Akoosütoʼu

Na aleewakana maʼin nümaa Jesuu, eʼreena kasa anasü saaʼujee naapajiraain nikii naaʼu. Naashin Jesuu aapajiraashi nia nikii saaʼujee nütünajutüirua (Juan 15:13). Na wayuu aʼyataakana nümüin Maleiwa, na anaajaakana süpülapünaa nüntüin Jesuu Mmapaʼamüin, ekirajaweena naya nüchiki süpüla alinjachin nia napüla. Aleewainjanapejeʼe naya nümaa Jesuu süpüla katüin noʼu waneepia (Juan 17:2, 3; Aluw. 24:15; Heb. 11:8-12, 24-26, 31). Talatüsü waaʼin süka waʼyanaajiraain nümaa Jesuu sünain aküjaa pütchi jee sünain ekirajaa wayuu süchiki tü Aluwatawaa eeinjatkat nutuma Maleiwa. Wanaa sümaa yaajachin nia saaʼu tü Mmakat, ekirajüshi nia wayuu süchiki tü shiimainkat nüchiki Maleiwa. Ayatsia nuʼunirüin sukuwaʼipa tia aʼyatawaakat chejee iipünaajee, jama niain Wekiipüʼüin. Jülüjasü naaʼin jee kojutusü nümüin tü waaʼinrakat süpüla wakaalinjain wayuu sünain eʼraajaa nia nümaa chi Nüshikai. Paaʼinwajiraale waya nümaa Jesuu, nükaalinjeena waya süpüla wountuin wekeraajüin tia aʼyatawaakat jee nükaalinjeena waya Jeʼwaa (Juan 15:4). w20.04 22 püt. 7, 8

«Chi aluwataai palaajeʼewaikai», münapuʼushi chi aluwataakai saaʼu wanee mma palaajee sünain Israel. «Chi aluwataai uuchijeʼewaikai», münapuʼushi chi eekai nuluwataain saaʼu wanee mma uuchijee sünain Israel (Dan. 10:14). Sümaiwa paala, nüneeküin Maleiwa na israeliitakana süpüla nupueulosein naya. Shiasaʼa soʼujee tü Pentecostés eejatkat soʼu juyakat 33, naya nüneekaka Maleiwa na nikirajüinkana Jesuu süpüla nupueulosein naya. Süpüshi tü pütchi aküjünakat suluʼu Daniel kapiitulo 11 naya saashajaaka achiki na oushikajaakana süchiirua nukuwaʼipa Kürisüto, nnojoishi nayain neʼe saashajaain achiki na israeliitakana (Aluw. 2:1-4; Roma 9:6-9; Gal. 6:15, 16). Akaataajaʼa chi aluwataai palaajeʼewaikai otta chi aluwataai uuchijeʼewaikai, eeʼiratawaishii naya. Wanaawapejeʼe naaʼin sünain aaʼinraa apünüinsü kasa. Tü palajatkat, müliasü maʼin nupueulose Jeʼwaa natuma. Tü piamakat, sünainjee tü naaʼinrakat sümüin nupueulose Maleiwa jayasü naaʼu naʼürülain nia. Otta tü apünüinkat, paʼünüüwajiraashii naya. w20.05 2 püt. 3, 4

Nuuʼulakaʼayatüin Jeʼwaa wainma kasa süpüla nikeraajüin tü keeʼireekat naaʼin. Akaʼaya nia, wainma kasa naaʼinraka süpüla nükaalinjain waya sünain aʼyatawaa nümüin otta süpüla nikeraajüin tü keeʼireekat naaʼin (Is. 64:8). Sükajee tia piamasükat kasa, nikeraajüin Jeʼwaa tü keeʼireekat naaʼin. Nnojotsü eein wanee kasa ooʼuleʼerüinjachika nia suulia nikeraajüin tia (Is. 46:10, 11). ¿Kasache waaʼinrajatka süpüla kojutuleein wamüin chi Washi iipünaajachikai? Jülüjainjatü waaʼin tü kasa naaʼinrakat otta tü naaʼinrakat wapüleerua süpüla wountuinjatüin waaʼinrüin wanee kasa. Jamüsüjaʼa jülüjale waaʼin tü kasa nukumajalakat, poneerü waaʼin tia (Sal. 8:3, 4). Otta kojuteechi maʼin nia wamüin, jülüjale waaʼin süpüshuaʼale tü kasa naaʼinrakat süpüla nükaalinjain waya sünain ekeraajaa tü keeʼireekat naaʼin. Nnojotsü eein wanee anüliee makalü aka saaʼin nünülia Jeʼwaa, süka jamüin, pansaain shia sümaa tü nukuwaʼipakat, tü kasa naaʼinrüitkat otta tü kasa naaʼinreetkat mapeena (Sal. 89:7, 8). w20.06 9 püt. 6, 7

Outusüje wayuu sümaa mürüt nnojorüle süsanalüin joutai. Miyoʼu joutai süsanatka wayuu sümaa mürüt juyawai. Süchikijee süsanalüin tü joutaikat, sujuulasü tia mapa jee outasiroʼu shia. Nnojotpejeʼe süsanalüin wayuu otta mürüt süpüshuaʼa tü joutai eekat saaʼu tü Mmakat otta nnojotsü epirajaain tü Mmakat sutuma sujuula wayuu otta mürüt. Makaʼa tia, shia süka nukumajüin Jeʼwaa tü wunuʼuliakalüirua süpüla sujuupatüin tü sujuulakat wayuu otta mürüt. Aleʼejüsü joutalin shia süchikuaʼa sutuma. Sünainjee tü sukuwaʼipakat süpüla eeinjatüin tü joutai wasanatkalü aka waaʼin, wayaawata aaʼu shikeraajüin tü sümakat tü pütchi süpülajatkat soʼukai. ¿Kasa waaʼinrajatka süpüla kojutuinjatüin wamüin tü Mmakat jee süpüshuaʼa tü kasa eekat yaa süpaʼa? Wanee sukuwaʼipa süpüla wountuin tia, shia jülüjale waaʼin tü kasa nukumajakat Jeʼwaa (Sal. 115:16). Waaʼinrüle tia, waapeerü analuʼut nümüin Jeʼwaa soʼukaiwai saaʼu süpüshuaʼa tü kasa naapakat wamüin otta wuleerü watuma tü wepiapaʼakat saaʼu kojutuin wamüin tü Mmakat. w20.05 22 püt. 5, 7

