Tü nüshajalakat Juan
16 »Taküjain jümüin tüü, süpüla nnojoluinjatüin sümalajaain junoula. 2 Ajünajaaneena* jia suluʼujee tü ekirajüleekat nüchiki Maleiwa. Eejeerü wanee kaʼi juʼutuneenaka aaʼin natuma na wayuukana süka anayaain tia noʼuluʼu Maleiwa naküjainruʼu. 3 Naainjeetpejeʼe tia, jama nnojolin neʼraajüin taya otta nnojoishi neʼraajüin chi Tashikaiya. 4 Shikeraajapa süpüshuaʼa tü taküjaitpakat jümüin, soteerü jaaʼin taküjain shia jümüin.
»Nnojotsü shia taküjain jümüin paalainka süka eejachin taya jümaa. 5 Aleʼejüinjachi taya nümaʼanamüin chi Kajünalakai taya, nnojoipejeʼe wanee jaʼakajee asakirakai taya süchiki jalaʼwalin taya. 6 Mojupejeʼe neʼe jaaʼin sutuma taküjain tia jümüin. 7 Shiimain tü tamakat jümüin, oʼunajachi taya süpüla anainjatüin jukuwaʼipa. Jamüshijaʼa nnojoire toʼunuin, nnojoleerü antüin jünainmüin tü nüpülainkat Maleiwa. Eekajasaʼa toʼunule, taluwataajeerü shia jümüin. 8 Naapapeena Maleiwa jümüin tü nüpülainkat, sütüjaajeerü aaʼu wayuu jaralin aaʼinrüin kasa mojusü, jaralin aaʼinrüin kasa eekai lotuin akuwaʼipa otta jaralin süsalain naainjala. 9 Palajana atüjaaneerü aaʼu jaralin aaʼinrüin kasa mojusü süka nnojolin kanoulain naya tanain. 10 Süchikijee atüjaaneerü aaʼu jaralin lotuin akuwaʼipa süka chainjachin taya eemüin chi Tashikai jee nnojoleechi taya jiʼrüin piantua. 11 Otta atüjaaneerü aaʼu sutuma wayuu jaralin süsalain naainjala süka süsalaichipain atumawaa chi aluwataashikai saaʼu wayuu.
12 »Wainmayülia maʼin tü kasa taküjainjatkat jümüin, nnojotpejeʼe taküjeerüin shia jümüin jooluʼu, jama nnojoleerüin jiyaawatüin saaʼu. 13 Naapapeena Maleiwa tü nüpülainkat jümüin, tü jiyaawatakalü akajee tü shiimainkat, jiyaawateerü aaʼu süpüshuaʼa tü shiimainkat. Nnojotpejeʼe shia aluwataain sümüiwaʼa, sükajee tü nüpülainkat Maleiwa jiyaawateerü aaʼu tü kasa nüküjakalü achiki jee tü kasa eejeetkat mapeena. 14 Saapünapeena jümüin tü nüpülainkat Maleiwa jütüjaajeechi aaʼu kojutuin taya atumawaa. Sükajee tü nüpülainkat Maleiwa jütüjaajeerü aaʼu tü kasa taküjakat. 15 Taya kakoroloko süpüshuaʼa tü kasa eekat nümaʼana chi Tashikai, müshijeseʼe taküjainkain jümüin jütüjaajeerüin saaʼu sükajee tü nüpülainkat Maleiwa tü tamakat. 16 Soʼu palit kaʼi nnojoleechi taya jiʼrüin, jiʼreechipejeʼe taya soʼu palit kaʼi tachikuaʼa».
