Juulioʼu

Aleewainjana waya nümaa Jesuu süpüla nusoutuin Jeʼwaa shiʼipajee tü wachuntakat nümüin. Nnojoishii waya achuntuinjanain neʼe süpaʼa mma saaʼujee nünülia Jesuu. Watüjaainjatü saaʼu jamüin amén wamaka saaʼujee tü nünüliakat. Anuu nünüiki Jesuu namüin na nikirajüinkana: «Süpüshua tü kasa jüchunteetkat nümüin chi Tashikai saaʼu tapüshin jia, taaʼinreerü shia» (Juan 14:13). Nia Jeʼwaa aapajakai wanüiki jee asoutakai shiʼipajee tü wachuntakat nümüin. Naapapejeʼe Jeʼwaa laülawaa nümüin Jesuu süpüla naaʼinrüinjatüin tü nüchekakat Jeʼwaa. Süpülapünaa nusoutuin Maleiwa shiʼipajee tü wachuntakat nümüin, jülüjasü naaʼin müleka waaʼinrüle tü nuluwataakalü anain Jesuu. Anuu süpüshi tia: «Müleka motüle jaaʼin tü saainjalakat wayuu eekai kaainjalain juulia, alatinneerü jaainjala juuliaya nütüma chi Jüshikai Maleiwa. Otta müleka nnojorule motüin jaaʼin tü saainjalakat, nnojoleeria alatinnüin jaainjala juulia nütüma» (Mat. 6:14, 15). Anasü maʼin motule waaʼin naainjala na waneinnua maʼaka naaʼinrüin shia Jeʼwaa nümaa Jesuu. w20.04 21 püt. 6

Jülüjasü naaʼin chi aluwataaushikai Pablo tü kamalainkat sümüin wayuu jee nüküja nümüsia tü pütchikat wanaapünaa sümaa tia. Wanaa sümaa chajachin nia Listra, aashajaashi namüin na wayuukana süchiki tü kasa neʼraajakat maʼaka saaʼin süchiki aʼttiee jee tü talateetkalü atuma naaʼin. Aashajaashi nia namüin süchiki tia süka eein na nnojoliikana atüjaain saaʼu tü sümakat tü Ashajuushikat. Mapüleesat nutuma Pablo ayaawataa saaʼu tü naashajaakalü achiki. Jülüja waaʼin kasain kamalain namüin na wayuukana jee waküja tü pütchikat wanaapünaa sümaa tia. ¿Kasa waaʼinrüinjatka süpüla watüjaain saaʼu kasain kamalain namüin na wayuukana? Jülüjainjatü waaʼin tü kasa wayaawateetkalü aaʼujee tü kamalainkat namüin. Jamüshiijaʼa wantüle nümaʼanamüin wanee wayuu ajaralakai, aashajeʼerakai karaloʼuta, akumajakai neʼejena jee aaʼinrakai waneirua kasa, eeshii süpüla yootuin waya nümaa süchiki tia müleka anashiire shia nümüin (Juan 4:7, 8). Sünainjee nüsheʼin wanee wayuu, eesü süpüla watüjaain saaʼu jalejeʼewalin nia, kasain niʼyataain anain otta jaralüin tü equipo kamalainkat nümüin. w20.04 11 püt. 11, 12

Na wawalayuu shapaakana aaʼin, mmoluwaasü naaʼin namaapa naya na waneinnua. Mayaainjeʼe müin nakuwaʼipa, oʼunushii naya sünain tü outkajawaakat otta sünain tü outkajawaakat miyoʼu. Mayaainjeʼe kapüleein namüin yootoo namaa na nnojoliikana neʼraajüin, ojuʼitüshii naya sünain aküjaa pütchi. Sülatüle wamüin tia, nnojoishii wayain neʼe müin akuwaʼipa. Wainma na wawalayuu alatakana amüin tia. Soteesü waaʼin talatüin naaʼin Jeʼwaa sümaa tü kasa waaʼinrakat süka süpüshuaʼa waaʼin. Watüjaa aaʼu nükaalinjain waya Jeʼwaa jee katsüin waaʼin nutuma sükajee ayatüin waya sünain aʼyatawaa nümüin (Filip. 4:6, 7). Jaʼitashii ayuulin waya jee shapaain waaʼin, watüjaa aaʼu talatüin naaʼin Jeʼwaa sümaa tü waʼyataainkat nümüin. Jaʼitaina waya ayuulin, ayatüsia wachecherüin waaʼin sünain anoujaa (2 Cor. 4:16). Nükaalinjeena waya Jeʼwaa süpüla wountuin wekeraajüin tü ayoujirawaa naashajaakalü achiki Pablo. w20.04 30 püt. 20, 21

Sutuma anain maʼin sukumajia tü Mmakat nutuma Maleiwa, atüjaana aaʼu kekiin maʼin nia (Heb. 3:4, TNM). Mayaainjeʼe eein waneirua planeta shiaʼala neʼe tü Mmakat eekalü aluʼu süpüshuaʼa tü kasa choʼujaakat süpüla katüinjatüin soʼu wayuu. Eesü süpüla waʼwanaajireʼerüin sukuwaʼipa tü Mmakat sümaa wanee katünasü pirataka wayuu. Eepejeʼe waneirua kasa naataka aluʼu shia. Jamüsüjaʼa nakumajüinjatüle na wayuu suluʼukana tü katünasükat tü joutai nasanalüinjatkat, tü eküülü neküinjatkat, tü wüin nasüinjatkat otta nnojorüle jalapünaainjatüin nojotuin tü wasuurakat, ¿kakalieenache naya katüin oʼu? Nnojo. Aluʼujasaʼa tü Mma nukumajakat Maleiwa wapüla, eesü süpüla katüin woʼu suluʼu süka eein joutai, eküülü otta wüin. Jee matüjainsat nnojoluu tia kasakalüirua. Mayaainjeʼe wainmain wasuura sutuma wayuu, ayatüsia anain maʼin tü Mmakat otta eesü süpüla kepiain wayuu suluʼu. ¿Jamüsüche makaʼa shia? Shia süka anain maʼin sukumajia nutuma Maleiwa süpüla wuleinjatüin shia waneepia. w20.05 20 püt. 3, 4