Nüchajaain Jeʼwaa sukuwaʼipa süpüla nunouteʼerüin tü kasa naainjakat Satanaa sümaa lotuin sukuwaʼipa otta anain sukuwaʼipa nutuma. Jee wainmairü kasa naaʼinraka ayaawatünaka anainjee pülain maʼin nia. Shiapejeʼe jaʼyain naaʼu aipüralin maʼin nia wayuu (1 Juan 4:8). Ayatüsia nukumajüin Jeʼwaa sukuwaʼipa süpüla sütüjaanüin aaʼu alawaain tü münakat nüchiki suluʼu tü apainkat Edén. Ayatüshia Satanaa maaʼulu sünain aküjaa alawaa nüchiki Jeʼwaa. Nüchajaain maʼin sukuwaʼipa süpüla wainmajüin saaʼin wayuu saaʼu pülain Jeʼwaa, lotuin sukuwaʼipa tü kasa naaʼinrakat, kekiin maʼin nia otta alin wayuu nüpüla. Nüchajaainya sukuwaʼipa süpüla nunoujirüin wayuu sünain nnojoluin eein Jeʼwaa. Niasaʼa chi eekai nunoujain nünain Jeʼwaa, nunoujireein nia Satanaa sünain wainmain maʼin kasa nüpülajaka Jeʼwaa nuulia otta nnojoluin lotuin sukuwaʼipa tü kasa nuluwataakalü anain. Mojulaashi maʼin Jeʼwaa naashin Satanaa sümaa naʼajüin wayuu saʼaka siki chaa shiinaluʼu tü mmakat. Chi eekai nunoujain sünain tü naʼalainkat Satanaa, eeshijaʼa niyouteechire süchiki niain Jeʼwaa laülaain naaʼu. Sümaʼinruʼu eein Satanaa, ayateechi nia aküjain alawaa nüchiki Jeʼwaa otta ayateerü nüchajaain sukuwaʼipa süpüla pükayalaain nuulia Jeʼwaa. ¿Nuunteetche naaʼinrüin tia? w20.06 5 püt. 13-15

Watta naalii na wawalayuu achajaakana sukuwaʼipa süpüla nekirajaain sünain wanee anüikii naata. Shiasaʼa sünainjee tia, eesü kapüleere namüin naküjain tü suluʼukat naaʼin. Nnojotpejeʼe shiainjatüin jülüjain maʼin waaʼin isain nachiki tia anüikiikat, shia jülüjainjatka waaʼin alin maʼin Jeʼwaa napüla otta naʼyataweein nümüin. Jülüjale waaʼin anashaatain maʼin nakuwaʼipa naya wawalayuukana, kojuteena maʼin naya wamüin. «Nnojotsü kasain paamüin tamüin», nnojoleena müin waya namüin sünainjee neʼe nnojoluin natüjain süpüleerua wanüikipala (1 Cor. 12:21). Talatüsü maʼin waaʼin süka naapüin Jeʼwaa aʼyatawaa wamüin suluʼu tü outkajaaleekat. Jaʼitashii tooloyuuin, jieyuuin, maʼwayuusein, kaʼwayuusein, tepichin, laülaayuuin, watüjale jee matüjainre waya süpüleerua wanee anüikii, kojutushii maʼin waya nümüin Jeʼwaa otta namüin na wawalayuukana (Roma 12:4, 5; Col. 3:10). Kojuta wamüin tü waʼyataainkat nümüin Jeʼwaa otta tü naʼyataainkat na wawalayuukana. w20.08 31 püt. 20-22

Aʼwaajapuʼushii maleiwayaasü na chajanakana Atenas, yarüttapuʼusü nakuwaʼipa jee nanoujapuʼu anainrü tü nekirajakalü anain na griegokana. Nnojotpejeʼe jülüjain naaʼin chi aluwataaushikai Pablo mepin nakuwaʼipa jee nnojoishii niyüülajüin naya sünainjee airuʼuluin nanüiki nümüin. Mayaainjeʼe eʼrüipuʼuin wayumüin Pablo jee müliapuʼuin nutuma na anoujashiikana, anoujashi nia mapa (1 Tim. 1:13). Maʼaka jülüjain naaʼin Jesuu nunoujeechin Pablo, jülüjasia naaʼin Pablo nuwalayuujeenain na chajanakana Atenas. Nnojotpejeʼe amülain neʼe tü naaʼinrakat Pablo (Aluw. 9:13-15). Anoujasü wayuu maʼleekalia nakalioʼu na nikirajüinkana Jesuu. Nüshajüin Pablo namüin na wayuu chajanakana Corinto, suluʼu tü mmakat Grecia, mojulaapuʼuin noʼutku naya wayuukana otta yarüttapuʼuin nakuwaʼipa. Anuu nünüiki namüin mapa: «Alaʼajaanüitpa jaainjala juulia» (1 Cor. 6:9-11). «Neeʼirateerü nakuwaʼipa jee anoujeena naya», ¿müsüche tü jülüjakat waaʼin nachiki naya wayuukana? w20.04 12 püt. 15, 16

Nnojotsü mojumaatüinjatüin nanüiki na laülaashiikana nachiki na wawalayuu jülüjakana aaʼin nnojoluin kaluʼuin kasa anasü aʼyatawaa nümüin Maleiwa. Tü naaʼinrajatkat shia nayaawatüinjatüin saaʼu jamüin makaʼa nanüiki naya wawalayuukana otta jamüin makaʼa nakuwaʼipa. Nayaawatapa saaʼu tia, natütüleʼerüinjatü naaʼin sükajee tü sümakat tü Wiwüliakat. Jamüshijaʼa Elías, aluwataanaa anainchi süpüla nuʼutunuin aaʼin sutuma Jezabel (1 Rey. 19:1-3). Saaʼin nümüin amülashi neʼe nia aʼyataain nümüin Jeʼwaa otta sutuma tia achuntushi nia outairee (1 Rey. 19:10). Nnojotsü mojuin nünüiki Jeʼwaa nüchiki Elías. Nüküjain nümüin nnojoluin nia nümüiwaʼain. Eein süpüla niʼitaain naaʼin nünain jee nüküjain nümüin wattayülüin saalii aʼyatawaa nüpüleerua. Wanaa sümaa nüküjain Elías tü alatakat nümüin, jülüjasü naaʼin Jeʼwaa tü nümakat jee kachipünaasü naaʼin tü nukuwaʼipakat jee naapaka nümüin waneirua aʼyatawaa (1 Rey. 19:11-16, 18). ¿Kasa watüjaka sünainjee tia? Wayakana wapüshuaʼa, wakaalinjainjana na aʼyataashiikana nümüin Jeʼwaa. Na aaʼinrajanakana maʼin tia, naya na laülaashiikana. Mojukuwaʼiparüle nünüiki wanee wawala sünainjee tü kasa alatakat nümüin jee nüküjale nnojoleerüin motuin naaʼin Jeʼwaa tü naainjalakat, naapajüinjatü na laülaashiikana tü nünüikikat jee süchikijee tia, naküjainjatü nümüin kojutuin maʼin nia nümüin Jeʼwaa. w20.06 21 püt. 13, 14

