Poilim Sakxi Asloleam Sangata Jehovachim Sakxi Koxim Vagtat?
Ami sogleam sangata mogan, doiallaien ani respedan vagonk amchean zata tem soglem kortat. Konnui Jehovachi seva poilim kortaloa titli korina zalear vo tannem tachi seva korop bond kelear, ami tachea lagim uloitat, tacho mog kortat mhunn khatri ditat ani Jehova sangata tachi ixttagot porot ghott korunk ami modot kortat.—Lukas 15:4-7.
Thodde pavtti, ek munis oslim kamam korunk xokta zaka lagon taka sobhentlean bhair kaddunk poddot. (1 Korintkarank 5:13) Punn, ami tacho mog kortat dekhun taka sobhentlean bhair kaddina zaunk taka modot korunk amchean zata tem soglem kortat. Ani taka sobhentlean bhair kaddlear pasun, Bible-ant sanglolea pormonnem ami taka mog ani resped ditat.—Marku 12:31; 1 Pedru 2:17.
Kiteak lagon eka munxak sobhentlean bhair kaddcho poddtta?
Ek Kristanv gombhir patok korta ani to bodlonk toiar na zalear taka sobhentlean bhair kaddcho mhunn Bible sangta.b (1 Korintkarank 5:11-13) Bible-ant gombhir patkam vixim spoxttponnim sanglam, zaka lagon eka munxak sobhentlean bhair kaddcho poddtta. Zoxem, pordvar, bebdikai, khun korop, ghorcheank marop, ani chori korop.—1 Korintkarank 6:9, 10; Galasiekarank 5:19-21; 1 Timotak 1:9, 10.
Punn, eka munxan gombhir patok kelem mhunn taka rokddoch sobhentlean bhair kaddinant. Sobhentle vhoddilc tannem aplo sobhav bodolcho mhunn taka modot kortat. (Romkarank 2:4) Te movall ani doiall ritin taka somzaunk zata titlo proitn korit ravtat. (Galasiekarank 6:1) Oxem kelolean, to munis apli chuk vollkhon poschatap korunk xokta. (2 Timotak 2:24-26) Tori astana, to Bible-ache noitik dorje moddit ravta ani poschatap korina zalear, taka sobhentlean bhair kaddcho poddtta. Tednam, to munis Jehovacho Sakxi na mhunn vhoddil sobhek kollounni kortat.
Patok kortolea sangata doiall ani mogall ritin vagon, vhoddil taka apli chuk vollkhon gheunk modot kortat
Patok korit ravta tea munxak sobhentlean bhair kaddlolean koslo boro porinnam zata? Poilem mhunnttlear, sobha noitik ritin nitoll urta ani tea munxacho vaitt probhav her bhav-bhoinnancher poddona. (1 Korintkarank 5:6; 15:33; 1 Pedru 1:16) Tea bhair, to munis apli vaitt vagnnuk soddun bodlav korunk fuddem sorot.—Hebrevank 12:11.
Eka munxak sobhentlean bhair kaddlea uprant, Jehovache Sakxi tachea sovem koxe vagtat?
Sobhentlean bhair kaddlolea “munxam sangata vell sarop bond korat ani oslea munxam sangata jevunk porian bosom nakat“ mhunn Bible amkam sangta. Dekhun hea munxam sangata ami vell sarinant. (1 Korintkarank 5:11) Punn hacho orth, ami taka samkoch pois korinant. Taka amchea sobhentlea mittingek ieunk ieukar asa. Thoim bhav-bhoinnam taka zap diunk xoktat. Taka porot Jehovacho Sakxid zaunk zai zalear to vhoddilanchi modot pasun gheunk xokta. Hea toren ami tachea lagim respedan vagtat.
Sobhentlean bhair kaddloleank mittingek ieunk ieukar asa
Zor eka munxak sobhentlean bhair kaddla ani tachi bail ani bhurgim Jehovachim Sakxi asat zalear kitem? To ek Jehovacho Sakxi urona dekhun aplea ghorabeant to dhormik ritin fuddakar gheunk xokona. Punn aplea ghorchea lokam sangata aslolo tacho sombond ani tachem kazari jivit tunttona.
Sobhentlean bhair kaddlolea munxan vhoddilamnim apleak bhett diunk sangonk zata. Hea vellar, vhoddil taka mogan Bible adarit solʼle ditole ani poschatap korun porot Deva sangata tachi ixttagot ghott korunk urba ditole. (Zekaria 1:3) To apli vaitt vagnnuk soddun Bible-achea noitik dorjeam adarit jieunk vavurta tednam, taka porot sobhecho bhag zaunk ieukar asa. Poilea xekddeantlea Korint sobhent eka patkean aplem jivit bodolʼlem tednam thoinchea Kristanvamnim kelʼlem toxem, sobhentlim bhav-bhoinnam ‘doia dakhoun taka bhogxitolim ani bhuzvonn ditolim.’—2 Korintkarank 2:6-8.
Sobhentlean zankam poile bhair kaddlole tankam koxem bhogta?
Sobhentlean bhair kaddlolim thoddim Jehovachim Sakxi, Jehova Deva lagim porot aileant. Tim kitem mhunnttat tem polloum-ia.
“Sobhent porot ieunk hanvem nirnnoi ghetlo tednam, itlim vorsam hanvem kitem kelʼlem tem vhoddil vichartole oxem mhaka dislem. Punn tannim mhaka sanglem, ‘Hea fuddem tum kitem kortolem tacher dhean di.’ Hem aikon mhaka khub borem dislem.”—Maria, United States.
“Hanv porot ailom mhunn bhav-bhoinnam khub khuxal zalim. Tannim mhaka bhogxilo tem polloun mhojim guneanvkari bhavnam pois korun fuddem soronk mhaka modot zali. Tea bhair, Jehova sangata mhoji ixttagot porot ghott korunk vhoddil sodanch mhaka modot korunk toiar asle. Tannim mhaka bhuzvonn dili toxench, Jehova mhozo mog korta ani tache nodren hanv azunui moladik hem somzonk tannim mhaka modot keli.”—Malcom, Sierra Leone.
“Aplem songotton nitoll dovrun Jehova aplea lokancho mog korta mhunn dakhoita. Hem polloun mhaka borem dista. Thoddeank hem chukichem disot, punn oxem korop gorjechem. Amcho sorgincho Bap khub mogall ani amkam bhogsunk toiar asa dekhun hanv tache khub upkari.”—Sandi, United States.
a Hanga ami dadlea vixim uloitat, punn hem bailank pasun lagu zata.
b Poilim, poschatap korina toslea patkeank ami Inglez bhaxent tankam “disfellowshipped” oxem mhunnttalim. Punn atam ami Bible-ant sanglam toxem tankam sobhentlean bhair kaddleant oxem mhunnttat.
c Vhoddil mhunnttlear onnbhov aslole bhav je Jehovachea lokank Bible-antli xikounn ditat, gonvlli koxe tanchi kallji ghetat, tankam modot kortat ani urba ditat. Tanchea vavra pasot tankam poixe mellonant.—1 Pedru 5:1-3.
d Bhov thoddea kesimnim, ek munis sobha soddun gelea uprant, sobhek luksonn korunk tantunt asloleank niraxi korunk proitn korunk xokta vo to dusreank vaitt kamam korunk uksaunk xokta. Oxem zata tednam Bible adnea dita ki ami oslea munxank ‘nomoskar,’ mhunnche zap pasun korchi nhoi.—2 Juanv 9-11.