Palajatka karaloʼuta namüinjatka na chajanakana Corinto
9 ¿Aashin taashin takuwaʼipa süpüla taaʼinrüin tü taaʼinreekalü amüin? ¿Aashin aluwataaushin taya? ¿Aashin teʼrüin chi Waseñotsekai Jesús? ¿Aashin junoujainnapain saaʼujee taʼyataain nümüin chi Señotkai? 2 Jütüjaa aaʼu taluwataaushin mayaainjeʼe nnojoluin sunoujain wayuu sünain tia. Jaaʼujee jiakana atüjaana aaʼuchi taluwataaushin nutuma chi Señotkai.
3 Anuu tü tanüikinjatkat neʼipajee na wayuu mojukana anüiki tachiki: 4 ¿Aashin wekajatüin jee wasajatüin wanee kasa eekai saapünüin wamüin? 5 ¿Aashin wamaainjatüin waʼwayuuse müleka sunoujale maʼaka namaain naʼwayuuse na aluwataaushikana? Shia naaʼinraka tia Cefas otta müshiʼiya na nimüliayuukana chi Señotkai Jesús. 6 ¿Tayakaʼa aʼyataainjachin neʼe nümaa Bernabé süpüleerua tü choʼujaakat wamüin? 7 ¿Aashin walaain chi surulaatkai süpüla niyaʼlajüinjatüin tü kasa choʼujaakat nümüin? Jamüshijaʼa wanee wayuu nüpünajüle uuwoʼulia, nika achonlu. Akaataajaʼaya neʼe wanee wayuu eekai nürüleejüin, nüsa achirat tü nürüleejüinkat.
8 Nnojotsü pütchin neʼe taleʼeruʼujeejatü tü taküjakat jümüin. Aküjünüsü süchiki tia suluʼu tü Pütchi Aapünakat nümüin Moisés.* 9 Anuu tü ashajünakat suluʼu tü Pütchi Aapünakat nümüin Moisés: «Nnojo keimataalajain putuma wanee paaʼa toolo wanaa sümaa nüsaichijain tü trigokot süka nuuʼui». ¿Shiache kaalinka nüpüla Maleiwa paaʼa eekai tooloin? 10 ¿Nüküjataapa tia pütchikat wayaaluʼu? Ashajünüsü tia pütchikat shiiʼiree aneein wakuwaʼipa. Jamüshijaʼa najararüle wanee wayuu saaʼu tü nüpünajüinkat otta eetaale wanee eekai nuwaajüin süchon tü nüʼttiakat, naaʼinrüinjatü tia sümaa jülüjain naaʼin nekeenain süchon tü naʼttiakat.
11 Weitajülejeʼeya nünüiki Maleiwa jümüin, ¿jamakaʼa nnojotka anain jükaalinjale waya sümaa tü kasa choʼujaakat wamüin? 12 Jükaalinjalejeʼeya waneinnua wayuu sümaa tü kasa choʼujaakat namüin, ¿wayeematataakaʼa nnojoliin jükaalinjain? Nnojoliipejeʼe waya achuntuin kaalinwaa jümüin. Eʼrüshii waya wamüliala süpüla nnojoluinjatüin kapüleein sümüin wayuu aapawaa sümaa tü pütchi waküjakat nüchiki Cristo. 13 ¿Nnojotsükai jütüjaain saaʼu? Na wayuu chakana aʼyataain suluʼu tü aʼwaajüleekat Maleiwa, neküin tü antinnakat suluʼumüin tü aʼwaajüleekat. Nayasaʼa na wayuu aʼyataakana eere saʼajünüin wanee kasa nümüin Maleiwa, aapünüsü namüin süpüshi tü aʼajünakat nümüin Maleiwa. 14 Akaʼaya neʼe naashin chi Señotkai, na wayuu aküjakana tü pütchi anakat maʼin,* epijaainjana sünainjee.
