Jivit ani Porgottnni Mittingechea Pustike Pasot Modot

ABRIL 13-19

DEVACHEA UTRANTLE THEVE | UTPOTI 31

“Jakob ani Laban Xanticho Korar Kortat”

it-1 883 ¶1

Galeed

Jakob ani Laban aplea modem asloli zhogddi suttavi kortat ani uprant eka-meka sangata ek korar kortat. Jakob ek fator ubo korta ani aplea munxank thoim fatranchi ras korunk sangta. Hi fatranchi ras korun tannim ek mez koxem kelem ani tacher te korar-achem jevonn jevle. Uprant, Labanan tea raxik “Jegar Sahadutha” mhunn Aramaik (Syriachem) bhaxent nanv dilem. Ani Jakoban tea raxik tosoch orth aslolem Hebrev bhaxent nanv “Galeed” dovorlem. Labanan mhunnttlem: “Hi fatranchi ras [Heb., gal] amkam dogaim-kui ek ugddas [Heb., ʽedh] zaun astoli.” (Ut. 31:44-48) Hi fatranchi ras (ani ubo fator) tea vatten vetolea lokank ek govai ditali. Vers 49-am pormonnem, hea zageak “Mizpah” hem-ui nanv dilem. Hebrev utor Mizpah mhunnttlear Pahrogopur. Ho Pahrogopur govai ditalo ki Jakob ani Laban ani toxench tanche kuttumb eka-mekacher kednanch loddai korchim nant, punn xantin jietole. (Ut. 31:50-53) Uprant, dusrea vellar-ui heach ritin fator govaiki koxe uzar keleat.—Josh. 4:4-7; 24:25-27.

it-2 1172

Pahrogopur

Jakoban fatranchi ras keli ani taka “Galeed” (hacho orth “Sakxichi Ras”) ani “Mizpah” mhunnttlear Pahrogopur hem nanv dilem. Uprant, Labanan mhunnttlem: “Ami dog-ui eka-meka sorxile koddsorlole asanv tedna Sorvespor amchi zoton korum-di.” (Ut. 31:45-49) Tannim kelʼlo xanticho korar te pallttat vo na tem Jehova polloita mhunn hi fatranchi ras tankam ugddas kortali.

it-2 1087-1088

Teraphim (Gorcheo Murteo)

Mesopotamia ani laginchea vattarant adlea vostuncho sodh korun obheas kortolea xastriank je purave mellʼlle tatuntlean kollon ieta ki, jea munxa lagim gorche dev (murteo) astale taka kuttumbachem daiz mellonk xoktalem. Nuzi mhunnttat thoim mellʼllolea eka fatricher boroilʼlea utram pormonnem kollon ieta ki, eka zanveam lagim gorcheo murteo asleo zalear, sasupaichea mornna uprant tannem korttan vochon sasupaichem bhatt-bes aplem korunk zatalem (Ancient Near Eastern Texts, edited by J. Pritchard, 1974, pp. 219, 220, and ftn 51). Rakelan hem monant dovrun, teo murteo vorop sarkem mhunn chintlem astolem karonn tichea bapain Jakobak zaite pavtti fottoilʼlo. (Ut. 31:14-16 sor korat.) Aplem daiz samballunk teo murteo Labanak gorjecheo asleo. Heach pasot, to aplea bhavank gheun sat disanchi vatt kaddun Jakobak dhorunk gelo. (Ut. 31:19-30) Rakelan teo murteo chorloleo mhunn Jakobak kainch khobor nasli. (Ut. 31:32) Toxench, Jakoban teo murteo uzar korun Labanachea putanchem daiz aplem korunk proitn kelo mhunn Bible-ant amkam khoinch mellona. Jakobak tea murteanchi koslich goroz nasli. Jea vellar, Jakoban aplea gorchea koddlean mellʼllole porke dev Shekema lagim aslolea sindur-rukha pondak purle tednam heo murteo pasun tannem purleo astoleo.—Ut. 35:1-4.