Niʼitaala Jeʼwaa sukuwaʼipa süpüla talatüinjatüin naaʼin wanee wayuu sümaa nüpüshi jee naʼaleewainyuu (Sal. 133:1). Anasü maʼin nakuwaʼipa na wayuu naʼaleewajaakana amaa Jesuu (Juan 15:15). Süküjain tü Wiwüliakat tü kasa anasü weʼreetkalü anale nakuwaʼipa na wayuu waʼaleewajaakana amaa (Prov. 18:24). Jee süküjainya nnojoleerüin anain wakuwaʼipa wakayalaale noulia na waneinnua (Prov. 18:1). Eeshii na waneepiakana sünain redes sociales süpüla wainmainjanain na naʼaleewainkana jee süpüla nnojoliinjanain namüiwaʼain naya. Eejüinjatpejeʼe waaʼin sünain tü kasa weʼitaakat suluʼupünaa redes sociales. Naashin na wayuu ekirajaakana süchiirua nakuwaʼipa na wayuu waneepiakana sünain redes sociales, eesüjaʼa mojeerüle naaʼin mapa. ¿Jamüsüche mojeetka naaʼin? Shia süka naashajeʼerawalin jee nanajawalin tü ayaakuaa neʼitaakat na waneinnua. Eeshii na eʼitaakana saʼanasia nayaakua, shiyaakua tü kasa naaʼinrakat, nayaakua naʼaleewainyuu otta shiyaakua tü mma eepünaale naya. Na wayuu anajakana tia, eesüjaʼa mojule naaʼin sutuma naʼwanaajireʼerüin nakuwaʼipa namaa na waneinnua. w20.07 5 püt. 12, 13

Anuu sünüiki tü Aapiria Wayuu ojuʼitakat oʼutuupüroʼu 1 soʼu 1988: «Süpüla nanoutajatüin na laülaashiikana sukuwaʼipa wanee kasa jee süpüla anainjatüin süneekia natuma wanee kasa, soteesü naaʼin eein süpüla naapüin Maleiwa chi naaʼinkai nümüin wanee laülaashi süpüla nüküjainjatüin wanee pütchi suluʼujeejatü tü Wiwüliakat (Aluw. 15:7-15). Eeshi chi naaʼinkai Maleiwa naaʼu napüshuaʼa na laülaashiikana suluʼu tü outkajaaleekat, nnojoishi waneeshin chi eekai aaʼu nia». Wanee laülaashi kojutuka amüin na laülaashiikana, nnojoishi niain palajaneein sünain asoutaa noutkajaapa na laülaashiikana. Nnojoishi nia alanaʼaleein maʼin sünain aashajawaa otta nnojotsü jülüjain naaʼin sünain shiain anain maʼin tü nümakat waneepia. Tü naaʼinrakat shia nüküjain tü jülüjakat naaʼin sümaa nnojoluin yaletayaain naaʼin. Jülüjasü naaʼin tü namakat na wane laülaashiikana. Shiapejeʼe kapülain maʼin naaʼin naashajeʼerüinjatüin wanee pütchi suluʼujee tü Wiwüliakat otta jülüjasü maʼin naaʼin nuʼunirüinjatüin nukuwaʼipa sükajee tü nümakat chi achepchiee oonookai otta kekiikai maʼin (Mat. 24:45-47). Eejeechi chi naaʼinkai Maleiwa naaʼu na laülaashiikana, aijiraale jee kojutujiraale naya wanaa sümaa noutkajaain. Nuʼunireerü nakuwaʼipa süpüla naneeküin tü kasa anasü naaʼinrajatkat (Sant. 3:17, 18). w20.08 27 püt. 5, 6

Wayuu kojutushii maʼin sümüin wayuu na nüʼünüükana Pablo. Eeshi niʼyaajünüle jee püreesale nia atumawaa. Müliasü naaʼin Pablo natuma waneinnua wayuu aleewapuʼukana nümaa, jaʼitakajeʼe natuma noʼutku na anoujashiikana, mojutusai Pablo namüin (2 Cor. 12:11; Filip. 3:18, TNM). Mayaainjeʼe müin tia, ayatüshia Pablo sünain aküjaa pütchi, nnojoishi kasakainjachin natuma na kaʼürülakana nia. Ayatüshiʼiya alin na nuwalayuukana nüpüla mayaainjeʼe naaʼinrüin kasa mojuka atuma naaʼin Pablo. Aʼyataapejeʼe waneepia Pablo nümüin Jeʼwaa outaleepa nia (2 Tim. 4:8). Watta saalii tü kasa nuuntakat naaʼinrüin Pablo süka niʼitaain naaʼin nünain Jeʼwaa, nnojotsü sükajeejatüin nütchin nümüiwaʼa. ¿Airuʼutsüche pütchi pümüin jee müliasüche paaʼin atumawaa? Tü waaʼinrajatkat shia watanaleein naaʼin na wayuukana sükajee tü sümakat tü Wiwüliakat nüchiki Jeʼwaa. Wounteerü waaʼinrüin tia waküjale pütchi namüin na wayuukana sükajee tü Wiwüliakat, kojutule naya wamüin otta kamaneere waya namüin mayaainjeʼe müliain waya natuma. Waaʼinrüinjatü tia sümüin wayuu maʼleekalia, jaʼitakajeʼe namüin na kaʼürülakana waya (Mat. 5:44; 1 Ped. 3:15-17). w20.07 17 püt. 14, 15

«Nnojotsü yaletüin naaʼin Jeʼwaa», ¿eeshiicheʼeya süpüla wamüin nüchiki Jeʼwaa? Aa, eeshii süpüla wamüin, maʼaka nümüin David (Sal. 18:35). Wanaa sümaa nüshajüin David pütchikat tia, eesüjaʼa jülüjale naaʼin tü kaʼi nüntakalü oʼu Samuel nipialuʼumüin chi nüshikai süpüla nüneeküinjachin chi aluwataainjachikai saaʼu Israel niiʼirakalü Saúl. Emüliee David naʼakajee na mekiisatshiikana nüchonnii Jesé. Mayaainjeʼe müin tia, nia nüneekaka Jeʼwaa süpüla niainjachin niiʼirakain Saúl sünain aluwatawaa (1 Sam. 16:1, 10-13). Eesüjaʼa wanaawale naaʼin David sümaa tü pütchi aküjünakat suluʼu Salmo 113, tü makat mayaa nüchiki Jeʼwaa: «Müshi nejepülaakai aaʼin Jeʼwaa süpüla niʼrüin tü alatakat chaa sirumatuʼu otta tü alatakat saaʼu tü Mmakat jee süpüla niyalerüin chi wayuu nnojoikai yaletüin aaʼin. Niyalerüin [...] chi wayuu eekai müliain niʼrüin süpüla nüikalaainjachin nutuma naʼaka na wayuu kojutukana sümüin wayuu» (Sal. 113:6-8). Wanee kasa wayaawataka anainjee nnojoluin yaletüin naaʼin Jeʼwaa, shia sünainjee tü naaʼinrakat napüleerua na aʼyataashiikana nümüin mayaainjeʼe naleʼeruʼuin tü kaainjalaakat. «Aʼyataalii tamüin» nnojoishi müin neʼe nia namüin, «taʼaleewain» müshi nia namüin (Sal. 25:14). Süpüla aleewainjanain waya nümaa Jeʼwaa, naapüin nikii chi nüchonkai süpüla outajachin nia saaʼu waainjala. ¡Anakatche maʼin tü naaʼinrakat Jeʼwaa wapüleerua!, amülialaasü naaʼin waalin. w20.08 8 püt. 1-3

