Tü nüshajalakat Mateo
20 »Aluwataajeechi Maleiwa chejee iipünaajee. Tia müsü aka saaʼin nukuwaʼipa wanee wayuu atamaakai wattachon sünain achajawaa wayuu aʼyataainjanakana nümüin suluʼu tü niyüüjain nüpünajakalü aluʼu uuwa. 2 Nüjütaka suluʼumüin tü niyüüjainkat na wayuu aʼyataainjanakana nümüin, keraapa nünüiki namüin süchiki nuwalaajüinjanain naya wanee ‹denario›* süpüla kaʼikat. 3 Nujuʼitaka nüchikuaʼa chia wayuukai maʼaka saaʼin las nueve* wattaʼa maalü. Niʼrakalaka shaʼwashawalüin waneinnua wayuu sünain maʼyataainwaa chaa metkaaraluʼu. 4 Nümaka namüin: ‹Anashii juʼunule suluʼumüin tü tayüüjainkat süpüla jiʼyataainjanain tamüin, tawalaajeetkalaka jümüin wanaapünaa sümaa tü jiʼyataainkat›. 5 Noʼunakalaka naya wayuukana. Niasaʼa chi wayuu kayüüjainshikai, nujuʼitaka nüchikuaʼa maʼaka saaʼin las doce* otta maʼaka saaʼin las tres* aliika sünain achajawaa wayuu aʼyataainjatka nümüin. 6 Nujuʼitaka nüchikuaʼa chi wayuu kayüüjainshikai maʼaka saaʼin las cinco* aliika, niʼrakalaka waneinnua wayuu shaʼwashawalüin, nümaka namüin: ‹¿Jamüsü siraakaʼa jaaʼu kaʼi sümaa maʼyataainwaa?›. 7 Nasoutaka nümüin: ‹Jama nnojolin jaralin asakajüin waya süpüla aʼyatawaa›. Anuujeseʼe nünüiki namüin: ‹Anashii juʼunule jiʼyataaiwa tamüin suluʼu tü tayüüjasekat›.
8 »Shiasaʼa aipoʼupa, nümaka chi kayüüjainshikai nümüin chi sülaülajanashikai tü aʼyatawaakat: ‹Puuneja na aʼyataashiikana otta puwalaaja naya. Naya puwalaaja palajana na eiwaʼaliikana oʼttaa sünain aʼyatawaa, puwalaajenaka chiiruaa na oʼttatüjüliikana wattaʼapa›. 9 Nantapaaka na wayuu oʼttushiikana sünain aʼyatawaa maʼaka saaʼin las cinco aliika. Saapünaka namüin waneʼewai nakua wanee ‹denario› saaʼu tü naʼyataainkat. 10 Nayasaʼa na oʼttatüjüliikana sünain aʼyatawaa wattaʼa maalü, wainmainjatiaa naaʼinruʼu tü nneerü nakanajakat, waneepejeʼe neʼe ‹denario› aapünaka namüin saaʼu naʼyataain. 11 Shiasaʼa nawalaajünapa, naʼyounalaayaa namaka saaʼujee tü aapünakat namüin nutuma chi kayüüjainshikai. 12 Nasoutakalaka nümüin: ‹¿Jamüsü wanaawakaʼa putuma tü wakanainkat namaa na wayuu eiwaʼaliikana oʼttaa sünain aʼyatawaa? Waneʼeraa neʼe oora naya sünain aʼyatawaa. Akaajasaʼa wayakana oʼttatüjülii wattaʼapa sünain aʼyatawaa otta kaʼisitshii waya›. 13 Nusoutakalaka chi kayüüjainshikai nümüin napüshi na wayuu aʼyounalaakana: ‹Waʼle, mataasü keraakai tanüiki pümüin süchiki waneesüinjatüin «denario» pükanain tatuma. 14 Anashi puʼunule sümaa tü aapünüitpakat pümüin. Anashiisü tamüin wanaawainjatüin pükanain nümaa chi wayuu oʼttakai chiiruaa sünain aʼyatawaa. 15 Laülaa taya saaʼu tü kasa eekat tamaʼana, ¿achumüjataapasaʼa neʼe pia saaʼu nnojolin jeʼiyein taya noulia naya wayuukana?›. 16 Akaweeria neʼe nakuwaʼipa na wayuukana atumawaa. Na chiiruaajanakana, nayeena palajanakana atumawaa. Nayasaʼa na palajanakana, chiiruaajeena naya atumawaa».
