Tü nüshajalakat Lucas

21 Niirakaaka Jesús namüin na wayuu washinnuu ejitakana nanneetse suluʼu tü kojon süpülajanakat nneerü. 2 Wanaa maʼin sümaa tia, niʼrakalaka wanee wayuu müliasü outa aʼwayuuset, ejitaka suluʼu tü kojonkot piamasüchein nneerü maliapalasat 3 jee nümakalaka Jesús: «Tü nneerü shijitakat suluʼu tü kojonkot tü wayuu müliasü outakalü aʼwayuuse, alanaʼaleesia suulia tü nejitakat nala wayuukana. 4 Jamüshiijaʼa nala wayuukana, nasülajüin neʼe tü süpütaalakat wanee kasa namaʼana, eekajasaʼa tü wayuu müliasükat shijitüin süpüshuaʼa tü shipijaainjatkalü aaʼu».

5 Wanaa sümaa naashajaain waneinnua wayuu süchiki anain maʼin shiyolojo tü aʼwaajüleekat Maleiwa sutuma tü ipa akumajünakalü aka shia otta tü kasa anasü asülajünakat nümüin Maleiwa, 6 nümakalaka Jesús: «Eejeerü kaʼi sujuttinnakalü oʼu türa ipa jiʼrakat, osolojuneerü süpüshuaʼa». 7 Anuujeseʼe nanüiki na wayuukana nümüin Jesús: «Ekirajüikalee, püma wamüin kasoʼuleerüin alatüin tü makat otta kaseerüin wayaawatüin akajee sülüʼülaain tia». 8 Nusoutakalaka Jesús namüin: «Eeja jaaʼin suulia shimeejüin jia wayuu. Eejeena na wayuu tayayaakana naashin. ‹Tayasa chia makai›, meena. ‹Alüʼütsü tü kaʼi yaawatüjütkalia paala›, eejeena na makana. Joonoʼoloyaai sümaa nanüiki. 9 Nnojotsü ainkuuinjatüin jaaʼin jaapapa süchiki atkawaa jee kasachiki süka sülatüinjatüinña palajana tia. Nnojotpejeʼe antamaateerüin tü kaʼi sajaʼlajaainjatkalü oʼu tü kasa alatakat sainküin mma».

10 Anuujeseʼe nünüiki namüin: «Atkaajiraajeerü wayuu suluʼujee wanee pueulo sümaa waneʼeya, atkaajiraajeerü wayuu suluʼujeejatü wanee mma sümaa waneʼeya. 11 Emetuleerü maʼin tü mmakat sukutkujaapa, aijeerü jamü otta jouleerü ayuulii sainküin mma. Shiʼreerü wayuu kasa mmoleetka eema shia sümaa shiiʼiyalaajeerüin kasa iipünaajee.

12 »Süpülapünaa sülatüin süpüshuaʼa tia makat, ataʼünneena jia jee mülieerü jaaʼin atumawaa. Amaaneena jia suluʼumüin tü ekirajüleekat nüchiki Maleiwa jee apüreesajüneena jia. Saaʼujee tekirajanain jia, amaaneena jia namaʼanamüin na sülaülakana mma jee namaʼanamüin na aluwataashiikana. 13 Sükajee tia, aküjeena jia pütchi sümüin wayuu. 14 Anakajaʼa nnojorüle yapain jutuma tü jünüikinjatkat jusoutapeena neʼipajee 15 süka taküjeerüin jümüin tü jünüikinjatkat otta kekiijeena jia tatuma, iseetkalaka nachiki na jiʼipolokana tü nanüikinjatkat jiʼipajee. 16 Aapüneena ekii jia nutuma jüshi, jii, juwalayuu, kasayuu jünain otta jaʼaleewainyuu. Eejeena na oʼutunakana aaʼin jaʼakajee. 17 Süʼürüleena jia wayuu saaʼujee tekirajanain jia. 18 Mayaapejeʼe sülatüin jümüin tia, nnojoleerü ojutuuin waneesiaakaijeʼe juʼwala. 19 Oʼttaajeena jia jüchecherüle jaaʼin.