Yaawasü nutuma Jeʼwaa tü kaʼi najaʼttirajatkalü oʼu tü kasakat süpüshuaʼa (Mat. 24:36). Nnojoleechi nia ashapajaajaain jee nüntiramaatüin tia kaʼikat. Mayaainjeʼe keeʼireein naaʼin Jeʼwaa nüsoʼireʼerüin naaʼin na outushiikana, nnojoishi nia ashapajaajaain süpüla naaʼinrüin tia (Job 14:14, 15). Naʼatapajüin tü kaʼi nüneekakat süpüla nüsoʼireʼerüin naaʼin na outushiikana (Juan 5:28). Talatüsü waaʼin süka nnojolin kashapajaaralin Jeʼwaa. Sutuma nnojolin kashapajaaralin nia wainma na wayuu ayaawajaakana suulia naainjala maʼaka wayaawajaain wayakana. Nücheka achikit Jeʼwaa wainmainjanain na wayuu katüinjanakana oʼu waneepia. ¿Kasakaʼa waaʼinrajatüin süka nnojolin kashapajaaralin Jeʼwaa? Wachajaainjatü nachiki na wayuu «kapülakana aaʼin nünüiki Maleiwa süpüla eeinjanain naya waneepia», wakaalinjainjana naya süpüla alinjachin Jeʼwaa napüla otta naʼyataainjanain nümüin (Aluw. 13:48, TNM). Aneerü nakuwaʼipa otta wakuwaʼipa sünainjee nnojolin kashapajaaralin Jeʼwaa. w20.08 18 püt. 17

Waaʼinrüin tü kasa suluʼukat waaʼin, maʼaka saaʼin tü keeʼireekat waaʼin, tü talatakalü atuma waaʼin otta tü jülüjakat waaʼin. Müsüjeseʼe sütanalüinjatüin naaʼin na wayuukana tü wekirajakalü anain naya. Jamüshijaʼa Jesuu, wainma tü kasa nikirajakalü anain otta anasü namüin na wayuukana tü nikirajakalü anain. Oushikajaapejeʼe naya süchiirua nukuwaʼipa Jesuu süka sütanalüin naaʼin tü nikirajakalü anain naya (Luc. 24:15, 27, 32). Aleewainjana nümaa Jeʼwaa na wekirajüinkana. «Chi Tashikai, chi Tamaleiwasekai, chi Taʼaleewainkai», müinjatü nanüiki nüchiki Jeʼwaa (Sal. 25:5). Wekirajapa sünain tü Wiwüliakat, yooto waya namaa süchiki nukuwaʼipa Jeʼwaa (Éx. 34:5, 6; 1 Ped. 5:6, 7). Jaʼitairü kasain wekirajüin anain na wekirajüinkana, yooto waya namaa süchiki nukuwaʼipa Maleiwa, wekiraja naya sünain aipüralin Jeʼwaa, kamaneein nia jee sümülialaain naaʼin saalin wayuu. Naashin Jesuu tü pütchi alanaʼaleekat maʼin saʼakajee tü nuluwataakalü anain Moisés shia alinjachin wapüla Maleiwa (Mat. 22:37, 38). Wekiraja na wekirajüinkana süpüla alinjachin maʼin Maleiwa napüla. w20.10 10 püt. 12

Kojutushii maʼin na jieyuukana nümüin Jesuu (Juan 4:27). Kapülasü maʼin naaʼin nakuwaʼipa na jieyuu aaʼinrakana tü nümakat chi Nüshikai. Nüküjain Jesuu müin naya nümüin maʼaka saaʼin nüpüshi (Mat. 12:49, 50). Aleewapuʼushi maʼin Jesuu namaa. Aleewashi maʼin nia sümaa María otta Marta, eeshiijaʼa maʼwayuusere naya jieyuukana (Luc. 10:38-42). Anasü naaʼin na jieyuukana sutuma tü naaʼinrakat otta tü nümakat Jesuu. Jamüsüjaʼa María, nnojotsü mmoluwaain saaʼin sünain aikalawaa nümülatuʼu Jesuu maʼaka naaʼinrüin shia na nikirajüinkana. Akaajaʼa Marta, nnojotsü japülin shia sünain süküjain nümüin Jesuu nnojoluin sükaalinjünüin sutuma María. Soʼu tia, wainma kasa nikirajaka anain naya Jesuu. Jaʼyasü naaʼu Jesuu alin maʼin Lázaro nüpüla otta na nushunuumuyuukana, müshijeseʼe waraitawalin nia naaʼu (Juan 12:1-3). Shiajaʼa makaʼa suchuntuin María otta Marta kaalinwaa nümüin Jesuu wanaa sümaa ayuuijaain Lázaro (Juan 11:3). w20.09 20 püt. 3; 21 püt. 6