Nüküjain Satanaa sümüin Eva alaain Jeʼwaa. Müshijeseʼe Yolujaa nümünaleeichipain amüin Satanaa suluʼujeereʼeya tia. Emeejünüsü Eva nutuma Satanaa (1 Tim. 2:14). Nia neʼe sunoujaka anüiki Satanaa nuulialeʼeya Jeʼwaa, müsüjeseʼe mojuin maʼin tü saaʼinrakat: nnojotsü oonooin sümaa nünüiki Jeʼwaa, shiküin süchon tü wunuʼu apülajünakat noulia otta shikirüin Adán (Gén. 3:6). Anasüjeʼe maʼin mayürülüje sünüiki Eva niʼipajee Satanaa: «¿Joujaisaʼa teʼraajüin pia? Nnojotsüsaʼa tacheküin müinjatüin pünüiki nüchiki chi tashikai Jeʼwaa. ¿Maalinyaasai nia tapüla paaʼinruʼu? Nia teʼraajaka maʼin otta aishi nia tapüla, nia toonooka amaa anüiki otta nia aapaka nümüin Adán otta tamüin tayakat süpüshuaʼa tü eekat wamaʼana. ¡Puʼuna yaajee!». Talatüsüjeʼe maʼin naaʼin Jeʼwaa matüjürüle sünüiki Eva nümüin Satanaa. Niʼrüinje Jeʼwaa alin nia süpüla otta jüüjüüin shia nümüin (Prov. 27:11). Nnojoipejeʼe alin Jeʼwaa süpüla Eva otta nüpüla Adán, müshiijeseʼe nnojoliin nasoutuin naaʼu. w20.06 4 püt. 10, 11

Kojutuinjatü wamüin naʼyataain na wawalayuu jieyuukana. Eeshii naʼyataale sünain akumajaa jee anoutaa piichi eere nuʼwaajünüin Jeʼwaa, aküjashii naya pütchi suluʼu wanee anüikii naata otta akaalinjashii suluʼu Weteet. Eetaashii na akaalinjakana na wawalayuu müliakana sutuma wawai jee sutuma sukutkujaain mma, eeshii na akaalinjakana süpüla sukumajünüin karaloʼuta suluʼu waneirua anüikii, eeshii na pürekutsootkana jee na misioneerokana. Na wawalayuu jieyuukana nakaalinjain naʼwayuuse süpüla nekeraajüin tü naʼyataainkat suluʼu tü nupueulosekat Jeʼwaa. Isasüjeʼeya nachiki na wawalayuukana nekeraajüin süpüshuaʼa tü naʼyataainkat nnojorüle nakaalinjünüin sutuma naʼwayuuse (Éf. 4:8). Nayaawatajatü aaʼu na laülaashiikana wattain maʼin naalii na jieyuu aküjakana süchiki tü pütchi anasükat otta eeshii na atüjakana maʼin süpüleerua tü naʼyataainkat. Nayaawata aaʼu na laülaashiikana waneepiain na wawalayuu jieyuukana nümaa Jeʼwaa otta laülaain naaʼin sünain anoujaa. Müshiijeseʼe anain naya süpüla akaalinjaa na wawalayuu majayünnüükana sülatüle kasa namüin (Tito 2:3-5). Kojutuinjatü wamüin tü naaʼinrakat na wawalayuu jieyuukana. w20.09 23 püt. 13, 14

Nnojoishii motuin naaʼin Jeʼwaa na akatalaakana paala suulia tü nupueulosekat otta kojutusü nümüin tü naaʼinrakat naʼyataaiwaʼaya nümüin (Heb. 6:10). Nüküjain Isaías sukuwaʼipa tü naaʼinrakat Jeʼwaa süpüla naaʼinmajüin tü nupueulosekat, anuu nünüiki: «Nürüleejeerü naʼanneetse maʼaka naaʼin wanee anneetpüʼü. Kotteerü nutuma tü anneetcheinkalüirua; nülüʼüjeerü shia nutuʼu» (Is. 40:11). Müsü nukuwaʼipa Jeʼwaa maʼaka saaʼin nukuwaʼipa wanee arüleejüi. ¿Jamüsü naaʼin Jeʼwaa nükatalaale wanee anoujashi nuulia? Nüküjain Jesuu namüin na nikirajüinkana jamüin naaʼin Jeʼwaa, anuu nünüiki: «Wane wayuu jaʼaka, müleka kamüʼünüinre nia poloo shikii anneerü je machikitaarüle waneesia sünainjee, nüpüteerü tü süpüshikat, tü mekietsatkat shikii mekietsalümüin, chaa saaʼu tü namünakat süpüla oʼunaa sünain achajawaa süchiki tü machikisatkat. Shiimüin tü tamakat jümüin: Nüntapa chi wayuukai sünain, talataleejeeria maʼi naaʼin sümaa suulialee sümaa tü mekietsatkat shikii mekietsalümüin nnojotkat machikisalüin» (Mat. 18:12, 13). w20.06 19 püt. 8, 9

Kojutusü wamüin waʼyataain nümüin Jeʼwaa jaʼitasü kasain waʼyataain anain nümüin (Sal. 27:4; 84:10). Anasü maʼin nukooʼomüinreere niʼyataain wanee wawala nümüin Jeʼwaa. Saapünapa tia aʼyatawaakat nümüin, nnojotsü jülüjainjatüin naaʼin niain alanaʼaleeichipain akuwaʼipa (Luc. 17:7-10). Jülüjainjatü naaʼin nükaalinjainjanain na waneinnua (2 Cor. 12:15). Aküjünüsü suluʼu tü Wiwüliakat nachiki waneinnua wayuu alanaweekana ojutu noulia na waneinnua. Jamüshijaʼa Diótrefes, alanaweesü nujutu noulialeʼeya na wane anoujashiikana (3 Juan 9). Akaatajaʼa Uzías, naaʼinrüin wanee kasa nnojotka niʼitaain Jeʼwaa nüpüleerua (2 Crón. 26:16-21). Müshia Absalón, aiyaasü wayuu nüpüla shiiʼiree nüneekünüin süpüla aluwatawaa (2 Sam. 15:2-6). Sünainjee tia, wayaawata aaʼu mojuin nümüin Jeʼwaa nakuwaʼipa na wayuu alanaweekana ojutu noulia na waneinnua (Prov. 25:27). Na wayuu yaletakana aaʼin jee na alanaweekana ojutu noulia na waneinnua, eʼreena neʼe müliaa mapa (Prov. 16:18). w20.07 4 püt. 7, 8