15 Nnojoishi taya achuntuitchin kaalinwaa jümüin otta nnojotsü tashajüin jümüin pütchikat tüü süpüla jükaalinjainjachin taya. Shia anaʼleekajaʼa aluʼu outule taya suulia... ¡Nnojorüleejaʼa jaralüinjatüin amalajeʼerüin tü kasa taʼwaataakalü aluʼu! 16 Nnojoishi taya aʼwaataainjachin suluʼu taküjain tü pütchi anakat maʼin,* taküjainjatiaʼaya neʼe tia pütchikat. ¡Aluʼutaʼaleeshijaʼa maʼin taya nnojoire taküjain süchiki tü pütchi anakat maʼin! 17 Taainjale tia süka taaʼin tamüiwaʼa, eʼreechi taya kasa anasü sünainjee, jaʼitakajeʼe taluwanaajuushire sünain. Taaʼinrajatia neʼe tia, jama shiain tü aʼyatawaa eʼitaanakat tajapuluʼu. 18 ¿Kasakaʼa teʼreerüin sünainjee tia? Shia teʼreetka taküjain tü pütchi anakat maʼin süka taaʼin tamüiwaʼa otta nnojoleechi taya achekajüin sümüin wayuu saaʼujee tia. Nnojoleechikalaka tachuntuin jümüin wanee kasa saaʼujee taküjain jümüin tü pütchi anakat maʼin.
19 Mayaainjeʼe taashin takuwaʼipa süpüla taaʼinrajatüin wanee kasa, müshi taya maʼaka naaʼin wanee achepchiee namüin na wayuukana shiiʼiree wainmeein na takaalinjakana. 20 Müsü takuwaʼipa maʼaka naaʼin wanee judío shiiʼiree takaalinjeein na wayuu judíokana. Taaʼinrüin tü nuluwataakalü anain Moisés süpüla takaalinjain na wayuu oonookana sümaa tia pütchikat, mayaainjeʼe nnojoluin suchuntunuin tamüin taaʼinrajatüin tia. 21 Müsü takuwaʼipa maʼaka nukuwaʼipa wanee wayuu nnojoikai oonooin sümaa tü pütchi aapünakat nümüin Moisés shiiʼiree takaalinjeein na wayuu nnojoliikana oonooin sümaa tia pütchikat. Taaʼinrüin tia mayaashijeʼe toonooin sümaa tü nuluwataakalü anain Maleiwa otta toʼunirüin takuwaʼipa sükajee tü nuluwataakalü anain Cristo. 22 Müsü takuwaʼipa maʼaka nakuwaʼipa na wayuu matchinkana anoula shiiʼiree takaalinjeein naya. Tooʼulaküin kasa süpüshuaʼa shiiʼiree takaalinjeein wayuu maʼleekalia. Eejeechijaʼa chira eekai nuʼttaain. 23 Taaʼinrüin süpüshuaʼa tia shiiʼiree taküjeein sümüin wayuu tü pütchi anakat maʼin.
24 Jütüjaa aaʼu wainmain na wayuu awanaajakana sünain wanee ayoujirawaa, waneeshipejeʼe neʼe chi akanajakai. Shiakalaka anain aluʼu juwataale shiiʼiree jükanajüinjanain. 25 Napüshuaʼaleʼeya na wayuu awanaajakana sünain wanee ayoujirawaa nachecherüin naaʼin suulia kasa süpüshuaʼa. Naaʼinrüin tia süpüla nakanajüinjanain* wanee kasa atüjaka ajaʼttaa. Akaajasaʼa wayakana waaʼinrüin tia süpüla wakanajüinjanain wanee kasa matüjainka ajaʼttaa. 26 Nnojoishi taya awanaajüin süpaʼa mma. Lotusü tojunain suulia tasheʼejüin neʼe joutai. 27 Müshi tasheʼejakai saaʼin tatapaʼa jee müsü aka saaʼin wanee tachepchia süpüla nnojoluinjatüin sumojujaain takuwaʼipa noʼuluʼu Maleiwa süchikijee taküjain pütchi sümüin wayuu.