Müshiʼiya na nikirajüinkana Jesuu «alüʼülüyaasü nükalia Maleiwa süpüla aluwatawaa» saaʼin namüin jee oʼttaainjanayaa naya noulia na romaanokana saaʼin namüin. Akaataajaʼa wayakana, keeʼireesü waaʼin nüntirüin Maleiwa tü sukuwaʼipakat aluwatawaa nutuma süpüla najaʼttirüin tü kasa mojusükat otta nüntirüinjatüin tü Mma jeketkat (2 Ped. 3:13). Nnojoliipejeʼe waya ashapajaainjanain, waʼatapajüinjatü tü kaʼi nüneekakat Jeʼwaa süpüla naaʼinrüin tia. Wanaa sümaa nukumajüin Noé tü anuwakat nnojoishi nia apüleeruaanüin aaʼin nutuma Jeʼwaa, naʼatapajüin kettaain shia nutuma jee naʼatapüin nüküjain süchiki tü pütchi anasükat (2 Ped. 2:5; 1 Ped. 3:20). Wanaa sümaa nüsakiijünüin pejeewa nutuma Abraham shiiʼiree nnojoliinjanain najaʼttirüin na kepiakana Sodoma otta Gomorra, nnojoishi nia aashichijaain nooʼomüin Abraham, naapajüin tü nümakat (Gén. 18:20-33). Kakalia na israeliitakana sünain aaʼinraa kasa mojusü noʼuluʼu Jeʼwaa, nnojoipejeʼe nia aashichijaamaatüin nooʼomüin (Neh. 9:30, 31). Müsia nukuwaʼipa Jeʼwaa maaʼulu yaa, nnojoishi nia aashichijaain nooʼomüin na mojulaashiikana, naʼatapajüin nouyantüinjanain suulia naainjala jee aleewainjanain naya nümaa (Juan 6:44; 1 Tim. 2:3, 4; 2 Ped. 3:9). Müinjanaʼaya waya maʼaka naaʼin Jeʼwaa, nnojoliinjana waya aashichijaamaatüin, ayatüinjanaʼaya waya aküjain pütchi otta ekirajüin wayuu. w20.09 10 püt. 8, 9

Süsoʼiraapa naaʼin wanee wayuu nutuma Jeʼwaa, ayateeria nutuma tü nukuwaʼipakat maʼakaajüle shia, ayateeria tü jülüjakat naaʼin. Süka alin maʼin wanee wayuu nüpüla Jeʼwaa nütüjaa aaʼu tü jülüjakat naaʼin, tü suluʼukat naaʼin, tü nümakat otta tü naaʼinrakat. Jamüshiijaʼa outule waya jee süsoʼiraale waaʼin, ayateeria maʼakaajüle tü wakuwaʼipakat nutuma Jeʼwaa. Nütüjaa aaʼulu chi aluwataaikai David niʼraajüin maʼin Jeʼwaa tü wakuwaʼipakat waneʼewai wakua (Sal. 139:1-4). ¿Jameerü waaʼin sünainjee niʼraajüin maʼin Jeʼwaa tü wakuwaʼipakat? Nnojoluinjatü shapaain waaʼin süka niʼraajüin maʼin Jeʼwaa tü wakuwaʼipakat. Soto waaʼin alin maʼin waya nüpüla, kachipünaain waya naaʼin waneʼewai wakua otta niʼrüin tü alatüitkat wamüin. Anasü waaʼin sutuma tia. Nnojoishii mmoluinjanain waya, eeshi Jeʼwaa waneepia wamaa otta nükaalinjeein waya (2 Crón. 16:9). w20.08 17 püt. 13, 14

Anasü nümüin Jeʼwaa nikirajüin waya. Nücheka achikit Jeʼwaa weʼraajüinjachin nia, alinjachin nia wapüla otta katüinjatüin woʼu süpüla kaʼikat süpüshuaʼa. Wountuin tia süka nikirajüin waya (Juan 17:3). Nikirajüin tü nupueulosekat sümaiwa paala nakajee na anoujashiikana nükalioʼu Kürisüto (Col. 1:9, 10). Nükaalinjain Jeʼwaa na anoujashiikana nükajee chi naaʼinkai maʼaka nüküjain paala shia Jesuu (Juan 14:16). Nayaawatüinjeseʼe saaʼu na anoujashiikana tü sümakat Nünüiki Maleiwa otta sotusü naaʼin tü kasa nümakat jee tü naaʼinrakat Jesuu. Müsüjeseʼe, süshajünüin süchiki tia suluʼu tü karaloʼutakat Mateo, Marcos, Lucas otta Juan. Akatchinraasü maʼin nanoula naya anoujashiikana sutuma otta akooʼomüinraasü maʼin naalin Jeʼwaa napüla, naalin Jesuu otta aijiraashii maʼin naya. Naashin Jeʼwaa sülüʼütpa süpüla sajaʼttüin kasakat süpüshuaʼa, watteena maʼin naalii na wayuu ekeroloko suluʼumüin nupueulose süpüla nikirajüinjanain naya (Is. 2:2, 3). Weʼrüin ekeraajüin tia maaʼulu. w20.10 24 püt. 14, 15

¿Kasache nnojotka naapaain anainjee wanee wayuu tü pütchi münakat nümüin? Shia sünainjee yaletüin naaʼin. Na wayuu yaletakana aaʼin, nnojotsü «kasajatüin namüin tü shiimüinkat». Shia kapülaka naaʼin tü «pütchi kemeʼeriakat maʼi, tü anakat saaʼin namüin süpüla naapajaa» (2 Tim. 4:3, 4). Chi wayuu yaletakai aaʼin, nnojotsü choʼujaain nümüin nüchiaanüin, kekiishi maʼin nia jee alanaʼaleesia nukuwaʼipa noulia na waneinnua naashin. Anuu nünüiki chi aluwataaushikai Pablo: «Nnojotsü anain müleka yaletayaale jukuaippa suʼupala wayuu. Nnojo motüin jaaʼin sünain cheʼojaain akaaliijirawaa jümüin» (Gal. 6:3). Nüküjainya chi aluwataaikai Salomón süchiki tia. Anuu nünüiki: «Jaʼitaichi maʼletsein wanee jintüi, anaʼleesia nukuwaʼipa kekiire maʼin nia nuulialeʼeya wanee aluwataai laülaa nnojoikai kacheʼein sümüin tü münakat nümüin» (Ecl. 4:13). Jülüjataa paaʼin tü naaʼinrakat Pedro soʼu nüchiaanüin suʼupala wayuu nutuma chi aluwataaushikai Pablo (Gal. 2:11-14). Jashichikuʼu müshijeʼe Pedro saalinjee nüchiaanüin suʼupala wayuu nutuma chi aluwataaushikai Pablo. Nnojotpejeʼe naaʼinrüin Pedro tia. Süka jamüin, kekiin maʼin nia jee naapaain sümaa tü nümakat Pablo nümüin. «Chi wawalakai Pablo, chi aishikai wapüla», müshi Pedro mapa nüchiki Pablo (2 Ped. 3:15). w20.11 21 püt. 9, 11, 12