Wainma na wawalayuu akolojookana namaa nachonnii suluʼumüin wanee mma naata süka müliain naya jee shiale süpüla nantüin sünain wanee aʼyatawaa. Sutuma tia, koleejiainjana na tepichikana suluʼu wanee koleejia eere shikirajünüin tü anüikii aashajaanakat suluʼu tia mmakat. Akaataajaʼa na wayuu kachooinkana naya tepichikana, ekirajaainjana sünain tia anüikiikat süpüla mapüleeinjatüin namüin ousütaa sünain aʼyatawaa. ¿Jalainjanache naya outkajaain? ¿Outkajaainjanache naya suluʼu wanee outkajaalee eere saashajaanüin tü anüikii aashajaanakat suluʼu tia mmakat? ¿Shiataapaʼa suluʼu wanee outkajaalee eere saashajaanüin tü anüikii natüjakalü apüleerua? Nia aneeküinjachika wanee wayuu laülaakai süpüleerua nüpüshi jalainjanain naya outkajaain. Nüneeküinjatü tia süka naaʼin nümüiwaʼa, jülüjainjatpejeʼe naaʼin tü kasa anainjatkalü atuma sukuwaʼipa nüpüshi. Nnojoishi wayoujüinjachin chi wawalakai sünainjee tü nüneekakat. Jaʼitasü kasain nüneeküin, kapülainjana naya waaʼin nantapa sünain tü outkajawaakat otta weeʼiyatüinjatü naalin wapüla (Roma 15:7). w20.08 30 püt. 17, 18

Nükaalinjeere waya Jeʼwaa, nnojoluinjatü jülüjain waaʼin kojutuin waya nümüin sünainjee katchin waya, watüjain karaloʼuta, jalejeʼewaliin waya jee shiale sünainjee washirüin waya. Nnojotsü shiain tia jaloulin anainjee waya nümüin Jeʼwaa. «Nnojoliishii wainmain jaʼaka eekai atüjain saashin wayuu, eekai kojutüin sütüma wayuu, otta eekai nachooin washinnuu» (1 Cor. 1:26). Kapüleere wamüin aʼyatawaa nümüin Jeʼwaa, wachunta kaalinwaa nümüin süpüla wekeraajüin tü waʼyataainkat nümüin. Jamüshiijaʼa meeʼeraparale waya sünainjee tü wanoujakalü anain, wachunta kaalinwaa nümüin süpüla wasoutuin saaʼu wanoula (Éf. 6:19, 20). Müliale waaʼin saalinjee ayuulin waya, wachunta nümüin Jeʼwaa nükatchinraiwa waaʼin süpüla ayatüinya waʼyataain nümüin. Weʼrüle nükaalinjain waya, akooʼomüinraajeerü wanoula. w20.07 16 püt. 9

Wainma tü kasa anasü naainjakat Abraham nüpüleerua Maleiwa. Washateerü nukuwaʼipa waaʼinmaale waneepia sukuwaʼipa aluwatawaa nutuma Maleiwa (Mar. 10:28-30; Heb. 11:8-10). Soto waaʼin eein süpüla sülatüin kasa mojusü wamüin. Akaʼaya na wawalayuu aʼyataakana waneepia nümüin Jeʼwaa, alatüsü kasa mojusü namüin (Sant. 1:2; 1 Ped. 5:9). Sünainjee tü kasa alatakat sainküin mmakat, wayaawata aaʼu sülüʼülüin sükalia süpüla sajaʼttüin kasakat süpüshuaʼa. Müsüjeseʼe jülüjainjatüin waaʼin tü kasa eejeetkat mapeena nutuma Maleiwa. Watteerü saalii tü kasa anasü weʼreetkat otta tü talateetkalü atuma waaʼin nuluwataapa Maleiwa maʼaka saaʼin süsoʼiraapa naaʼin na wapüshikana. Anakuwaʼipaleechi Abraham nutuma Jeʼwaa süka kanoulain nia otta naʼatapüin sünain nikeraajeerüin Jeʼwaa tü nümakat nümüin. Müsüjeseʼe, nüsoʼireʼenneechin aaʼin nutuma Jeʼwaa namaʼaleʼeya na nüpüshikana. ¿Eejeenache waya süsoʼiraapa naaʼin na outushiikana? Eejeena waya wooʼulaale waneirua kasa süpüleerua aʼyatawaa nümüin Jeʼwaa maʼaka naaʼinrüin shia Abraham. Ayatüleʼeya ichein wanoula mayaainjeʼe sülatüin kasa mojusü wamüin otta nnojorüle süshapalaain waaʼin sümaʼinruʼu waʼatapüin nikeraajüin Jeʼwaa tü nümakat (Miq. 7:7). w20.08 5 püt. 13, 14; 7 püt. 17

Watüjaa aaʼu outule waya natuma na nuluwataakana aaʼu Satanaa, asoʼiraajeerü waaʼin nutuma Jeʼwaa. Jaʼitasü kasain naaʼinrüin waka nnojoleena waya nooʼuleʼerüin suulia aʼyatawaa nümüin Jeʼwaa (Roma 8:35-39). ¡Kekiikaiche maʼin Jeʼwaa süka nüsoʼireʼerüinjatüin naaʼin na outushiikana! Akanaluushi Satanaa yalapünaa jee meimmoluinsalii waya nutuma Jeʼwaa. Woʼutüneere aaʼin, ¿weʼitaajeetche waaʼin sünain süsoʼiraajeerüin waaʼin nutuma Jeʼwaa? ¿Jamüsü süpüla watüjaain saaʼu weʼitaale waaʼin nünain Jeʼwaa? Süpüla watüjaain saaʼu tia jülüja waaʼin tüü: «¿Taaʼinrajatpa wanee kasa jaʼyasüche taaʼu teʼitaain maʼin taaʼin nünain Jeʼwaa?» (Luc. 16:10). «¿Teʼitaainche taaʼin sünain naapeerüin Jeʼwaa tü choʼujaakat tamüin taaʼinmaale tü taʼyataainkat nümüin?» (Mat. 6:31-33). «Aa» wamüle, watüjaa aaʼu yapeenain waya süpüla tü alatajateetkat mapeena (Prov. 3:5, 6). w20.08 17 püt. 15, 16