w13 3/15 21 ¶8

Jehova—Amcho Asro

⁸ Jakob Haran-ant pavlo tednam, Labanan taka boro ieukar dilo. Ani uprant, tannem aplea duvank, mhunnchem Leak ani Rakelak tache lagim kazar kelim. Punn, thoddea tempa uprant, Labanan taka mozuri dita mhunnttloli ti dha pavtti bodlun Jakobak fottoilo! (Ut. 31:41, 42) Punn, Jehova apli kallji ghetolo mhunn bhavarth dovrun Jakoban ho onʼneai soslo. Khorench, Jehovan tacho samball kelo! Devan Jakobak Kanaan desant porot voch mhunn sanglem tednam, tachea lagim “zaite hindd, chakor, chakornim, unttam ani gaddvam” aslim. (Ut. 30:43) Hea soglea vostum pasot apunn upkari asa mhunn dakhounk Jakoban oxem magnnem kelem: “Tuvem mhaka, tujea sevokak dakhoilai tem sogllem bholeponn mhaka favo nhoi. Vetana, mhojea hatant ek danddo ghevun hanv Jordan-nodi poltoddi sorlam, ani atam porot ietana don urponjimnim hanv asam.”—Ut. 32:10.

ABRIL 20-26

DEVACHEA UTRANTLE THEVE | UTPOTI 32-33

“Axirvad Gheunk Tumi Loddai Kortat Kai?”

w03 8/15 25 ¶3

Tumi Kallzant Thaun Jehovak Sodhtat Kai?

Kallzant thaun Jehovak sodhtoleam munxanchim Povitr Pustokant zaitim udharonnam asat. Tatuntlem ek udharonn mhunnttlear Jakobachem. Munxache kuddin ailolea devduta lagim Jakoban soglea bollan sokall zaisor loddai keli. Hea karonnak lagon, devdutan Jakobak Israel (Devakodde zhuz korpi) mhunn nanv dilem. Hem nanv dakhoita ki Deva koddlean axirvad gheunk to soglea bollan zhuzlo. Tannem koxtti vavr kelo ani soddun diunk na. Heach pasot devdutan taka axirvad dilo.—Utpoti 32:24-30, futtnott.

(Utpoti 32:25, 26) Ani Jakobacher zoit vhorunk zaina tem polleun, tannem tachea zangllak hat ghalo. Ani tache kodde loddai kortana, Jakobachea zangllachem hadd bhair sorlem. ²⁶  Tedna tannem mhollem: ‘Atam mhaka vochum-di, kiteak dis uzvaddlo.’ Punn Jakoban zobab dilo: ‘Tunvem mhojer axirvad ghalea bogor hanv tuka vochunk diuncho na.”

it-2 190

Thontto, Thontteponn

Jakob Thontto Zata. Jakob 97 vorsacho aslo tednam, tannem akʼkhi rat devduta lagim loddai kelʼli. Apleak axirvad mello porian tannim devdutak soddunk na. Loddai kortana, devdutan Jakobachea zangllak hat ghalo tednam tachea zangllacheam hadd bhair sorlem. Ani taka lagon Jakob thontto zalo. (Ut. 32:24-32; Hos. 12:3-5) Devdutan Jakobak mhunnttlem, “Deva lagim zhuzon tunvem apunn bollixtt mhunn dakhoilem ani monʼxacher-ui tum zoit vhortoloi.” Punn, tachem thontteponn taka ugddas korun ditalem ki khorem mhunnttlear tannem Devachea bollixtt dutak harounk na. Devanuch taka toxem korunk favo kelʼlem dekhun to devdutaxim loddai korunk xoklo. Jakoban toxem kelʼlem Devak zai aslem. Tor, hea ritin Dev dakhounk sodhtalo ki Jakob Devachea axirvadacho khub valor korta mhunn.

it-1 1228

Israel

1. Jakob 97 vorsancho aslo tednam Devan taka Israel nanv dilem. Jakob Esau-ak mellonk voitalo tednam tannem Jakobacho (Jabbok) vhall par kelo. Tea rati to eka munxa lagim loddai korta zo ek devdut mhunn uprant taka kollon ieta. Jakob soddun dinastana loddai korta dekhun devdut taka axirvad dita ani tachem nanv bodlun Israel dovorta. Hea ghoddnnek lagon Jakob tea zageak Peniel vo Penuel hem nanv dovorta. (Ut. 32:22-31; JACOB No. 1 polloiat.) Uprant, Bethelant Dev taka porot sangta ki lok taka Israel hea nanvan vollkhotole. Tednam thaun, Jakob moro poriant khub pavtti taka Israel hea nanvan ulo kela. (Ut. 35:10, 15; 50:2; 1It. 1:34) Bible-ant Israel hem nanv 2,500-am voir zagear melltta. Choddxea pavtt, hem nanv Jakobachea sonsti vixim sangtana uzar kelam.—Sutt. 5:1, 2.