¿Kasache akaalinjeenaka na wekirajüinkana süpüla sükooʼomüinraain nanoula? Noʼunule sünain tü outkajawaakat. Tü naapajakat sünain tü outkajawaakat sükaalinjeena naya süpüla nayaawatüinjatüin saaʼu tü sümakat tü Wiwüliakat, sükatchinraain nanoula otta sükooʼomüinraain naalin Maleiwa napüla (Aluw. 15:30-32). Otta müsia eein süpüla waküjain nümüin chi wekirajüinkai kapüleein wamüin waaʼinrüin wanee kasa nuluwataakalü anain Jeʼwaa wountapejeʼe waaʼinrüin tia sutuma alin nia wapüla (2 Cor. 7:1; Filip. 4:13, TNM). Neʼraajapa na wekirajüinkana waneinnua wawalayuu waneepiakana sünain aʼyatawaa nümüin Jeʼwaa, nayaawateerü saaʼu tü naaʼinrajatkat süpüla noonooin sümaa tü nuluwataakalü anain Jesuu süchiki alinjachin Maleiwa wapüla otta na waneinnua (Juan 13:35; 1 Tim. 4:12). Atüjeena na wekirajüinkana nanainjee na wawalayuu alatakana amüin tü kasa alatakat namüin. Nayaawateerü saaʼu eein süpüla nountuin noushikajaain süchiirua nukuwaʼipa Kürisüto (Deut. 30:11). Akaalinjashii waya waneʼewai wakua süpüla sükooʼomüinraainjatüin nanoula na wayuu ekirajaakana sünain tü Wiwüliakat (Mat. 5:16). w20.11 5 püt. 10-12

Eeshijaʼa eejiraale chi aluwataaushikai Pablo sümaa wüchii jashichi chaa Éfeso (2 Cor. 1:8; 4:10; 11:23). Jee shiale eejiraain amaa nia na judío ayoutakana tü nikirajakalü anain jee waneinnua wayuu makana aka saaʼin sukuwaʼipa «wüchii jashichi» (Aluw. 19:26-34; 1 Cor. 16:8, 9). Soʼunnaa sülatüin nümüin Pablo tia, jülüjasü naaʼin waneepia aneerüin nukuwaʼipa mapeena (1 Cor. 15:30, 31; 2 Cor. 4:16-18). Eʼrüshiʼiya waya müliaa maaʼulu yaa. Eeshii na wawalayuu aainjünakana amüin kasa mojusü. Eetaashii na wawalayuu kepiakana eere joouluin atkawaa. Eeshii na wawalayuu kepiakana eere süpülajünüin tü aküjaakat pütchi. Eetaashii na wawalayuu aʼyataakana nümüin Jeʼwaa mayaainjeʼe eein süpüla püreesain naya jee outuin naya sünainjee. Ayatüshiʼiya wawalayuukana naainnua naʼwaajüin Jeʼwaa. Anasü maʼin nakuwaʼipa wapüleerua. Nnojoishii naya mmoluin süka natüjaain saaʼu outule naya aapüneerü wanee kasa anasü namüin mapeena nutuma Jeʼwaa. w20.12 9 püt. 3, 4

Eeshii waküjale pütchi eere nnojoluin jimatüin na wayuukana nepialuʼu jee nnojorüle naapajeein tü pütchikat. Mojule waaʼin sutuma tia, ¿kasa waaʼinrajatka süpüla ayatüin talatüin waaʼin? Sotuinjatü waaʼin anainjatüin tü jülüjakat waaʼin süchiki tü waʼyataainkat. ¿Kasa waaʼinrüinjatka süpüla wountuin tia? Soteesü waaʼin jamüin waküjaka pütchi süchiki nünülia Maleiwa jee süchiki Nuluwataaya. Naashin Jesuu, palitchon na wayuu antakana sünain tü wopu katüinjatkalü atuma soʼu wayuu (Mat. 7:13, 14, TNM). Wanaa sümaa waküjain pütchi, aʼyataajiraashii waya nümaa Jeʼwaa, Jesuu otta na aapieekana (Mat. 28:19, 20; Alat. Map. 14:6, 7). Neenaküin Jeʼwaa suluʼumüin tü nupueulosekat na wayuu aʼyataweekana nümüin (Juan 6:44). Na wayuu nnojoliikana aapaain sümaa tü pütchikat maaʼulu yaa, eeshiijaʼa naapaajeenale sümaa mapeena waküjapa tü pütchikat namüin. Anuu sünüiki wanee wawala kanüliaka Deborah: «Eeshii süpüla najayatüin waya Satanaa soʼunnaa mojuin waaʼin». Pülaleepejeʼe Jeʼwaa nuulia Satanaa jee suulia tü kasa niʼitaakat wapüleerua. w20.12 26 püt. 18, 19; 27 püt. 21

Wainma na wawalayuu aʼyataakana waneepia süpüleerua tü kasa choʼujaakat namüin jee tü choʼujaakat sümüin napüshi. Mayaainjeʼe müin nakuwaʼipa wawalayuukana naainnua, nakaalinjain nupueulose Jeʼwaa sünain waneirua kasa eeka süpüla naaʼinrüin. Eeshii na akaalinjakana eere sukutkujaain mma jee süsetüin wüin. Eetaashii na akaalinjakana sünain akumajaa piichi eeinjachire nuʼwaajünüin Jeʼwaa. Eeshii süpüla wasülajüin süpüshi wanneetse süpüla saaʼinnajatüin tü aʼyatawaakat nümüin Jeʼwaa sainküin mmakat süpüshuaʼa. Wawalayuukana naainnua naaʼinrüin süpüshuaʼaleʼeya tia süka alin Jeʼwaa napüla jee alin na wayuukana napüla. Weeʼiyatüin naalin na wawalayuukana wapüla woʼunule sünain tü outkajawaakat jaʼitashii mapüsain waya. Wasoutule shiʼipajee tü asakinnakalü anain jaʼitashii mmoleʼein waya jee watütüleʼerüle naaʼin süpülapünaa jee süchikijee tü outkajawaakat mayaainjeʼe sülatüin kasa mojusü wamüin (Heb. 10:24, 25). Talatüsü maʼin waaʼin sutuma tü kasa naaʼinrakat na wawalayuukana wapüleerua. w21.01 10 püt. 11

Chi wayuu yaletakai aaʼin, kapüleesü nümüin anainjatüin nünüiki namüin na waneinnua, süka shiain nücheküin neʼe niainjachin kojutuin atumawaa. Niyoujireʼerüin nukuwaʼipa otta nüchajaain sukuwaʼipa süpüla anaʼleeinjatüin tü kasa naaʼinrakat noulia na waneinnua, nnojotsü niʼitaain aʼyatawaa najapuluʼu otta jeʼiyeshi nia saaʼu tü nütüjakalü apüleerua. «Aneere sukuwaʼipa wanee kasa, piainjachi aaʼinraka shia» müshi. Nüküjain tia süka nnojoleerüin anain sukuwaʼipa natuma na waneinnua naashin. Chi wayuu yaletakai aaʼin jülüjasü naaʼin niain alanaʼaleein akuwaʼipa noulia na waneinnua otta achunjasü naaʼin anale naʼyataain niʼrüin. Wayaawatüle saaʼu yaletüin wakuwaʼipa, wachunta kaalinwaa nümüin Jeʼwaa süpüla nnojoluinjatüin wanaawain tü jülüjakat waaʼin namaa naya wayuukana otta süpüla nnojoluinjatüin ichein maʼin sünain wakuwaʼipa tü yaletaakalü aaʼin (Roma 12:2). Talatüsü maʼin waaʼin sünainjee anain maʼin nukuwaʼipa Jeʼwaa (Sal. 18:35). Wayaawata aaʼu nnojoluin yaletüin naaʼin süka eein süpüla waʼyataain nümüin mayaainjeʼe wayuuin neʼe waya otta eein süpüla washatüin nukuwaʼipa. Washateein nakuwaʼipa na wayuu aʼyataapuʼukana nümüin Jeʼwaa sümaa nnojoluin yaletüin naaʼin. Nia Jeʼwaa anaka süpüla kojuta wamüin (Alat. Map. 4:11). w20.08 13 püt. 19, 20

