Tü nüshajalakat Juan
10 «Shiimain tanüiki jümüin, kaʼruwarai chi wayuu awatakai süsepü sukulaatse anneerü, chi nnojoikai ekeroluin soʼuluʼupünaa. 2 Eekajasaʼa chi anneetpuʼukai ekerotushi soʼuluʼupünaa tü kulaalakat. 3 Ojutanna apüleeruachi nia nutuma chi süpüʼüyakai tü kulaalakat, ayaawatünüsü nünüiki chi anneetpüʼükai sutuma tü naʼanneetsekat. Neenajüin tü naʼanneetsekalüirua süka sünülia sümaa nujuʼitirüin shia anooipaʼamüin. 4 Niyuʼlapa tü anneetkat suluʼujee tü kulaalakat, oʼunushi nia süpüleerua, sükoʼulayaa sümakat tü anneetkat nüchiirua süka shiyaawatüin nünüiki. 5 Nnojoleerü akoʼulayaa müin tü anneetkat nüchiirua wanee wayuu eekai naatajachin, aʼwalakajaweerü nüpüleerua, jama nnojoluin shiyaawatüin nünüiki wanee wayuu eekai naatajachin». 6 Shiyaawase nünüiki Jesús tia makat, nnojotpejeʼe nayaawatüin saaʼu kasain tü naashajaain achiki.
7 Naashajaaka Jesús nüchikuaʼa namüin: «Müshi taya maʼaka saaʼin soʼu kulaala eepünaale sülatüin anneerü. 8 Kaʼruwaralii neʼe napüshuaʼa na wayuu tayayaakana naashin, nnojotpejeʼe kacheʼein tü anneetkat sümüin nanüiki. 9 Müshi taya maʼaka saaʼin soʼu kulaala, oʼttaajeechi chi eekai nülatüin eepünaale taya. Meechi nujuʼitakai aaʼin jee meechi nikerotokoi aaʼin, eejeetkalaka eküülü nüpüla. 10 Chi kaʼruwaraikai antüshi neʼe shiiʼiree aʼluwajaa, shiiʼiree uwomuyuuin nia otta shiiʼiree najaʼttirüin wanee kasa, eekajasaʼa tayakai antüshi süpüla taapajachin kataa oʼuu jümüin süpüla kaʼikat süpüshuaʼa. 11 Taya chi arüleejüi anamiakai maʼin, jamüshijaʼa chi arüleejüi eekai anamiain, nnojoishi mmoluin seema outaa* saaʼujee naʼanneetse. 12 Chi wayuu aʼyataakai saaʼu nneerü, nnojoishi müin aka naaʼin chi arüleejüikai jee nnojoishi müin nia maʼaka naaʼin chi kaʼanneetseshikai. Süntüle wanee erü simoluuna sünainmüin tü anneetkat, apantajaashi neʼe sümaa nüpütüin tü anneetkat, anta müsia tü erü simoluunakat, süsaajaain tü anneetkat sümaa suʼwalakajeʼerüin tü süpüshikat. 13 Chi wayuu aʼyataakai saaʼu nneerü, apantajaashi neʼe süka nuwalaajünawalin saaʼu tü niʼyataainkat, nnojotsü kachipünaain naaʼin tü anneetkat. 14 Taya chi arüleejüi anamiakai maʼin, teʼraajüin tü taʼanneetsekat jee shiʼraajüinña taya tü taʼanneetsekat 15 maʼaka teʼraajünüin nutuma chi Tashikai, teʼraajüinña Niaya jee nnojoishi mmoluin taya seema outaa saaʼujee taʼanneetse.
16 »Eesiaʼaya waneirua taʼanneetse nnojotkalü yaain saʼaka tü anneerü yaakat tamaa. Tantirajatü tia anneetkalüirua jee kacheʼejeerü shia sümüin tanüiki. Kottiraweerü tü taʼanneetsekat, tayeechika arüleejüin shia tamüiwaʼa. 17 Anuu tü aikalü aaʼujee taya nüpüla chi Tashikai, aapajiraashi taya tekii saaʼu wayuu jee kateerü toʼu tachikuaʼa nutuma. 18 Nnojotsü jaralüin oʼutuin taaʼin, taapajiraain tekii süka taaʼin tamüiwaʼa, aapünüsü laülawaa tamüin süpüla taapajiraainjachin tekii jee aapünüsü laülawaa tamüin süpüla katajatüin toʼu tachikuaʼa, shia nuluwataaka anain taya tia chi Tashikai».