w10 6/15 22 ¶10-11

Movall Utram Ixttagot Korunk Adar Kortat

¹⁰ Movall utram ani borem ulounnem amkam dusream lagim ixttagot korunk ani ti samballunk adar korta. Dusream lagim ixttagot ghott korunk ami ghoddtta tem kortat tednam amkam eka-meka lagim ulounk bori sondhi melltta. Dusream pasot khorea monan doiall korneo kortat tednam, mhunnchem dusreank ami adar kortat, tankam dennim ditat vo tancho poramos kortat tednam amkam tanchea lagim ukteponnim ulounk sondhi melltta. Oxem kelear, “tachea mathear pettlolea ujeache inglle ghatlolea bhaxen zatolem” jea udexim tancho vaitt sobhav bodoltolo ani tanchea lagim ulounk amkam sompem zatolem.—Mhonnʼnneo 25:21,22

¹¹ Jakobak hem bore bhaxen somzolem. Tacho zonvllo bhav Esau tacher khub ragar aslo ani tacho jiv kaddunk sodhtalo dekhun Jakob tachea thaun pollun gelʼlo. Atam zaitea vorsamnim Jakob porot ieta ani dusrea vatten, Esau aplea 400 munxank gheun taka mellonk bhair sorta. Hea vellar, Jakob Jehova lagim magnnem korun adar magta. Uprant, to Esau-a pasot xelliam-bhokddeanchem hindd dhaddtta. Hea denneak lagon Esau-achem kalliz movallʼllem. Esau dhavon ieta ani taka veng marta ani te dogui roddonk lagtat.—Ut. 27:41-44; 32:6, 11, 13-15; 33:4, 10.

it-1 980

Dev, Israelacho Dev

Peniel-ant Jehovacho dut taka mellʼllea uprant Jakobak Israel mhunn nanv poddlem. Fuddem, to aplea bhav Esau-ak melltta ani tachea lagim xanti korta. Uprant, to Sukkoth ani magir Shekem mhunntta tea ganvant jieta. Hanga, Hamorachea putam thaun Jakob ek xet viktem gheta ani thoim aplo tombu ubarta. (Ut. 32:24-30; 33:1-4, 17-19) “Thoim tannem ek vedi ubarli, ani El, Israelachea Devak to bhettoilo,” mhunnchem tannem tea vedik Dev, Israelacho Dev hem nanv dilem. Hem nanv Bible-ant amkam ekuch pavtt melltta. (Ut. 33:20) Dev Israelacho Dev, hem nanv tea vedik diun Jakoban dakhoun dilem ki taka Israel hem novem nanv manlam mhunn. Toxench, tannem upkariponn dakhoilem karonn Devan taka bhasailʼlea desant samballun portun pavoilo.

ABRIL 27–MAY 3

DEVACHEA UTRANTLE THEVE | UTPOTI 34-35

“Vaitt Sangateancho Dukhest Porinnam”

w97 2/1 30 ¶4

Shekem—Falkeant aslolem Xar

Dina ekttich tea xarantlea ostoreank sodanch bhett diunk voitali tednam tea xarache tornatte tika khoinchea nodren polloitale kai? Rajkunvrachea putan “tika polleli; to tika ghevn gelo ani tiche kodden nhidun tika bhoxttaili.” Kanaanitkar onoitik lok mhunn zannam astana pasun Dina tanchea sangata ixttagot kiteak korta? Ti aplea piraiechea ostoreancho sangat zhoddunk sodhtali kai? Ti aplea thoddea bhavam bhaxen hottʼtti ani avoi-bapaichi adnea aikonam tosli asli kai? Dina Shekemachea ostoreank porot-porot mellonk voitali dekhun kitem porinnam zalo? Ani tea udexim Jakobak ani Leak kitli khont ani loz bhogchi poddli tem Utpoti pustokant vachtana chintun polloiat.—Utpoti 34:1-31; 49:5-7; Tosoch The Watchtower, June 15, 1985, pan 31 polloiat.

lvs 124 ¶14

“Pozoddponna Thaun Sarkem Pois Ravat!”