Nia Jeʼwaa eʼitaakai sukuwaʼipa kaʼwayuuseinjachin wanee wayuu otta anashaatasü sukuwaʼipa tia nutuma. Nnojotpejeʼe lotuin nakuwaʼipa na wayuukana (1 Juan 1:8). Müsüjeseʼe süküjain tü Wiwüliakat sünain kooʼomüinjeerüin maʼin tü müliaa neʼrakat na wayuu achajaakana süchiki kaʼwayuusee. Shia nüchekaka Jeʼwaa nüpüleerua wanee wayuu kaʼwayuuseshi naapüinjatüin tü choʼujaakat sümüin nuʼwayuuse jee nüchonnii, nikirajüinjana naya süpüla aleewain naya nümaa Jeʼwaa jee nüküjainjatü namüin alin naya nüpüla (1 Tim. 5:8). Nachajaainjatpejeʼe sukuwaʼipa na jieyuu kaʼwayuuseshiikana süpüla naashajeʼerüin tü Wiwüliakat, jülüjain naaʼin tü nekirajaakalü anain otta noʼuraajüin nümüin Jeʼwaa süka süpüshuaʼa naaʼin. Jamüshiijaʼa na jieyuu wainmakana aʼyataain, choʼujaasü naaʼinrüinjatüin tia. ¿Jamüsüche choʼujaaka tia? Jama shiain nücheküin achiki Jeʼwaa aleewainjanain waya nümaa waneʼewai wakua (Aluw. 17:27). Kapüleesiaʼaya sümüin wanee wayuu jüüjüüinjatüin shia nümüin suʼwayuuse jee kojutuin nia sümüin jama nüleʼeruʼuin tü kaainjalaakat. Mapüleejeetpejeʼe sümüin saaʼinrüin tia shiyaawatüle saaʼu tü sümakat tü Wiwüliakat süchiki jamüin saaʼinrajatka tia. w21.02 8 püt. 3; 9 püt. 6, 7

Tü kasa mojusü alatakat wamüin müsü aka saaʼin wanee siki ojojunaka akajee wanee kachueera. Shiasaʼa jaʼipa maʼin tü kachueerakalü ooʼulaanüsü seemiajaain, suluʼujee tia ichereʼesia maʼin shia. Akaataajaʼa neʼe wakuwaʼipa wanaa sümaa weʼrüin müliaa achecheraʼaleesia tü wanoulakat. Anuujeseʼe tü nüshajakat Santiago: «Jüchechera jaaʼin süpüla laülaainjatüin jaaʼin sünain anoujaa jee süpüla nnojoluinjatüin kasain choʼujaain sümüin junoula» (Sant. 1:4, TNM). Weʼrüle sükatchinraain maʼin wanoula sutuma tü kasa mojusü alatakat wamüin, wachechereerü waaʼin sümaa talatüin waaʼin. Suluʼu tü karaloʼuta nüshajakat Santiago, nüshajüin süchiki waneirua kasa eeka süpüla nnojoluin talatüin atuma waaʼin. Wanee kasa eeka süpüla nnojoluin talatüin atuma waaʼin shia nnojorüle watüjaain saaʼu tü wakuwaʼipainjatkat. Soʼunnaa weʼrüin müliaa, aneesü sukuwaʼipa tü kasa waneekakat süpüla talatüin Jeʼwaa wamaa otta süpüla anainjatüin nakuwaʼipa na wawalayuukana jee süpüla waneepiainjanain waya nümaa (Jer. 10:23). Choʼujaasü kekiinjanain waya süpüla wayaawatajatüin saaʼu tü waaʼinrüinjatkat jee tü wanüikinjatkat neʼipajee na wayuu müliakana atuma waya. Mojeetpejeʼe maʼin waaʼin nnojorüle watüjaain saaʼu tü wakuwaʼipainjatkat sülatapa tia wamüin. w21.02 28 püt. 7-9

Anasü washatüle nukuwaʼipa Jeʼwaa. Aishii maʼin waya nüpüla, waneepiale waya nümaa nnojoleerü eein wanee kasa akayaleʼeraka waya nuulia (Roma 8:38, 39). Tü aküjüneekat sükajee tü pütchikat griego «alinjanain maʼin» shia wachajaainjatüin sukuwaʼipa süpüla weeʼiyatüin naalin na wayuukana wapüla. Eesüjaʼa kapüleere wamüin waaʼinrüin tia namüin waneinnua wawalayuu, waaʼinrajatpejeʼe shia. Süküjain wamüin tü Wiwüliakat tü waaʼinrajatkat aire wamüin tü nümakat wamüin wanee wawala, anuu sünüiki: «Jaaʼinra tü anasükat niʼipajee chi juwalakai eekai niʼrülüin wayumüin jümüin, saaʼu alin jia jüpüshua nüpüla chi Maleiwakai. Nnojo jüʼülüjiraain. Nnojo jütkaajiraain. Soto jaaʼin sünain eeichipain chi Naaʼinkai Maleiwa suluʼu jaaʼin, chi akaalinjüinjachikai jia süpüla wanaawajiraainjatüin jaaʼin» (Éf. 4:1-3). Nnojotsü jülüjainjatüin maʼin waaʼin tü kasa mojukat natuma na wawalayuukana, shia anaka aluʼu aire naya wapüla maʼaka alin naya nüpüla Jeʼwaa (1 Sam. 16:7; Sal. 130:3). Eesü kapüleere wamüin weeʼiyatüin naalin na wawalayuukana wapüla, shialeekajaʼa watüjaale saaʼu tü kasa mojukat natuma. Alatapuʼusü tia namüin na anoujashiikana sümaiwa paala, maʼaka sülatüin sümüin Evodia sümaa Síntique. Makalaka nümüin Pablo namüin: «Tachuntüin jümüin süpüla anajiraainjanain jia jüchikua saaʼu saʼaniraaitpain jukuaippa nümaa chi Senyotkai» (Filip. 4:2, 3). w21.01 22 püt. 10, 11