Ekirajaainjana waya palajana süpüla watüjainjanain süpüleerua tü sümakat tü Wiwüliakat. Ekirajünüshii waya sünain tü outkajawaakat süpüla wountuin tia. Keeʼireere waaʼin nayaawatüin saaʼu na wayuukana tü pütchi wekirajakat suluʼujee tü Wiwüliakat, ekirajaainjana waya palajana sünain. Otta wakatsüinrüinjatü wanoula sükajee tü sümakat. Nnojotpejeʼe waashajeʼeraʼalüinjatüin neʼe shia. Jülüjainjatü waaʼin tü sümakat tü wetsiikulo waashajeʼerakat, ekirajaainjana waya sooʼomüin süpüla wayaawatüin saaʼu tü sümakat otta süpüla mapüleein wamüin waküjapa shia sümüin wayuu (1 Tim. 4:13-15). Müle shia watuma, yapeena waya süpüla wekirajüin na waneinnua sükajee tü sümakat tü Wiwüliakat. Nnojotpejeʼe waashajeʼeraʼalüinjatüin neʼe wanee wetsiikulo namüin. Wakaalinjainjana naya süpüla natüjaainjatüin saaʼu otta süpüla sütanalüinjatüin naaʼin. Wekirajaale sünain tü Wiwüliakat waneepia, atüjeena waya ekirajaa (2 Tim. 3:16, 17). w20.09 28 püt. 12

Jülüjale waaʼin tü naaʼinrakat Jeʼwaa süpüla nükaalinjain waya, waaʼinmaajeerü tü aküjaakat pütchi. Jamüshijaʼa nia, niʼitaain tü pütchikat wamüin suluʼu karaloʼuta, suluʼu Internet, akürawaajünüsü shia süpüla waapajüinjatüin, süpüla wanajüinjatüin otta eʼitaanüsü shia suluʼu JW Broadcasting®. Jülüjataa waaʼin tü eʼitaanakat suluʼu jw.org®, alatüsü suulia miit anüikii tü eʼitaanakalü suluʼu (Mat. 24:45-47). Wane kasa waaʼinmaajeetka atuma tü aküjaakat pütchi shia washatüle nukuwaʼipa Jesuu. Nnojotsü naaʼinmaain Jesuu wanee kasa naata suulia tü aküjaakat pütchi (Juan 18:37). Jamüshijaʼa nia, wanaa sümaa niiʼiyatüin Satanaa nümüin «tü suumainkalüirua wayuu süpüshuaʼale sünain anashaatain maʼi shia», nnojoishi eirakaain nia sümüin. Akaataajaʼa wanaa sümaa niʼitaaneein süpüla aluwatawaa natuma na wayuukana, oʼunushi nia noulia (Mat. 4:8, 9; Juan 6:15). Mayaainjeʼe eein tü kasa choʼujaakat nümüin, nnojoishi nia oʼunuin süchiirua wainmeein kasa nümaʼana. Mayaainjeʼe müliain nia atumawaa, nnojoishi nia eimmolojooin (Luc. 9:58; Juan 8:59). Nnojoleena waya ooʼulaain suulia aküjaa pütchi waaʼinrüle tü sümakat tü pütchi süpülajatkat soʼukai. w20.09 9 püt. 6, 7

Anataʼaleesüjaʼa maʼin wakuwaʼipa süka eein wawalayuu jieyuu aʼyataakana maʼin suluʼu tü outkajaaleekat. Naya wawalayuukana, asoutawaishii shiʼipajee tü asakinnakalü anain sünain tü outkajawaakat otta ojuʼitawaishii naya sünain aküjaa pütchi. Eeshii na akaalinjakana sünain anoutaa wanee kasa amojujaaka suluʼu tü piichi outkajaaleekat otta nakaalinjain maʼin na wawalayuukana. Eepejeʼe tü müliakalü atuma naaʼin, eeshii na aaʼinmajakana na wayuu kachooinkana naya süka laülaainnain naya, eetaashii na müliakana natuma napüshi, eeshii na epijakana nachonnii namüiwaʼa otta aʼyataakana maʼin süpüla naapüin tü choʼujaakat namüin. ¿Jamüshii wakaalinjainjanaka na wawalayuu jieyuukana? Shia süka mojutuwalin amüinwaa na jieyuukana otta wakaalinjainjanain naya saashin tü Wiwüliakat. Jamüshijaʼa Pablo, nüküjain namüin na anoujashii chajanakana Roma sünain kamaneeinjanain naya otta naapüinjatüin tü choʼujaakat sümüin Febe süntapa namaʼanamüin (Roma 16:1, 2). Miyoʼushi Pablo saʼaka wayuu mojutka amüin na jieyuukana, eeʼiratapejeʼe nukuwaʼipa mapa. Kojutushii na jieyuukana nümüin otta kamaneeshi nia namüin maʼaka naaʼinrüin shia Jesuu. w20.09 20 püt. 1, 2

Süpüla wakaalinjain na wekirajüinkana süpüla naküjeein süchiki tü pütchi anasükat namüin na waneinnua, eeshii süpüla wasakirüin naya pütchikat tüü: «¿Kasa anasü piʼraka sünainjee paaʼinrüin tü sümakat tü Wiwüliakat? ¿Choʼujaasüche saaʼin pümüin naapüin na waneinnua süchiki tia pütchikat? ¿Kasa paaʼinrajatka süpüla püküjain shia namüin?» (Prov. 3:27; Mat. 9:37, 38). Nikirajüin waya Jesuu süpüla wekirajüin na waneinnua sünain tü nuluwataapuʼukalü anain. Piamasü maʼin tü pütchi alanaʼaleekat saʼakajee tia maʼaka saaʼin alinjachin Maleiwa wapüla otta alinjanain na waneinnua wapüla (Mat. 22:37-39). Wakaalinjale na wekirajüinkana süpüla noonooinjanain sümaa tia pütchikat, wakaalinjainya naya süpüla naküjain pütchi, süka jamüin, aire Jeʼwaa napüla jee na waneinnua nachekeerü achiki naküjain pütchi (Sal. 18:1-3; Prov. 29:25). w20.11 3 püt. 6-8