17 Anuukalaka nanüiki waneinnua nikirajüin Jesús naapapa tü nümakat: «¿Jamaluʼutche nünüiki wamüin wanaa sümaa nümüin: ‹Soʼu palit kaʼi nnojoleechi taya jiʼrüin, jiʼreechipejeʼe taya soʼu palit kaʼi tachikuaʼa›? Otta wanaa sümaa nümüin wamüin: ‹Chainjachi taya eemüin chi Tashikai›». 18 Anuu sooʼomüin nanüiki: «¿Jamaluʼutche tü nümakat wanaa sümaa nümüin: ‹Soʼu palit kaʼi›? Nnojotsü wayaawatüin saaʼu kasain nüküjeein achiki wamüin». 19 Anuujeseʼe nünüiki Jesús namüin na nikirajüinkana nütüjaapa saaʼu nüsakinneein natuma: «¿Jamüshii jaashajaajiraaka sünainjee tamüin jümüin ‹Soʼu palit kaʼi nnojoleechi taya jiʼrüin, jiʼreechipejeʼe taya soʼu palit kaʼi tachikuaʼa›? 20 Shiimain tü tamakat jümüin, aʼyalajeena jia jee mojeerü maʼin jaaʼin, talateetpejeʼe saaʼin wayuu. Mojeerü jaaʼin, talateetpejeʼe jaaʼin mapa. 21 Aʼalijaasü wanee wayuu süpülapünaa jemeyuluin shia, niweetapa chi süchonkai motusü saaʼin tü sümülialakat, jama talatüin maʼin saaʼin nümaa chi süchonkai. 22 Akaataajaʼa neʼe jukuwaʼipa, mojusü maʼin jaaʼin maaʼulu yaa, aleʼejeechipejeʼe taya tachikuaʼa jünainmüin. Talateetkalaka maʼin jaaʼin otta nnojoleerü jaralüin amalajeʼerüin tü talataa eekat suluʼu jaaʼin. 23 Soʼu kaʼikat tia, nnojoleechi taya jüsakirüin sünain wanee kasa, shiimain tü tamakat jümüin, jaʼitasü kasain juchuntuin nümüin chi Tashikai tanülialuʼu, naapeerü shia jümüin. 24 Maaʼutpünaa yaa, nnojotyülia juchuntuin wanee kasa tanülialuʼu, juchunta, saapüneetka jümüin wanee kasa. Miyoʼuleejeetka tü talataa eejeetkat suluʼu jaaʼin.
25 »Taküjain jümüin tia sümaa kayaawasein tanüiki jümüin, eejeetpejeʼe tü kaʼi, nnojoleetkalü oʼu kayaawasein tanüiki jümüin. Taküjaleejeeria uwatuwoʼushi jümüin jaralin chi Tashikai. 26 Noʼu kaʼikai chia, achunteena jia nümüin chi Tashikai tanülialuʼu. Nnojoipejeʼe tayainjachin achuntuin nümüin jüpüleerua. 27 Aishii jia nüpüla chi Tashikai, jama alin taya jüpüla otta junouja anainrü nüjünalain taya chi Maleiwakai. 28 Antüshi taya saʼakamüin wayuu süka nüjünalain taya chi Tashikai. Anii joo taya oʼunuin saʼakajee wayuu, chainjachi taya eemüin chi Tashikai».
29 Anuujeseʼe nanüiki na nikirajüinkana nümüin: «Lotuitpainjaʼa pünüiki, nnojoluitpa kayaawasein putuma. 30 Wayaawatüitpa saaʼu pütüjaain saaʼu kasa süpüshuaʼa otta nnojoluin choʼujaain püsakiijünakuʼu pümünajachin, jama pütüjaain saaʼu tü suluʼukat naaʼin wanee wayuu. Wanoujainjeseʼe sünain nüjünalain pia Maleiwa». 31 Nusoutakalaka Jesús namüin: «¿Junoujainnapaka sünain tanüiki? 32 Taküjain jümüin jooluʼu sülüʼülüin tü kaʼi juʼwalakajeʼenneenakalü oʼu waneʼewai jukua, eitaweena jia jipialuʼumüin. Jüpüteechikalaka taya tamüiwaʼa, nnojoipejeʼe taya tamüiwaʼain, eeshi chi Tashikai tamaa. 33 Anuu taküjain jümüin jooluʼu tüü, süpüla jimatüinjatüin jaaʼin tanainjee. Eʼreena jia müliaa saaʼu tü mmakat, yalayalainjatpejeʼe jaaʼin, tayamülüitpa tü kasa mojusü eekat saaʼu tü mmakat».