20 »Jiʼrapa suutkajünüin Jerusalén natuma na surulaatkana, jiyaawateerü aaʼu sülüʼülüin sükalia süpüla sajaʼttinnajatüin. 21 Anashii naʼluwataale saaʼumüin tü uuchikat na wayuu chakana Judea. Nayasaʼa na chakana Jerusalén, anashii noʼunule chejee otta na chakana yüüjapaʼa, anashii nnojoliire naleʼejüin Jerusalénmüin. 22 Süsalainjatü saainjala wayuu soʼu kaʼikat tia süpüla shikeraajüin süpüshuaʼa tü ashajünakat paala. 23 Aluʼutaʼaleeshiijaʼa maʼin na jieyuu ipuonnuukana otta na atujeʼerakana wanaa maʼin sümaa tia kaʼikat süka jouleerüin maʼin müliaa suluʼu mmakat tüü otta süsaleena naainjala nutuma Maleiwa na wayuu yaakana suluʼu tü pueulokot. 24 Eejeena na oʼutunakana aaʼin süka chajaruuta otta eejeena na amaanakana süpüla püreesain naya sainküinpünaa tü mmakat. Meerü süliikajünakai aaʼu Jerusalén natuma na wayuu nnojoliikana judíoin, waneʼereeya shikeraajapa tü kaʼi eʼitaanakat napüleerua na wayuu nnojoliikana judíoin.

25 »Eejeerü tü kasa eeʼiyalaajeetkalü eejee chi kaʼikai, eejee tü kashikat otta eejee tü shüliwalakat otta müsia yaa mmapaʼa, shapaajeerü maʼin saaʼin wayuu süka nnojoleerüin sütüjaain saaʼu tü saaʼinrajatkat saapapa suʼlotuin tü palaakat otta shiʼrapa tü sümünakat. 26 Oʼuchichajaajeerü wayuu sutuma mmoluin maʼin shia otta sutuma shapaain saaʼin saaʼujee tü kasa alatajatkat yaa mmapaʼa süka meerüin sülianajaanakai aaʼin tü sirumatuʼukat. 27 Shiʼreechi wayuu chi Süchonkai Wayuu* sünain antaa saʼaka wanee siruma sümaa pülasheechin nia otta kojuteechin nia atumawaa. 28 Wanaa sümaa sülatüin tia makat, anashii jüshaʼwalaale sümaa jiyalerüin jikii süka sülüʼülüin tü kaʼi taasheetkalü oʼu jukuwaʼipa».

29 Nümakalaka Jesús sümaa kayaawasein nutuma tü nikirajakalü anain: «Jülüjataa jaaʼin sukuwaʼipa tü wunuʼu kanüliakat higuera sümaʼaleeya süpüshuaʼa tü wunuʼuliakat. 30 Jiʼrapa yotuin shia, jiyaawata aaʼu sülüʼülüin sükalia joutaleʼu. 31 Akaʼaya jiʼrapa sülatüin süpüshuaʼaleʼeya tü taküjaitpakat jümüin, jiyaawateerü aaʼu sülüʼülüin nükalia chi Maleiwakai süpüla aluwatawaa. 32 Tamüshii paala jia, eejeena na wayuu eekana maaʼulu yaa sülatapeena süpüshuaʼa tü taküjaitpakalü achiki jümüin. 33 Jaʼitasü nnojoluin tü sirumatuʼukat jee tü mmakat, ayateeria tü tanüikikat süpüla kaʼikat süpüshuaʼa.

34 »Eeja jaaʼin suulia shiain jaaʼinmaain maʼin wainmainjatüin jiküin, miyoʼuinjatüin jüsüin otta suulia jaaʼinmaain maʼin tü kasa alatawaikat jümüin, ainka meerüjaʼa neʼe jaaʼin tia kaʼikat 35 maʼaka süinküin saaʼin wüchii tü kasa ataʼünnakalü aka shia. Anta meerü sooʼomüin wayuu maʼleekalia tia kaʼikat. 36 Eeja jaaʼin jee juchunta maʼin waneepia süpüla isajüinjanain jia suulia süpüshuaʼa tü kasa alatajatkat jee shaʼwateenakalaka jia nümülatuʼu chi Süchonkai Wayuu».

37 Ekirajawaishi Jesús soʼukaiwai suluʼu tü aʼwaajüleekat Maleiwa, oʼunawaipejeʼe nia aipaʼa saaʼumüin tü wutai kanüliakat Olivos. 38 Oʼunawaisü wayuu wattaʼa maalü sünain aapajaa nünüiki suluʼu tü aʼwaajüleekat Maleiwa.