17 Soʼu noʼunuin Jerusalénmüin, nuunejaaka Jesús namüiwaʼa na polookana piamamüin nikirajüin jee nümaka namüin wopuluʼu: 18 «Anaasaʼa joo waya oʼunuin Jerusalénmüin eeinjachire naapünüin chi Süchonkai Wayuu* namüin nekiipüʼü na sacerdotekana jee namüin na karaloʼutamaajanakana, saapüneetkalaka nikii süpüla outaa. 19 Aapüneechi sajapuluʼu wayuu nnojotka judíoin, shimeeʼerainpaleechi nia, shiʼyaajeechi otta sükachereechi sünain wanee wunuʼu süpüla outajachin nia. Asoʼiraajeetpejeʼe naaʼin soʼu tü apünüinkat kaʼi».
20 Sürütkaakalaka nünainmüin Jesús nei na nüchonniikana Zebedeo namaʼaleeya na piamashiikana süchon. Süsapainkaka shia nümülatuʼu süpüla suchuntajatüin wanee kasa nümüin. 21 Nümaka Jesús sümüin: «¿Kasa puchunteeka tamüin?». Susoutakalaka nümüin: «Nuluwataapeena Maleiwa, anashii puuʼulaale naikalaain na tachonniikana paʼatoʼu, wanee pikialuʼujee jee wane pipeʼeruʼujee». 22 Anuujeseʼe nünüiki Jesús namüin: «Nnojotsü jiyaawatüin aaʼu tü juchuntakat tamüin, ¿juunteerüjasaʼa jüsüin tü tasüinjatkat jooluʼu?». «Aa, waseerün», namaka nümüin. 23 Nusoutakalaka Jesús namüin: «Shiimain jüseerüin tia, nnojoipejeʼe tayain aneeküin jaraliinjanain aikalaain tekialuʼujee jee tepeʼeruʼujee. Nia chi Tashikai aneekaka na aikalaainjanakana taʼatoʼu».
24 Shiasaʼa naapapa tia na polooshiikana nikirajüin Jesús, naashichijaakalaka nooʼomüin na piamashii wayuu achuntakana aikalawaa naʼatoʼu Jesús. 25 Nuunejakalaka naya Jesús jee nümaka namüin: «Na wayuu aluwataashiikana saaʼu mma, alaülaajaashii naaʼu na wayuu naluwataakana aaʼu. Akaataajaʼa neʼe na wayuu kojutukana atumawaa, laülaashii naya saaʼu wayuu. 26 Nnojotpejeʼe müinjatüin jukuwaʼipa. Chi wayuu miyoʼuweekai jaʼakajee, aʼyataainjachi napüleerua na waneinnua. 27 Chi wayuu eekai kojuteein jaʼakajee niainjachi jüchepchiaka. 28 Shiaʼaya naaʼinraka tia chi Süchonkai Wayuu, nnojoishi nia antüshin süpüla shiʼyataainjatüin wayuu nümüin, antüshi nia süpüla niʼyataainjachin namüin na waneinnua otta naapüinjatüin nikii süpüla suʼttaainjatüin watta saalii wayuu».
29 Sukoʼulayaa sümaka watta saalii wayuu nümaa Jesús nuʼunaiwaʼaya suluʼujee tü pueulokot Jericó. 30 Eejanakalaka piamashii wayuu moʼupaʼasalii joyotuin sotpaʼa tü wopukot. Naapakalaka süchiki nülatüin Jesús suluʼupünaa tia wopukot, naʼwaataka nümüin Jesús, «pümüliaja waya Señotkalee, piakai Nüchonkai David», namakalaka nümüin. 31 Nachiaanakalaka sutuma wayuu süpüla koʼutajanain naya, emetutpejeʼe maʼin nekiisa sünain maa: «Pümüliajaʼaya waya Señotkalee, pia Nüchonkai David». 32 Nüshaʼwalaaka Jesús sümaa nuunejüin naya, nümakalaka namüin: «¿Kasa jüchekaka taaʼinrüin jüpüleerua?». 33 Nasoutakalaka nümüin: «Anashii koʼule waya putuma Señotkalee». 34 Sümülialaaka naaʼin Jesús naalinjee. Niʼitaaka najapü sünain noʼu na moʼupaʼasaliikana, koʼuka naya jee noʼunakalaka nümaa Jesús.