Jiakana jimaʼaliikana, kojutusü namüin na wawalayuu laülaayuuinnakana jiʼyanaajiraain nümüin Jeʼwaa wanaa namaa (Sof. 3:9). Talatüsü naaʼin neʼrüle jia sünain talatüin jaaʼin jee tütüin jia sünain jaaʼinrüin tü jiʼyataainkat nümüin Jeʼwaa. Kojutushii jia namüin otta natüjaa aaʼu aneerüin jutuma tü aʼyatawaa eʼitaanakat jüpüla. Piakai jimaʼaikai, jülüja paaʼin alin pia nüpüla Jeʼwaa jee nütüjaa aaʼu aneerüin putuma tü aʼyatawaa aapünakat pümüin. Nüküjatüjülia Jeʼwaa wainmainjanain na jimaʼalii aʼyataainjanakana nümüin maaʼutpünaa yaa süka süpüshuaʼa naaʼin (Sal. 110:1-3). Nütüjaa aaʼu alin nia püpüla otta piʼyataweein nümüin süka süpüshuaʼa paaʼin. Nnojoluinjachi kashapajaaralin pia mojukuwaʼiparüle putuma wanee kasa jee noʼtchejaale na waneinnua sümaa tü kasa naaʼinrakat. Paapaa sümaa tü aküjünakat pümüin otta jülüjaa paaʼin nümaʼanajeejatüin shia Jeʼwaa (Heb. 12:6). Anainjatü putuma tü aʼyatawaa aapünakat pümüin. Shiainjatü paaʼinmaaka talatüinjachin pümaa chi Püshi iipünaajachikai (Prov. 27:11). w21.03 7 püt. 17, 18

Wainma tü kasa eekat süpüla mojuin atuma waaʼin. Eesü mojule waaʼin sutuma tü mojukat watuma, sutuma tü kasa mojusü keejiakat wamüin, sutuma ayuulin waya, sutuma nnojoluin saapünüin wamüin wanee aʼyatawaa waʼyataweeka anain suluʼu nupueulose Jeʼwaa jee waküjale pütchi eere palirüin na wayuu achekakana tü pütchikat. Mojukuʼu sümüle waaʼin sutuma tü kasa mojukat watuma jee sutuma tü kasa mojusü keejiakat wamüin, jülüjeerü waaʼin nnojoleenain walatüin nutuma Jeʼwaa suluʼumüin tü Mma jeketkat. Jülüjale waaʼin tia, mojeerü maʼin waaʼin. Kaainjalashii waya wapüshuaʼa, niaʼala maainjalaka Jesukürisüto (Roma 3:23). Nnojotpejeʼe jülüjain naaʼin Jeʼwaa tü kasa mojusü waaʼinrakat, nütüjaa aaʼu nnojoluin lotuin tü wakuwaʼipakat. Aishii waya nüpüla otta nnojoishi nia aashichijaain wamüin. Nütüjaa aaʼu wachajaain sukuwaʼipa süpüla waaʼinrüin tü anasükat otta süpüla nnojoluin yüülain waaʼin, nükaalinjeein waya Jeʼwaa (Roma 7:17-19). w20.12 22 püt. 1-3

Maaʼulu yaa, müshii woʼunakai aaʼin suluʼupünaa wanee wopu süpüla wantüinjanain suluʼumüin tü mma jeketkat, tü nuluwataainjatkalü aaʼu Jeʼwaa. Oʼunushii waya suluʼupünaa tü wopu katüinjatkalü atuma woʼu waneepia, mouipejeʼe tia wopukot maʼaka nüküjain shia Jesuu otta kapüleesü oʼunaa suluʼupünaa (Mat. 7:13, 14). Süka waleʼeruʼuin tü kaainjalaakat, eeshii wojunujaale suulia tia wopukot (Gal. 6:1). Waneepieere waya suluʼu tü wopu mouisü katüinjatkalü atuma woʼu, wacheküinjatü süchiki wanouteʼerüin tü jülüjakat waaʼin, tü wakuwaʼipakat otta tü kasa waaʼinrakat. Naashin chi aluwataaushikai Pablo ayatüinjatü wanouteʼerüin wakuwaʼipa. Kapüleesü wamüin wanouteʼerüin tü jülüjakat waaʼin otta tü suluʼukat waaʼin. Süka jamüin, kemeeralüin maʼin tü waaʼinkat jee nnojoluin watüjaain saaʼu kaseerüin waaʼinrüin sutuma (Jer. 17:9). Eeshii süpüla wemeejünüin süka pütchi alawaa (Sant. 1:22). Müshiijeʼe wekirajaainjanain sünain tü Wiwüliakat süpüla watüjaain saaʼu anale tü waaʼinrakat. Sutuma tü Wiwüliakat, wayaawata aaʼu tü suluʼukat waaʼin jee tü jülüjakat waaʼin (Heb. 4:12, 13). w20.11 18 püt. 1-3

Talateerü maʼin waaʼin nnojorüle yaletüin waaʼin otta wayaawatüle saaʼu wakuwaʼipa. Jamüsüjaʼa wayaawatüle saaʼu eein tü kasa isakat wachiki, talateerü maʼin waaʼin wakaalinjünüle natuma na waneinnua sünain kasa eekai eein. Jülüjataa waaʼin tü alatakat wanaa sümaa niiyajüin Jesuu polooshii wayuu ajaʼtta atachii, waneeshia neʼe chi wayuu aapakai analuʼut nümüin Jesuu saaʼu anaichipain nia nutuma. Nnojoishi süpüla anainjachin nia süka naaʼin nümüiwaʼa. Nnojotsü yaletayaain naaʼin otta niyaawata aaʼu nukuwaʼipa. Müsüjeseʼe talatüin maʼin naaʼin sutuma nükaalinjünüin otta nuʼwaajüin Maleiwa saaʼujee tia (Luc. 17:11-19). Chi wayuu nnojoikai yaletüin aaʼin, anasü nukuwaʼipa namaa na waneinnua otta eeshi süpüla aleewain maʼin nia namaa. Niyaawatüin saaʼu anain maʼin nakuwaʼipa na waneinnua otta niʼitaain naaʼin nanain. Chi wayuu nnojoikai yaletüin aaʼin, niyaawata aaʼu nukuwaʼipa, talatüsü maʼin naaʼin wanaa sümaa saapünüin aʼyatawaa namüin na waneinnua, nüküjain namüin talatüin naaʼin namaa otta niiʼiyatüin nojutu nümüin. w20.08 12 püt. 17, 18