Anasü wekirajaale sünain palajana tü pütchi wekirajainjatkalü anain nümaa wanee wayuu otta wachunta nümüin Jeʼwaa naaʼu na wekirajüinkana jee saaʼu tü kasa neeʼiratüinjatkat sünain nakuwaʼipa. Wachunta kaalinwaa nümüin Jeʼwaa süpüla sütanalüin naaʼin tü sümakat tü Wiwüliakat. Jülüja waaʼin wakaalinjainjanain naya süpüla woutiisain naya. Choʼujaasü noʼuraajüinjanain na wekirajüinkana nümüin Jeʼwaa. ¿Kasa naaʼinrajatka süpüla tia? Naapajüinjatü tü nümakat Jeʼwaa jee aashajaainjana naya nümaa. Süpüla naapajüinjatüin tü nümakat Jeʼwaa, naashajeʼerüinjatü tü Wiwüliakat soʼukaiwai (Jos. 1:8; Sal. 1:1-3). Eeshii süpüla noʼuraajüin nümüin Jeʼwaa soʼukaiwai. Wachunta nümüin Jeʼwaa süka süpüshuaʼa waaʼin süpülapünaa jee süchikijee wekirajaain namaa, wachunta napüleerua na wekirajüinkana. Naapajüle wanüiki, atüjeena naya oʼuraajaa, achunteena naya nümüin Jeʼwaa sükajee nünülia Jesukürisüto (Mat. 6:9; Juan 15:16). Arütkaajeena naya nünainmüin Maleiwa naashajeʼerüle tü Wiwüliakat soʼukaiwai otta noʼuraajüle nümüin (Sant. 4:8). w20.10 8 püt. 8; 9 püt. 10, 11

Maʼaka naaʼin na anoujashii namaiwajanakana, paaʼinwainjana jee lotuinjatü sukuwaʼipa tü naaʼinrakat na anoujashiikana maaʼulu (Aluw. 16:4, 5). Jamüshijaʼa puʼunule suluʼumüin wanee mma naata jee puʼunule sünain tü outkajawaakat eere shikirajaanüin anain Aapiria Wayuu, pütüjaa aaʼu tü sukuwaʼipainjatkat tia ekirajawaakat otta tü pütchi ekirajaanajatkalü anain, nnojoluichipa müin naatakai paaʼin chayaa. Niaʼala neʼe chi naaʼinkai Maleiwa wountakai akajee paaʼinwain waya (Sof. 3:9, noota). ¿Kasa anaka süpüla waaʼinrüin? Wasakira waaʼin sünain tüü: «¿Tachajaainche sukuwaʼipa süpüla paaʼinwajiraain jee anajiraain taya namaa na tawalayuukana? ¿Jüüjüüshiche taya namüin na wawalayuu laülaakana wapüleerua? Saapünüle aʼyatawaa tamüin suluʼu tü outkajaaleekat, ¿neʼitaajeetche naaʼin na wawalayuukana tanain? ¿Antawaishiche taya maalü sünain wanee kasa? ¿Takaalinjeeinche maʼin na wawalayuukana?» (Sant. 3:17). Eere wanee kasa wanoutajatka sünain wakuwaʼipa, wachunta chi naaʼinkai Maleiwa nümüin. Woʼunirüle wakuwaʼipa nükajee jee sukuwaʼipa tü kasa waaʼinrakat, aijeena waya napüla na wawalayuukana jee kojuteerü namüin tü waaʼinrakat. w20.10 23 püt. 12, 13

Müsü aka saaʼin wanee rouya tü Wiwüliakat wamüin (Sant. 1:23-25). Jamüshiijaʼa waya, anaʼlaʼawaishii waya suluʼu rouya wattaʼa maalü süpülapünaa wojuʼitüin wepialuʼujee. Choʼujaasü waaʼinrüin tia, süpüla wanoutuin wanee kasa eekai mojuin wanain süpülapünaa neʼrajüin shia na waneinnua. Akaataajaʼa waashajeʼerapa tü Wiwüliakat soʼukaiwai, müinjatia sukuwaʼipa watuma. Wooʼulaainjatü sunoutuin tü jülüjakat waaʼin otta wakuwaʼipa. Eeshii na aashajeʼerawaikana tü karaloʼuta aashajeʼennakat wattaʼa maalü süpülapünaa nojuʼitüin nepialuʼujee. Nooʼulaain sunoutuin nakuwaʼipa tü naashajeʼerakat. Nachajaain sukuwaʼipa süpüla naaʼinrüin tü naashajeʼerakat soʼu kaʼikat tia. Waashajeʼerawalinjatü soʼukaiwai tü Wiwüliakat jee jülüjawalinjatü waaʼin tü sümakat. Choʼujaasü waaʼinrüin tia süpüla ayatüinya waya suluʼu tü wopu mouisü katüinjatkalü atuma woʼu. Tü Wiwüliakat, müsü aka saaʼin wanee rouya anakia süchiirua ayuulii. Sunoutaweere wakuwaʼipa, waapaainjatü sümaa tü sümakat otta sümaa tü namakat na oʼunirakana sukuwaʼipa nupueulose Jeʼwaa. w20.11 18 püt. 3; 20 püt. 8

Mayaainjeʼe müliain atumawaa na anoujashii namaiwajanakana, eeshiʼiya anale naya süka jimatüin saaʼin mmapaʼakat. ¿Kasa naaʼinraka süpüla najayatüin tia? Aküjashii maʼin naya pütchi. Saashin tü karaloʼutakat Aluwataaushikana, «akatsüinraasü maʼi naaʼinrua sünain nanoula sünain kojutüin chi Senyotkai natüma waneepia» otta sünainjee nnojoluin nooʼulaain suulia aküjaa pütchi «oʼunüshii naya suluʼu nokojuyalaain maʼi». Akaalinjünüshii naya wawalayuukana nutuma Jeʼwaa süka naküjain maʼin pütchi soʼunnaa jimatüin saaʼin mmapaʼakat (Aluw. 9:26-31). Na anoujashii namaiwajanakana najayatüin naküjain pütchi. Jamüshijaʼa chi aluwataaushikai Pablo, makatüshi nia chaa Éfeso süka wainmain aʼyatawaa nüpüleerua sünain aküjaa pütchi otta ekirajaa wayuu (1 Cor. 16:8, 9). Nachajaain sukuwaʼipa na nikirajüinkana Jesuu süpüla naküjainjanain pütchi süchiki tü nünüikikat Jeʼwaa (Aluw. 15:30-35). ¿Kasa anasü eeka sünainjee tia? Aküjünüsü süchiki tia suluʼu tü pütchi süpülajatkat soʼukai. w20.09 16 püt. 6-8

