehova tanchi pirai nhoi, punn tanche sobit gunn polloita. Tannim zaitea vorsam thaun sosnikai dakhoilea ani tim visvaxiponnan tachi seva kortat dekhun tim taka khub moladik asat.

3. Jehovan mhotvachim kamam korunk aplea zannttea sevokank koxim uzar kelim? Ek udharonn diat.

³ Ami zannttim zalear pasun Jehovak unnea molachim zainant.a Khorem mhunnttlear, mhotvachim vo ojapachim kamam korunk tannem adim aplea zannttea sevokank uzar kelim. Udharonnak, Sara thaun ek vhodd raxttr ietolem ani ti Mesiasachi purvoz zatoli mhunn Jehovan sanglem tednam ti khub zanntti asli. (Ut. 17:15-19) Toxench, Izraelitkarank Ejipttantlean suttka diunk Jehovan Moizesak adnea dili tednam to pasun khub zanntto aslo. (Sutt. 7:6, 7) Ani Jehovan apostl Juanvak Bible-antlim panch pustokam borounk prerit kelo tednam, to-ui khub zanntto aslo.

4. Zanntteponnar ietat tea trasancho fuddo korunk amkam koxi modot zaunk xokta? (Mhonnʼnneo 15:15) (Chitr pasun polloiat.)

⁴ Ami zannttim zait voitat toxim, amkam zaitea oddchonneancho fuddo korcho poddtta. Eke bhoinnin fokannamnim mhunnttlem: “Zanntteponn bhizuddeank lagon nhoi.” Punn ami khuxalb aslear, zanntteponnar ietat tea trasancho fuddo korunk amkam modot zatoli. (Mhonnʼnneo 15:15 vachat.) Tor hea lekhant, zannttea bhav-bhoinnamnim khuxal ravonk kitem korchem ani sobhentlea bhav-bhoinnamnim tankam koxi modot korunk zata tem polloum-ia. Punn poilim, zannttim zatat toxim amkam khuxal ravonk kiteak kotthin zaunk xokta tacher dhean dium-ia.

ZANNTTEPONNAR KHUXAL RAVONK KITEAK KOTTHIN ZAIT?

5. Thoddim zannttim bhav-bhoinnam kiteak niraxi zait?

⁵ Ami poilim korunk xoktalim tim kamam atam korunk xokonant dekhun ami niraxi zait. Ami poilim bhaxen tornattim ani bore bholaiken asonk zai aslim oxem ami chintit. (Up. 7:10) Udharonnak, Ruby nanvachi ek bhoinn sangta: “Mhojea kuddik khub dukh asa ani mhojean cholonk zaina dekhun, mhaka kopdde ghalunk pasun khub kotthin zata. Toxench socks ghalunk paim voir kaddchem sadem kam pasun mhojean korunk zaina. Arthritis-ak lagon mhoje hat muietat ani mhojim bottam sarkim kam korinant dekhun lhan-lhan kamam korunk mhaka khub kotthin zata.” Ani bhav Harold, zo Bethel-ant seva kortalo to sangta: “Mhaka avoddttaleo teo vostu hanv korunk xokona dekhun hanv thodde pavtti khub ragar zatam. Poilim hanv khub ghott aslom ani mhaka baseball khellonk khub avoddttalem. Dusrim mhojea vixim mhunnttalim, ‘Bol Harold-ak diat, to amkam jikhon ditolo.’ Punn atam mhojean bol ghalunk pasun zauncho na oxem mhaka dista.”

6. (a) Zannttim bhav-bhoinnam anik koslea karonnank lagon niraxi zait? (b) Gaddi cholounchi vo na tem tharaunk zannttea bhav-bhoinnank koxi modot zaunk xokta? (Hea masikent aslolo, “Hanvem Gaddi Cholovop Bond Korchem Kai?” ho lekh polloiat.)