19 Nnojoishii paaʼinwain nachikuaʼa na judíokana sünainjee tü nümakat Jesús. 20 Eeshii na makana anüiki mayaa: «¿Jamüshiikai jaa jümaka nümüin? Wayuu yolujaashi neʼe, mamainnashi makaʼa nia». 21 Eeshii na makana anüikiya: «Nnojotsü nünüikin wanee wayuu eekai yolujaashin tia. ¿Aashin nnojoluin süpüla koʼuin wanee wayuu nutuma wanee eekai yolujaashin?».
22 Wanaa sümaa tia, aainjünüsü chaa Jerusalén tü Miʼiraa Shikiirakat tü aʼwaajüleekat Maleiwa. Juyapoʼujatü tia, 23 chajachikalaka Jesús eekai tü aʼwaajüleekat, warai müshi nia suupunaapünaa tü Luma naainjirakat Salomón.* 24 Pasanainjaakalaka nia natuma na judíokana jee namakalaka nümüin: «¿Joujeechi maʼin püküjaka wamüin jaralin maʼin pia? Pialejeʼeya chi Cristokai, püküjaleʼeya shia uwatuwoʼushi wamüin». 25 Nusoutakalaka Jesús namüin: «Mataasü taküjaitpakai shia jümüin, nnojotpejeʼe junoujain sünain tanüiki. Atüjaana aaʼuchi jaralin kajünalain taya sünainjee tü kasa taaʼinrakat saaʼu nünülia chi Tashikai. 26 Nnojoliipejeʼe jia anoujain tanain süka nnojoliin taʼanneetsein jia. 27 Shiyaawata aaʼu tanüiki taʼanneetse, teʼraajüin shia otta oʼunusü shia tachiirua. 28 Kateerü soʼu tatuma süpüla kaʼikat süpüshuaʼa, nnojoleerü ajaʼttinnüin shia, nnojoishi eein wanee wayuu asütajachikai shia toulia. 29 Nnojotsü eein wanee kasa alanaʼaleeka ojutu suulialeʼeya tü kasa naapakat tamüin chi Tashikai otta nnojoishi eein wanee wayuu asütajachikai tü anneetkat nuulia chi Tashikai. 30 Paaʼinwashi taya nümaa chi Tashikai».
31 Naapaakalaka ipa nachikuaʼa na judíokana süpüla naʼinaʼalajachin Jesús. 32 Anuujeseʼe nünüiki Jesús namüin: «Wainmairü maʼin tü kasa anasü taaʼinrüitkat juʼupala, tü nuluwataakalü anain taya chi Tashikai, ¿jeʼtsü maʼin tü jüʼinaʼalajachikalü anainjee taya?». 33 Nasoutakalaka na judíokana nümüin: «Nnojoishi pia waʼinaʼalajachin saalinjee tü kasa anasü paaʼinrakat, waʼinaʼalajachi pia saalinjee mojutuin Maleiwa pümüin, mayaapejeʼe wayuuin neʼe pia müshi pia maʼaka naaʼin wanee maleiwa paajüin». 34 Anuujeseʼe nünüiki Jesús namüin: «¿Aashin mayaain tü Pütchi Aapünakat nümüin Moisés ‹Anuu tanüiki jümüin: maleiwa jia»›? 35 (Nnojotsü süpüla sümalajaainjatüin tü sümakat tü Karaloʼuta Nüchikimaajatkat Maleiwa), «maleiwa» nümülejeʼe Maleiwa namüin naya wayuu kaliajanakana tia pütchikat, 36 ¿jamakaʼa ‹mojutusai Maleiwa putuma› jümaka tamüin saaʼujee ‹Nüchon taya Maleiwa› tamüin jümüin? Eerejeʼe kojutuin taya nutuma chi Tashikai jee nüjütüin taya mmapaʼamüin. 37 Nnojo junoujain tanüiki nnojorülejeʼeya taaʼinrüin tü nuluwataakalü anain taya chi Tashikai. 38 Akaajasaʼa taaʼinrüle tia, anashii junoujale sünainjee tü kasa taaʼinrakat, jaʼitashiijaʼa nnojoliin junoujain tanain. Jütüjaajeetkalaka saaʼu paaʼinwain chi Tashikai tamaa». 39 Nütaʼüneeka Jesús nüchikuaʼa, isajapejeʼe nia.
40 Nuʼunakalaka nüchikuaʼa Jesús waneemüin saʼata tü süchikat Jordán, eepuʼule woutiisain wayuu nutuma Juan, makatakalaka nia chayaa. 41 Suʼunakalaka watta saalii wayuu eemüin Jesús jee sümakalaka nüchiki: «Nnojoishi aainjain Juan waneesiaakaijeʼe kasa pülasü, shiimainpejeʼe tü nümakat nüchiki wayuukai chii». 42 Wattakalaka maʼin saalii wayuu kanoulaka nünain Jesús.