Nüküjain chi aluwataaushikai Pablo outuin Adán saaʼu naainjala. Müshiʼiya wayakana, müliashii waya sünainjee tia. Asoʼiraajeeria naaʼin na outushiikana sutuma nüsoʼireʼennüin aaʼin Jesuu nutuma Maleiwa. Maʼaka outuin wayuu sünainjee naainjala Adán, suunteeria wayuu katüin soʼu nünainjee Kürisüto (1 Cor. 15:21, 22). Wanaa sümaa nümüin Pablo: «Maleeirümaʼaka ouktüin wayuu», naya naashajaaka achiki Pablo napüshuaʼa na wayuukana. Naleʼeruʼusü tü kaainjalaakat jee tü outaakat nünainjee Adán (Roma 5:12). Nnojoleechi asoʼiraain aaʼin Adán sükajee kaainjalain nia nuulia Maleiwa sümaa wayuuin loto akuwaʼipachi nia nutuma. Nnojoleerü niʼrüin kataa oʼuu sünainjee naapajiraain nikii Jesuu. Tü alatakat nümüin Adán shieeria neʼe tü alatakat namüin na wayuu süsaleenakana naainjala nutuma Jesuu, na makana aka saaʼin kaaʼula. Saashin tü Wiwüliakat ajaʼttinneena naya (Mat. 25:31-33; Mat. 25:46, TNM; Heb. 5:9). w20.12 5 püt. 13, 14

Anasü washatüle nakuwaʼipa na aapieekana nnojorüle saapünüin wamüin wanee aʼyatawaa suluʼu tü nupueulose Jeʼwaa. Soʼu wanee kaʼi, nüsakirüin Jeʼwaa naya sünain kasain anain süpüla nimeejünüin aka chi aluwataaikai Acab. Kojuya na aapiee aküjakana nümüin Jeʼwaa kasain anain süpüla saainjünüin nümüin. Waneeshia neʼe chi aapiee nüneekakai Jeʼwaa jee nüküjain nümüin anain tü nümakat (1 Rey. 22:19-22). ¿Jama na wane aapieekana?, ¿mojusüche naaʼin? «Amülashii neʼe waya asoutuin», ¿müshiiche naya? Nnojotsü müin nanüiki. Nnojotsü yaletüin naaʼin jee nacheka achikit niainjachin Jeʼwaa kojutuin atumawaa (Juec. 13:16-18; Alat. Map. 19:10). Kojuta wamüin waküjaliin pütchi nüchiki Jeʼwaa jee waküjain pütchi süchiki Nuluwataaya. Nnojotsü shiain kojutuin anainjee waya nümüin Jeʼwaa jee namüin na wawalayuukana tü waʼyataainkat nümüin Jeʼwaa, shia kojuteetka anainjee waya nnojorüle yaletüin waaʼin. Müshiijeseʼe wachuntuinjanain kaalinwaa nümüin Jeʼwaa süpüla nnojoluinjatüin yaletüin waaʼin. Jülüja waaʼin nakuwaʼipa na wayuu nnojoliikana yaletüin aaʼin, na ashajünakana anülia suluʼu tü Wiwüliakat otta wachajaa sukuwaʼipa süpüla wakaalinjain na wawalayuukana süka süpüshuaʼa waaʼin (1 Ped. 5:5). w20.12 25 püt. 16, 17

Tü uwon kachueerakat shia tü kasa waʼatapajakat nutuma Maleiwa, maʼaka saaʼin woʼttaajeenain suulia tü outaakat jee naapeerüin Maleiwa kasa anasü namüin napüshuaʼa na aaʼinrakana tü nüchekakat (1 Tes. 5:8, TNM; 1 Tim. 4:10; Tito 1:1, 2). Nnojoleerü mojuin tü jülüjakat waaʼin sutuma tü kasa waʼatapajakat nutuma Maleiwa. Shieerü jülüjaka waaʼin waneepia tü kasa anasü naapeetkat wamüin Maleiwa otta nnojoleerü shapaain maʼin waaʼin sutuma tü kasa mojusü alatakat wamüin. Müsü waʼatakai saaʼin wanain tia uwon kachueerakat müleka pansaale tü jülüjakat waaʼin sümaa tü jülüjakat naaʼin Maleiwa. Jamüshiijaʼa waya, nnojotsü weʼitaain waaʼin sünain tü washirüükat, shia weʼitaaka anain waaʼin tü kasa anasü eejeetkat nutuma Maleiwa (Sal. 26:2; 104:34; 1 Tim. 6:17). Tü chajaruuta atkaayakat shia tü Nünüikikat Maleiwa, tü Wiwüliakat. Sutuma tü Wiwüliakat, atüjaana aaʼu wanee kasa alawaale shia jee taashisü wayuu sutuma suulia tü alawaa ekirajünakalü anain jee suulia tü kasa mojusü kiʼrakalü anain wanee wayuu (2 Cor. 10:4, 5; 2 Tim. 3:16, 17; Heb. 4:12). Wekirajaale maʼin sünain tü Wiwüliakat otta tü karaloʼutairua saapakat wamüin tü nupueulosekat Maleiwa atüjeena waya süpüleerua asoutaa saaʼu wanoula (2 Tim. 2:15). w21.03 27 püt. 4; 28 püt. 10, 11