⁶ Tumi adim kortalim tim kamam korunk atam tumkam dusreanchi goroz poddtta dekhun, tumi niraxi zatat zait. Tumchi kallji gheunk konn tori tumchea ghora ieta zait vo tumkam tumchea eka bhurgeachea ghora vochon ravonk poddot. Vo bholaikek lagon vo tumchi dixtt unni zalea dekhun, tumkam gaddi cholounk vo dusrea zagear vochonk mellona zait. Hea pasot tumi khub dukhi asot. Punn tumi hem soglem korunk xokonant zalear pasun, tumi Jehovak moladik asat ani to tumchim bhavnam somzota mhunn ugddas dovrat. Karonn tumi bhitorlean koslim munxam asat tem Jehovak chodd mhotvachem. Tumi tacho ani bhav-bhoinnancho khub mog kortat mhunn to zannam. Ani haka lagon tumi taka khub moladik asat.—1 Sam. 16:7.

7. Tumi Armageddon pollounk jivim urchimnant oxem chintun niraxi zatat zalear tumi kitem ugddas dovrunk zata?

⁷ Armageddon pollounk tumi jivim urchimnant oxem chintun tumi niraxi zait. Tea vellar tumkam kitem modot korunk xokta? Jehovan azunui hea noxttea sonvsaracho kiteak nas korunk na tem ugddasak haddat. (Iz. 30:18) Anikui zaito lok aplea vixim xikon aplim ixttam zatolim mhunn Jehova pasiensan ravla. (2 Ped. 3:9) Tor tumi niraxi zatat tednam, zaito lok Jehova vixim xikon salvar zaunk xokta mhunn ugddas dovrat. Ani tanchea modlim thoddim tumchim soirim vo ghorchim asot.

8. Zannttim bhav-bhoinnam dukhant vo duent astat tednam tim thodde pavtti kitem korit?

⁸ Ami zannttim vo tornattim asum, duent vo dukhant astana, ami oxem kitem-i korit vo mhunnot, jem amkam uprant vaitt disot. (Up. 7:7; Jak. 3:2) Udharonnak, Jehovacho visvaxi sevok Job dukh sostalo tednam tachim “utram khor-khos” zalʼlim. (Job 6:1-3) Ek-ek pavtti umkeach duensak vo vokhdank lagon, ek munis dusreank dukhoita toslem kitem-i mhunnonk vo korunk xokta. Punn ami zannttim vo duent asat dekhun dusreank kitem-i mhunnonk zata oxem nhoi vo tannim amkam soglech pavtti modot korunk zai mhunn ami opekxa korunk zaina. Ani ami konnankui dukhoila mhunn amkam kollon ieta zalear ami rokddench tachea lagim bhogsonnem magonk zai.—Mt. 5:23, 24.

ZANNTTEPONNAR KHUXAL RAVONK KITEM KORCHEM?

9. Zannttea bhav-bhoinnamnim dusreanchi modot kiteak gheunk zai? (Chitram pasun polloiat.)

⁹ Dusreanchi modot gheiat. (Gal. 6:2) Oxem korunk tumkam survatek kotthin zait. Bhoinn Gretl sangta: “Dusreanchi modot maglear, tankam gorje bhair tras zatole oxem hanv poilim chintʼtalem. Punn mhojem chintop bodlunk ani mhaka modotichi goroz asa mhunn khaltikaien manun gheunk mhaka vell laglo.” Ami dusreanchi modot ghetat tednam, diun ji khuxalkai melltta ti onnbhovunk ami tankam ek sondhi ditat. (D.I. 20:35) Toxench, dusrim amcho kitlo mog ani porva kortat tem ami onnbhovtat.

10. Zannttea bhav-bhoinnamnim dusreanche upkar attounk kiteak visorchem nhoi? (Chitr pasun polloiat.)

¹⁰ Upkar attoiat. (Kol. 3:15; 1 Tes. 5:18) Dusrim tumkam modot kortat tednam tumi tanche upkari asot, punn tanche upkar attounk visrot. Tor tankam smile korun thank you mhunnttlear, tumi tanche upkari asat mhunn tankam kollttolem. Bhoinn Leah, ji Bethel-ant aslolea zannttea bhav-bhoinnanchi kallji gheta, ti oxem mhunntta: “Ek bhoinn mhaka upkar attounk lhan-lhan thank you note boroita. Te thoddeach utranche astat tem khorem, punn te vachun mhaka khub borem dista. Ani ti mhaka upkari asa mhunn kollon ieta.”