¹⁴ Shekemak jem sarkem ani chaltem dislem tem tannem kelem. Dina taka avoddlem dekhun, to “tika ghevn gelo” ani tannem “tika bhoxttaili.” (Utpoti 34:1-4. vach) Hea vaitt ghoddnnek lagon, Dinak ani tichea akʼkhea kuttumbak eka fattlean ek zaite vaitt porinnam bhogche poddle ani khub dukh soschem poddlem.—Utpoti 34:7, 25-31; Galasiekarank 6:7, 8.

w09 9/1 21 ¶1-2

Tuzo Opman Zata Tednam

Sudd vo bodlo gheun aplem dukh unnem zatolem mhunn zaito lok chintʼta. Udharonnak, Shekeman Dinak bhoxttaili mhunn Jakobachea putank kollʼllem tednam “te thottakle ani teach borabor ragabhorit zale.” (Utpoti 34:1-7) Aplea bhoinnik vaitt kelem mhunn, Jakobachea dog putamnim Shekemachea ani tachea ghorannea add ek manddnni kaddli. Konnakuch dubav dinastana, Simeon and Levi-n Kanaanitanchea xarant vochun Shekemak ani soglea dadleank jivexim marun uddoile.—Utpoti 34:13-27.

Sogleancho jiv kaddlo dekhun hi oddchonn suttavi zali kai? Aplea putamnim jem kelʼlem tem Jakobak kollʼllem tednam tannem tapoun tankam mhunnttlem: “Tumi atam mhaka sonkottant ghalo. . .soglle mhozo dves kortole. Mhoje kodde chodd monis nant; ani te soglle ekttai zaun mhoje add ieun dhadd ghaltit zalear, sogllem amchem kuttumb nanch zaun vetolem.” (Utpoti 34:30) Hoi, bodlo gheun oddchonn suttavi zaunk na punn tache bodlek, tankam vaitt porinnam bhogcho poddlo. Atam Kanaanit lok ragan bhoron Jakobachea kuttumbacher porot holʼlo korunk xoktale. Dekhun, Devan Jakobak ani tachea kuttumbak thoim thaun Bethel-ak vochunk sanglem.—Utpoti 35:1, 5.

it-1 600 ¶4

Deborah

1. Rebekachi nors. Rebeka aplea bapaichem, mhunnchem Bethuel-achem ghor soddun Izaka lagim kazar zaunk Palestin-ant voita tednam tiche borabor Deborah asli. (Ut. 24:59) Deborahn Izakachea ghorant zaitim vorsam seva kelʼli ani Rebeka melea uprant, tinnem Jakobachea ghorantui seva keli. Rebeka Izaka lagim kazar zaun sumar 125 vorsam uprant Deborah meli ani tika Bethelant eka vhodd rukhachea mullak purli. Tea rukhak ‘Dukhacho Asonn’ vo roddnneacho rukh mhunn nanv dilem. Ti Jakobak ani tachea kuttumbak khub mogachi asli mhunn hem dakhoun dita.—Ut. 35:8.

w17.12 14

Vachpeam Thaun Prosn

Adlea Israelant, Mesias jea vonxavollintlean ieuncho aslo ti vonxavoll malgoddea putachea hokʼkacher adarit asli kai?

Ami thodde pavtti oxem mhunnttlolem ani Hebrev 12:16-a pormonnem hem sarkem koxem distalem. Tem vers sangta, “Ezau porim sonvsari monachim konnuch aschim nhoi. Tannem eka jevnnache bodlek malgoddea putache aple hokʼk vikle.” Hache voilean oxem dista ki Jakoban “malgoddea putache aple hokʼk,” vikte ghetle tednam to Mesiasachea vonxavollicho ek purvoz zaunk pavlo.—Mt. 1:2, 16; Lukas 3:23, 34.

Punn, Bible-antlea thoddea ghoddneam udexim kollon ieta ki Mesiasacho purvoz zaunk, malgoddo put asop gorjechem nasle. Thodde purave polloum-ia:

Jakobak (Israel) Lea vorvim zolmolʼlea putam modlo, Reuben malgoddo put aslo. Uprant, Jakobak dusre ani mogache baile vorvim mhunnttlear, Rakela vorvim poilo Juze zolmolo. Reuben-an chuk adarli tednam tachea malgoddea Putacho hokʼk Juzek mellʼllo. (Ut. 29:31-35; 30:22-25; 35:22-26; 49:22-26; 1 It. 5:1, 2) Toripunn, Mesias Reuben-achea vonxavollint nhoi mhunn Juzechea vonxavollint ieunk na. To Jakobacho ani Leachea chovtea puta vorvim mhunnchem, Judachea vonxavollint ailo.—Ut. 49:10.