Mayaainjeʼe püreesain chi aluwataaushikai Juan atumawaa sünainjee nüküjain pütchi nüchiki Jesuu, nnojotsü kapülain naaʼin nukuwaʼipa neʼe nümüiwaʼa. Jamüshijaʼa nia nüshajüin süchiki tü kasa eeʼiyatünakat nümüin nutuma Maleiwa otta nuluwataain shia namüin na anoujashiikana süpüla natüjaainjatüin saaʼu tü kasa alatajatkat mapeena (Alat. Map. 1:1). Nüjütünapa achiki Juan chejee Patmos, nüshajüin tü karaloʼutakat Juan eere nüküjain süchiki tü nukuwaʼipakat jee tü niʼyataainkat Jesuu otta nüshajüinya tü wane apünüinsükat karaloʼuta süpüla nütütüleʼerüin jee nükatchinrüin naaʼin na nuwalayuukana. ¿Kasache waaʼinrajatka süpüla washatüin nukuwaʼipa Juan? Atüjaaneerü aaʼu shiimainrejeʼe alin püpüla wayuu sünainjee tü kasa püneekakat süpüla paaʼinrüin. Na wayuu nuluwataakana aaʼu Satanaa, shia keeʼireeka naaʼin kapülainjatüin neʼe paaʼin pukuwaʼipa pümüiwaʼa otta shia nachajaaka achiki pükanajüinjachin maʼin nneerü otta piʼraajünajachin maʼin. Naatapejeʼe maʼin nakuwaʼipa na anoujashiikana nünain Jeʼwaa. Sainküin mmakat süpüshuaʼa aküjashii naya pütchi sümüin wayuu otta nekirajüin wayuu süpüla aleewainjatüin shia nümaa Jeʼwaa. w21.01 10 püt. 9, 10

Jee müsia, achunjasüjeʼe naaʼin Jonatán naaʼu David, jülüjasüjeʼe naaʼin niainjachin aluwataain nüchikumüin Saúl, jama nüshin nia (1 Sam. 20:31). Nnojotpejeʼe naaʼinrüin Jonatán tia, anashiisü nümüin Jonatán tü nüneekakat Jeʼwaa jee waneepiashi nia nümaa. Nücheka achikit Jonatán nüneekünüin David nutuma Jeʼwaa süpüla aluwatawaa. Waneepiashi Jonatán nümaa David mayaainjeʼe jashichin maʼin Saúl sünainjee tia (1 Sam. 20:32-34). Nnojotsü achunjain naaʼin Jonatán naaʼu David süka alin nia nüpüla. Eʼinai maʼin Jonatán süka jatü jee yalayala aaʼinchi nia sünain atkawaa. Anuu pütchi nüchiki niakai otta nüchiki chi nüshikai: «Kawatüleshii maʼin naya suulialeʼeya warulapai» otta «katchinreeshiʼiya maʼin naya suulialeʼeya wasashi» (2 Sam. 1:22, 23). Yaletüsüjeʼe maʼin naaʼin Jonatán sükajee wainmain na nüʼünüü nükanajakana. Nnojotpejeʼe naaʼinrüin tia, nnojoishi jashichikuʼu müin nia sünainjee wainmain na nükanajakana David. Kojutushi David nümüin süka yalayalain nia sünain atkawaa jee niʼitaain naaʼin nünain Jeʼwaa. Wanaa sümaa nuʼutunuin aaʼin Goliat nutuma David, aishi David nüpüla Jonatán yalejeechikireʼeya. w21.01 21 püt. 6; 22 püt. 8, 9

Nia Jesukürisüto chi laülaakai waaʼu wapüshuaʼa waya anoujashiikana otta maainjalasai nia. Kasaatpa wanee anoujasü niaichipa laülaakai saaʼu wanee wayuu kaleʼeruʼukai kaainjalaa. Eesü kapüleere maʼin tia sümüin. Müsüjeseʼe jülüjeein saaʼin pütchikat tüü süpülapünaa kaʼwayuusein shia: «¿Anashiche wawalakai chii süpüla laülaain nia taaʼu? ¿Shiache naaʼinmaaka tü niʼyataainkat nümüin Jeʼwaa? ¿Jama nnojorüle müin nukuwaʼipa?, ¿nükaalinjeetche taya süpüla ayatüin aleewain taya nümaa Jeʼwaa?». Süsakirüinjatpejeʼe saaʼin sünain tüü: «¿Aashichijaamaatüsüche taya maalü? ¿Kapülasüche taaʼin nakuwaʼipa na waneinnua? ¿Aleewasüche taya nümaa Jeʼwaa?» (Ecl. 4:9, 12). Anale tü kasa süneekakat wanee wayuu süpülapünaa kaʼwayuusein shia, aneerü maʼin sukuwaʼipa jee talateerü saaʼin kaʼwayuusepa shia. Watta naalii na wawalayuu jieyuu anakana maʼin akuwaʼipa wapüleerua sükajee jüüjüüin naya namüin naʼwayuuse. Anashaatasü maʼin nakuwaʼipa wawalayuukana naainnua. w21.02 8 püt. 1, 2

Wainma na wawalayuu ekirajaakana sünain wanee naata anüikii süpüla nakooʼomüinrüinjatüin naʼyataain nümüin Jeʼwaa otta akolojooshii naya eere choʼujaain maʼin aküjalii pütchi. Naneeküin tia sükajee naaʼin namüiwaʼa otta naaʼinrüin shia süpüla naʼyataain maʼin nümüin Jeʼwaa. Mayaainjeʼe kakaliain süpüla natüjain süpüleerua tia anüikiikat jalouishii naya namüin na wawalayuukana. Sutuma anain maʼin nakuwaʼipa akatchinraasü nanoula na wawalayuukana natuma. Kojuteeshii wamüin wawalayuukana naainnua. Nüneekünajachipa wanee wawala süpüla laülaashinjachin jee süpüla niʼyataainjachin neʼipajee na laülaashiikana, nnojotsü jülüjainjatüin naaʼin na laülaashiikana nütüjainjachin maʼin süpüleerua tü anüikii nikirajaakalü anain. Shia jülüjainjatka naaʼin tü sümakat tü Wiwüliakat süchiki tü nukuwaʼipainjatkat wanee anoujashi anakai süpüla laülaashinjachin jee süpüla niʼyataainjachin neʼipajee na laülaashiikana. Nnojotsü shiainjatüin jülüjain naaʼin nütüjale süpüleerua tü anüikii nikirajaakalü anain (1 Tim. 3:1-10, 12, 13; Tito 1:5-9). w20.08 30 püt. 15, 16