11. Zannttea bhav-bhoinnamnim dusreank koxi modot korunk zata? (Chitr pasun polloiat.)

¹¹ Dusreank modot korunk proitn korat. Tumi tumcho vell ani takot dusreank modot korunk uzar kortolim tednam tumi tumcheach oddchonneam vixim chintit ravchimnant. Afrikechea eke mhunnʼnne pormonnem, zannttim khub zannvai aslolea pustokanche eke library sarkim asat. Punn tim pustokam konn vachina zalear tancho kosloch faido zaunchona. Tor zannttea bhav-bhoinnamno, tumkam aslolea gineana ani onnbhovam vixim tornatteank sangat. Tankam prosn vicharat. Ani tim jem sangtat tem pasiensan aikat. Toxench Jehovachea dorjeam pormonnem jievop kiteak faideachem ani toxem kelear tim khuxal astolim mhunn tankam xikoiat. Oxe toren tumi tornatteank bhuzvonn ani urba ditat tednam tumkam khuxalkai mellttoli.—St. 71:18.

12. Izaias 46:4-a pormonnem, Jehova zannttea bhav-bhoinnank kosli bhas dita? (Chitr pasun polloiat.)

¹² Ghottaie pasot Jehova lagim magnnem korat. Thodde pavtti tumi khub thokleant ani oskot zaleant oxem tumkam disot ani tumi niraxi zait. Punn Jehova khub xoktivont asa mhunn ugddas dovrat. Bible amkam sangta ki “to kednanch thokona vo taka kednanch puro zaina.” (Iz. 40:28) Tor Jehova tumkam goroz ti xokti diunk xokta. (Iz. 40:29-31) Khorem mhunnttlear, tumkam modot kortolo mhunn tannem bhas dilea. (Izaias 46:4 vachat.) Ani to sodanch apli bhas samballtta. (Josh. 23:14; Iz. 55:10, 11) Tachea lagim magnnem kelea uprant to tumkam modot korta mhunn tumi polloitat tednam tumi khuxal zatolim.

13. Zannttea bhav-bhoinnamnim 2 Korintkarank 4:16-18 pormonnem kitem ugddas dovrunk zai? (Chitr pasun polloiat.)

¹³ Zanntteponn sodanch aschem na mhunn ugddas dovrat. Ek oddchonn beginuch somptoli mhunn amkam khobor asta tednam, tacho fuddo korunk amkam anikui sompem zata. Ani zanntteponn toxench duensam beginuch kabar zatolim mhunn Bible-antlean amkam khatri melltta. (Job 33:25; Iz. 33:24) Tor zannttea bhav-bhoinnamno, tumkam fuddarak ekdom bori bholaiki astoli, tumkam khub boll astolem ani tumi khub sobit distolim hem ugddas dovorlolean tumi atam pasun khuxal ravonk xoktat. (2 Korintkarank 4:16-18 vachat.) Punn zannttea bhav-bhoinnank dusreamnim koxi modot korunk zata tem atam polloum-ia.

DUSREAMNIM ZANNTTEA BHAV-BHOINNANK KOXI MODOT KORUNK ZATA?

14. Zannttea bhav-bhoinnank mellop ani fon korop kiteak mhotvachem?

¹⁴ Tankam chukonastana mellat ani fon korat. (Heb. 13:16) Zannttea bhav-bhoinnank eksurponn bhogonk xokta. Bhav Camille-ak oxench dista. To mhunntta: “Hanv dis ani rat ghorantuch asta dekhun mhaka khub bejar ieta. Thodde pavtti eka pinzreant bond aslolea zannttea xinva sarkem mhaka dista ani hanv khub ragar ani niraxi zatam.” Tor oslea zannttea bhav-bhoinnank ami mellttat tednam, tim amkam mhotvachim asat ani ami tancho mog kortat mhunn dakhoitat. Punn ami bizi aslolean, tankam fon korunk vo mellonk visrot. Toxem zaina zaunk ami kitem korunk zata? Tankam ami kednam mellttolim, message kortolim vo fon kortolim tem ami calendar-acher mark korunk zata. Oxem korun ‘kitem chodd mhotvachem tachi ami khatri korunk pavtolim.’—Filp. 1:10.