Wainma na wayuu jülüjakana aaʼin talateerüin neʼe naaʼin müleka nnojoliire ayuulin naya, wainmale nneerü namaʼana jee anajiraale naya sümaa napüshi. Naatapejeʼe sümüin tü talataa aaʼin nüküjakalü achiki Santiago, süka shiain wanee akuwaʼipaa eeka nutuma chi naaʼinkai Maleiwa. Müsüjeseʼe talateerüin waaʼin jaʼitasü kasain alatüin wamüin (Gal. 5:22). Talatüsü naaʼin wanee anoujashi nütüjaale saaʼu anain nukuwaʼipa noʼuluʼu Jeʼwaa otta nuushikajaale süchiirua nukuwaʼipa Jesuu (Luc. 6:22, 23; Col. 1:10, 11). Tü talataa eekat suluʼu waaʼin müsü aka saaʼin shieerain wanee ranpara, jaʼitasü eein joutai jee juya nnojotsü ayokojooin shia sutuma. Akaataajaʼa neʼe wayakana, eesü süpüla talatüin waaʼin jaʼitasü kasain alatüin wamüin, jaʼitashii ayuulin waya jee paliʼirüle nneerü wamaʼana. Ayateeria talatüin waaʼin jaʼitashii shimeeʼerainpalain waya wayuu, nayoutule na wapüshikana jee waneinnua wayuu wanoujainjanain nünain Jeʼwaa. Tü kasa mojusü weʼrakat sünainjee kanoulain waya nünain Jeʼwaa, shia süka shiimain nikirajüin waya Kürisüto (Mat. 10:22; 24:9; Juan 15:20). Nüküjainjeseʼe Santiago tü pütchi süpülajatkat soʼukai. w21.02 27 püt. 6

Paashajeʼerapa wanee wetsiikulo akaalinjeechika pia süpüla nnojoluin shapaain maʼin paaʼin jee süpüla piʼitaain paaʼin nünain Jeʼwaa, pikirajaa sünain süpüla pütüjain süpüleerua. Eesüjaʼa süpüla paashajeʼerüin shia sümaa emetuluin pünüiki, püshajüin shia sünain karaloʼuta jee pikirajaʼawalin sünain. Süpüla kekiinjachin maʼin Josué sünain aaʼinraa waneirua kasa, nüküjain Jeʼwaa nümüin naashajeʼerüinjatüin tü pütchi nuluwataakalü anain nia jee nüsakireʼerüinjatüin naaʼin sünain soʼukai jee saʼwai. Sükaalinjeechi nia tia süpüla nnojolin mmoluin nia soʼunnaa sülatüin kasa mojusü nümüin (Jos. 1:8, 9). Watta saalii tü kasa eekat süpüla watüjain suluʼujee tü Wiwüliakat akaalinjeenaka waya süpüla nnojoluin shapaain maʼin waaʼin soʼunnaa weʼrüin müliaa (Sal. 27:1-3; Prov. 3:25, 26). Atüjashii waya sünainjee tü ekirajünakalü anain sünain tü outkajawaakat, tü namakat na wawalayuukana wanaa sümaa nasoutuin shiʼipajee tü asakinnakalü anain jee tü namakat wanaa sümaa yootuin naya wamaa (Heb. 10:24, 25). Atütülaajeerü waaʼin waküjale nümüin wanee wawala eekai waʼaleewain süchiki tü alatakat wamüin. w21.01 6 püt. 15, 16

Wanaa sümaa woutiisain pia, atüjaana aaʼu kanoulain pia jee piʼitaain paaʼin nünain Jeʼwaa. Talatakajasaʼa maʼin naaʼin Jeʼwaa pümaa süka püntüin saʼakamüin nüpüshi. Shiakalaka anain maʼin ayatüle puchuntuin kaalinwaa nümüin, achuntajachi pia kaalinwaa nümüin Jeʼwaa paaʼinrajatpa wanee kasa kapüleeka, jaʼitairü mapüleein pümüin tü paaʼinrajatkat achuntajachiya neʼe pia kaalinwaa nümüin Jeʼwaa. Jülüjainjatü paaʼin tü kasa pünajüinjatkat, tü püshaitüinjatkat, tü piʼyataainjatkalü anain otta tü puʼuneekalü achiirua. Nnojo puʼwaataain suluʼu pütüjain maʼin. Shia anaka aluʼu pikirajaale sünain tü sümakat tü Wiwüliakat jee paaʼinra shia (Prov. 3:5, 6). Müle shia putuma, talateechi Jeʼwaa pümaa otta kojuteechi pia namüin na wawalayuukana. Süka waleʼeruʼuin tü kaainjalaakat eejeeria tü wotchejaakalü amaa. Sülatüle pümüin tia, nnojo pümalajaain suulia aʼyatawaa nümüin Jeʼwaa. w21.03 5 püt. 14, 15

¿Nooʼuleʼereeinche waya na wapüshikana suulia waʼyataain nümüin Jeʼwaa? ¿Kepiashiiche waya suluʼu wanee mma eere shiyoutunuin wapüleerua waʼyataain nümüin Jeʼwaa jee süpülajünüin woulia? Sülatüle tia wamüin, eesü süpüla sütütülaain waaʼin waashajeʼerüle 2 Timoteo 1:12-16 otta 4:6-11, 17-22. Nüshajüin chi aluwataaushikai Pablo tia pütchikalüirua soʼu püreesain nia. Süpülapünaa waashajeʼerüin tia wetsiikulokalüirua waküja nümüin Jeʼwaa tü alatakat wamüin jee jamüin waaʼin. Pansaa wanüiki nümüin jee wachunta nümüin Jeʼwaa süpüla wayaawatüin saaʼu pütchi akaalinjeenaka waya sünainjee tü alatakat nümüin Pablo. Aapinnatüjüiya Pablo nutuma Jeʼwaa müliainjachin nia saaʼujee nunoujain (Aluw. 21:11-13). ¿Kasa naaʼinraka Jeʼwaa süpüla nükaalinjain Pablo? Asoutushi Jeʼwaa nümüin jee akatchinnüsü naaʼin nutuma. Nüküjain Jeʼwaa nümüin Pablo saapünajatüin nümüin tü niʼyataakat maʼin achiirua. Nütütüleʼerüin Jeʼwaa naaʼin na naʼaleewainyuukana Pablo süpüla nakaalinjain nia. w21.03 17 püt. 14; 18 püt. 15, 19