15. Tornattea ani zannttea bhav-bhoinnamnim sangata mellon kitem korunk zata?

¹⁵ Tumi tornattim asat zalear, zannttea bhav-bhoinnam lagim kitea vixim ulounchem mhunn tumkam usko zata kai? Hea vixim chodd usko korinakat. Tanchea lagim ixttagot korat. (Mho. 17:17) Mittinge poilim ani uprant tanchea lagim uloiat. Bible-antlem khoinchem vers tankam chodd avoddtta vo tanchea bhurgeponnar hanspa sarki zaloli eke ghoddnne vixim tumi tankam vicharunk zata. Toxench, tumi tanchea sangata JW Broadcasting^® pollounk zata. Tea bhair tumi her vattamnim tankam modot korunk zata. Zoxem, tanchea lagim tab vo fon asa zalear, to update kelʼlo asa mhunn tumi khatri korunk zata. Ani novim prokaxonam download korunk tankam modot korunk zata. Carol nanvachi ek bhoinn sangta: “Tornatteank korunk avoddttat teo vostu tannim zannttea bhav-bhoinnam sangata mellon korunk zai. Hanv zanntti zalea. Torui shopping korunk, bhair jevunk ani rochnna pollounk mhaka avoddtta.” Toxench Maira nanvachi ek bhoinn sangta: “Mhoji ek ixttin 90 vorsanchi ani hanv 33 vorsanchem. Torui hanv tichea poros itlem lhan mhunn thodde pavtti hanv visortam. Karonn ami eka-meka sangata hanson vell sartat ani sangata mellon pichʼcheram polloitat. Toxench thodde pavtti oddchonneo ietat tednam, ami eka-meka lagim solʼlo pasun magtat.”

16. Zannttea bhav-bhoinnank dotorager voichem poddtta tednam ami tanchea sangata gelear kiteak borem?

¹⁶ Tankam dotorager voichem poddtta tednam tanchea sangata vochat. Goroz poddtta tednam tumi zannttea bhav-bhoinnank dotorager gheun vochonk zata. Toxench, dotor vo nurse tanchea sangata sarke toren vagtat ani tankam goroz ti modot ditat mhunn khatri korun gheunk zata. (Iz. 1:17) Tea bhair, dotor tankam kitem sangta tem tumi boroun gheunk zata. Hea vixim Ruth nanvachi ek zanntti bhoinn sangta: “Thodde pavtt hanv ekttich dotorager voitam tednam, hanv taka kitem sangta tem to manunuch ghena. To oxem mhunntta: ‘Tuka kainch zaunk na; tuka bexttench toxem dista.’ Punn mhojea sangata konnui asa zalear, dotor mhojea sangata bore toren vagta. Tor mhojim bhav-bhoinnam mhojea sangata dotorager ietat mhunn hanv tanche khub upkari.”

17. Zannttea bhav-bhoinnam sangata porgottnni korunk ami kitem korunk zata?

¹⁷ Tanchea sangata porgottnni korat. Thoddea zannttea bhav-bhoinnank ghor-ghoramnim porgottnni korunk kotthin zait. Tor ami tankam amchea sangata kartt uzar korun porgottnni korunk apounk zata, ani kartta lagim bosonk kodel pasun diunk zata. Toxench amchea borabor Bible obheasak vhoronk zata. Ani tankam addkholl na zalear, to Bible obheas tanchea ghora dovrunk zata. Toxench vhoddilamnim porgottnni mitting tanchea ghora dovrunk zata. Oxem kelolean tankam porgottnni korunk ghoddie sompem zait. Tor zannttea bhav-bhoinnank mog dakhounk ani man diunk ami amchean zata tem soglem korta tednam, Jehova khuxal zata.—Mho. 3:27; Rom. 12:10.

18. Ami fuddlea lekhant kitem polloitolim?

¹⁸ Jehova zannttea bhav-bhoinnancho khub mog ani valor korta mhunn ami hea lekhant polloilem. Ami-i toxench kortat! Zannttea bhav-bhoinnamno, tumkam zaiteo oddchonneo asot, punn Jehova tumkam khuxal ravonk modot kortolo mhunn ugddas dovrat. (St. 37:25) Toxench fuddarak tumi hachea poilim kednanch asonk nant titlim khuxal astolim! Punn thoddea bhav-bhoinnank ek veglli oddchonn asa. Tim aplea zannttea avoi-bapaichi vo bhurgeachi vo duent aslolea eka ixttachi kallji ghetat. Tor tannim koxem khuxal ravonk zata, tem ami fuddlea lekhant polloitolim.